Chapter 19

dhṛtarāṣṭra uvāca |
akṣauhiṇyo daśaikāṃ ca vyūḍhāṃ dṛṣṭvā yudhiṣṭhiraḥ |
kathamalpena sainyena pratyavyūhata pāṇḍavaḥ || 1 ||
[Analyze grammar]

yo veda mānuṣaṃ vyūhaṃ daivaṃ gāndharvamāsuram |
kathaṃ bhīṣmaṃ sa kaunteyaḥ pratyavyūhata pāṇḍavaḥ || 2 ||
[Analyze grammar]

saṃjaya uvāca |
dhārtarāṣṭrāṇyanīkāni dṛṣṭvā vyūḍhāni pāṇḍavaḥ |
abhyabhāṣata dharmātmā dharmarājo dhanaṃjayam || 3 ||
[Analyze grammar]

maharṣervacanāttāta vedayanti bṛhaspateḥ |
saṃhatānyodhayedalpānkāmaṃ vistārayedbahūn || 4 ||
[Analyze grammar]

sūcīmukhamanīkaṃ syādalpānāṃ bahubhiḥ saha |
asmākaṃ ca tathā sainyamalpīyaḥ sutarāṃ paraiḥ || 5 ||
[Analyze grammar]

etadvacanamājñāya maharṣervyūha pāṇḍava |
tacchrutvā dharmarājasya pratyabhāṣata phalgunaḥ || 6 ||
[Analyze grammar]

eṣa vyūhāmi te rājanvyūhaṃ paramadurjayam |
acalaṃ nāma vajrākhyaṃ vihitaṃ vajrapāṇinā || 7 ||
[Analyze grammar]

yaḥ sa vāta ivoddhūtaḥ samare duḥsahaḥ paraiḥ |
sa naḥ puro yotsyati vai bhīmaḥ praharatāṃ varaḥ || 8 ||
[Analyze grammar]

tejāṃsi ripusainyānāṃ mṛdnanpuruṣasattamaḥ |
agre'graṇīryāsyati no yuddhopāyavicakṣaṇaḥ || 9 ||
[Analyze grammar]

yaṃ dṛṣṭvā pārthivāḥ sarve duryodhanapurogamāḥ |
nivartiṣyanti saṃbhrāntāḥ siṃhaṃ kṣudramṛgā iva || 10 ||
[Analyze grammar]

taṃ sarve saṃśrayiṣyāmaḥ prākāramakutobhayam |
bhīmaṃ praharatāṃ śreṣṭhaṃ vajrapāṇimivāmarāḥ || 11 ||
[Analyze grammar]

na hi so'sti pumāṃlloke yaḥ saṃkruddhaṃ vṛkodaram |
draṣṭumatyugrakarmāṇaṃ viṣaheta nararṣabham || 12 ||
[Analyze grammar]

bhīmaseno gadāṃ bibhradvajrasāramayīṃ dṛḍhām |
caranvegena mahatā samudramapi śoṣayet || 13 ||
[Analyze grammar]

kekayā dhṛṣṭaketuśca cekitānaśca vīryavān |
eta tiṣṭhanti sāmātyāḥ prekṣakāste nareśvara || 14 ||
[Analyze grammar]

dhṛtarāṣṭrasya dāyādā iti bībhatsurabravīt |
bruvāṇaṃ tu tathā pārthaṃ sarvasainyāni māriṣa |
apūjayaṃstadā vāgbhiranukūlābhirāhave || 15 ||
[Analyze grammar]

evamuktvā mahābāhustathā cakre dhanaṃjayaḥ |
vyūhya tāni balānyāśu prayayau phalgunastadā || 16 ||
[Analyze grammar]

saṃprayātānkurūndṛṣṭvā pāṇḍavānāṃ mahācamūḥ |
gaṅgeva pūrṇā stimitā syandamānā vyadṛśyata || 17 ||
[Analyze grammar]

bhīmaseno'graṇīsteṣāṃ dhṛṣṭadyumnaśca pārṣataḥ |
nakulaḥ sahadevaśca dhṛṣṭaketuśca vīryavān || 18 ||
[Analyze grammar]

samudyojya tataḥ paścādrājāpyakṣauhiṇīvṛtaḥ |
bhrātṛbhiḥ saha putraiśca so'bhyarakṣata pṛṣṭhataḥ || 19 ||
[Analyze grammar]

cakrarakṣau tu bhīmasya mādrīputrau mahādyutī |
draupadeyāḥ sasaubhadrāḥ pṛṣṭhagopāstarasvinaḥ || 20 ||
[Analyze grammar]

dhṛṣṭadyumnaśca pāñcālyasteṣāṃ goptā mahārathaḥ |
sahitaḥ pṛtanāśūrai rathamukhyaiḥ prabhadrakaiḥ || 21 ||
[Analyze grammar]

śikhaṇḍī tu tataḥ paścādarjunenābhirakṣitaḥ |
yatto bhīṣmavināśāya prayayau bharatarṣabha || 22 ||
[Analyze grammar]

pṛṣṭhagopo'rjunasyāpi yuyudhāno mahārathaḥ |
cakrarakṣau tu pāñcālyau yudhāmanyūttamaujasau || 23 ||
[Analyze grammar]

rājā tu madhyamānīke kuntīputro yudhiṣṭhiraḥ |
bṛhadbhiḥ kuñjarairmattaiścaladbhiracalairiva || 24 ||
[Analyze grammar]

akṣauhiṇyā ca pāñcālyo yajñaseno mahāmanāḥ |
virāṭamanvayātpaścātpāṇḍavārthe parākramī || 25 ||
[Analyze grammar]

teṣāmādityacandrābhāḥ kanakottamabhūṣaṇāḥ |
nānācihnadharā rājanratheṣvāsanmahādhvajāḥ || 26 ||
[Analyze grammar]

samutsarpya tataḥ paścāddhṛṣṭadyumno mahārathaḥ |
bhrātṛbhiḥ saha putraiśca so'bhyarakṣadyudhiṣṭhiram || 27 ||
[Analyze grammar]

tvadīyānāṃ pareṣāṃ ca ratheṣu vividhāndhvajān |
abhibhūyārjunasyaiko dhvajastasthau mahākapiḥ || 28 ||
[Analyze grammar]

pādātāstvagrato'gacchannasiśaktyṛṣṭipāṇayaḥ |
anekaśatasāhasrā bhīmasenasya rakṣiṇaḥ || 29 ||
[Analyze grammar]

vāraṇā daśasāhasrāḥ prabhinnakaraṭāmukhāḥ |
śūrā hemamayairjālairdīpyamānā ivācalāḥ || 30 ||
[Analyze grammar]

kṣaranta iva jīmūtā madārdrāḥ padmagandhinaḥ |
rājānamanvayuḥ paścāccalanta iva parvatāḥ || 31 ||
[Analyze grammar]

bhīmaseno gadāṃ bhīmāṃ prakarṣanparighopamām |
pracakarṣa mahatsainyaṃ durādharṣo mahāmanāḥ || 32 ||
[Analyze grammar]

tamarkamiva duṣprekṣyaṃ tapantaṃ raśmimālinam |
na śekuḥ sarvato yodhāḥ prativīkṣitumantike || 33 ||
[Analyze grammar]

vajro nāmaiṣa tu vyūho durbhidaḥ sarvatomukhaḥ |
cāpavidyuddhvajo ghoro gupto gāṇḍīvadhanvanā || 34 ||
[Analyze grammar]

yaṃ prativyūhya tiṣṭhanti pāṇḍavāstava vāhinīm |
ajeyo mānuṣe loke pāṇḍavairabhirakṣitaḥ || 35 ||
[Analyze grammar]

saṃdhyāṃ tiṣṭhatsu sainyeṣu sūryasyodayanaṃ prati |
prāvātsapṛṣato vāyuranabhre stanayitnumān || 36 ||
[Analyze grammar]

viṣvagvātāśca vāntyugrā nīcaiḥ śarkarakarṣiṇaḥ |
rajaścoddhūyamānaṃ tu tamasācchādayajjagat || 37 ||
[Analyze grammar]

papāta mahatī colkā prāṅmukhī bharatarṣabha |
udyantaṃ sūryamāhatya vyaśīryata mahāsvanā || 38 ||
[Analyze grammar]

atha sajjīyamāneṣu sainyeṣu bharatarṣabha |
niṣprabho'bhyudiyātsūryaḥ saghoṣo bhūścacāla ha |
vyaśīryata sanādā ca tadā bharatasattama || 39 ||
[Analyze grammar]

nirghātā bahavo rājandikṣu sarvāsu cābhavan |
prādurāsīdrajastīvraṃ na prājñāyata kiṃcana || 40 ||
[Analyze grammar]

dhvajānāṃ dhūyamānānāṃ sahasā mātariśvanā |
kiṅkiṇījālanaddhānāṃ kāñcanasragvatāṃ ravaiḥ || 41 ||
[Analyze grammar]

mahatāṃ sapatākānāmādityasamatejasām |
sarvaṃ jhaṇajhaṇībhūtamāsīttālavaneṣviva || 42 ||
[Analyze grammar]

evaṃ te puruṣavyāghrāḥ pāṇḍavā yuddhanandinaḥ |
vyavasthitāḥ prativyūhya tava putrasya vāhinīm || 43 ||
[Analyze grammar]

sraṃsanta iva majjāno yodhānāṃ bharatarṣabha |
dṛṣṭvāgrato bhīmasenaṃ gadāpāṇimavasthitam || 44 ||
[Analyze grammar]