Chapter 7

dhṛtarāṣṭra uvāca |
ukto dvīpasya saṃkṣepo vistaraṃ brūhi saṃjaya |
yāvadbhūmyavakāśo'yaṃ dṛśyate śaśalakṣaṇe |
tasya pramāṇaṃ prabrūhi tato vakṣyasi pippalam || 1 ||
[Analyze grammar]

vaiśaṃpāyana uvāca |
evamuktaḥ sa rājñā tu saṃjayo vākyamabravīt |
prāgāyatā mahārāja ṣaḍete ratnaparvatāḥ |
avagāḍhā hyubhayataḥ samudrau pūrvapaścimau || 2 ||
[Analyze grammar]

himavānhemakūṭaśca niṣadhaśca nagottamaḥ |
nīlaśca vaiḍūryamayaḥ śvetaśca rajataprabhaḥ |
sarvadhātuvinaddhaśca śṛṅgavānnāma parvataḥ || 3 ||
[Analyze grammar]

ete vai parvatā rājansiddhacāraṇasevitāḥ |
teṣāmantaraviṣkambho yojanāni sahasraśaḥ || 4 ||
[Analyze grammar]

tatra puṇyā janapadāstāni varṣāṇi bhārata |
vasanti teṣu sattvāni nānājātīni sarvaśaḥ || 5 ||
[Analyze grammar]

idaṃ tu bhārataṃ varṣaṃ tato haimavataṃ param |
hemakūṭātparaṃ caiva harivarṣaṃ pracakṣate || 6 ||
[Analyze grammar]

dakṣiṇena tu nīlasya niṣadhasyottareṇa ca |
prāgāyato mahārāja mālyavānnāma parvataḥ || 7 ||
[Analyze grammar]

tataḥ paraṃ mālyavataḥ parvato gandhamādanaḥ |
parimaṇḍalastayormadhye meruḥ kanakaparvataḥ || 8 ||
[Analyze grammar]

ādityataruṇābhāso vidhūma iva pāvakaḥ |
yojanānāṃ sahasrāṇi ṣoḍaśādhaḥ kila smṛtaḥ || 9 ||
[Analyze grammar]

uccaiśca caturāśītiryojanānāṃ mahīpate |
ūrdhvamantaśca tiryakca lokānāvṛtya tiṣṭhati || 10 ||
[Analyze grammar]

tasya pārśve tvime dvīpāścatvāraḥ saṃsthitāḥ prabho |
bhadrāśvaḥ ketumālaśca jambūdvīpaśca bhārata |
uttarāścaiva kuravaḥ kṛtapuṇyapratiśrayāḥ || 11 ||
[Analyze grammar]

vihagaḥ sumukho yatra suparṇasyātmajaḥ kila |
sa vai vicintayāmāsa sauvarṇānprekṣya vāyasān || 12 ||
[Analyze grammar]

meruruttamamadhyānāmadhamānāṃ ca pakṣiṇām |
aviśeṣakaro yasmāttasmādenaṃ tyajāmyaham || 13 ||
[Analyze grammar]

tamādityo'nuparyeti satataṃ jyotiṣāṃ patiḥ |
candramāśca sanakṣatro vāyuścaiva pradakṣiṇam || 14 ||
[Analyze grammar]

sa parvato mahārāja divyapuṣpaphalānvitaḥ |
bhavanairāvṛtaḥ sarvairjāmbūnadamayaiḥ śubhaiḥ || 15 ||
[Analyze grammar]

tatra devagaṇā rājangandharvāsurarākṣasāḥ |
apsarogaṇasaṃyuktāḥ śaile krīḍanti nityaśaḥ || 16 ||
[Analyze grammar]

tatra brahmā ca rudraśca śakraścāpi sureśvaraḥ |
sametya vividhairyajñairyajante'nekadakṣiṇaiḥ || 17 ||
[Analyze grammar]

tumbururnāradaścaiva viśvāvasurhahā huhūḥ |
abhigamyāmaraśreṣṭhāḥ stavai stunvanti cābhibho || 18 ||
[Analyze grammar]

saptarṣayo mahātmānaḥ kaśyapaśca prajāpatiḥ |
tatra gacchanti bhadraṃ te sadā parvaṇi parvaṇi || 19 ||
[Analyze grammar]

tasyaiva mūrdhanyuśanāḥ kāvyo daityairmahīpate |
tasya hīmāni ratnāni tasyeme ratnaparvatāḥ || 20 ||
[Analyze grammar]

tasmātkubero bhagavāṃścaturthaṃ bhāgamaśnute |
tataḥ kalāṃśaṃ vittasya manuṣyebhyaḥ prayacchati || 21 ||
[Analyze grammar]

pārśve tasyottare divyaṃ sarvartukusumaṃ śivam |
karṇikāravanaṃ ramyaṃ śilājālasamudgatam || 22 ||
[Analyze grammar]

tatra sākṣātpaśupatirdivyairbhūtaiḥ samāvṛtaḥ |
umāsahāyo bhagavānramate bhūtabhāvanaḥ || 23 ||
[Analyze grammar]

karṇikāramayīṃ mālāṃ bibhratpādāvalambinīm |
tribhirnetraiḥ kṛtoddyotastribhiḥ sūryairivoditaiḥ || 24 ||
[Analyze grammar]

tamugratapasaḥ siddhāḥ suvratāḥ satyavādinaḥ |
paśyanti na hi durvṛttaiḥ śakyo draṣṭuṃ maheśvaraḥ || 25 ||
[Analyze grammar]

tasya śailasya śikharātkṣīradhārā nareśvara |
triṃśadbāhuparigrāhyā bhīmanirghātanisvanā || 26 ||
[Analyze grammar]

puṇyā puṇyatamairjuṣṭā gaṅgā bhāgīrathī śubhā |
patatyajasravegena hrade cāndramase śubhe |
tayā hyutpāditaḥ puṇyaḥ sa hradaḥ sāgaropamaḥ || 27 ||
[Analyze grammar]

tāṃ dhārayāmāsa purā durdharāṃ parvatairapi |
śataṃ varṣasahasrāṇāṃ śirasā vai maheśvaraḥ || 28 ||
[Analyze grammar]

merostu paścime pārśve ketumālo mahīpate |
jambūṣaṇḍaśca tatraiva sumahānnandanopamaḥ || 29 ||
[Analyze grammar]

āyurdaśa sahasrāṇi varṣāṇāṃ tatra bhārata |
suvarṇavarṇāśca narāḥ striyaścāpsarasopamāḥ || 30 ||
[Analyze grammar]

anāmayā vītaśokā nityaṃ muditamānasāḥ |
jāyante mānavāstatra niṣṭaptakanakaprabhāḥ || 31 ||
[Analyze grammar]

gandhamādanaśṛṅgeṣu kuberaḥ saha rākṣasaiḥ |
saṃvṛto'psarasāṃ saṃghairmodate guhyakādhipaḥ || 32 ||
[Analyze grammar]

gandhamādanapādeṣu pareṣvaparagaṇḍikāḥ |
ekādaśa sahasrāṇi varṣāṇāṃ paramāyuṣaḥ || 33 ||
[Analyze grammar]

tatra kṛṣṇā narā rājaṃstejoyuktā mahābalāḥ |
striyaścotpalapatrābhāḥ sarvāḥ supriyadarśanāḥ || 34 ||
[Analyze grammar]

nīlātparataraṃ śvetaṃ śvetāddhairaṇyakaṃ param |
varṣamairāvataṃ nāma tataḥ śṛṅgavataḥ param || 35 ||
[Analyze grammar]

dhanuḥsaṃsthe mahārāja dve varṣe dakṣiṇottare |
ilāvṛtaṃ madhyamaṃ tu pañca varṣāṇi caiva ha || 36 ||
[Analyze grammar]

uttarottarametebhyo varṣamudricyate guṇaiḥ |
āyuṣpramāṇamārogyaṃ dharmataḥ kāmato'rthataḥ || 37 ||
[Analyze grammar]

samanvitāni bhūtāni teṣu varṣeṣu bhārata |
evameṣā mahārāja parvataiḥ pṛthivī citā || 38 ||
[Analyze grammar]

hemakūṭastu sumahānkailāso nāma parvataḥ |
yatra vaiśravaṇo rājā guhyakaiḥ saha modate || 39 ||
[Analyze grammar]

astyuttareṇa kailāsaṃ mainākaṃ parvataṃ prati |
hiraṇyaśṛṅgaḥ sumahāndivyo maṇimayo giriḥ || 40 ||
[Analyze grammar]

tasya pārśve mahaddivyaṃ śubhaṃ kāñcanavālukam |
ramyaṃ bindusaro nāma yatra rājā bhagīrathaḥ |
dṛṣṭvā bhāgīrathīṃ gaṅgāmuvāsa bahulāḥ samāḥ || 41 ||
[Analyze grammar]

yūpā maṇimayāstatra cityāścāpi hiraṇmayāḥ |
tatreṣṭvā tu gataḥ siddhiṃ sahasrākṣo mahāyaśāḥ || 42 ||
[Analyze grammar]

sṛṣṭvā bhūtapatiryatra sarvalokānsanātanaḥ |
upāsyate tigmatejā vṛto bhūtaiḥ samāgataiḥ |
naranārāyaṇau brahmā manuḥ sthāṇuśca pañcamaḥ || 43 ||
[Analyze grammar]

tatra tripathagā devī prathamaṃ tu pratiṣṭhitā |
brahmalokādapakrāntā saptadhā pratipadyate || 44 ||
[Analyze grammar]

vasvokasārā nalinī pāvanā ca sarasvatī |
jambūnadī ca sītā ca gaṅgā sindhuśca saptamī || 45 ||
[Analyze grammar]

acintyā divyasaṃkalpā prabhoreṣaiva saṃvidhiḥ |
upāsate yatra satraṃ sahasrayugaparyaye || 46 ||
[Analyze grammar]

dṛśyādṛśyā ca bhavati tatra tatra sarasvatī |
etā divyāḥ sapta gaṅgāstriṣu lokeṣu viśrutāḥ || 47 ||
[Analyze grammar]

rakṣāṃsi vai himavati hemakūṭe tu guhyakāḥ |
sarpā nāgāśca niṣadhe gokarṇe ca tapodhanāḥ || 48 ||
[Analyze grammar]

devāsurāṇāṃ ca gṛhaṃ śvetaḥ parvata ucyate |
gandharvā niṣadhe śaile nīle brahmarṣayo nṛpa |
śṛṅgavāṃstu mahārāja pitṝṇāṃ pratisaṃcaraḥ || 49 ||
[Analyze grammar]

ityetāni mahārāja sapta varṣāṇi bhāgaśaḥ |
bhūtānyupaniviṣṭāni gatimanti dhruvāṇi ca || 50 ||
[Analyze grammar]

teṣāmṛddhirbahuvidhā dṛśyate daivamānuṣī |
aśakyā parisaṃkhyātuṃ śraddheyā tu bubhūṣatā || 51 ||
[Analyze grammar]

yāṃ tu pṛcchasi mā rājandivyāmetāṃ śaśākṛtim |
pārśve śaśasya dve varṣe ubhaye dakṣiṇottare |
karṇau tu nāgadvīpaṃ ca kaśyapadvīpameva ca || 52 ||
[Analyze grammar]

tāmravarṇaḥ śiro rājañśrīmānmalayaparvataḥ |
etaddvitīyaṃ dvīpasya dṛśyate śaśasaṃsthitam || 53 ||
[Analyze grammar]