Chapter 36

vaiśaṃpāyana uvāca |
sa rājadhānyā niryāya vairāṭiḥ pṛthivīṃjayaḥ |
prayāhītyabravītsūtaṃ yatra te kuravo gatāḥ || 1 ||
[Analyze grammar]

samavetānkurūnyāvajjigīṣūnavajitya vai |
gāścaiṣāṃ kṣipramādāya punarāyāmi svaṃ puram || 2 ||
[Analyze grammar]

tatastāṃścodayāmāsa sadaśvānpāṇḍunandanaḥ |
te hayā narasiṃhena coditā vātaraṃhasaḥ |
ālikhanta ivākāśamūhuḥ kāñcanamālinaḥ || 3 ||
[Analyze grammar]

nātidūramatho yātvā matsyaputradhanaṃjayau |
avekṣetāmamitraghnau kurūṇāṃ balināṃ balam |
śmaśānamabhito gatvā āsasāda kurūnatha || 4 ||
[Analyze grammar]

tadanīkaṃ mahatteṣāṃ vibabhau sāgarasvanam |
sarpamāṇamivākāśe vanaṃ bahulapādapam || 5 ||
[Analyze grammar]

dadṛśe pārthivo reṇurjanitastena sarpatā |
dṛṣṭipraṇāśo bhūtānāṃ divaspṛṅnarasattama || 6 ||
[Analyze grammar]

tadanīkaṃ mahaddṛṣṭvā gajāśvarathasaṃkulam |
karṇaduryodhanakṛpairguptaṃ śāṃtanavena ca || 7 ||
[Analyze grammar]

droṇena ca saputreṇa maheṣvāsena dhīmatā |
hṛṣṭaromā bhayodvignaḥ pārthaṃ vairāṭirabravīt || 8 ||
[Analyze grammar]

notsahe kurubhiryoddhuṃ romaharṣaṃ hi paśya me |
bahupravīramatyugraṃ devairapi durāsadam |
pratiyoddhuṃ na śakṣyāmi kurusainyamanantakam || 9 ||
[Analyze grammar]

nāśaṃse bhāratīṃ senāṃ praveṣṭuṃ bhīmakārmukām |
rathanāgāśvakalilāṃ pattidhvajasamākulām |
dṛṣṭvaiva hi parānājāvātmā pravyathatīva me || 10 ||
[Analyze grammar]

yatra droṇaśca bhīṣmaśca kṛpaḥ karṇo viviṃśatiḥ |
aśvatthāmā vikarṇaśca somadatto'tha bāhlikaḥ || 11 ||
[Analyze grammar]

duryodhanastathā vīro rājā ca rathināṃ varaḥ |
dyutimanto maheṣvāsāḥ sarve yuddhaviśāradāḥ || 12 ||
[Analyze grammar]

dṛṣṭvaiva hi kurūnetānvyūḍhānīkānprahāriṇaḥ |
hṛṣitāni ca romāṇi kaśmalaṃ cāgataṃ mama || 13 ||
[Analyze grammar]

vaiśaṃpāyana uvāca |
aviyāto viyātasya maurkhyāddhūrtasya paśyataḥ |
paridevayate mandaḥ sakāśe savyasācinaḥ || 14 ||
[Analyze grammar]

trigartānme pitā yātaḥ śūnye saṃpraṇidhāya mām |
sarvāṃ senāmupādāya na me santīha sainikāḥ || 15 ||
[Analyze grammar]

so'hameko bahūnbālaḥ kṛtāstrānakṛtaśramaḥ |
pratiyoddhuṃ na śakṣyāmi nivartasva bṛhannaḍe || 16 ||
[Analyze grammar]

arjuna uvāca |
bhayena dīnarūpo'si dviṣatāṃ harṣavardhanaḥ |
na ca tāvatkṛtaṃ kiṃcitparaiḥ karma raṇājire || 17 ||
[Analyze grammar]

svayameva ca māmāttha vaha māṃ kauravānprati |
so'haṃ tvāṃ tatra neṣyāmi yatraite bahulā dhvajāḥ || 18 ||
[Analyze grammar]

madhyamāmiṣagṛdhrāṇāṃ kurūṇāmātatāyinām |
neṣyāmi tvāṃ mahābāho pṛthivyāmapi yudhyatām || 19 ||
[Analyze grammar]

tathā strīṣu pratiśrutya pauruṣaṃ puruṣeṣu ca |
katthamāno'bhiniryāya kimarthaṃ na yuyutsase || 20 ||
[Analyze grammar]

na cedvijitya gāstāstvaṃ gṛhānvai pratiyāsyasi |
prahasiṣyanti vīra tvāṃ narā nāryaśca saṃgatāḥ || 21 ||
[Analyze grammar]

ahamapyatra sairandhryā stutaḥ sārathyakarmaṇi |
na hi śakṣyāmyanirjitya gāḥ prayātuṃ puraṃ prati || 22 ||
[Analyze grammar]

stotreṇa caiva sairandhryāstava vākyena tena ca |
kathaṃ na yudhyeyamahaṃ kurūnsarvānsthiro bhava || 23 ||
[Analyze grammar]

uttara uvāca |
kāmaṃ harantu matsyānāṃ bhūyāṃsaṃ kuravo dhanam |
prahasantu ca māṃ nāryo narā vāpi bṛhannaḍe || 24 ||
[Analyze grammar]

vaiśaṃpāyana uvāca |
ityuktvā prādravadbhīto rathātpraskandya kuṇḍalī |
tyaktvā mānaṃ sa mandātmā visṛjya saśaraṃ dhanuḥ || 25 ||
[Analyze grammar]

bṛhannaḍovāca |
naiṣa pūrvaiḥ smṛto dharmaḥ kṣatriyasya palāyanam |
śreyaste maraṇaṃ yuddhe na bhītasya palāyanam || 26 ||
[Analyze grammar]

vaiśaṃpāyana uvāca |
evamuktvā tu kaunteyaḥ so'vaplutya rathottamāt |
tamanvadhāvaddhāvantaṃ rājaputraṃ dhanaṃjayaḥ |
dīrghāṃ veṇīṃ vidhunvānaḥ sādhu rakte ca vāsasī || 27 ||
[Analyze grammar]

vidhūya veṇīṃ dhāvantamajānanto'rjunaṃ tadā |
sainikāḥ prāhasankecittathārūpamavekṣya tam || 28 ||
[Analyze grammar]

taṃ śīghramabhidhāvantaṃ saṃprekṣya kuravo'bruvan |
ka eṣa veṣapracchanno bhasmaneva hutāśanaḥ || 29 ||
[Analyze grammar]

kiṃcidasya yathā puṃsaḥ kiṃcidasya yathā striyaḥ |
sārūpyamarjunasyeva klībarūpaṃ bibharti ca || 30 ||
[Analyze grammar]

tadevaitacchirogrīvaṃ tau bāhū parighopamau |
tadvadevāsya vikrāntaṃ nāyamanyo dhanaṃjayāt || 31 ||
[Analyze grammar]

amareṣviva devendro mānuṣeṣu dhanaṃjayaḥ |
ekaḥ ko'smānupāyāyādanyo loke dhanaṃjayāt || 32 ||
[Analyze grammar]

ekaḥ putro virāṭasya śūnye saṃnihitaḥ pure |
sa eṣa kila niryāto bālabhāvānna pauruṣāt || 33 ||
[Analyze grammar]

satreṇa nūnaṃ channaṃ hi carantaṃ pārthamarjunam |
uttaraḥ sārathiṃ kṛtvā niryāto nagarādbahiḥ || 34 ||
[Analyze grammar]

sa no manye dhvajāndṛṣṭvā bhīta eṣa palāyati |
taṃ nūnameṣa dhāvantaṃ jighṛkṣati dhanaṃjayaḥ || 35 ||
[Analyze grammar]

iti sma kuravaḥ sarve vimṛśantaḥ pṛthakpṛthak |
na ca vyavasituṃ kiṃciduttaraṃ śaknuvanti te |
channaṃ tathā taṃ satreṇa pāṇḍavaṃ prekṣya bhārata || 36 ||
[Analyze grammar]

uttaraṃ tu pradhāvantamanudrutya dhanaṃjayaḥ |
gatvā padaśataṃ tūrṇaṃ keśapakṣe parāmṛśat || 37 ||
[Analyze grammar]

so'rjunena parāmṛṣṭaḥ paryadevayadārtavat |
bahulaṃ kṛpaṇaṃ caiva virāṭasya sutastadā || 38 ||
[Analyze grammar]

śātakumbhasya śuddhasya śataṃ niṣkāndadāmi te |
maṇīnaṣṭau ca vaiḍūryānhemabaddhānmahāprabhān || 39 ||
[Analyze grammar]

hemadaṇḍapraticchannaṃ rathaṃ yuktaṃ ca suvrajaiḥ |
mattāṃśca daśa mātaṅgānmuñca māṃ tvaṃ bṛhannaḍe || 40 ||
[Analyze grammar]

vaiśaṃpāyana uvāca |
evamādīni vākyāni vilapantamacetasam |
prahasya puruṣavyāghro rathasyāntikamānayat || 41 ||
[Analyze grammar]

athainamabravītpārtho bhayārtaṃ naṣṭacetasam |
yadi notsahase yoddhuṃ śatrubhiḥ śatrukarśana |
ehi me tvaṃ hayānyaccha yudhyamānasya śatrubhiḥ || 42 ||
[Analyze grammar]

prayāhyetadrathānīkaṃ madbāhubalarakṣitaḥ |
apradhṛṣyatamaṃ ghoraṃ guptaṃ vīrairmahārathaiḥ || 43 ||
[Analyze grammar]

mā bhaistvaṃ rājaputrāgrya kṣatriyo'si paraṃtapa |
ahaṃ vai kurubhiryotsyāmyavajeṣyāmi te paśūn || 44 ||
[Analyze grammar]

praviśyaitadrathānīkamapradhṛṣyaṃ durāsadam |
yantā bhūstvaṃ naraśreṣṭha yotsye'haṃ kurubhiḥ saha || 45 ||
[Analyze grammar]

evaṃ bruvāṇo bībhatsurvairāṭimaparājitaḥ |
samāśvāsya muhūrtaṃ tamuttaraṃ bharatarṣabha || 46 ||
[Analyze grammar]

tata enaṃ viceṣṭantamakāmaṃ bhayapīḍitam |
rathamāropayāmāsa pārthaḥ praharatāṃ varaḥ || 47 ||
[Analyze grammar]