Chapter 145

vaiśaṃpāyana uvāca |
āgamya hāstinapurādupaplavyamariṃdamaḥ |
pāṇḍavānāṃ yathāvṛttaṃ keśavaḥ sarvamuktavān || 1 ||
[Analyze grammar]

saṃbhāṣya suciraṃ kālaṃ mantrayitvā punaḥ punaḥ |
svamevāvasathaṃ śaurirviśrāmārthaṃ jagāma ha || 2 ||
[Analyze grammar]

visṛjya sarvānnṛpatīnvirāṭapramukhāṃstadā |
pāṇḍavā bhrātaraḥ pañca bhānāvastaṃgate sati || 3 ||
[Analyze grammar]

saṃdhyāmupāsya dhyāyantastameva gatamānasāḥ |
ānāyya kṛṣṇaṃ dāśārhaṃ punarmantramamantrayan || 4 ||
[Analyze grammar]

yudhiṣṭhira uvāca |
tvayā nāgapuraṃ gatvā sabhāyāṃ dhṛtarāṣṭrajaḥ |
kimuktaḥ puṇḍarīkākṣa tannaḥ śaṃsitumarhasi || 5 ||
[Analyze grammar]

vāsudeva uvāca |
mayā nāgapuraṃ gatvā sabhāyāṃ dhṛtarāṣṭrajaḥ |
tathyaṃ pathyaṃ hitaṃ cokto na ca gṛhṇāti durmatiḥ || 6 ||
[Analyze grammar]

yudhiṣṭhira uvāca |
tasminnutpathamāpanne kuruvṛddhaḥ pitāmahaḥ |
kimuktavānhṛṣīkeśa duryodhanamamarṣaṇam |
ācāryo vā mahābāho bhāradvājaḥ kimabravīt || 7 ||
[Analyze grammar]

pitā yavīyānasmākaṃ kṣattā dharmabhṛtāṃ varaḥ |
putraśokābhisaṃtaptaḥ kimāha dhṛtarāṣṭrajam || 8 ||
[Analyze grammar]

kiṃ ca sarve nṛpatayaḥ sabhāyāṃ ye samāsate |
uktavanto yathātattvaṃ tadbrūhi tvaṃ janārdana || 9 ||
[Analyze grammar]

uktavānhi bhavānsarvaṃ vacanaṃ kurumukhyayoḥ |
kāmalobhābhibhūtasya mandasya prājñamāninaḥ || 10 ||
[Analyze grammar]

apriyaṃ hṛdaye mahyaṃ tanna tiṣṭhati keśava |
teṣāṃ vākyāni govinda śrotumicchāmyahaṃ vibho || 11 ||
[Analyze grammar]

yathā ca nābhipadyeta kālastāta tathā kuru |
bhavānhi no gatiḥ kṛṣṇa bhavānnātho bhavānguruḥ || 12 ||
[Analyze grammar]

vāsudeva uvāca |
śṛṇu rājanyathā vākyamukto rājā suyodhanaḥ |
madhye kurūṇāṃ rājendra sabhāyāṃ tannibodha me || 13 ||
[Analyze grammar]

mayā vai śrāvite vākye jahāsa dhṛtarāṣṭrajaḥ |
atha bhīṣmaḥ susaṃkruddha idaṃ vacanamabravīt || 14 ||
[Analyze grammar]

duryodhana nibodhedaṃ kulārthe yadbravīmi te |
tacchrutvā rājaśārdūla svakulasya hitaṃ kuru || 15 ||
[Analyze grammar]

mama tāta pitā rājañśaṃtanurlokaviśrutaḥ |
tasyāhameka evāsaṃ putraḥ putravatāṃ varaḥ || 16 ||
[Analyze grammar]

tasya buddhiḥ samutpannā dvitīyaḥ syātkathaṃ sutaḥ |
ekaputramaputraṃ vai pravadanti manīṣiṇaḥ || 17 ||
[Analyze grammar]

na cocchedaṃ kulaṃ yāyādvistīryeta kathaṃ yaśaḥ |
tasyāhamīpsitaṃ buddhvā kālīṃ mātaramāvaham || 18 ||
[Analyze grammar]

pratijñāṃ duṣkarāṃ kṛtvā piturarthe kulasya ca |
arājā cordhvaretāśca yathā suviditaṃ tava |
pratīto nivasāmyeṣa pratijñāmanupālayan || 19 ||
[Analyze grammar]

tasyāṃ jajñe mahābāhuḥ śrīmānkurukulodvahaḥ |
vicitravīryo dharmātmā kanīyānmama pārthivaḥ || 20 ||
[Analyze grammar]

svaryāte'haṃ pitari taṃ svarājye saṃnyaveśayam |
vicitravīryaṃ rājānaṃ bhṛtyo bhūtvā hyadhaścaraḥ || 21 ||
[Analyze grammar]

tasyāhaṃ sadṛśāndārānrājendra samudāvaham |
jitvā pārthivasaṃghātamapi te bahuśaḥ śrutam || 22 ||
[Analyze grammar]

tato rāmeṇa samare dvandvayuddhamupāgamam |
sa hi rāmabhayādebhirnāgarairvipravāsitaḥ |
dāreṣvatiprasaktaśca yakṣmāṇaṃ samapadyata || 23 ||
[Analyze grammar]

yadā tvarājake rāṣṭre na vavarṣa sureśvaraḥ |
tadābhyadhāvanmāmeva prajāḥ kṣudbhayapīḍitāḥ || 24 ||
[Analyze grammar]

prajā ūcuḥ |
upakṣīṇāḥ prajāḥ sarvā rājā bhava bhavāya naḥ |
ītayo nuda bhadraṃ te śaṃtanoḥ kulavardhana || 25 ||
[Analyze grammar]

pīḍyante te prajāḥ sarvā vyādhibhirbhṛśadāruṇaiḥ |
alpāvaśiṣṭā gāṅgeya tāḥ paritrātumarhasi || 26 ||
[Analyze grammar]

vyādhīnpraṇudya vīra tvaṃ prajā dharmeṇa pālaya |
tvayi jīvati mā rāṣṭraṃ vināśamupagacchatu || 27 ||
[Analyze grammar]

bhīṣma uvāca |
prajānāṃ krośatīnāṃ vai naivākṣubhyata me manaḥ |
pratijñāṃ rakṣamāṇasya sadvṛttaṃ smaratastathā || 28 ||
[Analyze grammar]

tataḥ paurā mahārāja mātā kālī ca me śubhā |
bhṛtyāḥ purohitācāryā brāhmaṇāśca bahuśrutāḥ |
māmūcurbhṛśasaṃtaptā bhava rājeti saṃtatam || 29 ||
[Analyze grammar]

pratīparakṣitaṃ rāṣṭraṃ tvāṃ prāpya vinaśiṣyati |
sa tvamasmaddhitārthaṃ vai rājā bhava mahāmate || 30 ||
[Analyze grammar]

ityuktaḥ prāñjalirbhūtvā duḥkhito bhṛśamāturaḥ |
tebhyo nyavedayaṃ putra pratijñāṃ pitṛgauravāt |
ūrdhvaretā hyarājā ca kulasyārthe punaḥ punaḥ || 31 ||
[Analyze grammar]

tato'haṃ prāñjalirbhūtvā mātaraṃ saṃprasādayam |
nāmba śaṃtanunā jātaḥ kauravaṃ vaṃśamudvahan |
pratijñāṃ vitathāṃ kuryāmiti rājanpunaḥ punaḥ || 32 ||
[Analyze grammar]

viśeṣatastvadarthaṃ ca dhuri mā māṃ niyojaya |
ahaṃ preṣyaśca dāsaśca tavāmba sutavatsale || 33 ||
[Analyze grammar]

evaṃ tāmanunīyāhaṃ mātaraṃ janameva ca |
ayācaṃ bhrātṛdāreṣu tadā vyāsaṃ mahāmunim || 34 ||
[Analyze grammar]

saha mātrā mahārāja prasādya tamṛṣiṃ tadā |
apatyārthamayācaṃ vai prasādaṃ kṛtavāṃśca saḥ |
trīnsa putrānajanayattadā bharatasattama || 35 ||
[Analyze grammar]

andhaḥ karaṇahīneti na vai rājā pitā tava |
rājā tu pāṇḍurabhavanmahātmā lokaviśrutaḥ || 36 ||
[Analyze grammar]

sa rājā tasya te putrāḥ piturdāyādyahāriṇaḥ |
mā tāta kalahaṃ kārṣī rājyasyārdhaṃ pradīyatām || 37 ||
[Analyze grammar]

mayi jīvati rājyaṃ kaḥ saṃpraśāsetpumāniha |
māvamaṃsthā vaco mahyaṃ śamamicchāmi vaḥ sadā || 38 ||
[Analyze grammar]

na viśeṣo'sti me putra tvayi teṣu ca pārthiva |
matametatpitustubhyaṃ gāndhāryā vidurasya ca || 39 ||
[Analyze grammar]

śrotavyaṃ yadi vṛddhānāṃ mātiśaṅkīrvaco mama |
nāśayiṣyasi mā sarvamātmānaṃ pṛthivīṃ tathā || 40 ||
[Analyze grammar]