Chapter 187

rāma uvāca |
pratyakṣametallokānāṃ sarveṣāmeva bhāmini |
yathā mayā paraṃ śaktyā kṛtaṃ vai pauruṣaṃ mahat || 1 ||
[Analyze grammar]

na caiva yudhi śaknomi bhīṣmaṃ śastrabhṛtāṃ varam |
viśeṣayitumatyarthamuttamāstrāṇi darśayan || 2 ||
[Analyze grammar]

eṣā me paramā śaktiretanme paramaṃ balam |
yatheṣṭaṃ gamyatāṃ bhadre kimanyadvā karomi te || 3 ||
[Analyze grammar]

bhīṣmameva prapadyasva na te'nyā vidyate gatiḥ |
nirjito hyasmi bhīṣmeṇa mahāstrāṇi pramuñcatā || 4 ||
[Analyze grammar]

bhīṣma uvāca |
evamuktvā tato rāmo viniḥśvasya mahāmanāḥ |
tūṣṇīmāsīttadā kanyā provāca bhṛgunandanam || 5 ||
[Analyze grammar]

bhagavannevamevaitadyathāha bhagavāṃstathā |
ajeyo yudhi bhīṣmo'yamapi devairudāradhīḥ || 6 ||
[Analyze grammar]

yathāśakti yathotsāhaṃ mama kāryaṃ kṛtaṃ tvayā |
anidhāya raṇe vīryamastrāṇi vividhāni ca || 7 ||
[Analyze grammar]

na caiṣa śakyate yuddhe viśeṣayitumantataḥ |
na cāhamenaṃ yāsyāmi punarbhīṣmaṃ kathaṃcana || 8 ||
[Analyze grammar]

gamiṣyāmi tu tatrāhaṃ yatra bhīṣmaṃ tapodhana |
samare pātayiṣyāmi svayameva bhṛgūdvaha || 9 ||
[Analyze grammar]

evamuktvā yayau kanyā roṣavyākulalocanā |
tapase dhṛtasaṃkalpā mama cintayatī vadham || 10 ||
[Analyze grammar]

tato mahendraṃ saha tairmunibhirbhṛgusattamaḥ |
yathāgataṃ yayau rāmo māmupāmantrya bhārata || 11 ||
[Analyze grammar]

tato'haṃ rathamāruhya stūyamāno dvijātibhiḥ |
praviśya nagaraṃ mātre satyavatyai nyavedayam |
yathāvṛttaṃ mahārāja sā ca māṃ pratyanandata || 12 ||
[Analyze grammar]

puruṣāṃścādiśaṃ prājñānkanyāvṛttāntakarmaṇi |
divase divase hyasyā gatajalpitaceṣṭitam |
pratyāharaṃśca me yuktāḥ sthitāḥ priyahite mama || 13 ||
[Analyze grammar]

yadaiva hi vanaṃ prāyātkanyā sā tapase dhṛtā |
tadaiva vyathito dīno gatacetā ivābhavam || 14 ||
[Analyze grammar]

na hi māṃ kṣatriyaḥ kaścidvīryeṇa vijayedyudhi |
ṛte brahmavidastāta tapasā saṃśitavratāt || 15 ||
[Analyze grammar]

api caitanmayā rājannārade'pi niveditam |
vyāse caiva bhayātkāryaṃ tau cobhau māmavocatām || 16 ||
[Analyze grammar]

na viṣādastvayā kāryo bhīṣma kāśisutāṃ prati |
daivaṃ puruṣakāreṇa ko nivartitumutsahet || 17 ||
[Analyze grammar]

sā tu kanyā mahārāja praviśyāśramamaṇḍalam |
yamunātīramāśritya tapastepe'timānuṣam || 18 ||
[Analyze grammar]

nirāhārā kṛśā rūkṣā jaṭilā malapaṅkinī |
ṣaṇmāsānvāyubhakṣā ca sthāṇubhūtā tapodhanā || 19 ||
[Analyze grammar]

yamunātīramāsādya saṃvatsaramathāparam |
udavāsaṃ nirāhārā pārayāmāsa bhāminī || 20 ||
[Analyze grammar]

śīrṇaparṇena caikena pārayāmāsa cāparam |
saṃvatsaraṃ tīvrakopā pādāṅguṣṭhāgradhiṣṭhitā || 21 ||
[Analyze grammar]

evaṃ dvādaśa varṣāṇi tāpayāmāsa rodasī |
nivartyamānāpi tu sā jñātibhirnaiva śakyate || 22 ||
[Analyze grammar]

tato'gamadvatsabhūmiṃ siddhacāraṇasevitām |
āśramaṃ puṇyaśīlānāṃ tāpasānāṃ mahātmanām || 23 ||
[Analyze grammar]

tatra puṇyeṣu deśeṣu sāplutāṅgī divāniśam |
vyacaratkāśikanyā sā yathākāmavicāriṇī || 24 ||
[Analyze grammar]

nandāśrame mahārāja tatolūkāśrame śubhe |
cyavanasyāśrame caiva brahmaṇaḥ sthāna eva ca || 25 ||
[Analyze grammar]

prayāge devayajane devāraṇyeṣu caiva ha |
bhogavatyāṃ tathā rājankauśikasyāśrame tathā || 26 ||
[Analyze grammar]

māṇḍavyasyāśrame rājandilīpasyāśrame tathā |
rāmahrade ca kauravya pailagārgyasya cāśrame || 27 ||
[Analyze grammar]

eteṣu tīrtheṣu tadā kāśikanyā viśāṃ pate |
āplāvayata gātrāṇi tīvramāsthāya vai tapaḥ || 28 ||
[Analyze grammar]

tāmabravītkauraveya mama mātā jalotthitā |
kimarthaṃ kliśyase bhadre tathyametadbravīhi me || 29 ||
[Analyze grammar]

saināmathābravīdrājankṛtāñjaliraninditā |
bhīṣmo rāmeṇa samare na jitaścārulocane || 30 ||
[Analyze grammar]

ko'nyastamutsahejjetumudyateṣuṃ mahīpatim |
sāhaṃ bhīṣmavināśāya tapastapsye sudāruṇam || 31 ||
[Analyze grammar]

carāmi pṛthivīṃ devi yathā hanyāmahaṃ nṛpam |
etadvrataphalaṃ dehe parasminsyādyathā hi me || 32 ||
[Analyze grammar]

tato'bravītsāgaragā jihmaṃ carasi bhāmini |
naiṣa kāmo'navadyāṅgi śakyaḥ prāptuṃ tvayābale || 33 ||
[Analyze grammar]

yadi bhīṣmavināśāya kāśye carasi vai vratam |
vratasthā ca śarīraṃ tvaṃ yadi nāma vimokṣyasi |
nadī bhaviṣyasi śubhe kuṭilā vārṣikodakā || 34 ||
[Analyze grammar]

dustīrthā cānabhijñeyā vārṣikī nāṣṭamāsikī |
bhīmagrāhavatī ghorā sarvabhūtabhayaṃkarī || 35 ||
[Analyze grammar]

evamuktvā tato rājankāśikanyāṃ nyavartata |
mātā mama mahābhāgā smayamāneva bhāminī || 36 ||
[Analyze grammar]

kadācidaṣṭame māsi kadāciddaśame tathā |
na prāśnītodakamapi punaḥ sā varavarṇinī || 37 ||
[Analyze grammar]

sā vatsabhūmiṃ kauravya tīrthalobhāttatastataḥ |
patitā paridhāvantī punaḥ kāśipateḥ sutā || 38 ||
[Analyze grammar]

sā nadī vatsabhūmyāṃ tu prathitāmbeti bhārata |
vārṣikī grāhabahulā dustīrthā kuṭilā tathā || 39 ||
[Analyze grammar]

sā kanyā tapasā tena bhāgārdhena vyajāyata |
nadī ca rājanvatseṣu kanyā caivābhavattadā || 40 ||
[Analyze grammar]