Chapter 38

vaiśaṃpāyana uvāca |
tāṃ śamīmupasaṃgamya pārtho vairāṭimabravīt |
sukumāraṃ samājñātaṃ saṃgrāme nātikovidam || 1 ||
[Analyze grammar]

samādiṣṭo mayā kṣipraṃ dhanūṃṣyavaharottara |
nemāni hi tvadīyāni soḍhuṃ śakṣyanti me balam || 2 ||
[Analyze grammar]

bhāraṃ vāpi guruṃ hartuṃ kuñjaraṃ vā pramarditum |
mama vā bāhuvikṣepaṃ śatrūniha vijeṣyataḥ || 3 ||
[Analyze grammar]

tasmādbhūmiṃjayāroha śamīmetāṃ palāśinīm |
asyāṃ hi pāṇḍuputrāṇāṃ dhanūṃṣi nihitānyuta || 4 ||
[Analyze grammar]

yudhiṣṭhirasya bhīmasya bībhatsoryamayostathā |
dhvajāḥ śarāśca śūrāṇāṃ divyāni kavacāni ca || 5 ||
[Analyze grammar]

atra caitanmahāvīryaṃ dhanuḥ pārthasya gāṇḍivam |
ekaṃ śatasahasreṇa saṃmitaṃ rāṣṭravardhanam || 6 ||
[Analyze grammar]

vyāyāmasahamatyarthaṃ tṛṇarājasamaṃ mahat |
sarvāyudhamahāmātraṃ śatrusaṃbādhakārakam || 7 ||
[Analyze grammar]

suvarṇavikṛtaṃ divyaṃ ślakṣṇamāyatamavraṇam |
alaṃ bhāraṃ guruṃ voḍhuṃ dāruṇaṃ cārudarśanam |
tādṛśānyeva sarvāṇi balavanti dṛḍhāni ca || 8 ||
[Analyze grammar]

uttara uvāca |
asminvṛkṣe kilodbaddhaṃ śarīramiti naḥ śrutam |
tadahaṃ rājaputraḥ sanspṛśeyaṃ pāṇinā katham || 9 ||
[Analyze grammar]

naivaṃvidhaṃ mayā yuktamālabdhuṃ kṣatrayoninā |
mahatā rājaputreṇa mantrayajñavidā satā || 10 ||
[Analyze grammar]

spṛṣṭavantaṃ śarīraṃ māṃ śavavāhamivāśucim |
kathaṃ vā vyavahāryaṃ vai kurvīthāstvaṃ bṛhannaḍe || 11 ||
[Analyze grammar]

bṛhannaḍovāca |
vyavahāryaśca rājendra śuciścaiva bhaviṣyasi |
dhanūṃṣyetāni mā bhaistvaṃ śarīraṃ nātra vidyate || 12 ||
[Analyze grammar]

dāyādaṃ matsyarājasya kule jātaṃ manasvinam |
kathaṃ tvā ninditaṃ karma kārayeyaṃ nṛpātmaja || 13 ||
[Analyze grammar]

vaiśaṃpāyana uvāca |
evamuktaḥ sa pārthena rathātpraskandya kuṇḍalī |
āruroha śamīvṛkṣaṃ vairāṭiravaśastadā || 14 ||
[Analyze grammar]

tamanvaśāsacchatrughno rathe tiṣṭhandhanaṃjayaḥ |
pariveṣṭanameteṣāṃ kṣipraṃ caiva vyapānuda || 15 ||
[Analyze grammar]

tathā saṃnahanānyeṣāṃ parimucya samantataḥ |
apaśyadgāṇḍivaṃ tatra caturbhiraparaiḥ saha || 16 ||
[Analyze grammar]

teṣāṃ vimucyamānānāṃ dhanuṣāmarkavarcasām |
viniśceruḥ prabhā divyā grahāṇāmudayeṣviva || 17 ||
[Analyze grammar]

sa teṣāṃ rūpamālokya bhogināmiva jṛmbhatām |
hṛṣṭaromā bhayodvignaḥ kṣaṇena samapadyata || 18 ||
[Analyze grammar]

saṃspṛśya tāni cāpāni bhānumanti bṛhanti ca |
vairāṭirarjunaṃ rājannidaṃ vacanamabravīt || 19 ||
[Analyze grammar]

uttara uvāca |
bindavo jātarūpasya śataṃ yasminnipātitāḥ |
sahasrakoṭi sauvarṇāḥ kasyaitaddhanuruttamam || 20 ||
[Analyze grammar]

vāraṇā yasya sauvarṇāḥ pṛṣṭhe bhāsanti daṃśitāḥ |
supārśvaṃ sugrahaṃ caiva kasyaitaddhanuruttamam || 21 ||
[Analyze grammar]

tapanīyasya śuddhasya ṣaṣṭiryasyendragopakāḥ |
pṛṣṭhe vibhaktāḥ śobhante kasyaitaddhanuruttamam || 22 ||
[Analyze grammar]

sūryā yatra ca sauvarṇāstrayo bhāsanti daṃśitāḥ |
tejasā prajvalanto hi kasyaitaddhanuruttamam || 23 ||
[Analyze grammar]

śālabhā yatra sauvarṇāstapanīyavicitritāḥ |
suvarṇamaṇicitraṃ ca kasyaitaddhanuruttamam || 24 ||
[Analyze grammar]

ime ca kasya nārācāḥ sahasrā lomavāhinaḥ |
samantātkaladhautāgrā upāsaṅge hiraṇmaye || 25 ||
[Analyze grammar]

vipāṭhāḥ pṛthavaḥ kasya gārdhrapatrāḥ śilāśitāḥ |
hāridravarṇāḥ sunasāḥ pītāḥ sarvāyasāḥ śarāḥ || 26 ||
[Analyze grammar]

kasyāyamasitāvāpaḥ pañcaśārdūlalakṣaṇaḥ |
varāhakarṇavyāmiśraḥ śarāndhārayate daśa || 27 ||
[Analyze grammar]

kasyeme pṛthavo dīrghāḥ sarvapāraśavāḥ śarāḥ |
śatāni sapta tiṣṭhanti nārācā rudhirāśanāḥ || 28 ||
[Analyze grammar]

kasyeme śukapatrābhaiḥ pūrvairardhaiḥ suvāsasaḥ |
uttarairāyasaiḥ pītairhemapuṅkhaiḥ śilāśitaiḥ || 29 ||
[Analyze grammar]

kasyāyaṃ sāyako dīrghaḥ śilīpṛṣṭhaḥ śilīmukhaḥ |
vaiyāghrakośe nihito hemacitratsarurmahān || 30 ||
[Analyze grammar]

suphalaścitrakośaśca kiṅkiṇīsāyako mahān |
kasya hematsarurdivyaḥ khaḍgaḥ paramanirvraṇaḥ || 31 ||
[Analyze grammar]

kasyāyaṃ vimalaḥ khaḍgo gavye kośe samarpitaḥ |
hematsaruranādhṛṣyo naiṣadhyo bhārasādhanaḥ || 32 ||
[Analyze grammar]

kasya pāñcanakhe kośe sāyako hemavigrahaḥ |
pramāṇarūpasaṃpannaḥ pīta ākāśasaṃnibhaḥ || 33 ||
[Analyze grammar]

kasya hemamaye kośe sutapte pāvakaprabhe |
nistriṃśo'yaṃ guruḥ pītaḥ saikyaḥ paramanirvraṇaḥ || 34 ||
[Analyze grammar]

nirdiśasva yathātattvaṃ mayā pṛṣṭā bṛhannaḍe |
vismayo me paro jāto dṛṣṭvā sarvamidaṃ mahat || 35 ||
[Analyze grammar]

bṛhannaḍovāca |
yanmāṃ pūrvamihāpṛcchaḥ śatrusenānibarhaṇam |
gāṇḍīvametatpārthasya lokeṣu viditaṃ dhanuḥ || 36 ||
[Analyze grammar]

sarvāyudhamahāmātraṃ śātakumbhapariṣkṛtam |
etattadarjunasyāsīdgāṇḍīvaṃ paramāyudham || 37 ||
[Analyze grammar]

yattacchatasahasreṇa saṃmitaṃ rāṣṭravardhanam |
yena devānmanuṣyāṃśca pārtho viṣahate mṛdhe || 38 ||
[Analyze grammar]

devadānavagandharvaiḥ pūjitaṃ śāśvatīḥ samāḥ |
etadvarṣasahasraṃ tu brahmā pūrvamadhārayat || 39 ||
[Analyze grammar]

tato'nantaramevātha prajāpatiradhārayat |
trīṇi pañcaśataṃ caiva śakro'śīti ca pañca ca || 40 ||
[Analyze grammar]

somaḥ pañcaśataṃ rājā tathaiva varuṇaḥ śatam |
pārthaḥ pañca ca ṣaṣṭiṃ ca varṣāṇi śvetavāhanaḥ || 41 ||
[Analyze grammar]

mahāvīryaṃ mahaddivyametattaddhanuruttamam |
pūjitaṃ suramartyeṣu bibharti paramaṃ vapuḥ || 42 ||
[Analyze grammar]

supārśvaṃ bhīmasenasya jātarūpagrahaṃ dhanuḥ |
yena pārtho'jayatkṛtsnāṃ diśaṃ prācīṃ paraṃtapaḥ || 43 ||
[Analyze grammar]

indragopakacitraṃ ca yadetaccāruvigraham |
rājño yudhiṣṭhirasyaitadvairāṭe dhanuruttamam || 44 ||
[Analyze grammar]

sūryā yasmiṃstu sauvarṇāḥ prabhāsante prabhāsinaḥ |
tejasā prajvalanto vai nakulasyaitadāyudham || 45 ||
[Analyze grammar]

śalabhā yatra sauvarṇāstapanīyavicitritāḥ |
etanmādrīsutasyāpi sahadevasya kārmukam || 46 ||
[Analyze grammar]

ye tvime kṣurasaṃkāśāḥ sahasrā lomavāhinaḥ |
ete'rjunasya vairāṭe śarāḥ sarpaviṣopamāḥ || 47 ||
[Analyze grammar]

ete jvalantaḥ saṃgrāme tejasā śīghragāminaḥ |
bhavanti vīrasyākṣayyā vyūhataḥ samare ripūn || 48 ||
[Analyze grammar]

ye ceme pṛthavo dīrghāścandrabimbārdhadarśanāḥ |
ete bhīmasya niśitā ripukṣayakarāḥ śarāḥ || 49 ||
[Analyze grammar]

hāridravarṇā ye tvete hemapuṅkhāḥ śilāśitāḥ |
nakulasya kalāpo'yaṃ pañcaśārdūlalakṣaṇaḥ || 50 ||
[Analyze grammar]

yenāsau vyajayatkṛtsnāṃ pratīcīṃ diśamāhave |
kalāpo hyeṣa tasyāsīnmādrīputrasya dhīmataḥ || 51 ||
[Analyze grammar]

ye tvime bhāskarākārāḥ sarvapāraśavāḥ śarāḥ |
ete citrāḥ kriyopetāḥ sahadevasya dhīmataḥ || 52 ||
[Analyze grammar]

ye tvime niśitāḥ pītāḥ pṛthavo dīrghavāsasaḥ |
hemapuṅkhāstriparvāṇo rājña ete mahāśarāḥ || 53 ||
[Analyze grammar]

yastvayaṃ sāyako dīrghaḥ śilīpṛṣṭhaḥ śilīmukhaḥ |
arjunasyaiṣa saṃgrāme gurubhārasaho dṛḍhaḥ || 54 ||
[Analyze grammar]

vaiyāghrakośastu mahānbhīmasenasya sāyakaḥ |
gurubhārasaho divyaḥ śātravāṇāṃ bhayaṃkaraḥ || 55 ||
[Analyze grammar]

suphalaścitrakośaśca hematsaruranuttamaḥ |
nistriṃśaḥ kauravasyaiṣa dharmarājasya dhīmataḥ || 56 ||
[Analyze grammar]

yastu pāñcanakhe kośe nihitaścitrasevane |
nakulasyaiṣa nistriṃśo gurubhārasaho dṛḍhaḥ || 57 ||
[Analyze grammar]

yastvayaṃ vimalaḥ khaḍgo gavye kośe samarpitaḥ |
sahadevasya viddhyenaṃ sarvabhārasahaṃ dṛḍham || 58 ||
[Analyze grammar]