Chapter 146

vāsudeva uvāca |
bhīṣmeṇokte tato droṇo duryodhanamabhāṣata |
madhye nṛpāṇāṃ bhadraṃ te vacanaṃ vacanakṣamaḥ || 1 ||
[Analyze grammar]

prātīpaḥ śaṃtanustāta kulasyārthe yathotthitaḥ |
tathā devavrato bhīṣmaḥ kulasyārthe sthito'bhavat || 2 ||
[Analyze grammar]

tataḥ pāṇḍurnarapatiḥ satyasaṃdho jitendriyaḥ |
rājā kurūṇāṃ dharmātmā suvrataḥ susamāhitaḥ || 3 ||
[Analyze grammar]

jyeṣṭhāya rājyamadadāddhṛtarāṣṭrāya dhīmate |
yavīyasastathā kṣattuḥ kuruvaṃśavivardhanaḥ || 4 ||
[Analyze grammar]

tataḥ siṃhāsane rājansthāpayitvainamacyutam |
vanaṃ jagāma kauravyo bhāryābhyāṃ sahito'nagha || 5 ||
[Analyze grammar]

nīcaiḥ sthitvā tu vidura upāste sma vinītavat |
preṣyavatpuruṣavyāghro vālavyajanamutkṣipan || 6 ||
[Analyze grammar]

tataḥ sarvāḥ prajāstāta dhṛtarāṣṭraṃ janeśvaram |
anvapadyanta vidhivadyathā pāṇḍuṃ narādhipam || 7 ||
[Analyze grammar]

visṛjya dhṛtarāṣṭrāya rājyaṃ sa vidurāya ca |
cacāra pṛthivīṃ pāṇḍuḥ sarvāṃ parapuraṃjayaḥ || 8 ||
[Analyze grammar]

kośasaṃjanane dāne bhṛtyānāṃ cānvavekṣaṇe |
bharaṇe caiva sarvasya viduraḥ satyasaṃgaraḥ || 9 ||
[Analyze grammar]

saṃdhivigrahasaṃyukto rājñaḥ saṃvāhanakriyāḥ |
avaikṣata mahātejā bhīṣmaḥ parapuraṃjayaḥ || 10 ||
[Analyze grammar]

siṃhāsanastho nṛpatirdhṛtarāṣṭro mahābalaḥ |
anvāsyamānaḥ satataṃ vidureṇa mahātmanā || 11 ||
[Analyze grammar]

kathaṃ tasya kule jātaḥ kulabhedaṃ vyavasyasi |
saṃbhūya bhrātṛbhiḥ sārdhaṃ bhuṅkṣva bhogāñjanādhipa || 12 ||
[Analyze grammar]

bravīmyahaṃ na kārpaṇyānnārthahetoḥ kathaṃcana |
bhīṣmeṇa dattamaśnāmi na tvayā rājasattama || 13 ||
[Analyze grammar]

nāhaṃ tvatto'bhikāṅkṣiṣye vṛttyupāyaṃ janādhipa |
yato bhīṣmastato droṇo yadbhīṣmastvāha tatkuru || 14 ||
[Analyze grammar]

dīyatāṃ pāṇḍuputrebhyo rājyārdhamarikarśana |
samamācāryakaṃ tāta tava teṣāṃ ca me sadā || 15 ||
[Analyze grammar]

aśvatthāmā yathā mahyaṃ tathā śvetahayo mama |
bahunā kiṃ pralāpena yato dharmastato jayaḥ || 16 ||
[Analyze grammar]

evamukte mahārāja droṇenāmitatejasā |
vyājahāra tato vākyaṃ viduraḥ satyasaṃgaraḥ |
piturvadanamanvīkṣya parivṛtya ca dharmavit || 17 ||
[Analyze grammar]

devavrata nibodhedaṃ vacanaṃ mama bhāṣataḥ |
pranaṣṭaḥ kauravo vaṃśastvayāyaṃ punaruddhṛtaḥ || 18 ||
[Analyze grammar]

tanme vilapamānasya vacanaṃ samupekṣase |
ko'yaṃ duryodhano nāma kule'sminkulapāṃsanaḥ || 19 ||
[Analyze grammar]

yasya lobhābhibhūtasya matiṃ samanuvartase |
anāryasyākṛtajñasya lobhopahatacetasaḥ |
atikrāmati yaḥ śāstraṃ piturdharmārthadarśinaḥ || 20 ||
[Analyze grammar]

ete naśyanti kuravo duryodhanakṛtena vai |
yathā te na praṇaśyeyurmahārāja tathā kuru || 21 ||
[Analyze grammar]

māṃ caiva dhṛtarāṣṭraṃ ca pūrvameva mahādyute |
citrakāra ivālekhyaṃ kṛtvā mā sma vināśaya |
prajāpatiḥ prajāḥ sṛṣṭvā yathā saṃharate tathā || 22 ||
[Analyze grammar]

nopekṣasva mahābāho paśyamānaḥ kulakṣayam |
atha te'dya matirnaṣṭā vināśe pratyupasthite |
vanaṃ gaccha mayā sārdhaṃ dhṛtarāṣṭreṇa caiva ha || 23 ||
[Analyze grammar]

baddhvā vā nikṛtiprajñaṃ dhārtarāṣṭraṃ sudurmatim |
sādhvidaṃ rājyamadyāstu pāṇḍavairabhirakṣitam || 24 ||
[Analyze grammar]

prasīda rājaśārdūla vināśo dṛśyate mahān |
pāṇḍavānāṃ kurūṇāṃ ca rājñāṃ cāmitatejasām || 25 ||
[Analyze grammar]

virarāmaivamuktvā tu viduro dīnamānasaḥ |
pradhyāyamānaḥ sa tadā niḥśvasaṃśca punaḥ punaḥ || 26 ||
[Analyze grammar]

tato'tha rājñaḥ subalasya putrī dharmārthayuktaṃ kulanāśabhītā |
duryodhanaṃ pāpamatiṃ nṛśaṃsaṃ rājñāṃ samakṣaṃ sutamāha kopāt || 27 ||
[Analyze grammar]

ye pārthivā rājasabhāṃ praviṣṭā brahmarṣayo ye ca sabhāsado'nye |
śṛṇvantu vakṣyāmi tavāparādhaṃ pāpasya sāmātyaparicchadasya || 28 ||
[Analyze grammar]

rājyaṃ kurūṇāmanupūrvabhogyaṃ kramāgato naḥ kuladharma eṣaḥ |
tvaṃ pāpabuddhe'tinṛśaṃsakarmanrājyaṃ kurūṇāmanayādvihaṃsi || 29 ||
[Analyze grammar]

rājye sthito dhṛtarāṣṭro manīṣī tasyānujo viduro dīrghadarśī |
etāvatikramya kathaṃ nṛpatvaṃ duryodhana prārthayase'dya mohāt || 30 ||
[Analyze grammar]

rājā ca kṣattā ca mahānubhāvau bhīṣme sthite paravantau bhavetām |
ayaṃ tu dharmajñatayā mahātmā na rājyakāmo nṛvaro nadījaḥ || 31 ||
[Analyze grammar]

rājyaṃ tu pāṇḍoridamapradhṛṣyaṃ tasyādya putrāḥ prabhavanti nānye |
rājyaṃ tadetannikhilaṃ pāṇḍavānāṃ paitāmahaṃ putrapautrānugāmi || 32 ||
[Analyze grammar]

yadvai brūte kurumukhyo mahātmā devavrataḥ satyasaṃdho manīṣī |
sarvaṃ tadasmābhirahatya dharmaṃ grāhyaṃ svadharmaṃ paripālayadbhiḥ || 33 ||
[Analyze grammar]

anujñayā cātha mahāvratasya brūyānnṛpo yadvidurastathaiva |
kāryaṃ bhavettatsuhṛdbhirniyujya dharmaṃ puraskṛtya sudīrghakālam || 34 ||
[Analyze grammar]

nyāyāgataṃ rājyamidaṃ kurūṇāṃ yudhiṣṭhiraḥ śāstu vai dharmaputraḥ |
pracodito dhṛtarāṣṭreṇa rājñā puraskṛtaḥ śāṃtanavena caiva || 35 ||
[Analyze grammar]