Chapter 264

mārkaṇḍeya uvāca |
tato'vidūre nalinīṃ prabhūtakamalotpalām |
sītāharaṇaduḥkhārtaḥ pampāṃ rāmaḥ samāsadat || 1 ||
[Analyze grammar]

mārutena suśītena sukhenāmṛtagandhinā |
sevyamāno vane tasmiñjagāma manasā priyām || 2 ||
[Analyze grammar]

vilalāpa sa rājendrastatra kāntāmanusmaran |
kāmabāṇābhisaṃtaptaḥ saumitristamathābravīt || 3 ||
[Analyze grammar]

na tvāmevaṃvidho bhāvaḥ spraṣṭumarhati mānada |
ātmavantamiva vyādhiḥ puruṣaṃ vṛddhaśīlinam || 4 ||
[Analyze grammar]

pravṛttirupalabdhā te vaidehyā rāvaṇasya ca |
tāṃ tvaṃ puruṣakāreṇa buddhyā caivopapādaya || 5 ||
[Analyze grammar]

abhigacchāva sugrīvaṃ śailasthaṃ haripuṃgavam |
mayi śiṣye ca bhṛtye ca sahāye ca samāśvasa || 6 ||
[Analyze grammar]

evaṃ bahuvidhairvākyairlakṣmaṇena sa rāghavaḥ |
uktaḥ prakṛtimāpede kārye cānantaro'bhavat || 7 ||
[Analyze grammar]

niṣevya vāri pampāyāstarpayitvā pitṝnapi |
pratasthaturubhau vīrau bhrātarau rāmalakṣmaṇau || 8 ||
[Analyze grammar]

tāvṛśyamūkamabhyetya bahumūlaphalaṃ girim |
giryagre vānarānpañca vīrau dadṛśatustadā || 9 ||
[Analyze grammar]

sugrīvaḥ preṣayāmāsa sacivaṃ vānaraṃ tayoḥ |
buddhimantaṃ hanūmantaṃ himavantamiva sthitam || 10 ||
[Analyze grammar]

tena saṃbhāṣya pūrvaṃ tau sugrīvamabhijagmatuḥ |
sakhyaṃ vānararājena cakre rāmastato nṛpa || 11 ||
[Analyze grammar]

tadvāso darśayāmāsustasya kārye nivedite |
vānarāṇāṃ tu yatsītā hriyamāṇābhyavāsṛjat || 12 ||
[Analyze grammar]

tatpratyayakaraṃ labdhvā sugrīvaṃ plavagādhipam |
pṛthivyāṃ vānaraiśvarye svayaṃ rāmo'bhyaṣecayat || 13 ||
[Analyze grammar]

pratijajñe ca kākutsthaḥ samare vālino vadham |
sugrīvaścāpi vaidehyāḥ punarānayanaṃ nṛpa || 14 ||
[Analyze grammar]

ityuktvā samayaṃ kṛtvā viśvāsya ca parasparam |
abhyetya sarve kiṣkindhāṃ tasthuryuddhābhikāṅkṣiṇaḥ || 15 ||
[Analyze grammar]

sugrīvaḥ prāpya kiṣkindhāṃ nanādaughanibhasvanaḥ |
nāsya tanmamṛṣe vālī taṃ tārā pratyaṣedhayat || 16 ||
[Analyze grammar]

yathā nadati sugrīvo balavāneṣa vānaraḥ |
manye cāśrayavānprāpto na tvaṃ nirgantumarhasi || 17 ||
[Analyze grammar]

hemamālī tato vālī tārāṃ tārādhipānanām |
provāca vacanaṃ vāgmī tāṃ vānarapatiḥ patiḥ || 18 ||
[Analyze grammar]

sarvabhūtarutajñā tvaṃ paśya buddhyā samanvitā |
kenāpāśrayavānprāpto mamaiṣa bhrātṛgandhikaḥ || 19 ||
[Analyze grammar]

cintayitvā muhūrtaṃ tu tārā tārādhipaprabhā |
patimityabravītprājñā śṛṇu sarvaṃ kapīśvara || 20 ||
[Analyze grammar]

hṛtadāro mahāsattvo rāmo daśarathātmajaḥ |
tulyārimitratāṃ prāptaḥ sugrīveṇa dhanurdharaḥ || 21 ||
[Analyze grammar]

bhrātā cāsya mahābāhuḥ saumitriraparājitaḥ |
lakṣmaṇo nāma medhāvī sthitaḥ kāryārthasiddhaye || 22 ||
[Analyze grammar]

maindaśca dvividaścaiva hanūmāṃścānilātmajaḥ |
jāmbavānṛkṣarājaśca sugrīvasacivāḥ sthitāḥ || 23 ||
[Analyze grammar]

sarva ete mahātmāno buddhimanto mahābalāḥ |
alaṃ tava vināśāya rāmavīryavyapāśrayāt || 24 ||
[Analyze grammar]

tasyāstadākṣipya vaco hitamuktaṃ kapīśvaraḥ |
paryaśaṅkata tāmīrṣuḥ sugrīvagatamānasām || 25 ||
[Analyze grammar]

tārāṃ paruṣamuktvā sa nirjagāma guhāmukhāt |
sthitaṃ mālyavato'bhyāśe sugrīvaṃ so'bhyabhāṣata || 26 ||
[Analyze grammar]

asakṛttvaṃ mayā mūḍha nirjito jīvitapriyaḥ |
mukto jñātiriti jñātvā kā tvarā maraṇe punaḥ || 27 ||
[Analyze grammar]

ityuktaḥ prāha sugrīvo bhrātaraṃ hetumadvacaḥ |
prāptakālamamitraghno rāmaṃ saṃbodhayanniva || 28 ||
[Analyze grammar]

hṛtadārasya me rājanhṛtarājyasya ca tvayā |
kiṃ nu jīvitasāmarthyamiti viddhi samāgatam || 29 ||
[Analyze grammar]

evamuktvā bahuvidhaṃ tatastau saṃnipetatuḥ |
samare vālisugrīvau śālatālaśilāyudhau || 30 ||
[Analyze grammar]

ubhau jaghnaturanyonyamubhau bhūmau nipetatuḥ |
ubhau vavalgatuścitraṃ muṣṭibhiśca nijaghnatuḥ || 31 ||
[Analyze grammar]

ubhau rudhirasaṃsiktau nakhadantaparikṣatau |
śuśubhāte tadā vīrau puṣpitāviva kiṃśukau || 32 ||
[Analyze grammar]

na viśeṣastayoryuddhe tadā kaścana dṛśyate |
sugrīvasya tadā mālāṃ hanūmānkaṇṭha āsajat || 33 ||
[Analyze grammar]

sa mālayā tadā vīraḥ śuśubhe kaṇṭhasaktayā |
śrīmāniva mahāśailo malayo meghamālayā || 34 ||
[Analyze grammar]

kṛtacihnaṃ tu sugrīvaṃ rāmo dṛṣṭvā mahādhanuḥ |
vicakarṣa dhanuḥśreṣṭhaṃ vālimuddiśya lakṣyavat || 35 ||
[Analyze grammar]

visphārastasya dhanuṣo yantrasyeva tadā babhau |
vitatrāsa tadā vālī śareṇābhihato hṛdi || 36 ||
[Analyze grammar]

sa bhinnamarmābhihato vaktrācchoṇitamudvaman |
dadarśāvasthitaṃ rāmamārātsaumitriṇā saha || 37 ||
[Analyze grammar]

garhayitvā sa kākutsthaṃ papāta bhuvi mūrchitaḥ |
tārā dadarśa taṃ bhūmau tārāpatimiva cyutam || 38 ||
[Analyze grammar]

hate vālini sugrīvaḥ kiṣkindhāṃ pratyapadyata |
tāṃ ca tārāpatimukhīṃ tārāṃ nipatiteśvarām || 39 ||
[Analyze grammar]

rāmastu caturo māsānpṛṣṭhe mālyavataḥ śubhe |
nivāsamakaroddhīmānsugrīveṇābhyupasthitaḥ || 40 ||
[Analyze grammar]

rāvaṇo'pi purīṃ gatvā laṅkāṃ kāmabalātkṛtaḥ |
sītāṃ niveśayāmāsa bhavane nandanopame |
aśokavanikābhyāśe tāpasāśramasaṃnibhe || 41 ||
[Analyze grammar]

bhartṛsmaraṇatanvaṅgī tāpasīveṣadhāriṇī |
upavāsatapaḥśīlā tatra sā pṛthulekṣaṇā |
uvāsa duḥkhavasatīḥ phalamūlakṛtāśanā || 42 ||
[Analyze grammar]

dideśa rākṣasīstatra rakṣaṇe rākṣasādhipaḥ |
prāsāsiśūlaparaśumudgarālātadhāriṇīḥ || 43 ||
[Analyze grammar]

dvyakṣīṃ tryakṣīṃ lalāṭākṣīṃ dīrghajihvāmajihvikām |
tristanīmekapādāṃ ca trijaṭāmekalocanām || 44 ||
[Analyze grammar]

etāścānyāśca dīptākṣyaḥ karabhotkaṭamūrdhajāḥ |
parivāryāsate sītāṃ divārātramatandritāḥ || 45 ||
[Analyze grammar]

tāstu tāmāyatāpāṅgīṃ piśācyo dāruṇasvanāḥ |
tarjayanti sadā raudrāḥ paruṣavyañjanākṣarāḥ || 46 ||
[Analyze grammar]

khādāma pāṭayāmaināṃ tilaśaḥ pravibhajya tām |
yeyaṃ bhartāramasmākamavamanyeha jīvati || 47 ||
[Analyze grammar]

ityevaṃ paribhartsantīstrāsyamānā punaḥ punaḥ |
bhartṛśokasamāviṣṭā niḥśvasyedamuvāca tāḥ || 48 ||
[Analyze grammar]

āryāḥ khādata māṃ śīghraṃ na me lobho'sti jīvite |
vinā taṃ puṇḍarīkākṣaṃ nīlakuñcitamūrdhajam || 49 ||
[Analyze grammar]

apyevāhaṃ nirāhārā jīvitapriyavarjitā |
śoṣayiṣyāmi gātrāṇi vyālī tālagatā yathā || 50 ||
[Analyze grammar]

na tvanyamabhigaccheyaṃ pumāṃsaṃ rāghavādṛte |
iti jānīta satyaṃ me kriyatāṃ yadanantaram || 51 ||
[Analyze grammar]

tasyāstadvacanaṃ śrutvā rākṣasyastāḥ kharasvanāḥ |
ākhyātuṃ rākṣasendrāya jagmustatsarvamāditaḥ || 52 ||
[Analyze grammar]

gatāsu tāsu sarvāsu trijaṭā nāma rākṣasī |
sāntvayāmāsa vaidehīṃ dharmajñā priyavādinī || 53 ||
[Analyze grammar]

sīte vakṣyāmi te kiṃcidviśvāsaṃ kuru me sakhi |
bhayaṃ te vyetu vāmoru śṛṇu cedaṃ vaco mama || 54 ||
[Analyze grammar]

avindhyo nāma medhāvī vṛddho rākṣasapuṃgavaḥ |
sa rāmasya hitānveṣī tvadarthe hi sa māvadat || 55 ||
[Analyze grammar]

sītā madvacanādvācyā samāśvāsya prasādya ca |
bhartā te kuśalī rāmo lakṣmaṇānugato balī || 56 ||
[Analyze grammar]

sakhyaṃ vānararājena śakrapratimatejasā |
kṛtavānrāghavaḥ śrīmāṃstvadarthe ca samudyataḥ || 57 ||
[Analyze grammar]

mā ca te'stu bhayaṃ bhīru rāvaṇāllokagarhitāt |
nalakūbaraśāpena rakṣitā hyasyanindite || 58 ||
[Analyze grammar]

śapto hyeṣa purā pāpo vadhūṃ rambhāṃ parāmṛśan |
na śakto vivaśāṃ nārīmupaitumajitendriyaḥ || 59 ||
[Analyze grammar]

kṣiprameṣyati te bhartā sugrīveṇābhirakṣitaḥ |
saumitrisahito dhīmāṃstvāṃ ceto mokṣayiṣyati || 60 ||
[Analyze grammar]

svapnā hi sumahāghorā dṛṣṭā me'niṣṭadarśanāḥ |
vināśāyāsya durbuddheḥ paulastyakulaghātinaḥ || 61 ||
[Analyze grammar]

dāruṇo hyeṣa duṣṭātmā kṣudrakarmā niśācaraḥ |
svabhāvācchīladoṣeṇa sarveṣāṃ bhayavardhanaḥ || 62 ||
[Analyze grammar]

spardhate sarvadevairyaḥ kālopahatacetanaḥ |
mayā vināśaliṅgāni svapne dṛṣṭāni tasya vai || 63 ||
[Analyze grammar]

tailābhiṣikto vikaco majjanpaṅke daśānanaḥ |
asakṛtkharayukte tu rathe nṛtyanniva sthitaḥ || 64 ||
[Analyze grammar]

kumbhakarṇādayaśceme nagnāḥ patitamūrdhajāḥ |
kṛṣyante dakṣiṇāmāśāṃ raktamālyānulepanāḥ || 65 ||
[Analyze grammar]

śvetātapatraḥ soṣṇīṣaḥ śuklamālyavibhūṣaṇaḥ |
śvetaparvatamārūḍha eka eva vibhīṣaṇaḥ || 66 ||
[Analyze grammar]

sacivāścāsya catvāraḥ śuklamālyānulepanāḥ |
śvetaparvatamārūḍhā mokṣyante'smānmahābhayāt || 67 ||
[Analyze grammar]

rāmasyāstreṇa pṛthivī parikṣiptā sasāgarā |
yaśasā pṛthivīṃ kṛtsnāṃ pūrayiṣyati te patiḥ || 68 ||
[Analyze grammar]

asthisaṃcayamārūḍho bhuñjāno madhupāyasam |
lakṣmaṇaśca mayā dṛṣṭo nirīkṣansarvato diśaḥ || 69 ||
[Analyze grammar]

rudatī rudhirārdrāṅgī vyāghreṇa parirakṣitā |
asakṛttvaṃ mayā dṛṣṭā gacchantī diśamuttarām || 70 ||
[Analyze grammar]

harṣameṣyasi vaidehi kṣipraṃ bhartṛsamanvitā |
rāghaveṇa saha bhrātrā sīte tvamacirādiva || 71 ||
[Analyze grammar]

iti sā mṛgaśāvākṣī tacchrutvā trijaṭāvacaḥ |
babhūvāśāvatī bālā punarbhartṛsamāgame || 72 ||
[Analyze grammar]

yāvadabhyāgatā raudrāḥ piśācyastāḥ sudāruṇāḥ |
dadṛśustāṃ trijaṭayā sahāsīnāṃ yathā purā || 73 ||
[Analyze grammar]