Chapter 158

saṃjaya uvāca |
senāniveśaṃ saṃprāpya kaitavyaḥ pāṇḍavasya ha |
samāgataḥ pāṇḍaveyairyudhiṣṭhiramabhāṣata || 1 ||
[Analyze grammar]

abhijño dūtavākyānāṃ yathoktaṃ bruvato mama |
duryodhanasamādeśaṃ śrutvā na kroddhumarhasi || 2 ||
[Analyze grammar]

yudhiṣṭhira uvāca |
ulūka na bhayaṃ te'sti brūhi tvaṃ vigatajvaraḥ |
yanmataṃ dhārtarāṣṭrasya lubdhasyādīrghadarśinaḥ || 3 ||
[Analyze grammar]

saṃjaya uvāca |
tato dyutimatāṃ madhye pāṇḍavānāṃ mahātmanām |
sṛñjayānāṃ ca sarveṣāṃ kṛṣṇasya ca yaśasvinaḥ || 4 ||
[Analyze grammar]

drupadasya saputrasya virāṭasya ca saṃnidhau |
bhūmipānāṃ ca sarveṣāṃ madhye vākyaṃ jagāda ha || 5 ||
[Analyze grammar]

idaṃ tvāmabravīdrājā dhārtarāṣṭro mahāmanāḥ |
śṛṇvatāṃ kuruvīrāṇāṃ tannibodha narādhipa || 6 ||
[Analyze grammar]

parājito'si dyūtena kṛṣṇā cānāyitā sabhām |
śakyo'marṣo manuṣyeṇa kartuṃ puruṣamāninā || 7 ||
[Analyze grammar]

dvādaśaiva tu varṣāṇi vane dhiṣṇyādvivāsitāḥ |
saṃvatsaraṃ virāṭasya dāsyamāsthāya coṣitāḥ || 8 ||
[Analyze grammar]

amarṣaṃ rājyaharaṇaṃ vanavāsaṃ ca pāṇḍava |
draupadyāśca parikleśaṃ saṃsmaranpuruṣo bhava || 9 ||
[Analyze grammar]

aśaktena ca yacchaptaṃ bhīmasenena pāṇḍava |
duḥśāsanasya rudhiraṃ pīyatāṃ yadi śakyate || 10 ||
[Analyze grammar]

lohābhihāro nirvṛttaḥ kurukṣetramakardamam |
samaḥ panthā bhṛtā yodhāḥ śvo yudhyasva sakeśavaḥ || 11 ||
[Analyze grammar]

asamāgamya bhīṣmeṇa saṃyuge kiṃ vikatthase |
ārurukṣuryathā mandaḥ parvataṃ gandhamādanam || 12 ||
[Analyze grammar]

droṇaṃ ca yudhyatāṃ śreṣṭhaṃ śacīpatisamaṃ yudhi |
ajitvā saṃyuge pārtha rājyaṃ kathamihecchasi || 13 ||
[Analyze grammar]

brāhme dhanuṣi cācāryaṃ vedayorantaraṃ dvayoḥ |
yudhi dhuryamavikṣobhyamanīkadharamacyutam || 14 ||
[Analyze grammar]

droṇaṃ mohādyudhā pārtha yajjigīṣasi tanmṛṣā |
na hi śuśruma vātena merumunmathitaṃ girim || 15 ||
[Analyze grammar]

anilo vā vahenmeruṃ dyaurvāpi nipatenmahīm |
yugaṃ vā parivarteta yadyevaṃ syādyathāttha mām || 16 ||
[Analyze grammar]

ko hyābhyāṃ jīvitākāṅkṣī prāpyāstramarimardanam |
gajo vājī naro vāpi punaḥ svasti gṛhānvrajet || 17 ||
[Analyze grammar]

kathamābhyāmabhidhyātaḥ saṃsṛṣṭo dāruṇena vā |
raṇe jīvanvimucyeta padā bhūmimupaspṛśan || 18 ||
[Analyze grammar]

kiṃ darduraḥ kūpaśayo yathemāṃ na budhyase rājacamūṃ sametām |
durādharṣāṃ devacamūprakāśāṃ guptāṃ narendraistridaśairiva dyām || 19 ||
[Analyze grammar]

prācyaiḥ pratīcyairatha dākṣiṇātyairudīcyakāmbojaśakaiḥ khaśaiśca |
śālvaiḥ samatsyaiḥ kurumadhyadeśairmlecchaiḥ pulindairdraviḍāndhrakāñcyaiḥ || 20 ||
[Analyze grammar]

nānājanaughaṃ yudhi saṃpravṛddhaṃ gāṅgaṃ yathā vegamavāraṇīyam |
māṃ ca sthitaṃ nāgabalasya madhye yuyutsase manda kimalpabuddhe || 21 ||
[Analyze grammar]

ityevamuktvā rājānaṃ dharmaputraṃ yudhiṣṭhiram |
abhyāvṛtya punarjiṣṇumulūkaḥ pratyabhāṣata || 22 ||
[Analyze grammar]

akatthamāno yudhyasva katthase'rjuna kiṃ bahu |
paryāyātsiddhiretasya naitatsidhyati katthanāt || 23 ||
[Analyze grammar]

yadīdaṃ katthanātsidhyetkarma loke dhanaṃjaya |
sarve bhaveyuḥ siddhārthā bahu kattheta durgataḥ || 24 ||
[Analyze grammar]

jānāmi te vāsudevaṃ sahāyaṃ jānāmi te gāṇḍivaṃ tālamātram |
jānāmyetattvādṛśo nāsti yoddhā rājyaṃ ca te jānamāno harāmi || 25 ||
[Analyze grammar]

na tu paryāyadharmeṇa siddhiṃ prāpnoti bhūyasīm |
manasaiva hi bhūtāni dhātā prakurute vaśe || 26 ||
[Analyze grammar]

trayodaśa samā bhuktaṃ rājyaṃ vilapatastava |
bhūyaścaiva praśāsiṣye nihatya tvāṃ sabāndhavam || 27 ||
[Analyze grammar]

kva tadā gāṇḍivaṃ te'bhūdyattvaṃ dāsapaṇe jitaḥ |
kva tadā bhīmasenasya balamāsīcca phalguna || 28 ||
[Analyze grammar]

sagadādbhīmasenācca pārthāccaiva sagāṇḍivāt |
na vai mokṣastadā vo'bhūdvinā kṛṣṇāmaninditām || 29 ||
[Analyze grammar]

sā vo dāsyaṃ samāpannānmokṣayāmāsa bhāminī |
amānuṣyasamāyuktāndāsyakarmaṇyavasthitān || 30 ||
[Analyze grammar]

avocaṃ yatṣaṇḍhatilānahaṃ vastathyameva tat |
dhṛtā hi veṇī pārthena virāṭanagare tadā || 31 ||
[Analyze grammar]

sūdakarmaṇi ca śrāntaṃ virāṭasya mahānase |
bhīmasenena kaunteya yacca tanmama pauruṣam || 32 ||
[Analyze grammar]

evameva sadā daṇḍaṃ kṣatriyāḥ kṣatriye dadhuḥ |
śreṇyāṃ kakṣyāṃ ca veṇyāṃ ca saṃyuge yaḥ palāyate || 33 ||
[Analyze grammar]

na bhayādvāsudevasya na cāpi tava phalguna |
rājyaṃ pratipradāsyāmi yudhyasva sahakeśavaḥ || 34 ||
[Analyze grammar]

na māyā hīndrajālaṃ vā kuhakā vā vibhīṣaṇī |
āttaśastrasya me yuddhe vahanti pratigarjanāḥ || 35 ||
[Analyze grammar]

vāsudevasahasraṃ vā phalgunānāṃ śatāni vā |
āsādya māmamogheṣuṃ draviṣyanti diśo daśa || 36 ||
[Analyze grammar]

saṃyugaṃ gaccha bhīṣmeṇa bhindhi tvaṃ śirasā girim |
prataremaṃ mahāgādhaṃ bāhubhyāṃ puruṣodadhim || 37 ||
[Analyze grammar]

śāradvatamahīmānaṃ viviṃśatijhaṣākulam |
bṛhadbalasamuccālaṃ saumadattitimiṃgilam || 38 ||
[Analyze grammar]

duḥśāsanaughaṃ śalaśalyamatsyaṃ suṣeṇacitrāyudhanāganakram |
jayadrathādriṃ purumitragādhaṃ durmarṣaṇodaṃ śakuniprapātam || 39 ||
[Analyze grammar]

śastraughamakṣayyamatipravṛddhaṃ yadāvagāhya śramanaṣṭacetāḥ |
bhaviṣyasi tvaṃ hatasarvabāndhavastadā manaste paritāpameṣyati || 40 ||
[Analyze grammar]

tadā manaste tridivādivāśucernivartatāṃ pārtha mahīpraśāsanāt |
rājyaṃ praśāstuṃ hi sudurlabhaṃ tvayā bubhūṣatā svarga ivātapasvinā || 41 ||
[Analyze grammar]