Chapter 3

vyāsa uvāca |
kharā goṣu prajāyante ramante mātṛbhiḥ sutāḥ |
anārtavaṃ puṣpaphalaṃ darśayanti vane drumāḥ || 1 ||
[Analyze grammar]

garbhiṇyo rājaputryaśca janayanti vibhīṣaṇān |
kravyādānpakṣiṇaścaiva gomāyūnaparānmṛgān || 2 ||
[Analyze grammar]

triviṣāṇāścaturnetrāḥ pañcapādā dvimehanāḥ |
dviśīrṣāśca dvipucchāśca daṃṣṭriṇaḥ paśavo'śivāḥ || 3 ||
[Analyze grammar]

jāyante vivṛtāsyāśca vyāharanto'śivā giraḥ |
tripadāḥ śikhinastārkṣyāścaturdaṃṣṭrā viṣāṇinaḥ || 4 ||
[Analyze grammar]

tathaivānyāśca dṛśyante striyaśca brahmavādinām |
vainateyānmayūrāṃśca janayantyaḥ pure tava || 5 ||
[Analyze grammar]

govatsaṃ vaḍavā sūte śvā sṛgālaṃ mahīpate |
krakarāñśārikāścaiva śukāṃścāśubhavādinaḥ || 6 ||
[Analyze grammar]

striyaḥ kāścitprajāyante catasraḥ pañca kanyakāḥ |
tā jātamātrā nṛtyanti gāyanti ca hasanti ca || 7 ||
[Analyze grammar]

pṛthagjanasya kuḍakāḥ stanapāḥ stenaveśmani |
nṛtyanti parigāyanti vedayanto mahadbhayam || 8 ||
[Analyze grammar]

pratimāścālikhantyanye saśastrāḥ kālacoditāḥ |
anyonyamabhidhāvanti śiśavo daṇḍapāṇayaḥ |
uparundhanti kṛtvā ca nagarāṇi yuyutsavaḥ || 9 ||
[Analyze grammar]

padmotpalāni vṛkṣeṣu jāyante kumudāni ca |
viṣvagvātāśca vāntyugrā rajo na vyupaśāmyati || 10 ||
[Analyze grammar]

abhīkṣṇaṃ kampate bhūmirarkaṃ rāhustathāgrasat |
śveto grahastathā citrāṃ samatikramya tiṣṭhati || 11 ||
[Analyze grammar]

abhāvaṃ hi viśeṣeṇa kurūṇāṃ pratipaśyati |
dhūmaketurmahāghoraḥ puṣyamākramya tiṣṭhati || 12 ||
[Analyze grammar]

senayoraśivaṃ ghoraṃ kariṣyati mahāgrahaḥ |
maghāsvaṅgārako vakraḥ śravaṇe ca bṛhaspatiḥ || 13 ||
[Analyze grammar]

bhāgyaṃ nakṣatramākramya sūryaputreṇa pīḍyate |
śukraḥ proṣṭhapade pūrve samāruhya viśāṃ pate |
uttare tu parikramya sahitaḥ pratyudīkṣate || 14 ||
[Analyze grammar]

śyāmo grahaḥ prajvalitaḥ sadhūmaḥ sahapāvakaḥ |
aindraṃ tejasvi nakṣatraṃ jyeṣṭhāmākramya tiṣṭhati || 15 ||
[Analyze grammar]

dhruvaḥ prajvalito ghoramapasavyaṃ pravartate |
citrāsvātyantare caiva dhiṣṭhitaḥ paruṣo grahaḥ || 16 ||
[Analyze grammar]

vakrānuvakraṃ kṛtvā ca śravaṇe pāvakaprabhaḥ |
brahmarāśiṃ samāvṛtya lohitāṅgo vyavasthitaḥ || 17 ||
[Analyze grammar]

sarvasasyapraticchannā pṛthivī phalamālinī |
pañcaśīrṣā yavāścaiva śataśīrṣāśca śālayaḥ || 18 ||
[Analyze grammar]

pradhānāḥ sarvalokasya yāsvāyattamidaṃ jagat |
tā gāvaḥ prasnutā vatsaiḥ śoṇitaṃ prakṣarantyuta || 19 ||
[Analyze grammar]

niścerurapidhānebhyaḥ khaḍgāḥ prajvalitā bhṛśam |
vyaktaṃ paśyanti śastrāṇi saṃgrāmaṃ samupasthitam || 20 ||
[Analyze grammar]

agnivarṇā yathā bhāsaḥ śastrāṇāmudakasya ca |
kavacānāṃ dhvajānāṃ ca bhaviṣyati mahānkṣayaḥ || 21 ||
[Analyze grammar]

dikṣu prajvalitāsyāśca vyāharanti mṛgadvijāḥ |
atyāhitaṃ darśayanto vedayanti mahadbhayam || 22 ||
[Analyze grammar]

ekapakṣākṣicaraṇaḥ śakuniḥ khacaro niśi |
raudraṃ vadati saṃrabdhaḥ śoṇitaṃ chardayanmuhuḥ || 23 ||
[Analyze grammar]

grahau tāmrāruṇaśikhau prajvalantāviva sthitau |
saptarṣīṇāmudārāṇāṃ samavacchādya vai prabhām || 24 ||
[Analyze grammar]

saṃvatsarasthāyinau ca grahau prajvalitāvubhau |
viśākhayoḥ samīpasthau bṛhaspatiśanaiścarau || 25 ||
[Analyze grammar]

kṛttikāsu grahastīvro nakṣatre prathame jvalan |
vapūṃṣyapaharanbhāsā dhūmaketuriva sthitaḥ || 26 ||
[Analyze grammar]

triṣu pūrveṣu sarveṣu nakṣatreṣu viśāṃ pate |
budhaḥ saṃpatate'bhīkṣṇaṃ janayansumahadbhayam || 27 ||
[Analyze grammar]

caturdaśīṃ pañcadaśīṃ bhūtapūrvāṃ ca ṣoḍaśīm |
imāṃ tu nābhijānāmi amāvāsyāṃ trayodaśīm || 28 ||
[Analyze grammar]

candrasūryāvubhau grastāvekamāse trayodaśīm |
aparvaṇi grahāvetau prajāḥ saṃkṣapayiṣyataḥ || 29 ||
[Analyze grammar]

rajovṛtā diśaḥ sarvāḥ pāṃsuvarṣaiḥ samantataḥ |
utpātameghā raudrāśca rātrau varṣanti śoṇitam || 30 ||
[Analyze grammar]

māṃsavarṣaṃ punastīvramāsītkṛṣṇacaturdaśīm |
ardharātre mahāghoramatṛpyaṃstatra rākṣasāḥ || 31 ||
[Analyze grammar]

pratisroto'vahannadyaḥ saritaḥ śoṇitodakāḥ |
phenāyamānāḥ kūpāśca nardanti vṛṣabhā iva |
patantyulkāḥ sanirghātāḥ śuṣkāśanivimiśritāḥ || 32 ||
[Analyze grammar]

adya caiva niśāṃ vyuṣṭāmudaye bhānurāhataḥ |
jvalantībhirmaholkābhiścaturbhiḥ sarvatodiśam || 33 ||
[Analyze grammar]

ādityamupatiṣṭhadbhistatra coktaṃ maharṣibhiḥ |
bhūmipālasahasrāṇāṃ bhūmiḥ pāsyati śoṇitam || 34 ||
[Analyze grammar]

kailāsamandarābhyāṃ tu tathā himavato gireḥ |
sahasraśo mahāśabdaṃ śikharāṇi patanti ca || 35 ||
[Analyze grammar]

mahābhūtā bhūmikampe caturaḥ sāgarānpṛthak |
velāmudvartayanti sma kṣobhayantaḥ punaḥ punaḥ || 36 ||
[Analyze grammar]

vṛkṣānunmathya vāntyugrā vātāḥ śarkarakarṣiṇaḥ |
patanti caityavṛkṣāśca grāmeṣu nagareṣu ca || 37 ||
[Analyze grammar]

pītalohitanīlaśca jvalatyagnirhuto dvijaiḥ |
vāmārciḥ śāvagandhī ca dhūmaprāyaḥ kharasvanaḥ |
sparśā gandhā rasāścaiva viparītā mahīpate || 38 ||
[Analyze grammar]

dhūmāyante dhvajā rājñāṃ kampamānā muhurmuhuḥ |
muñcantyaṅgāravarṣāṇi bheryo'tha paṭahāstathā || 39 ||
[Analyze grammar]

prāsādaśikharāgreṣu puradvāreṣu caiva hi |
gṛdhrāḥ paripatantyugrā vāmaṃ maṇḍalamāśritāḥ || 40 ||
[Analyze grammar]

pakvāpakveti subhṛśaṃ vāvāśyante vayāṃsi ca |
nilīyante dhvajāgreṣu kṣayāya pṛthivīkṣitām || 41 ||
[Analyze grammar]

dhyāyantaḥ prakirantaśca vālānvepathusaṃyutāḥ |
rudanti dīnāsturagā mātaṅgāśca sahasraśaḥ || 42 ||
[Analyze grammar]

etacchrutvā bhavānatra prāptakālaṃ vyavasyatām |
yathā lokaḥ samucchedaṃ nāyaṃ gaccheta bhārata || 43 ||
[Analyze grammar]

vaiśaṃpāyana uvāca |
piturvaco niśamyaitaddhṛtarāṣṭro'bravīdidam |
diṣṭametatpurā manye bhaviṣyati na saṃśayaḥ || 44 ||
[Analyze grammar]

kṣatriyāḥ kṣatradharmeṇa vadhyante yadi saṃyuge |
vīralokaṃ samāsādya sukhaṃ prāpsyanti kevalam || 45 ||
[Analyze grammar]

iha kīrtiṃ pare loke dīrghakālaṃ mahatsukham |
prāpsyanti puruṣavyāghrāḥ prāṇāṃstyaktvā mahāhave || 46 ||
[Analyze grammar]