Chapter 149

vaiśaṃpāyana uvāca |
janārdanavacaḥ śrutvā dharmarājo yudhiṣṭhiraḥ |
bhrātṝnuvāca dharmātmā samakṣaṃ keśavasya ha || 1 ||
[Analyze grammar]

śrutaṃ bhavadbhiryadvṛttaṃ sabhāyāṃ kurusaṃsadi |
keśavasyāpi yadvākyaṃ tatsarvamavadhāritam || 2 ||
[Analyze grammar]

tasmātsenāvibhāgaṃ me kurudhvaṃ narasattamāḥ |
akṣauhiṇyastu saptaitāḥ sametā vijayāya vai || 3 ||
[Analyze grammar]

tāsāṃ me patayaḥ sapta vikhyātāstānnibodhata |
drupadaśca virāṭaśca dhṛṣṭadyumnaśikhaṇḍinau || 4 ||
[Analyze grammar]

sātyakiścekitānaśca bhīmasenaśca vīryavān |
ete senāpraṇetāro vīrāḥ sarve tanutyajaḥ || 5 ||
[Analyze grammar]

sarve vedavidaḥ śūrāḥ sarve sucaritavratāḥ |
hrīmanto nītimantaśca sarve yuddhaviśāradāḥ |
iṣvastrakuśalāścaiva tathā sarvāstrayodhinaḥ || 6 ||
[Analyze grammar]

saptānāmapi yo netā senānāṃ pravibhāgavit |
yaḥ saheta raṇe bhīṣmaṃ śarārciḥpāvakopamam || 7 ||
[Analyze grammar]

tvaṃ tāvatsahadevātra prabrūhi kurunandana |
svamataṃ puruṣavyāghra ko naḥ senāpatiḥ kṣamaḥ || 8 ||
[Analyze grammar]

sahadeva uvāca |
saṃyukta ekaduḥkhaśca vīryavāṃśca mahīpatiḥ |
yaṃ samāśritya dharmajñaṃ svamaṃśamanuyuñjmahe || 9 ||
[Analyze grammar]

matsyo virāṭo balavānkṛtāstro yuddhadurmadaḥ |
prasahiṣyati saṃgrāme bhīṣmaṃ tāṃśca mahārathān || 10 ||
[Analyze grammar]

vaiśaṃpāyana uvāca |
tathokte sahadevena vākye vākyaviśāradaḥ |
nakulo'nantaraṃ tasmādidaṃ vacanamādade || 11 ||
[Analyze grammar]

vayasā śāstrato dhairyātkulenābhijanena ca |
hrīmānkulānvitaḥ śrīmānsarvaśāstraviśāradaḥ || 12 ||
[Analyze grammar]

veda cāstraṃ bharadvājāddurdharṣaḥ satyasaṃgaraḥ |
yo nityaṃ spardhate droṇaṃ bhīṣmaṃ caiva mahābalam || 13 ||
[Analyze grammar]

ślāghyaḥ pārthivasaṃghasya pramukhe vāhinīpatiḥ |
putrapautraiḥ parivṛtaḥ śataśākha iva drumaḥ || 14 ||
[Analyze grammar]

yastatāpa tapo ghoraṃ sadāraḥ pṛthivīpatiḥ |
roṣāddroṇavināśāya vīraḥ samitiśobhanaḥ || 15 ||
[Analyze grammar]

pitevāsmānsamādhatte yaḥ sadā pārthivarṣabhaḥ |
śvaśuro drupado'smākaṃ senāmagre prakarṣatu || 16 ||
[Analyze grammar]

sa droṇabhīṣmāvāyāntau sahediti matirmama |
sa hi divyāstravidrājā sakhā cāṅgiraso nṛpaḥ || 17 ||
[Analyze grammar]

mādrīsutābhyāmukte tu svamate kurunandanaḥ |
vāsavirvāsavasamaḥ savyasācyabravīdvacaḥ || 18 ||
[Analyze grammar]

yo'yaṃ tapaḥprabhāvena ṛṣisaṃtoṣaṇena ca |
divyaḥ puruṣa utpanno jvālāvarṇo mahābalaḥ || 19 ||
[Analyze grammar]

dhanuṣmānkavacī khaḍgī rathamāruhya daṃśitaḥ |
divyairhayavarairyuktamagnikuṇḍātsamutthitaḥ || 20 ||
[Analyze grammar]

garjanniva mahāmegho rathaghoṣeṇa vīryavān |
siṃhasaṃhanano vīraḥ siṃhavikrāntavikramaḥ || 21 ||
[Analyze grammar]

siṃhorasko mahābāhuḥ siṃhavakṣā mahābalaḥ |
siṃhapragarjano vīraḥ siṃhaskandho mahādyutiḥ || 22 ||
[Analyze grammar]

subhrūḥ sudaṃṣṭraḥ suhanuḥ subāhuḥ sumukho'kṛśaḥ |
sujatruḥ suviśālākṣaḥ supādaḥ supratiṣṭhitaḥ || 23 ||
[Analyze grammar]

abhedyaḥ sarvaśastrāṇāṃ prabhinna iva vāraṇaḥ |
jajñe droṇavināśāya satyavādī jitendriyaḥ || 24 ||
[Analyze grammar]

dhṛṣṭadyumnamahaṃ manye sahedbhīṣmasya sāyakān |
vajrāśanisamasparśāndīptāsyānuragāniva || 25 ||
[Analyze grammar]

yamadūtasamānvege nipāte pāvakopamān |
rāmeṇājau viṣahitānvajraniṣpeṣadāruṇān || 26 ||
[Analyze grammar]

puruṣaṃ taṃ na paśyāmi yaḥ saheta mahāvratam |
dhṛṣṭadyumnamṛte rājanniti me dhīyate matiḥ || 27 ||
[Analyze grammar]

kṣiprahastaścitrayodhī mataḥ senāpatirmama |
abhedyakavacaḥ śrīmānmātaṅga iva yūthapaḥ || 28 ||
[Analyze grammar]

bhīma uvāca |
vadhārthaṃ yaḥ samutpannaḥ śikhaṇḍī drupadātmajaḥ |
vadanti siddhā rājendra ṛṣayaśca samāgatāḥ || 29 ||
[Analyze grammar]

yasya saṃgrāmamadhyeṣu divyamastraṃ vikurvataḥ |
rūpaṃ drakṣyanti puruṣā rāmasyeva mahātmanaḥ || 30 ||
[Analyze grammar]

na taṃ yuddheṣu paśyāmi yo vibhindyācchikhaṇḍinam |
śastreṇa samare rājansaṃnaddhaṃ syandane sthitam || 31 ||
[Analyze grammar]

dvairathe viṣahennānyo bhīṣmaṃ rājanmahāvratam |
śikhaṇḍinamṛte vīraṃ sa me senāpatirmataḥ || 32 ||
[Analyze grammar]

yudhiṣṭhira uvāca |
sarvasya jagatastāta sārāsāraṃ balābalam |
sarvaṃ jānāti dharmātmā gatameṣyacca keśavaḥ || 33 ||
[Analyze grammar]

yamāha kṛṣṇo dāśārhaḥ so'stu no vāhinīpatiḥ |
kṛtāstro hyakṛtāstro vā vṛddho vā yadi vā yuvā || 34 ||
[Analyze grammar]

eṣa no vijaye mūlameṣa tāta viparyaye |
atra prāṇāśca rājyaṃ ca bhāvābhāvau sukhāsukhe || 35 ||
[Analyze grammar]

eṣa dhātā vidhātā ca siddhiratra pratiṣṭhitā |
yamāha kṛṣṇo dāśārhaḥ sa naḥ senāpatiḥ kṣamaḥ |
bravītu vadatāṃ śreṣṭho niśā samativartate || 36 ||
[Analyze grammar]

tataḥ senāpatiṃ kṛtvā kṛṣṇasya vaśavartinam |
rātriśeṣe vyatikrānte prayāsyāmo raṇājiram |
adhivāsitaśastrāśca kṛtakautukamaṅgalāḥ || 37 ||
[Analyze grammar]

vaiśaṃpāyana uvāca |
tasya tadvacanaṃ śrutvā dharmarājasya dhīmataḥ |
abravītpuṇḍarīkākṣo dhanaṃjayamavekṣya ha || 38 ||
[Analyze grammar]

mamāpyete mahārāja bhavadbhirya udāhṛtāḥ |
netārastava senāyāḥ śūrā vikrāntayodhinaḥ |
sarva ete samarthā hi tava śatrūnpramarditum || 39 ||
[Analyze grammar]

indrasyāpi bhayaṃ hyete janayeyurmahāhave |
kiṃ punardhārtarāṣṭrāṇāṃ lubdhānāṃ pāpacetasām || 40 ||
[Analyze grammar]

mayāpi hi mahābāho tvatpriyārthamariṃdama |
kṛto yatno mahāṃstatra śamaḥ syāditi bhārata |
dharmasya gatamānṛṇyaṃ na sma vācyā vivakṣatām || 41 ||
[Analyze grammar]

kṛtārthaṃ manyate bālaḥ so''tmānamavicakṣaṇaḥ |
dhārtarāṣṭro balasthaṃ ca manyate''tmānamāturaḥ || 42 ||
[Analyze grammar]

yujyatāṃ vāhinī sādhu vadhasādhyā hi te matāḥ |
na dhārtarāṣṭrāḥ śakṣyanti sthātuṃ dṛṣṭvā dhanaṃjayam || 43 ||
[Analyze grammar]

bhīmasenaṃ ca saṃkruddhaṃ yamau cāpi yamopamau |
yuyudhānadvitīyaṃ ca dhṛṣṭadyumnamamarṣaṇam || 44 ||
[Analyze grammar]

abhimanyuṃ draupadeyānvirāṭadrupadāvapi |
akṣauhiṇīpatīṃścānyānnarendrāndṛḍhavikramān || 45 ||
[Analyze grammar]

sāravadbalamasmākaṃ duṣpradharṣaṃ durāsadam |
dhārtarāṣṭrabalaṃ saṃkhye vadhiṣyati na saṃśayaḥ || 46 ||
[Analyze grammar]

evamukte tu kṛṣṇena saṃprahṛṣyannarottamāḥ |
teṣāṃ prahṛṣṭamanasāṃ nādaḥ samabhavanmahān || 47 ||
[Analyze grammar]

yoga ityatha sainyānāṃ tvaratāṃ saṃpradhāvatām |
hayavāraṇaśabdaśca nemighoṣaśca sarvaśaḥ |
śaṅkhadundubhinirghoṣastumulaḥ sarvato'bhavat || 48 ||
[Analyze grammar]

prayāsyatāṃ pāṇḍavānāṃ sasainyānāṃ samantataḥ |
gaṅgeva pūrṇā durdharṣā samadṛśyata vāhinī || 49 ||
[Analyze grammar]

agrānīke bhīmaseno mādrīputrau ca daṃśitau |
saubhadro draupadeyāśca dhṛṣṭadyumnaśca pārṣataḥ |
prabhadrakāśca pāñcālā bhīmasenamukhā yayuḥ || 50 ||
[Analyze grammar]

tataḥ śabdaḥ samabhavatsamudrasyeva parvaṇi |
hṛṣṭānāṃ saṃprayātānāṃ ghoṣo divamivāspṛśat || 51 ||
[Analyze grammar]

prahṛṣṭā daṃśitā yodhāḥ parānīkavidāraṇāḥ |
teṣāṃ madhye yayau rājā kuntīputro yudhiṣṭhiraḥ || 52 ||
[Analyze grammar]

śakaṭāpaṇaveśāśca yānayugyaṃ ca sarvaśaḥ |
kośayantrāyudhaṃ caiva ye ca vaidyāścikitsakāḥ || 53 ||
[Analyze grammar]

phalgu yacca balaṃ kiṃcittathaiva kṛśadurbalam |
tatsaṃgṛhya yayau rājā ye cāpi paricārakāḥ || 54 ||
[Analyze grammar]

upaplavye tu pāñcālī draupadī satyavādinī |
saha strībhirnivavṛte dāsīdāsasamāvṛtā || 55 ||
[Analyze grammar]

kṛtvā mūlapratīkārāngulmaiḥ sthāvarajaṅgamaiḥ |
skandhāvāreṇa mahatā prayayuḥ pāṇḍunandanāḥ || 56 ||
[Analyze grammar]

dadato gāṃ hiraṇyaṃ ca brāhmaṇairabhisaṃvṛtāḥ |
stūyamānā yayū rājanrathairmaṇivibhūṣitaiḥ || 57 ||
[Analyze grammar]

kekayā dhṛṣṭaketuśca putraḥ kāśyasya cābhibhūḥ |
śreṇimānvasudānaśca śikhaṇḍī cāparājitaḥ || 58 ||
[Analyze grammar]

hṛṣṭāstuṣṭāḥ kavacinaḥ saśastrāḥ samalaṃkṛtāḥ |
rājānamanvayuḥ sarve parivārya yudhiṣṭhiram || 59 ||
[Analyze grammar]

jaghanārdhe virāṭaśca yajñasenaśca somakiḥ |
sudharmā kuntibhojaśca dhṛṣṭadyumnasya cātmajāḥ || 60 ||
[Analyze grammar]

rathāyutāni catvāri hayāḥ pañcaguṇāstataḥ |
pattisainyaṃ daśaguṇaṃ sādināmayutāni ṣaṭ || 61 ||
[Analyze grammar]

anādhṛṣṭiścekitānaścedirājo'tha sātyakiḥ |
parivārya yayuḥ sarve vāsudevadhanaṃjayau || 62 ||
[Analyze grammar]

āsādya tu kurukṣetraṃ vyūḍhānīkāḥ prahāriṇaḥ |
pāṇḍavāḥ samadṛśyanta nardanto vṛṣabhā iva || 63 ||
[Analyze grammar]

te'vagāhya kurukṣetraṃ śaṅkhāndadhmurariṃdamāḥ |
tathaiva dadhmatuḥ śaṅkhau vāsudevadhanaṃjayau || 64 ||
[Analyze grammar]

pāñcajanyasya nirghoṣaṃ visphūrjitamivāśaneḥ |
niśamya sarvasainyāni samahṛṣyanta sarvaśaḥ || 65 ||
[Analyze grammar]

śaṅkhadundubhisaṃsṛṣṭaḥ siṃhanādastarasvinām |
pṛthivīṃ cāntarikṣaṃ ca sāgarāṃścānvanādayat || 66 ||
[Analyze grammar]

tato deśe same snigdhe prabhūtayavasendhane |
niveśayāmāsa tadā senāṃ rājā yudhiṣṭhiraḥ || 67 ||
[Analyze grammar]

parihṛtya śmaśānāni devatāyatanāni ca |
āśramāṃśca maharṣīṇāṃ tīrthānyāyatanāni ca || 68 ||
[Analyze grammar]

madhurānūṣare deśe śive puṇye mahīpatiḥ |
niveśaṃ kārayāmāsa kuntīputro yudhiṣṭhiraḥ || 69 ||
[Analyze grammar]

tataśca punarutthāya sukhī viśrāntavāhanaḥ |
prayayau pṛthivīpālairvṛtaḥ śatasahasraśaḥ || 70 ||
[Analyze grammar]

vidrāvya śataśo gulmāndhārtarāṣṭrasya sainikān |
paryakrāmatsamantācca pārthena saha keśavaḥ || 71 ||
[Analyze grammar]

śibiraṃ māpayāmāsa dhṛṣṭadyumnaśca pārṣataḥ |
sātyakiśca rathodāro yuyudhānaḥ pratāpavān || 72 ||
[Analyze grammar]

āsādya saritaṃ puṇyāṃ kurukṣetre hiraṇvatīm |
sūpatīrthāṃ śucijalāṃ śarkarāpaṅkavarjitām || 73 ||
[Analyze grammar]

khānayāmāsa parikhāṃ keśavastatra bhārata |
guptyarthamapi cādiśya balaṃ tatra nyaveśayat || 74 ||
[Analyze grammar]

vidhiryaḥ śibirasyāsītpāṇḍavānāṃ mahātmanām |
tadvidhāni narendrāṇāṃ kārayāmāsa keśavaḥ || 75 ||
[Analyze grammar]

prabhūtajalakāṣṭhāni durādharṣatarāṇi ca |
bhakṣyabhojyopapannāni śataśo'tha sahasraśaḥ || 76 ||
[Analyze grammar]

śibirāṇi mahārhāṇi rājñāṃ tatra pṛthakpṛthak |
vimānānīva rājendra niviṣṭāni mahītale || 77 ||
[Analyze grammar]

tatrāsañśilpinaḥ prājñāḥ śataśo dattavetanāḥ |
sarvopakaraṇairyuktā vaidyāśca suviśāradāḥ || 78 ||
[Analyze grammar]

jyādhanurvarmaśastrāṇāṃ tathaiva madhusarpiṣoḥ |
sasarjarasapāṃsūnāṃ rāśayaḥ parvatopamāḥ || 79 ||
[Analyze grammar]

bahūdakaṃ suyavasaṃ tuṣāṅgārasamanvitam |
śibire śibire rājā saṃcakāra yudhiṣṭhiraḥ || 80 ||
[Analyze grammar]

mahāyantrāṇi nārācāstomararṣṭiparaśvadhāḥ |
dhanūṃṣi kavacādīni hṛdyabhūvannṛṇāṃ tadā || 81 ||
[Analyze grammar]

gajāḥ kaṅkaṭasaṃnāhā lohavarmottaracchadāḥ |
adṛśyaṃstatra giryābhāḥ sahasraśatayodhinaḥ || 82 ||
[Analyze grammar]

niviṣṭānpāṇḍavāṃstatra jñātvā mitrāṇi bhārata |
abhisasruryathoddeśaṃ sabalāḥ sahavāhanāḥ || 83 ||
[Analyze grammar]

caritabrahmacaryāste somapā bhūridakṣiṇāḥ |
jayāya pāṇḍuputrāṇāṃ samājagmurmahīkṣitaḥ || 84 ||
[Analyze grammar]