Chapter 22

dhṛtarāṣṭra uvāca |
prāptānāhuḥ saṃjaya pāṇḍuputrānupaplavye tānvijānīhi gatvā |
ajātaśatruṃ ca sabhājayethā diṣṭyānagha grāmamupasthitastvam || 1 ||
[Analyze grammar]

sarvānvadeḥ saṃjaya svastimantaḥ kṛcchraṃ vāsamatadarhā niruṣya |
teṣāṃ śāntirvidyate'smāsu śīghraṃ mithyopetānāmupakāriṇāṃ satām || 2 ||
[Analyze grammar]

nāhaṃ kvacitsaṃjaya pāṇḍavānāṃ mithyāvṛttiṃ kāṃcana jātvapaśyam |
sarvāṃ śriyaṃ hyātmavīryeṇa labdhvā paryākārṣuḥ pāṇḍavā mahyameva || 3 ||
[Analyze grammar]

doṣaṃ hyeṣāṃ nādhigacche parīkṣannityaṃ kaṃcidyena garheya pārthān |
dharmārthābhyāṃ karma kurvanti nityaṃ sukhapriyā nānurudhyanti kāmān || 4 ||
[Analyze grammar]

gharmaṃ śītaṃ kṣutpipāse tathaiva nidrāṃ tandrīṃ krodhaharṣau pramādam |
dhṛtyā caiva prajñayā cābhibhūya dharmārthayogānprayatanti pārthāḥ || 5 ||
[Analyze grammar]

tyajanti mitreṣu dhanāni kāle na saṃvāsājjīryati maitrameṣām |
yathārhamānārthakarā hi pārthāsteṣāṃ dveṣṭā nāstyājamīḍhasya pakṣe || 6 ||
[Analyze grammar]

anyatra pāpādviṣamānmandabuddherduryodhanātkṣudratarācca karṇāt |
teṣāṃ hīme hīnasukhapriyāṇāṃ mahātmanāṃ saṃjanayanti tejaḥ || 7 ||
[Analyze grammar]

utthānavīryaḥ sukhamedhamāno duryodhanaḥ sukṛtaṃ manyate tat |
teṣāṃ bhāgaṃ yacca manyeta bālaḥ śakyaṃ hartuṃ jīvatāṃ pāṇḍavānām || 8 ||
[Analyze grammar]

yasyārjunaḥ padavīṃ keśavaśca vṛkodaraḥ sātyako'jātaśatroḥ |
mādrīputrau sṛñjayāścāpi sarve purā yuddhātsādhu tasya pradānam || 9 ||
[Analyze grammar]

sa hyevaikaḥ pṛthivīṃ savyasācī gāṇḍīvadhanvā praṇudedrathasthaḥ |
tathā viṣṇuḥ keśavo'pyapradhṛṣyo lokatrayasyādhipatirmahātmā || 10 ||
[Analyze grammar]

tiṣṭheta kastasya martyaḥ purastādyaḥ sarvadeveṣu vareṇya īḍyaḥ |
parjanyaghoṣānpravapañśaraughānpataṃgasaṃghāniva śīghravegān || 11 ||
[Analyze grammar]

diśaṃ hyudīcīmapi cottarānkurūngāṇḍīvadhanvaikaratho jigāya |
dhanaṃ caiṣāmāharatsavyasācī senānugānbalidāṃścaiva cakre || 12 ||
[Analyze grammar]

yaścaiva devānkhāṇḍave savyasācī gāṇḍīvadhanvā prajigāya sendrān |
upāharatphalguno jātavedase yaśo mānaṃ vardhayanpāṇḍavānām || 13 ||
[Analyze grammar]

gadābhṛtāṃ nādya samo'sti bhīmāddhastyāroho nāsti samaśca tasya |
rathe'rjunādāhurahīnamenaṃ bāhvorbale cāyutanāgavīryam || 14 ||
[Analyze grammar]

suśikṣitaḥ kṛtavairastarasvī dahetkruddhastarasā dhārtarāṣṭrān |
sadātyamarṣī balavānna śakyo yuddhe jetuṃ vāsavenāpi sākṣāt || 15 ||
[Analyze grammar]

sucetasau balinau śīghrahastau suśikṣitau bhrātarau phalgunena |
śyenau yathā pakṣipūgānrujantau mādrīputrau neha kurūnviśetām || 16 ||
[Analyze grammar]

teṣāṃ madhye vartamānastarasvī dhṛṣṭadyumnaḥ pāṇḍavānāmihaikaḥ |
sahāmātyaḥ somakānāṃ prabarhaḥ saṃtyaktātmā pāṇḍavānāṃ jayāya || 17 ||
[Analyze grammar]

sahoṣitaścaritārtho vayaḥsthaḥ śālveyānāmadhipo vai virāṭaḥ |
saha putraiḥ pāṇḍavārthe ca śaśvadyudhiṣṭhiraṃ bhakta iti śrutaṃ me || 18 ||
[Analyze grammar]

avaruddhā balinaḥ kekayebhyo maheṣvāsā bhrātaraḥ pañca santi |
kekayebhyo rājyamākāṅkṣamāṇā yuddhārthinaścānuvasanti pārthān || 19 ||
[Analyze grammar]

sarve ca vīrāḥ pṛthivīpatīnāṃ samānītāḥ pāṇḍavārthe niviṣṭāḥ |
śūrānahaṃ bhaktimataḥ śṛṇomi prītyā yuktānsaṃśritāndharmarājam || 20 ||
[Analyze grammar]

giryāśrayā durganivāsinaśca yodhāḥ pṛthivyāṃ kulajā viśuddhāḥ |
mlecchāśca nānāyudhavīryavantaḥ samāgatāḥ pāṇḍavārthe niviṣṭāḥ || 21 ||
[Analyze grammar]

pāṇḍyaśca rājāmita indrakalpo yudhi pravīrairbahubhiḥ sametaḥ |
samāgataḥ pāṇḍavārthe mahātmā lokapravīro'prativīryatejāḥ || 22 ||
[Analyze grammar]

astraṃ droṇādarjunādvāsudevātkṛpādbhīṣmādyena kṛtaṃ śṛṇomi |
yaṃ taṃ kārṣṇipratimaṃ prāhurekaṃ sa sātyakiḥ pāṇḍavārthe niviṣṭaḥ || 23 ||
[Analyze grammar]

apāśritāścedikarūṣakāśca sarvotsāhairbhūmipālaiḥ sametāḥ |
teṣāṃ madhye sūryamivātapantaṃ śriyā vṛtaṃ cedipatiṃ jvalantam || 24 ||
[Analyze grammar]

astambhanīyaṃ yudhi manyamānaṃ jyākarṣatāṃ śreṣṭhatamaṃ pṛthivyām |
sarvotsāhaṃ kṣatriyāṇāṃ nihatya prasahya kṛṣṇastarasā mamarda || 25 ||
[Analyze grammar]

yaśomānau vardhayanyādavānāṃ purābhinacchiśupālaṃ samīke |
yasya sarve vardhayanti sma mānaṃ karūṣarājapramukhā narendrāḥ || 26 ||
[Analyze grammar]

tamasahyaṃ keśavaṃ tatra matvā sugrīvayuktena rathena kṛṣṇam |
saṃprādravaṃścedipatiṃ vihāya siṃhaṃ dṛṣṭvā kṣudramṛgā ivānye || 27 ||
[Analyze grammar]

yastaṃ pratīpastarasā pratyudīyādāśaṃsamāno dvairathe vāsudevam |
so'śeta kṛṣṇena hataḥ parāsurvātenevonmathitaḥ karṇikāraḥ || 28 ||
[Analyze grammar]

parākramaṃ me yadavedayanta teṣāmarthe saṃjaya keśavasya |
anusmaraṃstasya karmāṇi viṣṇorgāvalgaṇe nādhigacchāmi śāntim || 29 ||
[Analyze grammar]

na jātu tāñśatruranyaḥ saheta yeṣāṃ sa syādagraṇīrvṛṣṇisiṃhaḥ |
pravepate me hṛdayaṃ bhayena śrutvā kṛṣṇāvekarathe sametau || 30 ||
[Analyze grammar]

no cedgacchetsaṃgaraṃ mandabuddhistābhyāṃ suto me viparītacetāḥ |
no cetkurūnsaṃjaya nirdahetāmindrāviṣṇū daityasenāṃ yathaiva |
mato hi me śakrasamo dhanaṃjayaḥ sanātano vṛṣṇivīraśca viṣṇuḥ || 31 ||
[Analyze grammar]

dharmārāmo hrīniṣedhastarasvī kuntīputraḥ pāṇḍavo'jātaśatruḥ |
duryodhanena nikṛto manasvī no cetkruddhaḥ pradaheddhārtarāṣṭrān || 32 ||
[Analyze grammar]

nāhaṃ tathā hyarjunādvāsudevādbhīmādvāpi yamayorvā bibhemi |
yathā rājñaḥ krodhadīptasya sūta manyorahaṃ bhītataraḥ sadaiva || 33 ||
[Analyze grammar]

alaṃ tapobrahmacaryeṇa yuktaḥ saṃkalpo'yaṃ mānasastasya sidhyet |
tasya krodhaṃ saṃjayāhaṃ samīke sthāne jānanbhṛśamasmyadya bhītaḥ || 34 ||
[Analyze grammar]

sa gaccha śīghraṃ prahito rathena pāñcālarājasya camūṃ paretya |
ajātaśatruṃ kuśalaṃ sma pṛccheḥ punaḥ punaḥ prītiyuktaṃ vadestvam || 35 ||
[Analyze grammar]

janārdanaṃ cāpi sametya tāta mahāmātraṃ vīryavatāmudāram |
anāmayaṃ madvacanena pṛccherdhṛtarāṣṭraḥ pāṇḍavaiḥ śāntimīpsuḥ || 36 ||
[Analyze grammar]

na tasya kiṃcidvacanaṃ na kuryātkuntīputro vāsudevasya sūta |
priyaścaiṣāmātmasamaśca kṛṣṇo vidvāṃścaiṣāṃ karmaṇi nityayuktaḥ || 37 ||
[Analyze grammar]

samānīya pāṇḍavānsṛñjayāṃśca janārdanaṃ yuyudhānaṃ virāṭam |
anāmayaṃ madvacanena pṛccheḥ sarvāṃstathā draupadeyāṃśca pañca || 38 ||
[Analyze grammar]

yadyattatra prāptakālaṃ parebhyastvaṃ manyethā bhāratānāṃ hitaṃ ca |
tattadbhāṣethāḥ saṃjaya rājamadhye na mūrchayedyanna bhavecca yuddham || 39 ||
[Analyze grammar]