Chapter 34

dhṛtarāṣṭra uvāca |
jāgrato dahyamānasya yatkāryamanupaśyasi |
tadbrūhi tvaṃ hi nastāta dharmārthakuśalaḥ śuciḥ || 1 ||
[Analyze grammar]

tvaṃ māṃ yathāvadvidura praśādhi prajñāpūrvaṃ sarvamajātaśatroḥ |
yanmanyase pathyamadīnasattva śreyaskaraṃ brūhi tadvai kurūṇām || 2 ||
[Analyze grammar]

pāpāśaṅkī pāpamevānupaśyanpṛcchāmi tvāṃ vyākulenātmanāham |
kave tanme brūhi sarvaṃ yathāvanmanīṣitaṃ sarvamajātaśatroḥ || 3 ||
[Analyze grammar]

vidura uvāca |
śubhaṃ vā yadi vā pāpaṃ dveṣyaṃ vā yadi vā priyam |
apṛṣṭastasya tadbrūyādyasya necchetparābhavam || 4 ||
[Analyze grammar]

tasmādvakṣyāmi te rājanbhavamicchankurūnprati |
vacaḥ śreyaskaraṃ dharmyaṃ bruvatastannibodha me || 5 ||
[Analyze grammar]

mithyopetāni karmāṇi sidhyeyuryāni bhārata |
anupāyaprayuktāni mā sma teṣu manaḥ kṛthāḥ || 6 ||
[Analyze grammar]

tathaiva yogavihitaṃ na sidhyetkarma yannṛpa |
upāyayuktaṃ medhāvī na tatra glapayenmanaḥ || 7 ||
[Analyze grammar]

anubandhānavekṣeta sānubandheṣu karmasu |
saṃpradhārya ca kurvīta na vegena samācaret || 8 ||
[Analyze grammar]

anubandhaṃ ca saṃprekṣya vipākāṃścaiva karmaṇām |
utthānamātmanaścaiva dhīraḥ kurvīta vā na vā || 9 ||
[Analyze grammar]

yaḥ pramāṇaṃ na jānāti sthāne vṛddhau tathā kṣaye |
kośe janapade daṇḍe na sa rājye'vatiṣṭhate || 10 ||
[Analyze grammar]

yastvetāni pramāṇāni yathoktānyanupaśyati |
yukto dharmārthayorjñāne sa rājyamadhigacchati || 11 ||
[Analyze grammar]

na rājyaṃ prāptamityeva vartitavyamasāṃpratam |
śriyaṃ hyavinayo hanti jarā rūpamivottamam || 12 ||
[Analyze grammar]

bhakṣyottamapraticchannaṃ matsyo baḍiśamāyasam |
rūpābhipātī grasate nānubandhamavekṣate || 13 ||
[Analyze grammar]

yacchakyaṃ grasituṃ grasyaṃ grastaṃ pariṇamecca yat |
hitaṃ ca pariṇāme yattadadyaṃ bhūtimicchatā || 14 ||
[Analyze grammar]

vanaspaterapakvāni phalāni pracinoti yaḥ |
sa nāpnoti rasaṃ tebhyo bījaṃ cāsya vinaśyati || 15 ||
[Analyze grammar]

yastu pakvamupādatte kāle pariṇataṃ phalam |
phalādrasaṃ sa labhate bījāccaiva phalaṃ punaḥ || 16 ||
[Analyze grammar]

yathā madhu samādatte rakṣanpuṣpāṇi ṣaṭpadaḥ |
tadvadarthānmanuṣyebhya ādadyādavihiṃsayā || 17 ||
[Analyze grammar]

puṣpaṃ puṣpaṃ vicinvīta mūlacchedaṃ na kārayet |
mālākāra ivārāme na yathāṅgārakārakaḥ || 18 ||
[Analyze grammar]

kiṃ nu me syādidaṃ kṛtvā kiṃ nu me syādakurvataḥ |
iti karmāṇi saṃcintya kuryādvā puruṣo na vā || 19 ||
[Analyze grammar]

anārabhyā bhavantyarthāḥ kecinnityaṃ tathāgatāḥ |
kṛtaḥ puruṣakāro'pi bhavedyeṣu nirarthakaḥ || 20 ||
[Analyze grammar]

kāṃścidarthānnaraḥ prājño laghumūlānmahāphalān |
kṣipramārabhate kartuṃ na vighnayati tādṛśān || 21 ||
[Analyze grammar]

ṛju paśyati yaḥ sarvaṃ cakṣuṣānupibanniva |
āsīnamapi tūṣṇīkamanurajyanti taṃ prajāḥ || 22 ||
[Analyze grammar]

cakṣuṣā manasā vācā karmaṇā ca caturvidham |
prasādayati lokaṃ yaḥ taṃ loko'nuprasīdati || 23 ||
[Analyze grammar]

yasmāttrasyanti bhūtāni mṛgavyādhānmṛgā iva |
sāgarāntāmapi mahīṃ labdhvā sa parihīyate || 24 ||
[Analyze grammar]

pitṛpaitāmahaṃ rājyaṃ prāptavānsvena tejasā |
vāyurabhramivāsādya bhraṃśayatyanaye sthitaḥ || 25 ||
[Analyze grammar]

dharmamācarato rājñaḥ sadbhiścaritamāditaḥ |
vasudhā vasusaṃpūrṇā vardhate bhūtivardhanī || 26 ||
[Analyze grammar]

atha saṃtyajato dharmamadharmaṃ cānutiṣṭhataḥ |
pratisaṃveṣṭate bhūmiragnau carmāhitaṃ yathā || 27 ||
[Analyze grammar]

ya eva yatnaḥ kriyate pararāṣṭrāvamardane |
sa eva yatnaḥ kartavyaḥ svarāṣṭraparipālane || 28 ||
[Analyze grammar]

dharmeṇa rājyaṃ vindeta dharmeṇa paripālayet |
dharmamūlāṃ śriyaṃ prāpya na jahāti na hīyate || 29 ||
[Analyze grammar]

apyunmattātpralapato bālācca parisarpataḥ |
sarvataḥ sāramādadyādaśmabhya iva kāñcanam || 30 ||
[Analyze grammar]

suvyāhṛtāni sudhiyāṃ sukṛtāni tatastataḥ |
saṃcinvandhīra āsīta śilāhārī śilaṃ yathā || 31 ||
[Analyze grammar]

gandhena gāvaḥ paśyanti vedaiḥ paśyanti brāhmaṇāḥ |
cāraiḥ paśyanti rājānaścakṣurbhyāmitare janāḥ || 32 ||
[Analyze grammar]

bhūyāṃsaṃ labhate kleśaṃ yā gaurbhavati durduhā |
atha yā suduhā rājannaiva tāṃ vinayantyapi || 33 ||
[Analyze grammar]

yadataptaṃ praṇamati na tatsaṃtāpayantyapi |
yacca svayaṃ nataṃ dāru na tatsaṃnāmayantyapi || 34 ||
[Analyze grammar]

etayopamayā dhīraḥ saṃnameta balīyase |
indrāya sa praṇamate namate yo balīyase || 35 ||
[Analyze grammar]

parjanyanāthāḥ paśavo rājāno mitrabāndhavāḥ |
patayo bāndhavāḥ strīṇāṃ brāhmaṇā vedabāndhavāḥ || 36 ||
[Analyze grammar]

satyena rakṣyate dharmo vidyā yogena rakṣyate |
mṛjayā rakṣyate rūpaṃ kulaṃ vṛttena rakṣyate || 37 ||
[Analyze grammar]

mānena rakṣyate dhānyamaśvānrakṣatyanukramaḥ |
abhīkṣṇadarśanādgāvaḥ striyo rakṣyāḥ kucelataḥ || 38 ||
[Analyze grammar]

na kulaṃ vṛttahīnasya pramāṇamiti me matiḥ |
antyeṣvapi hi jātānāṃ vṛttameva viśiṣyate || 39 ||
[Analyze grammar]

ya īrṣyuḥ paravitteṣu rūpe vīrye kulānvaye |
sukhe saubhāgyasatkāre tasya vyādhiranantakaḥ || 40 ||
[Analyze grammar]

akāryakaraṇādbhītaḥ kāryāṇāṃ ca vivarjanāt |
akāle mantrabhedācca yena mādyenna tatpibet || 41 ||
[Analyze grammar]

vidyāmado dhanamadastṛtīyo'bhijano madaḥ |
ete madāvaliptānāmeta eva satāṃ damāḥ || 42 ||
[Analyze grammar]

asanto'bhyarthitāḥ sadbhiḥ kiṃcitkāryaṃ kadācana |
manyante santamātmānamasantamapi viśrutam || 43 ||
[Analyze grammar]

gatirātmavatāṃ santaḥ santa eva satāṃ gatiḥ |
asatāṃ ca gatiḥ santo na tvasantaḥ satāṃ gatiḥ || 44 ||
[Analyze grammar]

jitā sabhā vastravatā samāśā gomatā jitā |
adhvā jito yānavatā sarvaṃ śīlavatā jitam || 45 ||
[Analyze grammar]

śīlaṃ pradhānaṃ puruṣe tadyasyeha praṇaśyati |
na tasya jīvitenārtho na dhanena na bandhubhiḥ || 46 ||
[Analyze grammar]

āḍhyānāṃ māṃsaparamaṃ madhyānāṃ gorasottaram |
lavaṇottaraṃ daridrāṇāṃ bhojanaṃ bharatarṣabha || 47 ||
[Analyze grammar]

saṃpannataramevānnaṃ daridrā bhuñjate sadā |
kṣutsvādutāṃ janayati sā cāḍhyeṣu sudurlabhā || 48 ||
[Analyze grammar]

prāyeṇa śrīmatāṃ loke bhoktuṃ śaktirna vidyate |
daridrāṇāṃ tu rājendra api kāṣṭhaṃ hi jīryate || 49 ||
[Analyze grammar]

avṛttirbhayamantyānāṃ madhyānāṃ maraṇādbhayam |
uttamānāṃ tu martyānāmavamānātparaṃ bhayam || 50 ||
[Analyze grammar]

aiśvaryamadapāpiṣṭhā madāḥ pānamadādayaḥ |
aiśvaryamadamatto hi nāpatitvā vibudhyate || 51 ||
[Analyze grammar]

indriyairindriyārtheṣu vartamānairanigrahaiḥ |
tairayaṃ tāpyate loko nakṣatrāṇi grahairiva || 52 ||
[Analyze grammar]

yo jitaḥ pañcavargeṇa sahajenātmakarśinā |
āpadastasya vardhante śuklapakṣa ivoḍurāṭ || 53 ||
[Analyze grammar]

avijitya ya ātmānamamātyānvijigīṣate |
amitrānvājitāmātyaḥ so'vaśaḥ parihīyate || 54 ||
[Analyze grammar]

ātmānameva prathamaṃ deśarūpeṇa yo jayet |
tato'mātyānamitrāṃśca na moghaṃ vijigīṣate || 55 ||
[Analyze grammar]

vaśyendriyaṃ jitāmātyaṃ dhṛtadaṇḍaṃ vikāriṣu |
parīkṣyakāriṇaṃ dhīramatyantaṃ śrīrniṣevate || 56 ||
[Analyze grammar]

rathaḥ śarīraṃ puruṣasya rājannātmā niyantendriyāṇyasya cāśvāḥ |
tairapramattaḥ kuśalaḥ sadaśvairdāntaiḥ sukhaṃ yāti rathīva dhīraḥ || 57 ||
[Analyze grammar]

etānyanigṛhītāni vyāpādayitumapyalam |
avidheyā ivādāntā hayāḥ pathi kusārathim || 58 ||
[Analyze grammar]

anarthamarthataḥ paśyannarthaṃ caivāpyanarthataḥ |
indriyaiḥ prasṛto bālaḥ suduḥkhaṃ manyate sukham || 59 ||
[Analyze grammar]

dharmārthau yaḥ parityajya syādindriyavaśānugaḥ |
śrīprāṇadhanadārebhya kṣipraṃ sa parihīyate || 60 ||
[Analyze grammar]

arthānāmīśvaro yaḥ syādindriyāṇāmanīśvaraḥ |
indriyāṇāmanaiśvaryādaiśvaryādbhraśyate hi saḥ || 61 ||
[Analyze grammar]

ātmanātmānamanvicchenmanobuddhīndriyairyataiḥ |
ātmaiva hyātmano bandhurātmaiva ripurātmanaḥ || 62 ||
[Analyze grammar]

kṣudrākṣeṇeva jālena jhaṣāvapihitāvubhau |
kāmaśca rājankrodhaśca tau prajñānaṃ vilumpataḥ || 63 ||
[Analyze grammar]

samavekṣyeha dharmārthau saṃbhārānyo'dhigacchati |
sa vai saṃbhṛtasaṃbhāraḥ satataṃ sukhamedhate || 64 ||
[Analyze grammar]

yaḥ pañcābhyantarāñśatrūnavijitya matikṣayān |
jigīṣati ripūnanyānripavo'bhibhavanti tam || 65 ||
[Analyze grammar]

dṛśyante hi durātmāno vadhyamānāḥ svakarmabhiḥ |
indriyāṇāmanīśatvādrājāno rājyavibhramaiḥ || 66 ||
[Analyze grammar]

asaṃtyāgātpāpakṛtāmapāpāṃstulyo daṇḍaḥ spṛśate miśrabhāvāt |
śuṣkeṇārdraṃ dahyate miśrabhāvāttasmātpāpaiḥ saha saṃdhiṃ na kuryāt || 67 ||
[Analyze grammar]

nijānutpatataḥ śatrūnpañca pañcaprayojanān |
yo mohānna nigṛhṇāti tamāpadgrasate naram || 68 ||
[Analyze grammar]

anasūyārjavaṃ śaucaṃ saṃtoṣaḥ priyavāditā |
damaḥ satyamanāyāso na bhavanti durātmanām || 69 ||
[Analyze grammar]

ātmajñānamanāyāsastitikṣā dharmanityatā |
vākcaiva guptā dānaṃ ca naitānyantyeṣu bhārata || 70 ||
[Analyze grammar]

ākrośaparivādābhyāṃ vihiṃsantyabudhā budhān |
vaktā pāpamupādatte kṣamamāṇo vimucyate || 71 ||
[Analyze grammar]

hiṃsā balamasādhūnāṃ rājñāṃ daṇḍavidhirbalam |
śuśrūṣā tu balaṃ strīṇāṃ kṣamā guṇavatāṃ balam || 72 ||
[Analyze grammar]

vāksaṃyamo hi nṛpate suduṣkaratamo mataḥ |
arthavacca vicitraṃ ca na śakyaṃ bahu bhāṣitum || 73 ||
[Analyze grammar]

abhyāvahati kalyāṇaṃ vividhā vāksubhāṣitā |
saiva durbhāṣitā rājannanarthāyopapadyate || 74 ||
[Analyze grammar]

saṃrohati śarairviddhaṃ vanaṃ paraśunā hatam |
vācā duruktaṃ bībhatsaṃ na saṃrohati vākkṣatam || 75 ||
[Analyze grammar]

karṇinālīkanārācā nirharanti śarīrataḥ |
vākśalyastu na nirhartuṃ śakyo hṛdiśayo hi saḥ || 76 ||
[Analyze grammar]

vāksāyakā vadanānniṣpatanti yairāhataḥ śocati rātryahāni |
parasya nāmarmasu te patanti tānpaṇḍito nāvasṛjetpareṣu || 77 ||
[Analyze grammar]

yasmai devāḥ prayacchanti puruṣāya parābhavam |
buddhiṃ tasyāpakarṣanti so'pācīnāni paśyati || 78 ||
[Analyze grammar]

buddhau kaluṣabhūtāyāṃ vināśe pratyupasthite |
anayo nayasaṃkāśo hṛdayānnāpasarpati || 79 ||
[Analyze grammar]

seyaṃ buddhiḥ parītā te putrāṇāṃ tava bhārata |
pāṇḍavānāṃ virodhena na caināmavabudhyase || 80 ||
[Analyze grammar]

rājā lakṣaṇasaṃpannastrailokyasyāpi yo bhavet |
śiṣyaste śāsitā so'stu dhṛtarāṣṭra yudhiṣṭhiraḥ || 81 ||
[Analyze grammar]

atīva sarvānputrāṃste bhāgadheyapuraskṛtaḥ |
tejasā prajñayā caiva yukto dharmārthatattvavit || 82 ||
[Analyze grammar]

ānṛśaṃsyādanukrośādyo'sau dharmabhṛtāṃ varaḥ |
gauravāttava rājendra bahūnkleśāṃstitikṣati || 83 ||
[Analyze grammar]