Chapter 122

dhṛtarāṣṭra uvāca |
bhagavannevamevaitadyathā vadasi nārada |
icchāmi cāhamapyevaṃ na tvīśo bhagavannaham || 1 ||
[Analyze grammar]

vaiśaṃpāyana uvāca |
evamuktvā tataḥ kṛṣṇamabhyabhāṣata bhārata |
svargyaṃ lokyaṃ ca māmāttha dharmyaṃ nyāyyaṃ ca keśava || 2 ||
[Analyze grammar]

na tvahaṃ svavaśastāta kriyamāṇaṃ na me priyam |
aṅga duryodhanaṃ kṛṣṇa mandaṃ śāstrātigaṃ mama || 3 ||
[Analyze grammar]

anunetuṃ mahābāho yatasva puruṣottama |
suhṛtkāryaṃ tu sumahatkṛtaṃ te syājjanārdana || 4 ||
[Analyze grammar]

tato'bhyāvṛtya vārṣṇeyo duryodhanamamarṣaṇam |
abravīnmadhurāṃ vācaṃ sarvadharmārthatattvavit || 5 ||
[Analyze grammar]

duryodhana nibodhedaṃ madvākyaṃ kurusattama |
samarthaṃ te viśeṣeṇa sānubandhasya bhārata || 6 ||
[Analyze grammar]

mahāprājña kule jātaḥ sādhvetatkartumarhasi |
śrutavṛttopasaṃpannaḥ sarvaiḥ samudito guṇaiḥ || 7 ||
[Analyze grammar]

dauṣkuleyā durātmāno nṛśaṃsā nirapatrapāḥ |
ta etadīdṛśaṃ kuryuryathā tvaṃ tāta manyase || 8 ||
[Analyze grammar]

dharmārthayuktā loke'sminpravṛttirlakṣyate satām |
asatāṃ viparītā tu lakṣyate bharatarṣabha || 9 ||
[Analyze grammar]

viparītā tviyaṃ vṛttirasakṛllakṣyate tvayi |
adharmaścānubandho'tra ghoraḥ prāṇaharo mahān || 10 ||
[Analyze grammar]

anekaśastvannimittamayaśasyaṃ ca bhārata |
tamanarthaṃ pariharannātmaśreyaḥ kariṣyasi || 11 ||
[Analyze grammar]

bhrātṝṇāmatha bhṛtyānāṃ mitrāṇāṃ ca paraṃtapa |
adharmyādayaśasyācca karmaṇastvaṃ pramokṣyase || 12 ||
[Analyze grammar]

prājñaiḥ śūrairmahotsāhairātmavadbhirbahuśrutaiḥ |
saṃdhatsva puruṣavyāghra pāṇḍavairbharatarṣabha || 13 ||
[Analyze grammar]

taddhitaṃ ca priyaṃ caiva dhṛtarāṣṭrasya dhīmataḥ |
pitāmahasya droṇasya vidurasya mahāmateḥ || 14 ||
[Analyze grammar]

kṛpasya somadattasya bāhlīkasya ca dhīmataḥ |
aśvatthāmno vikarṇasya saṃjayasya viśāṃ pate || 15 ||
[Analyze grammar]

jñātīnāṃ caiva bhūyiṣṭhaṃ mitrāṇāṃ ca paraṃtapa |
śame śarma bhavettāta sarvasya jagatastathā || 16 ||
[Analyze grammar]

hrīmānasi kule jātaḥ śrutavānanṛśaṃsavān |
tiṣṭha tāta pituḥ śāstre mātuśca bharatarṣabha || 17 ||
[Analyze grammar]

etacchreyo hi manyante pitā yacchāsti bhārata |
uttamāpadgataḥ sarvaḥ pituḥ smarati śāsanam || 18 ||
[Analyze grammar]

rocate te pitustāta pāṇḍavaiḥ saha saṃgamaḥ |
sāmātyasya kuruśreṣṭha tattubhyaṃ tāta rocatām || 19 ||
[Analyze grammar]

śrutvā yaḥ suhṛdāṃ śāstraṃ martyo na pratipadyate |
vipākānte dahatyenaṃ kiṃpākamiva bhakṣitam || 20 ||
[Analyze grammar]

yastu niḥśreyasaṃ vākyaṃ mohānna pratipadyate |
sa dīrghasūtro hīnārthaḥ paścāttāpena yujyate || 21 ||
[Analyze grammar]

yastu niḥśreyasaṃ śrutvā prāptamevābhipadyate |
ātmano matamutsṛjya sa loke sukhamedhate || 22 ||
[Analyze grammar]

yo'rthakāmasya vacanaṃ prātikūlyānna mṛṣyate |
śṛṇoti pratikūlāni dviṣatāṃ vaśameti saḥ || 23 ||
[Analyze grammar]

satāṃ matamatikramya yo'satāṃ vartate mate |
śocante vyasane tasya suhṛdo nacirādiva || 24 ||
[Analyze grammar]

mukhyānamātyānutsṛjya yo nihīnānniṣevate |
sa ghorāmāpadaṃ prāpya nottāramadhigacchati || 25 ||
[Analyze grammar]

yo'satsevī vṛthācāro na śrotā suhṛdāṃ sadā |
parānvṛṇīte svāndveṣṭi taṃ gauḥ śapati bhārata || 26 ||
[Analyze grammar]

sa tvaṃ virudhya tairvīrairanyebhyastrāṇamicchasi |
aśiṣṭebhyo'samarthebhyo mūḍhebhyo bharatarṣabha || 27 ||
[Analyze grammar]

ko hi śakrasamāñjñātīnatikramya mahārathān |
anyebhyastrāṇamāśaṃsettvadanyo bhuvi mānavaḥ || 28 ||
[Analyze grammar]

janmaprabhṛti kaunteyā nityaṃ vinikṛtāstvayā |
na ca te jātu kupyanti dharmātmāno hi pāṇḍavāḥ || 29 ||
[Analyze grammar]

mithyāpracaritāstāta janmaprabhṛti pāṇḍavāḥ |
tvayi samyaṅmahābāho pratipannā yaśasvinaḥ || 30 ||
[Analyze grammar]

tvayāpi pratipattavyaṃ tathaiva bharatarṣabha |
sveṣu bandhuṣu mukhyeṣu mā manyuvaśamanvagāḥ || 31 ||
[Analyze grammar]

trivargayuktā prājñānāmārambhā bharatarṣabha |
dharmārthāvanurudhyante trivargāsaṃbhave narāḥ || 32 ||
[Analyze grammar]

pṛthaktu viniviṣṭānāṃ dharmaṃ dhīro'nurudhyate |
madhyamo'rthaṃ kaliṃ bālaḥ kāmamevānurudhyate || 33 ||
[Analyze grammar]

indriyaiḥ prasṛto lobhāddharmaṃ viprajahāti yaḥ |
kāmārthāvanupāyena lipsamāno vinaśyati || 34 ||
[Analyze grammar]

kāmārthau lipsamānastu dharmamevāditaścaret |
na hi dharmādapaityarthaḥ kāmo vāpi kadācana || 35 ||
[Analyze grammar]

upāyaṃ dharmamevāhustrivargasya viśāṃ pate |
lipsamāno hi tenāśu kakṣe'gniriva vardhate || 36 ||
[Analyze grammar]

sa tvaṃ tātānupāyena lipsase bharatarṣabha |
ādhirājyaṃ mahaddīptaṃ prathitaṃ sarvarājasu || 37 ||
[Analyze grammar]

ātmānaṃ takṣati hyeṣa vanaṃ paraśunā yathā |
yaḥ samyagvartamāneṣu mithyā rājanpravartate || 38 ||
[Analyze grammar]

na tasya hi matiṃ chindyādyasya necchetparābhavam |
avicchinnasya dhīrasya kalyāṇe dhīyate matiḥ || 39 ||
[Analyze grammar]

tyaktātmānaṃ na bādheta triṣu lokeṣu bhārata |
apyanyaṃ prākṛtaṃ kiṃcitkimu tānpāṇḍavarṣabhān || 40 ||
[Analyze grammar]

amarṣavaśamāpanno na kiṃcidbudhyate naraḥ |
chidyate hyātataṃ sarvaṃ pramāṇaṃ paśya bhārata || 41 ||
[Analyze grammar]

śreyaste durjanāttāta pāṇḍavaiḥ saha saṃgamaḥ |
tairhi saṃprīyamāṇastvaṃ sarvānkāmānavāpsyasi || 42 ||
[Analyze grammar]

pāṇḍavairnirjitāṃ bhūmiṃ bhuñjāno rājasattama |
pāṇḍavānpṛṣṭhataḥ kṛtvā trāṇamāśaṃsase'nyataḥ || 43 ||
[Analyze grammar]

duḥśāsane durviṣahe karṇe cāpi sasaubale |
eteṣvaiśvaryamādhāya bhūtimicchasi bhārata || 44 ||
[Analyze grammar]

na caite tava paryāptā jñāne dharmārthayostathā |
vikrame cāpyaparyāptāḥ pāṇḍavānprati bhārata || 45 ||
[Analyze grammar]

na hīme sarvarājānaḥ paryāptāḥ sahitāstvayā |
kruddhasya bhīmasenasya prekṣituṃ mukhamāhave || 46 ||
[Analyze grammar]

idaṃ saṃnihitaṃ tāta samagraṃ pārthivaṃ balam |
ayaṃ bhīṣmastathā droṇaḥ karṇaścāyaṃ tathā kṛpaḥ || 47 ||
[Analyze grammar]

bhūriśravāḥ saumadattiraśvatthāmā jayadrathaḥ |
aśaktāḥ sarva evaite pratiyoddhuṃ dhanaṃjayam || 48 ||
[Analyze grammar]

ajeyo hyarjunaḥ kruddhaḥ sarvairapi surāsuraiḥ |
mānuṣairapi gandharvairmā yuddhe ceta ādhithāḥ || 49 ||
[Analyze grammar]

dṛśyatāṃ vā pumānkaścitsamagre pārthive bale |
yo'rjunaṃ samare prāpya svastimānāvrajedgṛhān || 50 ||
[Analyze grammar]

kiṃ te janakṣayeṇeha kṛtena bharatarṣabha |
yasmiñjite jitaṃ te syātpumānekaḥ sa dṛśyatām || 51 ||
[Analyze grammar]

yaḥ sa devānsagandharvānsayakṣāsurapannagān |
ajayatkhāṇḍavaprasthe kastaṃ yudhyeta mānavaḥ || 52 ||
[Analyze grammar]

tathā virāṭanagare śrūyate mahadadbhutam |
ekasya ca bahūnāṃ ca paryāptaṃ tannidarśanam || 53 ||
[Analyze grammar]

tamajeyamanādhṛṣyaṃ vijetuṃ jiṣṇumacyutam |
āśaṃsasīha samare vīramarjunamūrjitam || 54 ||
[Analyze grammar]

maddvitīyaṃ punaḥ pārthaṃ kaḥ prārthayitumarhati |
yuddhe pratīpamāyāntamapi sākṣātpuraṃdaraḥ || 55 ||
[Analyze grammar]

bāhubhyāmuddharedbhūmiṃ dahetkruddha imāḥ prajāḥ |
pātayettridivāddevānyo'rjunaṃ samare jayet || 56 ||
[Analyze grammar]

paśya putrāṃstathā bhrātṝñjñātīnsaṃbandhinastathā |
tvatkṛte na vinaśyeyurete bharatasattama || 57 ||
[Analyze grammar]

astu śeṣaṃ kauravāṇāṃ mā parābhūdidaṃ kulam |
kulaghna iti nocyethā naṣṭakīrtirnarādhipa || 58 ||
[Analyze grammar]

tvāmeva sthāpayiṣyanti yauvarājye mahārathāḥ |
mahārājye ca pitaraṃ dhṛtarāṣṭraṃ janeśvaram || 59 ||
[Analyze grammar]

mā tāta śriyamāyāntīmavamaṃsthāḥ samudyatām |
ardhaṃ pradāya pārthebhyo mahatīṃ śriyamāpsyasi || 60 ||
[Analyze grammar]

pāṇḍavaiḥ saṃśamaṃ kṛtvā kṛtvā ca suhṛdāṃ vacaḥ |
saṃprīyamāṇo mitraiśca ciraṃ bhadrāṇyavāpsyasi || 61 ||
[Analyze grammar]