Chapter 93

vaiśaṃpāyana uvāca |
teṣvāsīneṣu sarveṣu tūṣṇīṃbhūteṣu rājasu |
vākyamabhyādade kṛṣṇaḥ sudaṃṣṭro dundubhisvanaḥ || 1 ||
[Analyze grammar]

jīmūta iva gharmānte sarvāṃ saṃśrāvayansabhām |
dhṛtarāṣṭramabhiprekṣya samabhāṣata mādhavaḥ || 2 ||
[Analyze grammar]

kurūṇāṃ pāṇḍavānāṃ ca śamaḥ syāditi bhārata |
aprayatnena vīrāṇāmetadyatitumāgataḥ || 3 ||
[Analyze grammar]

rājannānyatpravaktavyaṃ tava niḥśreyasaṃ vacaḥ |
viditaṃ hyeva te sarvaṃ veditavyamariṃdama || 4 ||
[Analyze grammar]

idamadya kulaṃ śreṣṭhaṃ sarvarājasu pārthiva |
śrutavṛttopasaṃpannaṃ sarvaiḥ samuditaṃ guṇaiḥ || 5 ||
[Analyze grammar]

kṛpānukampā kāruṇyamānṛśaṃsyaṃ ca bhārata |
tathārjavaṃ kṣamā satyaṃ kuruṣvetadviśiṣyate || 6 ||
[Analyze grammar]

tasminnevaṃvidhe rājankule mahati tiṣṭhati |
tvannimittaṃ viśeṣeṇa neha yuktamasāṃpratam || 7 ||
[Analyze grammar]

tvaṃ hi vārayitā śreṣṭhaḥ kurūṇāṃ kurusattama |
mithyā pracaratāṃ tāta bāhyeṣvābhyantareṣu ca || 8 ||
[Analyze grammar]

te putrāstava kauravya duryodhanapurogamāḥ |
dharmārthau pṛṣṭhataḥ kṛtvā pracaranti nṛśaṃsavat || 9 ||
[Analyze grammar]

aśiṣṭā gatamaryādā lobhena hṛtacetasaḥ |
sveṣu bandhuṣu mukhyeṣu tadvettha bharatarṣabha || 10 ||
[Analyze grammar]

seyamāpanmahāghorā kuruṣveva samutthitā |
upekṣyamāṇā kauravya pṛthivīṃ ghātayiṣyati || 11 ||
[Analyze grammar]

śakyā ceyaṃ śamayituṃ tvaṃ cedicchasi bhārata |
na duṣkaro hyatra śamo mato me bharatarṣabha || 12 ||
[Analyze grammar]

tvayyadhīnaḥ śamo rājanmayi caiva viśāṃ pate |
putrānsthāpaya kauravya sthāpayiṣyāmyahaṃ parān || 13 ||
[Analyze grammar]

ājñā tava hi rājendra kāryā putraiḥ sahānvayaiḥ |
hitaṃ balavadapyeṣāṃ tiṣṭhatāṃ tava śāsane || 14 ||
[Analyze grammar]

tava caiva hitaṃ rājanpāṇḍavānāmatho hitam |
śame prayatamānasya mama śāsanakāṅkṣiṇām || 15 ||
[Analyze grammar]

svayaṃ niṣkalamālakṣya saṃvidhatsva viśāṃ pate |
sahabhūtāstu bharatāstavaiva syurjaneśvara || 16 ||
[Analyze grammar]

dharmārthayostiṣṭha rājanpāṇḍavairabhirakṣitaḥ |
na hi śakyāstathābhūtā yatnādapi narādhipa || 17 ||
[Analyze grammar]

na hi tvāṃ pāṇḍavairjetuṃ rakṣyamāṇaṃ mahātmabhiḥ |
indro'pi devaiḥ sahitaḥ prasaheta kuto nṛpāḥ || 18 ||
[Analyze grammar]

yatra bhīṣmaśca droṇaśca kṛpaḥ karṇo viviṃśatiḥ |
aśvatthāmā vikarṇaśca somadatto'tha bāhlikaḥ || 19 ||
[Analyze grammar]

saindhavaśca kaliṅgaśca kāmbojaśca sudakṣiṇaḥ |
yudhiṣṭhiro bhīmasenaḥ savyasācī yamau tathā || 20 ||
[Analyze grammar]

sātyakiśca mahātejā yuyutsuśca mahārathaḥ |
ko nu tānviparītātmā yudhyeta bharatarṣabha || 21 ||
[Analyze grammar]

lokasyeśvaratāṃ bhūyaḥ śatrubhiścāpradhṛṣyatām |
prāpsyasi tvamamitraghna sahitaḥ kurupāṇḍavaiḥ || 22 ||
[Analyze grammar]

tasya te pṛthivīpālāstvatsamāḥ pṛthivīpate |
śreyāṃsaścaiva rājānaḥ saṃdhāsyante paraṃtapa || 23 ||
[Analyze grammar]

sa tvaṃ putraiśca pautraiśca bhrātṛbhiḥ pitṛbhistathā |
suhṛdbhiḥ sarvato guptaḥ sukhaṃ śakṣyasi jīvitum || 24 ||
[Analyze grammar]

etāneva purodhāya satkṛtya ca yathā purā |
akhilāṃ bhokṣyase sarvāṃ pṛthivīṃ pṛthivīpate || 25 ||
[Analyze grammar]

etairhi sahitaḥ sarvaiḥ pāṇḍavaiḥ svaiśca bhārata |
anyānvijeṣyase śatrūneṣa svārthastavākhilaḥ || 26 ||
[Analyze grammar]

tairevopārjitāṃ bhūmiṃ bhokṣyase ca paraṃtapa |
yadi saṃpatsyase putraiḥ sahāmātyairnarādhipa || 27 ||
[Analyze grammar]

saṃyuge vai mahārāja dṛśyate sumahānkṣayaḥ |
kṣaye cobhayato rājankaṃ dharmamanupaśyasi || 28 ||
[Analyze grammar]

pāṇḍavairnihataiḥ saṃkhye putrairvāpi mahābalaiḥ |
yadvindethāḥ sukhaṃ rājaṃstadbrūhi bharatarṣabha || 29 ||
[Analyze grammar]

śūrāśca hi kṛtāstrāśca sarve yuddhābhikāṅkṣiṇaḥ |
pāṇḍavāstāvakāścaiva tānrakṣa mahato bhayāt || 30 ||
[Analyze grammar]

na paśyema kurūnsarvānpāṇḍavāṃścaiva saṃyuge |
kṣīṇānubhayataḥ śūrānrathebhyo rathibhirhatān || 31 ||
[Analyze grammar]

samavetāḥ pṛthivyāṃ hi rājāno rājasattama |
amarṣavaśamāpannā nāśayeyurimāḥ prajāḥ || 32 ||
[Analyze grammar]

trāhi rājannimaṃ lokaṃ na naśyeyurimāḥ prajāḥ |
tvayi prakṛtimāpanne śeṣaṃ syātkurunandana || 33 ||
[Analyze grammar]

śuklā vadānyā hrīmanta āryāḥ puṇyābhijātayaḥ |
anyonyasacivā rājaṃstānpāhi mahato bhayāt || 34 ||
[Analyze grammar]

śiveneme bhūmipālāḥ samāgamya parasparam |
saha bhuktvā ca pītvā ca pratiyāntu yathāgṛham || 35 ||
[Analyze grammar]

suvāsasaḥ sragviṇaśca satkṛtya bharatarṣabha |
amarṣāṃśca nirākṛtya vairāṇi ca paraṃtapa || 36 ||
[Analyze grammar]

hārdaṃ yatpāṇḍaveṣvāsītprāpte'sminnāyuṣaḥ kṣaye |
tadeva te bhavatvadya śaśvacca bharatarṣabha || 37 ||
[Analyze grammar]

bālā vihīnāḥ pitrā te tvayaiva parivardhitāḥ |
tānpālaya yathānyāyaṃ putrāṃśca bharatarṣabha || 38 ||
[Analyze grammar]

bhavataiva hi rakṣyāste vyasaneṣu viśeṣataḥ |
mā te dharmastathaivārtho naśyeta bharatarṣabha || 39 ||
[Analyze grammar]

āhustvāṃ pāṇḍavā rājannabhivādya prasādya ca |
bhavataḥ śāsanādduḥkhamanubhūtaṃ sahānugaiḥ || 40 ||
[Analyze grammar]

dvādaśemāni varṣāṇi vane nirvyuṣitāni naḥ |
trayodaśaṃ tathājñātaiḥ sajane parivatsaram || 41 ||
[Analyze grammar]

sthātā naḥ samaye tasminpiteti kṛtaniścayāḥ |
nāhāsma samayaṃ tāta tacca no brāhmaṇā viduḥ || 42 ||
[Analyze grammar]

tasminnaḥ samaye tiṣṭha sthitānāṃ bharatarṣabha |
nityaṃ saṃkleśitā rājansvarājyāṃśaṃ labhemahi || 43 ||
[Analyze grammar]

tvaṃ dharmamarthaṃ yuñjānaḥ samyaṅnastrātumarhasi |
gurutvaṃ bhavati prekṣya bahūnkleśāṃstitikṣmahe || 44 ||
[Analyze grammar]

sa bhavānmātṛpitṛvadasmāsu pratipadyatām |
gurorgarīyasī vṛttiryā ca śiṣyasya bhārata || 45 ||
[Analyze grammar]

pitrā sthāpayitavyā hi vayamutpathamāsthitāḥ |
saṃsthāpaya pathiṣvasmāṃstiṣṭha rājansvavartmani || 46 ||
[Analyze grammar]

āhuścemāṃ pariṣadaṃ putrāste bharatarṣabha |
dharmajñeṣu sabhāsatsu neha yuktamasāṃpratam || 47 ||
[Analyze grammar]

yatra dharmo hyadharmeṇa satyaṃ yatrānṛtena ca |
hanyate prekṣamāṇānāṃ hatāstatra sabhāsadaḥ || 48 ||
[Analyze grammar]

viddho dharmo hyadharmeṇa sabhāṃ yatra prapadyate |
na cāsya śalyaṃ kṛntanti viddhāstatra sabhāsadaḥ |
dharma etānārujati yathā nadyanukūlajān || 49 ||
[Analyze grammar]

ye dharmamanupaśyantastūṣṇīṃ dhyāyanta āsate |
te satyamāhurdharmaṃ ca nyāyyaṃ ca bharatarṣabha || 50 ||
[Analyze grammar]

śakyaṃ kimanyadvaktuṃ te dānādanyajjaneśvara |
bruvantu vā mahīpālāḥ sabhāyāṃ ye samāsate |
dharmārthau saṃpradhāryaiva yadi satyaṃ bravīmyaham || 51 ||
[Analyze grammar]

pramuñcemānmṛtyupāśātkṣatriyānkṣatriyarṣabha |
praśāmya bharataśreṣṭha mā manyuvaśamanvagāḥ || 52 ||
[Analyze grammar]

pitryaṃ tebhyaḥ pradāyāṃśaṃ pāṇḍavebhyo yathocitam |
tataḥ saputraḥ siddhārtho bhuṅkṣva bhogānparaṃtapa || 53 ||
[Analyze grammar]

ajātaśatruṃ jānīṣe sthitaṃ dharme satāṃ sadā |
saputre tvayi vṛttiṃ ca vartate yāṃ narādhipa || 54 ||
[Analyze grammar]

dāhitaśca nirastaśca tvāmevopāśritaḥ punaḥ |
indraprasthaṃ tvayaivāsau saputreṇa vivāsitaḥ || 55 ||
[Analyze grammar]

sa tatra nivasansarvānvaśamānīya pārthivān |
tvanmukhānakarodrājanna ca tvāmatyavartata || 56 ||
[Analyze grammar]

tasyaivaṃ vartamānasya saubalena jihīrṣatā |
rāṣṭrāṇi dhanadhānyaṃ ca prayuktaḥ paramopadhiḥ || 57 ||
[Analyze grammar]

sa tāmavasthāṃ saṃprāpya kṛṣṇāṃ prekṣya sabhāgatām |
kṣatradharmādameyātmā nākampata yudhiṣṭhiraḥ || 58 ||
[Analyze grammar]

ahaṃ tu tava teṣāṃ ca śreya icchāmi bhārata |
dharmādarthātsukhāccaiva mā rājannīnaśaḥ prajāḥ || 59 ||
[Analyze grammar]

anarthamarthaṃ manvānā arthaṃ vānarthamātmanaḥ |
lobhe'tiprasṛtānputrānnigṛhṇīṣva viśāṃ pate || 60 ||
[Analyze grammar]

sthitāḥ śuśrūṣituṃ pārthāḥ sthitā yoddhumariṃdamāḥ |
yatte pathyatamaṃ rājaṃstasmiṃstiṣṭha paraṃtapa || 61 ||
[Analyze grammar]

tadvākyaṃ pārthivāḥ sarve hṛdayaiḥ samapūjayan |
na tatra kaścidvaktuṃ hi vācaṃ prākrāmadagrataḥ || 62 ||
[Analyze grammar]