Chapter 12

dhṛtarāṣṭra uvāca |
jambūkhaṇḍastvayā prokto yathāvadiha saṃjaya |
viṣkambhamasya prabrūhi parimāṇaṃ ca tattvataḥ || 1 ||
[Analyze grammar]

samudrasya pramāṇaṃ ca samyagacchidradarśana |
śākadvīpaṃ ca me brūhi kuśadvīpaṃ ca saṃjaya || 2 ||
[Analyze grammar]

śālmalaṃ caiva tattvena krauñcadvīpaṃ tathaiva ca |
brūhi gāvalgaṇe sarvaṃ rāhoḥ somārkayostathā || 3 ||
[Analyze grammar]

saṃjaya uvāca |
rājansubahavo dvīpā yairidaṃ saṃtataṃ jagat |
sapta tvahaṃ pravakṣyāmi candrādityau grahāṃstathā || 4 ||
[Analyze grammar]

aṣṭādaśa sahasrāṇi yojanānāṃ viśāṃ pate |
ṣaṭśatāni ca pūrṇāni viṣkambho jambuparvataḥ || 5 ||
[Analyze grammar]

lāvaṇasya samudrasya viṣkambho dviguṇaḥ smṛtaḥ |
nānājanapadākīrṇo maṇividrumacitritaḥ || 6 ||
[Analyze grammar]

naikadhātuvicitraiśca parvatairupaśobhitaḥ |
siddhacāraṇasaṃkīrṇaḥ sāgaraḥ parimaṇḍalaḥ || 7 ||
[Analyze grammar]

śākadvīpaṃ ca vakṣyāmi yathāvadiha pārthiva |
śṛṇu me tvaṃ yathānyāyaṃ bruvataḥ kurunandana || 8 ||
[Analyze grammar]

jambūdvīpapramāṇena dviguṇaḥ sa narādhipa |
viṣkambheṇa mahārāja sāgaro'pi vibhāgaśaḥ |
kṣīrodo bharataśreṣṭha yena saṃparivāritaḥ || 9 ||
[Analyze grammar]

tatra puṇyā janapadā na tatra mriyate janaḥ |
kuta eva hi durbhikṣaṃ kṣamātejoyutā hi te || 10 ||
[Analyze grammar]

śākadvīpasya saṃkṣepo yathāvadbharatarṣabha |
ukta eṣa mahārāja kimanyacchrotumicchasi || 11 ||
[Analyze grammar]

dhṛtarāṣṭra uvāca |
śākadvīpasya saṃkṣepo yathāvadiha saṃjaya |
uktastvayā mahābhāga vistaraṃ brūhi tattvataḥ || 12 ||
[Analyze grammar]

saṃjaya uvāca |
tathaiva parvatā rājansaptātra maṇibhūṣitāḥ |
ratnākarāstathā nadyasteṣāṃ nāmāni me śṛṇu |
atīvaguṇavatsarvaṃ tatra puṇyaṃ janādhipa || 13 ||
[Analyze grammar]

devarṣigandharvayutaḥ paramo merurucyate |
prāgāyato mahārāja malayo nāma parvataḥ |
yato meghāḥ pravartante prabhavanti ca sarvaśaḥ || 14 ||
[Analyze grammar]

tataḥ pareṇa kauravya jaladhāro mahāgiriḥ |
yatra nityamupādatte vāsavaḥ paramaṃ jalam |
yato varṣaṃ prabhavati varṣākāle janeśvara || 15 ||
[Analyze grammar]

uccairgirī raivatako yatra nityaṃ pratiṣṭhitaḥ |
revatī divi nakṣatraṃ pitāmahakṛto vidhiḥ || 16 ||
[Analyze grammar]

uttareṇa tu rājendra śyāmo nāma mahāgiriḥ |
yataḥ śyāmatvamāpannāḥ prajā janapadeśvara || 17 ||
[Analyze grammar]

dhṛtarāṣṭra uvāca |
sumahānsaṃśayo me'dya proktaṃ saṃjaya yattvayā |
prajāḥ kathaṃ sūtaputra saṃprāptāḥ śyāmatāmiha || 18 ||
[Analyze grammar]

saṃjaya uvāca |
sarveṣveva mahāprājña dvīpeṣu kurunandana |
gauraḥ kṛṣṇaśca varṇau dvau tayorvarṇāntaraṃ nṛpa || 19 ||
[Analyze grammar]

śyāmo yasmātpravṛtto vai tatte vakṣyāmi bhārata |
āste'tra bhagavānkṛṣṇastatkāntyā śyāmatāṃ gataḥ || 20 ||
[Analyze grammar]

tataḥ paraṃ kauravendra durgaśailo mahodayaḥ |
kesarī kesarayuto yato vātaḥ pravāyati || 21 ||
[Analyze grammar]

teṣāṃ yojanaviṣkambho dviguṇaḥ pravibhāgaśaḥ |
varṣāṇi teṣu kauravya saṃproktāni manīṣibhiḥ || 22 ||
[Analyze grammar]

mahāmerurmahākāśo jaladaḥ kumudottaraḥ |
jaladhārātparo rājansukumāra iti smṛtaḥ || 23 ||
[Analyze grammar]

raivatasya tu kaumāraḥ śyāmasya tu maṇīcakaḥ |
kesarasyātha modākī pareṇa tu mahāpumān || 24 ||
[Analyze grammar]

parivārya tu kauravya dairghyaṃ hrasvatvameva ca |
jambūdvīpena vikhyātastasya madhye mahādrumaḥ || 25 ||
[Analyze grammar]

śāko nāma mahārāja tasya dvīpasya madhyagaḥ |
tatra puṇyā janapadāḥ pūjyate tatra śaṃkaraḥ || 26 ||
[Analyze grammar]

tatra gacchanti siddhāśca cāraṇā daivatāni ca |
dhārmikāśca prajā rājaṃścatvāro'tīva bhārata || 27 ||
[Analyze grammar]

varṇāḥ svakarmaniratā na ca steno'tra dṛśyate |
dīrghāyuṣo mahārāja jarāmṛtyuvivarjitāḥ || 28 ||
[Analyze grammar]

prajāstatra vivardhante varṣāsviva samudragāḥ |
nadyaḥ puṇyajalāstatra gaṅgā ca bahudhāgatiḥ || 29 ||
[Analyze grammar]

sukumārī kumārī ca sītā kāverakā tathā |
mahānadī ca kauravya tathā maṇijalā nadī |
ikṣuvardhanikā caiva tathā bharatasattama || 30 ||
[Analyze grammar]

tataḥ pravṛttāḥ puṇyodā nadyaḥ kurukulodvaha |
sahasrāṇāṃ śatānyeva yato varṣati vāsavaḥ || 31 ||
[Analyze grammar]

na tāsāṃ nāmadheyāni parimāṇaṃ tathaiva ca |
śakyate parisaṃkhyātuṃ puṇyāstā hi saridvarāḥ || 32 ||
[Analyze grammar]

tatra puṇyā janapadāścatvāro lokasaṃmatāḥ |
magāśca maśakāścaiva mānasā mandagāstathā || 33 ||
[Analyze grammar]

magā brāhmaṇabhūyiṣṭhāḥ svakarmaniratā nṛpa |
maśakeṣu tu rājanyā dhārmikāḥ sarvakāmadāḥ || 34 ||
[Analyze grammar]

mānaseṣu mahārāja vaiśyāḥ karmopajīvinaḥ |
sarvakāmasamāyuktāḥ śūrā dharmārthaniścitāḥ |
śūdrāstu mandage nityaṃ puruṣā dharmaśīlinaḥ || 35 ||
[Analyze grammar]

na tatra rājā rājendra na daṇḍo na ca daṇḍikāḥ |
svadharmeṇaiva dharmaṃ ca te rakṣanti parasparam || 36 ||
[Analyze grammar]

etāvadeva śakyaṃ tu tasmindvīpe prabhāṣitum |
etāvadeva śrotavyaṃ śākadvīpe mahaujasi || 37 ||
[Analyze grammar]