Chapter 294

vaiśaṃpāyana uvāca |
devarājamanuprāptaṃ brāhmaṇacchadmanā vṛṣaḥ |
dṛṣṭvā svāgatamityāha na bubodhāsya mānasam || 1 ||
[Analyze grammar]

hiraṇyakaṇṭhīḥ pramadā grāmānvā bahugokulān |
kiṃ dadānīti taṃ vipramuvācādhirathistataḥ || 2 ||
[Analyze grammar]

brāhmaṇa uvāca |
hiraṇyakaṇṭhyaḥ pramadā yaccānyatprītivardhanam |
nāhaṃ dattamihecchāmi tadarthibhyaḥ pradīyatām || 3 ||
[Analyze grammar]

yadetatsahajaṃ varma kuṇḍale ca tavānagha |
etadutkṛtya me dehi yadi satyavrato bhavān || 4 ||
[Analyze grammar]

etadicchāmyahaṃ kṣipraṃ tvayā dattaṃ paraṃtapa |
eṣa me sarvalābhānāṃ lābhaḥ paramako mataḥ || 5 ||
[Analyze grammar]

karṇa uvāca |
avaniṃ pramadā gāśca nirvāpaṃ bahuvārṣikam |
tatte vipra pradāsyāmi na tu varma na kuṇḍale || 6 ||
[Analyze grammar]

vaiśaṃpāyana uvāca |
evaṃ bahuvidhairvākyairyācyamānaḥ sa tu dvijaḥ |
karṇena bharataśreṣṭha nānyaṃ varamayācata || 7 ||
[Analyze grammar]

sāntvitaśca yathāśakti pūjitaśca yathāvidhi |
naivānyaṃ sa dvijaśreṣṭhaḥ kāmayāmāsa vai varam || 8 ||
[Analyze grammar]

yadā nānyaṃ pravṛṇute varaṃ vai dvijasattamaḥ |
tadainamabravīdbhūyo rādheyaḥ prahasanniva || 9 ||
[Analyze grammar]

sahajaṃ varma me vipra kuṇḍale cāmṛtodbhave |
tenāvadhyo'smi lokeṣu tato naitaddadāmyaham || 10 ||
[Analyze grammar]

viśālaṃ pṛthivīrājyaṃ kṣemaṃ nihatakaṇṭakam |
pratigṛhṇīṣva mattastvaṃ sādhu brāhmaṇapuṃgava || 11 ||
[Analyze grammar]

kuṇḍalābhyāṃ vimukto'haṃ varmaṇā sahajena ca |
gamanīyo bhaviṣyāmi śatrūṇāṃ dvijasattama || 12 ||
[Analyze grammar]

yadā nānyaṃ varaṃ vavre bhagavānpākaśāsanaḥ |
tataḥ prahasya karṇastaṃ punarityabravīdvacaḥ || 13 ||
[Analyze grammar]

vidito devadeveśa prāgevāsi mama prabho |
na tu nyāyyaṃ mayā dātuṃ tava śakra vṛthā varam || 14 ||
[Analyze grammar]

tvaṃ hi deveśvaraḥ sākṣāttvayā deyo varo mama |
anyeṣāṃ caiva bhūtānāmīśvaro hyasi bhūtakṛt || 15 ||
[Analyze grammar]

yadi dāsyāmi te deva kuṇḍale kavacaṃ tathā |
vadhyatāmupayāsyāmi tvaṃ ca śakrāvahāsyatām || 16 ||
[Analyze grammar]

tasmādvinimayaṃ kṛtvā kuṇḍale varma cottamam |
harasva śakra kāmaṃ me na dadyāmahamanyathā || 17 ||
[Analyze grammar]

śakra uvāca |
vidito'haṃ raveḥ pūrvamāyanneva tavāntikam |
tena te sarvamākhyātamevametanna saṃśayaḥ || 18 ||
[Analyze grammar]

kāmamastu tathā tāta tava karṇa yathecchasi |
varjayitvā tu me vajraṃ pravṛṇīṣva yadicchasi || 19 ||
[Analyze grammar]

vaiśaṃpāyana uvāca |
tataḥ karṇaḥ prahṛṣṭastu upasaṃgamya vāsavam |
amoghāṃ śaktimabhyetya vavre saṃpūrṇamānasaḥ || 20 ||
[Analyze grammar]

karṇa uvāca |
varmaṇā kuṇḍalābhyāṃ ca śaktiṃ me dehi vāsava |
amoghāṃ śatrusaṃghānāṃ ghātanīṃ pṛtanāmukhe || 21 ||
[Analyze grammar]

vaiśaṃpāyana uvāca |
tataḥ saṃcintya manasā muhūrtamiva vāsavaḥ |
śaktyarthaṃ pṛthivīpāla karṇaṃ vākyamathābravīt || 22 ||
[Analyze grammar]

kuṇḍale me prayacchasva varma caiva śarīrajam |
gṛhāṇa karṇa śaktiṃ tvamanena samayena me || 23 ||
[Analyze grammar]

amoghā hanti śataśaḥ śatrūnmama karacyutā |
punaśca pāṇimabhyeti mama daityānvinighnataḥ || 24 ||
[Analyze grammar]

seyaṃ tava karaṃ prāpya hatvaikaṃ ripumūrjitam |
garjantaṃ pratapantaṃ ca māmevaiṣyati sūtaja || 25 ||
[Analyze grammar]

karṇa uvāca |
ekamevāhamicchāmi ripuṃ hantuṃ mahāhave |
garjantaṃ pratapantaṃ ca yato mama bhayaṃ bhavet || 26 ||
[Analyze grammar]

indra uvāca |
ekaṃ haniṣyasi ripuṃ garjantaṃ balinaṃ raṇe |
tvaṃ tu yaṃ prārthayasyekaṃ rakṣyate sa mahātmanā || 27 ||
[Analyze grammar]

yamāhurvedavidvāṃso varāhamajitaṃ harim |
nārāyaṇamacintyaṃ ca tena kṛṣṇena rakṣyate || 28 ||
[Analyze grammar]

karṇa uvāca |
evamapyastu bhagavannekavīravadhe mama |
amoghā pravarā śaktiryena hanyāṃ pratāpinam || 29 ||
[Analyze grammar]

utkṛtya tu pradāsyāmi kuṇḍale kavacaṃ ca te |
nikṛtteṣu ca gātreṣu na me bībhatsatā bhavet || 30 ||
[Analyze grammar]

indra uvāca |
na te bībhatsatā karṇa bhaviṣyati kathaṃcana |
vraṇaścāpi na gātreṣu yastvaṃ nānṛtamicchasi || 31 ||
[Analyze grammar]

yādṛśaste piturvarṇastejaśca vadatāṃ vara |
tādṛśenaiva varṇena tvaṃ karṇa bhavitā punaḥ || 32 ||
[Analyze grammar]

vidyamāneṣu śastreṣu yadyamoghāmasaṃśaye |
pramatto mokṣyase cāpi tvayyevaiṣā patiṣyati || 33 ||
[Analyze grammar]

karṇa uvāca |
saṃśayaṃ paramaṃ prāpya vimokṣye vāsavīmimām |
yathā māmāttha śakra tvaṃ satyametadbravīmi te || 34 ||
[Analyze grammar]

vaiśaṃpāyana uvāca |
tataḥ śaktiṃ prajvalitāṃ pratigṛhya viśāṃ pate |
śastraṃ gṛhītvā niśitaṃ sarvagātrāṇyakṛntata || 35 ||
[Analyze grammar]

tato devā mānavā dānavāśca nikṛntantaṃ karṇamātmānamevam |
dṛṣṭvā sarve siddhasaṃghāśca nedurna hyasyāsīdduḥkhajo vai vikāraḥ || 36 ||
[Analyze grammar]

tato divyā dundubhayaḥ praṇeduḥ papātoccaiḥ puṣpavarṣaṃ ca divyam |
dṛṣṭvā karṇaṃ śastrasaṃkṛttagātraṃ muhuścāpi smayamānaṃ nṛvīram || 37 ||
[Analyze grammar]

tataśchittvā kavacaṃ divyamaṅgāttathaivārdraṃ pradadau vāsavāya |
tathotkṛtya pradadau kuṇḍale te vaikartanaḥ karmaṇā tena karṇaḥ || 38 ||
[Analyze grammar]

tataḥ śakraḥ prahasanvañcayitvā karṇaṃ loke yaśasā yojayitvā |
kṛtaṃ kāryaṃ pāṇḍavānāṃ hi mene tataḥ paścāddivamevotpapāta || 39 ||
[Analyze grammar]

śrutvā karṇaṃ muṣitaṃ dhārtarāṣṭrā dīnāḥ sarve bhagnadarpā ivāsan |
tāṃ cāvasthāṃ gamitaṃ sūtaputraṃ śrutvā pārthā jahṛṣuḥ kānanasthāḥ || 40 ||
[Analyze grammar]

janamejaya uvāca |
kvasthā vīrāḥ pāṇḍavāste babhūvuḥ kutaścaitacchrutavantaḥ priyaṃ te |
kiṃ vākārṣurdvādaśe'bde vyatīte tanme sarvaṃ bhagavānvyākarotu || 41 ||
[Analyze grammar]

vaiśaṃpāyana uvāca |
labdhvā kṛṣṇāṃ saindhavaṃ drāvayitvā vipraiḥ sārdhaṃ kāmyakādāśramātte |
mārkaṇḍeyācchrutavantaḥ purāṇaṃ devarṣīṇāṃ caritaṃ vistareṇa || 42 ||
[Analyze grammar]

pratyājagmuḥ sarathāḥ sānuyātrāḥ sarvaiḥ sārdhaṃ sūdapaurogavaiśca |
tataḥ puṇyaṃ dvaitavanaṃ nṛvīrā nistīryograṃ vanavāsaṃ samagram || 43 ||
[Analyze grammar]