Chapter 8

vaiśaṃpāyana uvāca |
śalyaḥ śrutvā tu dūtānāṃ sainyena mahatā vṛtaḥ |
abhyayātpāṇḍavānrājansaha putrairmahārathaiḥ || 1 ||
[Analyze grammar]

tasya senāniveśo'bhūdadhyardhamiva yojanam |
tathā hi bahulāṃ senāṃ sa bibharti nararṣabhaḥ || 2 ||
[Analyze grammar]

vicitrakavacāḥ śūrā vicitradhvajakārmukāḥ |
vicitrābharaṇāḥ sarve vicitrarathavāhanāḥ || 3 ||
[Analyze grammar]

svadeśaveṣābharaṇā vīrāḥ śatasahasraśaḥ |
tasya senāpraṇetāro babhūvuḥ kṣatriyarṣabhāḥ || 4 ||
[Analyze grammar]

vyathayanniva bhūtāni kampayanniva medinīm |
śanairviśrāmayansenāṃ sa yayau yena pāṇḍavaḥ || 5 ||
[Analyze grammar]

tato duryodhanaḥ śrutvā mahāsenaṃ mahāratham |
upāyāntamabhidrutya svayamānarca bhārata || 6 ||
[Analyze grammar]

kārayāmāsa pūjārthaṃ tasya duryodhanaḥ sabhāḥ |
ramaṇīyeṣu deśeṣu ratnacitrāḥ svalaṃkṛtāḥ || 7 ||
[Analyze grammar]

sa tāḥ sabhāḥ samāsādya pūjyamāno yathāmaraḥ |
duryodhanasya sacivairdeśe deśe yathārhataḥ |
ājagāma sabhāmanyāṃ devāvasathavarcasam || 8 ||
[Analyze grammar]

sa tatra viṣayairyuktaḥ kalyāṇairatimānuṣaiḥ |
mene'bhyadhikamātmānamavamene puraṃdaram || 9 ||
[Analyze grammar]

papraccha sa tataḥ preṣyānprahṛṣṭaḥ kṣatriyarṣabhaḥ |
yudhiṣṭhirasya puruṣāḥ ke nu cakruḥ sabhā imāḥ |
ānīyantāṃ sabhākārāḥ pradeyārhā hi me matāḥ || 10 ||
[Analyze grammar]

gūḍho duryodhanastatra darśayāmāsa mātulam |
taṃ dṛṣṭvā madrarājastu jñātvā yatnaṃ ca tasya tam |
pariṣvajyābravītprīta iṣṭo'rtho gṛhyatāmiti || 11 ||
[Analyze grammar]

duryodhana uvāca |
satyavāgbhava kalyāṇa varo vai mama dīyatām |
sarvasenāpraṇetā me bhavānbhavitumarhati || 12 ||
[Analyze grammar]

vaiśaṃpāyana uvāca |
kṛtamityabravīcchalyaḥ kimanyatkriyatāmiti |
kṛtamityeva gāndhāriḥ pratyuvāca punaḥ punaḥ || 13 ||
[Analyze grammar]

sa tathā śalyamāmantrya punarāyātsvakaṃ puram |
śalyo jagāma kaunteyānākhyātuṃ karma tasya tat || 14 ||
[Analyze grammar]

upaplavyaṃ sa gatvā tu skandhāvāraṃ praviśya ca |
pāṇḍavānatha tānsarvāñśalyastatra dadarśa ha || 15 ||
[Analyze grammar]

sametya tu mahābāhuḥ śalyaḥ pāṇḍusutaistadā |
pādyamarghyaṃ ca gāṃ caiva pratyagṛhṇādyathāvidhi || 16 ||
[Analyze grammar]

tataḥ kuśalapūrvaṃ sa madrarājo'risūdanaḥ |
prītyā paramayā yuktaḥ samāśliṣya yudhiṣṭhiram || 17 ||
[Analyze grammar]

tathā bhīmārjunau hṛṣṭau svasrīyau ca yamāvubhau |
āsane copaviṣṭastu śalyaḥ pārthamuvāca ha || 18 ||
[Analyze grammar]

kuśalaṃ rājaśārdūla kaccitte kurunandana |
araṇyavāsāddiṣṭyāsi vimukto jayatāṃ vara || 19 ||
[Analyze grammar]

suduṣkaraṃ kṛtaṃ rājannirjane vasatā vane |
bhrātṛbhiḥ saha rājendra kṛṣṇayā cānayā saha || 20 ||
[Analyze grammar]

ajñātavāsaṃ ghoraṃ ca vasatā duṣkaraṃ kṛtam |
duḥkhameva kutaḥ saukhyaṃ rājyabhraṣṭasya bhārata || 21 ||
[Analyze grammar]

duḥkhasyaitasya mahato dhārtarāṣṭrakṛtasya vai |
avāpsyasi sukhaṃ rājanhatvā śatrūnparaṃtapa || 22 ||
[Analyze grammar]

viditaṃ te mahārāja lokatattvaṃ narādhipa |
tasmāllobhakṛtaṃ kiṃcittava tāta na vidyate || 23 ||
[Analyze grammar]

tato'syākathayadrājā duryodhanasamāgamam |
tacca śuśrūṣitaṃ sarvaṃ varadānaṃ ca bhārata || 24 ||
[Analyze grammar]

yudhiṣṭhira uvāca |
sukṛtaṃ te kṛtaṃ rājanprahṛṣṭenāntarātmanā |
duryodhanasya yadvīra tvayā vācā pratiśrutam |
ekaṃ tvicchāmi bhadraṃ te kriyamāṇaṃ mahīpate || 25 ||
[Analyze grammar]

bhavāniha mahārāja vāsudevasamo yudhi |
karṇārjunābhyāṃ saṃprāpte dvairathe rājasattama |
karṇasya bhavatā kāryaṃ sārathyaṃ nātra saṃśayaḥ || 26 ||
[Analyze grammar]

tatra pālyo'rjuno rājanyadi matpriyamicchasi |
tejovadhaśca te kāryaḥ sauterasmajjayāvahaḥ |
akartavyamapi hyetatkartumarhasi mātula || 27 ||
[Analyze grammar]

śalya uvāca |
śṛṇu pāṇḍava bhadraṃ te yadbravīṣi durātmanaḥ |
tejovadhanimittaṃ māṃ sūtaputrasya saṃyuge || 28 ||
[Analyze grammar]

ahaṃ tasya bhaviṣyāmi saṃgrāme sārathirdhruvam |
vāsudevena hi samaṃ nityaṃ māṃ sa hi manyate || 29 ||
[Analyze grammar]

tasyāhaṃ kuruśārdūla pratīpamahitaṃ vacaḥ |
dhruvaṃ saṃkathayiṣyāmi yoddhukāmasya saṃyuge || 30 ||
[Analyze grammar]

yathā sa hṛtadarpaśca hṛtatejāśca pāṇḍava |
bhaviṣyati sukhaṃ hantuṃ satyametadbravīmi te || 31 ||
[Analyze grammar]

evametatkariṣyāmi yathā tāta tvamāttha mām |
yaccānyadapi śakṣyāmi tatkariṣyāmi te priyam || 32 ||
[Analyze grammar]

yacca duḥkhaṃ tvayā prāptaṃ dyūte vai kṛṣṇayā saha |
paruṣāṇi ca vākyāni sūtaputrakṛtāni vai || 33 ||
[Analyze grammar]

jaṭāsurātparikleśaḥ kīcakācca mahādyute |
draupadyādhigataṃ sarvaṃ damayantyā yathāśubham || 34 ||
[Analyze grammar]

sarvaṃ duḥkhamidaṃ vīra sukhodarkaṃ bhaviṣyati |
nātra manyustvayā kāryo vidhirhi balavattaraḥ || 35 ||
[Analyze grammar]

duḥkhāni hi mahātmānaḥ prāpnuvanti yudhiṣṭhira |
devairapi hi duḥkhāni prāptāni jagatīpate || 36 ||
[Analyze grammar]

indreṇa śrūyate rājansabhāryeṇa mahātmanā |
anubhūtaṃ mahadduḥkhaṃ devarājena bhārata || 37 ||
[Analyze grammar]