Chapter 10

indra uvāca |
sarvaṃ vyāptamidaṃ devā vṛtreṇa jagadavyayam |
na hyasya sadṛśaṃ kiṃcitpratighātāya yadbhavet || 1 ||
[Analyze grammar]

samartho hyabhavaṃ pūrvamasamartho'smi sāṃpratam |
kathaṃ kuryāṃ nu bhadraṃ vo duṣpradharṣaḥ sa me mataḥ || 2 ||
[Analyze grammar]

tejasvī ca mahātmā ca yuddhe cāmitavikramaḥ |
grasettribhuvanaṃ sarvaṃ sadevāsuramānuṣam || 3 ||
[Analyze grammar]

tasmādviniścayamimaṃ śṛṇudhvaṃ me divaukasaḥ |
viṣṇoḥ kṣayamupāgamya sametya ca mahātmanā |
tena saṃmantrya vetsyāmo vadhopāyaṃ durātmanaḥ || 4 ||
[Analyze grammar]

śalya uvāca |
evamukte maghavatā devāḥ sarṣigaṇāstadā |
śaraṇyaṃ śaraṇaṃ devaṃ jagmurviṣṇuṃ mahābalam || 5 ||
[Analyze grammar]

ūcuśca sarve deveśaṃ viṣṇuṃ vṛtrabhayārditāḥ |
tvayā lokāstrayaḥ krāntāstribhirvikramaṇaiḥ prabho || 6 ||
[Analyze grammar]

amṛtaṃ cāhṛtaṃ viṣṇo daityāśca nihatā raṇe |
baliṃ baddhvā mahādaityaṃ śakro devādhipaḥ kṛtaḥ || 7 ||
[Analyze grammar]

tvaṃ prabhuḥ sarvalokānāṃ tvayā sarvamidaṃ tatam |
tvaṃ hi deva mahādevaḥ sarvalokanamaskṛtaḥ || 8 ||
[Analyze grammar]

gatirbhava tvaṃ devānāṃ sendrāṇāmamarottama |
jagadvyāptamidaṃ sarvaṃ vṛtreṇāsurasūdana || 9 ||
[Analyze grammar]

viṣṇuruvāca |
avaśyaṃ karaṇīyaṃ me bhavatāṃ hitamuttamam |
tasmādupāyaṃ vakṣyāmi yathāsau na bhaviṣyati || 10 ||
[Analyze grammar]

gacchadhvaṃ sarṣigandharvā yatrāsau viśvarūpadhṛk |
sāma tasya prayuñjadhvaṃ tata enaṃ vijeṣyatha || 11 ||
[Analyze grammar]

bhaviṣyati gatirdevāḥ śakrasya mama tejasā |
adṛśyaśca pravekṣyāmi vajramasyāyudhottamam || 12 ||
[Analyze grammar]

gacchadhvamṛṣibhiḥ sārdhaṃ gandharvaiśca surottamāḥ |
vṛtrasya saha śakreṇa saṃdhiṃ kuruta māciram || 13 ||
[Analyze grammar]

śalya uvāca |
evamuktāstu devena ṛṣayastridaśāstathā |
yayuḥ sametya sahitāḥ śakraṃ kṛtvā puraḥsaram || 14 ||
[Analyze grammar]

samīpametya ca tadā sarva eva mahaujasaḥ |
taṃ tejasā prajvalitaṃ pratapantaṃ diśo daśa || 15 ||
[Analyze grammar]

grasantamiva lokāṃstrīnsūryācandramasau yathā |
dadṛśustatra te vṛtraṃ śakreṇa saha devatāḥ || 16 ||
[Analyze grammar]

ṛṣayo'tha tato'bhyetya vṛtramūcuḥ priyaṃ vacaḥ |
vyāptaṃ jagadidaṃ sarvaṃ tejasā tava durjaya || 17 ||
[Analyze grammar]

na ca śaknoṣi nirjetuṃ vāsavaṃ bhūrivikramam |
yudhyatoścāpi vāṃ kālo vyatītaḥ sumahāniha || 18 ||
[Analyze grammar]

pīḍyante ca prajāḥ sarvāḥ sadevāsuramānavāḥ |
sakhyaṃ bhavatu te vṛtra śakreṇa saha nityadā |
avāpsyasi sukhaṃ tvaṃ ca śakralokāṃśca śāśvatān || 19 ||
[Analyze grammar]

ṛṣivākyaṃ niśamyātha sa vṛtraḥ sumahābalaḥ |
uvāca tāṃstadā sarvānpraṇamya śirasāsuraḥ || 20 ||
[Analyze grammar]

sarve yūyaṃ mahābhāgā gandharvāścaiva sarvaśaḥ |
yadbrūta tacchrutaṃ sarvaṃ mamāpi śṛṇutānaghāḥ || 21 ||
[Analyze grammar]

saṃdhiḥ kathaṃ vai bhavitā mama śakrasya cobhayoḥ |
tejasorhi dvayordevāḥ sakhyaṃ vai bhavitā katham || 22 ||
[Analyze grammar]

ṛṣaya ūcuḥ |
sakṛtsatāṃ saṃgataṃ lipsitavyaṃ tataḥ paraṃ bhavitā bhavyameva |
nātikrametsatpuruṣeṇa saṃgataṃ tasmātsatāṃ saṃgataṃ lipsitavyam || 23 ||
[Analyze grammar]

dṛḍhaṃ satāṃ saṃgataṃ cāpi nityaṃ brūyāccārthaṃ hyarthakṛcchreṣu dhīraḥ |
mahārthavatsatpuruṣeṇa saṃgataṃ tasmātsantaṃ na jighāṃseta dhīraḥ || 24 ||
[Analyze grammar]

indraḥ satāṃ saṃmataśca nivāsaśca mahātmanām |
satyavādī hyadīnaśca dharmavitsuviniścitaḥ || 25 ||
[Analyze grammar]

tena te saha śakreṇa saṃdhirbhavatu śāśvataḥ |
evaṃ viśvāsamāgaccha mā te bhūdbuddhiranyathā || 26 ||
[Analyze grammar]

śalya uvāca |
maharṣivacanaṃ śrutvā tānuvāca mahādyutiḥ |
avaśyaṃ bhagavanto me mānanīyāstapasvinaḥ || 27 ||
[Analyze grammar]

bravīmi yadahaṃ devāstatsarvaṃ kriyatāmiha |
tataḥ sarvaṃ kariṣyāmi yadūcurmāṃ dvijarṣabhāḥ || 28 ||
[Analyze grammar]

na śuṣkeṇa na cārdreṇa nāśmanā na ca dāruṇā |
na śastreṇa na vajreṇa na divā na tathā niśi || 29 ||
[Analyze grammar]

vadhyo bhaveyaṃ viprendrāḥ śakrasya saha daivataiḥ |
evaṃ me rocate saṃdhiḥ śakreṇa saha nityadā || 30 ||
[Analyze grammar]

bāḍhamityeva ṛṣayastamūcurbharatarṣabha |
evaṃ kṛte tu saṃdhāne vṛtraḥ pramudito'bhavat || 31 ||
[Analyze grammar]

yattaḥ sadābhavaccāpi śakro'marṣasamanvitaḥ |
vṛtrasya vadhasaṃyuktānupāyānanucintayan |
randhrānveṣī samudvignaḥ sadābhūdbalavṛtrahā || 32 ||
[Analyze grammar]

sa kadācitsamudrānte tamapaśyanmahāsuram |
saṃdhyākāla upāvṛtte muhūrte ramyadāruṇe || 33 ||
[Analyze grammar]

tataḥ saṃcintya bhagavānvaradānaṃ mahātmanaḥ |
saṃdhyeyaṃ vartate raudrā na rātrirdivasaṃ na ca |
vṛtraścāvaśyavadhyo'yaṃ mama sarvaharo ripuḥ || 34 ||
[Analyze grammar]

yadi vṛtraṃ na hanmyadya vañcayitvā mahāsuram |
mahābalaṃ mahākāyaṃ na me śreyo bhaviṣyati || 35 ||
[Analyze grammar]

evaṃ saṃcintayanneva śakro viṣṇumanusmaran |
atha phenaṃ tadāpaśyatsamudre parvatopamam || 36 ||
[Analyze grammar]

nāyaṃ śuṣko na cārdro'yaṃ na ca śastramidaṃ tathā |
enaṃ kṣepsyāmi vṛtrasya kṣaṇādeva naśiṣyati || 37 ||
[Analyze grammar]

savajramatha phenaṃ taṃ kṣipraṃ vṛtre nisṛṣṭavān |
praviśya phenaṃ taṃ viṣṇuratha vṛtraṃ vyanāśayat || 38 ||
[Analyze grammar]

nihate tu tato vṛtre diśo vitimirābhavan |
pravavau ca śivo vāyuḥ prajāśca jahṛṣustadā || 39 ||
[Analyze grammar]

tato devāḥ sagandharvā yakṣarākṣasapannagāḥ |
ṛṣayaśca mahendraṃ tamastuvanvividhaiḥ stavaiḥ || 40 ||
[Analyze grammar]

namaskṛtaḥ sarvabhūtaiḥ sarvabhūtāni sāntvayan |
hataśatruḥ prahṛṣṭātmā vāsavaḥ saha daivataiḥ |
viṣṇuṃ tribhuvanaśreṣṭhaṃ pūjayāmāsa dharmavit || 41 ||
[Analyze grammar]

tato hate mahāvīrye vṛtre devabhayaṃkare |
anṛtenābhibhūto'bhūcchakraḥ paramadurmanāḥ |
traiśīrṣayābhibhūtaśca sa pūrvaṃ brahmahatyayā || 42 ||
[Analyze grammar]

so'ntamāśritya lokānāṃ naṣṭasaṃjño vicetanaḥ |
na prājñāyata devendrastvabhibhūtaḥ svakalmaṣaiḥ |
praticchanno vasatyapsu ceṣṭamāna ivoragaḥ || 43 ||
[Analyze grammar]

tataḥ pranaṣṭe devendre brahmahatyābhayārdite |
bhūmiḥ pradhvastasaṃkāśā nirvṛkṣā śuṣkakānanā |
vicchinnasrotaso nadyaḥ sarāṃsyanudakāni ca || 44 ||
[Analyze grammar]

saṃkṣobhaścāpi sattvānāmanāvṛṣṭikṛto'bhavat |
devāścāpi bhṛśaṃ trastāstathā sarve maharṣayaḥ || 45 ||
[Analyze grammar]

arājakaṃ jagatsarvamabhibhūtamupadravaiḥ |
tato bhītābhavandevāḥ ko no rājā bhavediti || 46 ||
[Analyze grammar]

divi devarṣayaścāpi devarājavinākṛtāḥ |
na ca sma kaściddevānāṃ rājyāya kurute manaḥ || 47 ||
[Analyze grammar]