Chapter 133

putra uvāca |
kṛṣṇāyasasyeva ca te saṃhatya hṛdayaṃ kṛtam |
mama mātastvakaruṇe vairaprajñe hyamarṣaṇe || 1 ||
[Analyze grammar]

aho kṣatrasamācāro yatra māmaparaṃ yathā |
īdṛśaṃ vacanaṃ brūyādbhavatī putramekajam || 2 ||
[Analyze grammar]

kiṃ nu te māmapaśyantyāḥ pṛthivyā api sarvayā |
kimābharaṇakṛtyaṃ te kiṃ bhogairjīvitena vā || 3 ||
[Analyze grammar]

mātovāca |
sarvārambhā hi viduṣāṃ tāta dharmārthakāraṇāt |
tānevābhisamīkṣyāhaṃ saṃjaya tvāmacūcudam || 4 ||
[Analyze grammar]

sa samīkṣyakramopeto mukhyaḥ kālo'yamāgataḥ |
asmiṃścedāgate kāle kāryaṃ na pratipadyase |
asaṃbhāvitarūpastvaṃ sunṛśaṃsaṃ kariṣyasi || 5 ||
[Analyze grammar]

taṃ tvāmayaśasā spṛṣṭaṃ na brūyāṃ yadi saṃjaya |
kharīvātsalyamāhustanniḥsāmarthyamahetukam || 6 ||
[Analyze grammar]

sadbhirvigarhitaṃ mārgaṃ tyaja mūrkhaniṣevitam |
avidyā vai mahatyasti yāmimāṃ saṃśritāḥ prajāḥ || 7 ||
[Analyze grammar]

tava syādyadi sadvṛttaṃ tena me tvaṃ priyo bhaveḥ |
dharmārthaguṇayuktena netareṇa kathaṃcana |
daivamānuṣayuktena sadbhirācaritena ca || 8 ||
[Analyze grammar]

yo hyevamavinītena ramate putranaptṛṇā |
anutthānavatā cāpi moghaṃ tasya prajāphalam || 9 ||
[Analyze grammar]

akurvanto hi karmāṇi kurvanto ninditāni ca |
sukhaṃ naiveha nāmutra labhante puruṣādhamāḥ || 10 ||
[Analyze grammar]

yuddhāya kṣatriyaḥ sṛṣṭaḥ saṃjayeha jayāya ca |
krūrāya karmaṇe nityaṃ prajānāṃ paripālane |
jayanvā vadhyamāno vā prāpnotīndrasalokatām || 11 ||
[Analyze grammar]

na śakrabhavane puṇye divi tadvidyate sukham |
yadamitrānvaśe kṛtvā kṣatriyaḥ sukhamaśnute || 12 ||
[Analyze grammar]

manyunā dahyamānena puruṣeṇa manasvinā |
nikṛteneha bahuśaḥ śatrūnpratijigīṣayā || 13 ||
[Analyze grammar]

ātmānaṃ vā parityajya śatrūnvā vinipātya vai |
ato'nyena prakāreṇa śāntirasya kuto bhavet || 14 ||
[Analyze grammar]

iha prājño hi puruṣaḥ svalpamapriyamicchati |
yasya svalpaṃ priyaṃ loke dhruvaṃ tasyālpamapriyam || 15 ||
[Analyze grammar]

priyābhāvācca puruṣo naiva prāpnoti śobhanam |
dhruvaṃ cābhāvamabhyeti gatvā gaṅgeva sāgaram || 16 ||
[Analyze grammar]

putra uvāca |
neyaṃ matistvayā vācyā mātaḥ putre viśeṣataḥ |
kāruṇyamevātra paśya bhūtveha jaḍamūkavat || 17 ||
[Analyze grammar]

mātovāca |
ato me bhūyasī nandiryadevamanupaśyasi |
codyaṃ māṃ codayasyetadbhṛśaṃ vai codayāmi te || 18 ||
[Analyze grammar]

atha tvāṃ pūjayiṣyāmi hatvā vai sarvasaindhavān |
ahaṃ paśyāmi vijayaṃ kṛtsnaṃ bhāvinameva te || 19 ||
[Analyze grammar]

putra uvāca |
akośasyāsahāyasya kutaḥ svidvijayo mama |
ityavasthāṃ viditvemāmātmanātmani dāruṇām |
rājyādbhāvo nivṛtto me tridivādiva duṣkṛteḥ || 20 ||
[Analyze grammar]

īdṛśaṃ bhavatī kaṃcidupāyamanupaśyati |
tanme pariṇataprajñe samyakprabrūhi pṛcchate |
kariṣyāmi hi tatsarvaṃ yathāvadanuśāsanam || 21 ||
[Analyze grammar]

mātovāca |
putrātmā nāvamantavyaḥ pūrvābhirasamṛddhibhiḥ |
abhūtvā hi bhavantyarthā bhūtvā naśyanti cāpare || 22 ||
[Analyze grammar]

amarṣeṇaiva cāpyarthā nārabdhavyāḥ subāliśaiḥ |
sarveṣāṃ karmaṇāṃ tāta phale nityamanityatā || 23 ||
[Analyze grammar]

anityamiti jānanto na bhavanti bhavanti ca |
atha ye naiva kurvanti naiva jātu bhavanti te || 24 ||
[Analyze grammar]

aikaguṇyamanīhāyāmabhāvaḥ karmaṇāṃ phalam |
atha dvaiguṇyamīhāyāṃ phalaṃ bhavati vā na vā || 25 ||
[Analyze grammar]

yasya prāgeva viditā sarvārthānāmanityatā |
nudedvṛddhisamṛddhī sa pratikūle nṛpātmaja || 26 ||
[Analyze grammar]

utthātavyaṃ jāgṛtavyaṃ yoktavyaṃ bhūtikarmasu |
bhaviṣyatītyeva manaḥ kṛtvā satatamavyathaiḥ |
maṅgalāni puraskṛtya brāhmaṇaiśceśvaraiḥ saha || 27 ||
[Analyze grammar]

prājñasya nṛpaterāśu vṛddhirbhavati putraka |
abhivartati lakṣmīstaṃ prācīmiva divākaraḥ || 28 ||
[Analyze grammar]

nidarśanānyupāyāṃśca bahūnyuddharṣaṇāni ca |
anudarśitarūpo'si paśyāmi kuru pauruṣam |
puruṣārthamabhipretaṃ samāhartumihārhasi || 29 ||
[Analyze grammar]

kruddhāṃllubdhānparikṣīṇānavakṣiptānvimānitān |
spardhinaścaiva ye kecittānyukta upadhāraya || 30 ||
[Analyze grammar]

etena tvaṃ prakāreṇa mahato bhetsyase gaṇān |
mahāvega ivoddhūto mātariśvā balāhakān || 31 ||
[Analyze grammar]

teṣāmagrapradāyī syāḥ kalyotthāyī priyaṃvadaḥ |
te tvāṃ priyaṃ kariṣyanti puro dhāsyanti ca dhruvam || 32 ||
[Analyze grammar]

yadaiva śatrurjānīyātsapatnaṃ tyaktajīvitam |
tadaivāsmādudvijate sarpādveśmagatādiva || 33 ||
[Analyze grammar]

taṃ viditvā parākrāntaṃ vaśe na kurute yadi |
nirvādairnirvadedenamantatastadbhaviṣyati || 34 ||
[Analyze grammar]

nirvādādāspadaṃ labdhvā dhanavṛddhirbhaviṣyati |
dhanavantaṃ hi mitrāṇi bhajante cāśrayanti ca || 35 ||
[Analyze grammar]

skhalitārthaṃ punastāta saṃtyajantyapi bāndhavāḥ |
apyasminnāśrayante ca jugupsanti ca tādṛśam || 36 ||
[Analyze grammar]

śatruṃ kṛtvā yaḥ sahāyaṃ viśvāsamupagacchati |
ataḥ saṃbhāvyamevaitadyadrājyaṃ prāpnuyāditi || 37 ||
[Analyze grammar]