Chapter 263

mārkaṇḍeya uvāca |
sakhā daśarathasyāsījjaṭāyuraruṇātmajaḥ |
gṛdhrarājo mahāvīryaḥ saṃpātiryasya sodaraḥ || 1 ||
[Analyze grammar]

sa dadarśa tadā sītāṃ rāvaṇāṅkagatāṃ snuṣām |
krodhādabhyadravatpakṣī rāvaṇaṃ rākṣaseśvaram || 2 ||
[Analyze grammar]

athainamabravīdgṛdhro muñca muñceti maithilīm |
dhriyamāṇe mayi kathaṃ hariṣyasi niśācara |
na hi me mokṣyase jīvanyadi notsṛjase vadhūm || 3 ||
[Analyze grammar]

uktvaivaṃ rākṣasendraṃ taṃ cakarta nakharairbhṛśam |
pakṣatuṇḍaprahāraiśca bahuśo jarjarīkṛtaḥ |
cakṣāra rudhiraṃ bhūri giriḥ prasravaṇairiva || 4 ||
[Analyze grammar]

sa vadhyamāno gṛdhreṇa rāmapriyahitaiṣiṇā |
khaḍgamādāya ciccheda bhujau tasya patatriṇaḥ || 5 ||
[Analyze grammar]

nihatya gṛdhrarājaṃ sa chinnābhraśikharopamam |
ūrdhvamācakrame sītāṃ gṛhītvāṅkena rākṣasaḥ || 6 ||
[Analyze grammar]

yatra yatra tu vaidehī paśyatyāśramamaṇḍalam |
saro vā saritaṃ vāpi tatra muñcati bhūṣaṇam || 7 ||
[Analyze grammar]

sā dadarśa giriprasthe pañca vānarapuṃgavān |
tatra vāso mahaddivyamutsasarja manasvinī || 8 ||
[Analyze grammar]

tatteṣāṃ vānarendrāṇāṃ papāta pavanoddhutam |
madhye supītaṃ pañcānāṃ vidyunmeghāntare yathā || 9 ||
[Analyze grammar]

evaṃ hṛtāyāṃ vaidehyāṃ rāmo hatvā mahāmṛgam |
nivṛtto dadṛśe dhīmānbhrātaraṃ lakṣmaṇaṃ tadā || 10 ||
[Analyze grammar]

kathamutsṛjya vaidehīṃ vane rākṣasasevite |
ityevaṃ bhrātaraṃ dṛṣṭvā prāpto'sīti vyagarhayat || 11 ||
[Analyze grammar]

mṛgarūpadhareṇātha rakṣasā so'pakarṣaṇam |
bhrāturāgamanaṃ caiva cintayanparyatapyata || 12 ||
[Analyze grammar]

garhayanneva rāmastu tvaritastaṃ samāsadat |
api jīvati vaidehī neti paśyāmi lakṣmaṇa || 13 ||
[Analyze grammar]

tasya tatsarvamācakhyau sītāyā lakṣmaṇo vacaḥ |
yaduktavatyasadṛśaṃ vaidehī paścimaṃ vacaḥ || 14 ||
[Analyze grammar]

dahyamānena tu hṛdā rāmo'bhyapatadāśramam |
sa dadarśa tadā gṛdhraṃ nihataṃ parvatopamam || 15 ||
[Analyze grammar]

rākṣasaṃ śaṅkamānastu vikṛṣya balavaddhanuḥ |
abhyadhāvata kākutsthastatastaṃ sahalakṣmaṇaḥ || 16 ||
[Analyze grammar]

sa tāvuvāca tejasvī sahitau rāmalakṣmaṇau |
gṛdhrarājo'smi bhadraṃ vāṃ sakhā daśarathasya ha || 17 ||
[Analyze grammar]

tasya tadvacanaṃ śrutvā saṃgṛhya dhanuṣī śubhe |
ko'yaṃ pitaramasmākaṃ nāmnāhetyūcatuśca tau || 18 ||
[Analyze grammar]

tato dadṛśatustau taṃ chinnapakṣadvayaṃ tathā |
tayoḥ śaśaṃsa gṛdhrastu sītārthe rāvaṇādvadham || 19 ||
[Analyze grammar]

apṛcchadrāghavo gṛdhraṃ rāvaṇaḥ kāṃ diśaṃ gataḥ |
tasya gṛdhraḥ śiraḥkampairācacakṣe mamāra ca || 20 ||
[Analyze grammar]

dakṣiṇāmiti kākutstho viditvāsya tadiṅgitam |
saṃskāraṃ lambhayāmāsa sakhāyaṃ pūjayanpituḥ || 21 ||
[Analyze grammar]

tato dṛṣṭvāśramapadaṃ vyapaviddhabṛsīghaṭam |
vidhvastakalaśaṃ śūnyaṃ gomāyubalasevitam || 22 ||
[Analyze grammar]

duḥkhaśokasamāviṣṭau vaidehīharaṇārditau |
jagmaturdaṇḍakāraṇyaṃ dakṣiṇena paraṃtapau || 23 ||
[Analyze grammar]

vane mahati tasmiṃstu rāmaḥ saumitriṇā saha |
dadarśa mṛgayūthāni dravamāṇāni sarvaśaḥ |
śabdaṃ ca ghoraṃ sattvānāṃ dāvāgneriva vardhataḥ || 24 ||
[Analyze grammar]

apaśyetāṃ muhūrtācca kabandhaṃ ghoradarśanam |
meghaparvatasaṃkāśaṃ śālaskandhaṃ mahābhujam |
urogataviśālākṣaṃ mahodaramahāmukham || 25 ||
[Analyze grammar]

yadṛcchayātha tadrakṣaḥ kare jagrāha lakṣmaṇam |
viṣādamagamatsadyaḥ saumitriratha bhārata || 26 ||
[Analyze grammar]

sa rāmamabhisaṃprekṣya kṛṣyate yena tanmukham |
viṣaṇṇaścābravīdrāmaṃ paśyāvasthāmimāṃ mama || 27 ||
[Analyze grammar]

haraṇaṃ caiva vaidehyā mama cāyamupaplavaḥ |
rājyabhraṃśaśca bhavatastātasya maraṇaṃ tathā || 28 ||
[Analyze grammar]

nāhaṃ tvāṃ saha vaidehyā sametaṃ kosalāgatam |
drakṣyāmi pṛthivīrājye pitṛpaitāmahe sthitam || 29 ||
[Analyze grammar]

drakṣyantyāryasya dhanyā ye kuśalājaśamīlavaiḥ |
abhiṣiktasya vadanaṃ somaṃ sābhralavaṃ yathā || 30 ||
[Analyze grammar]

evaṃ bahuvidhaṃ dhīmānvilalāpa sa lakṣmaṇaḥ |
tamuvācātha kākutsthaḥ saṃbhrameṣvapyasaṃbhramaḥ || 31 ||
[Analyze grammar]

mā viṣīda naravyāghra naiṣa kaścinmayi sthite |
chindhyasya dakṣiṇaṃ bāhuṃ chinnaḥ savyo mayā bhujaḥ || 32 ||
[Analyze grammar]

ityevaṃ vadatā tasya bhujo rāmeṇa pātitaḥ |
khaḍgena bhṛśatīkṣṇena nikṛttastilakāṇḍavat || 33 ||
[Analyze grammar]

tato'sya dakṣiṇaṃ bāhuṃ khaḍgenājaghnivānbalī |
saumitrirapi saṃprekṣya bhrātaraṃ rāghavaṃ sthitam || 34 ||
[Analyze grammar]

punarabhyāhanatpārśve tadrakṣo lakṣmaṇo bhṛśam |
gatāsurapatadbhūmau kabandhaḥ sumahāṃstataḥ || 35 ||
[Analyze grammar]

tasya dehādviniḥsṛtya puruṣo divyadarśanaḥ |
dadṛśe divamāsthāya divi sūrya iva jvalan || 36 ||
[Analyze grammar]

papraccha rāmastaṃ vāgmī kastvaṃ prabrūhi pṛcchataḥ |
kāmayā kimidaṃ citramāścaryaṃ pratibhāti me || 37 ||
[Analyze grammar]

tasyācacakṣe gandharvo viśvāvasurahaṃ nṛpa |
prāpto brahmānuśāpena yoniṃ rākṣasasevitām || 38 ||
[Analyze grammar]

rāvaṇena hṛtā sītā rājñā laṅkānivāsinā |
sugrīvamabhigacchasva sa te sāhyaṃ kariṣyati || 39 ||
[Analyze grammar]

eṣā pampā śivajalā haṃsakāraṇḍavāyutā |
ṛśyamūkasya śailasya saṃnikarṣe taṭākinī || 40 ||
[Analyze grammar]

saṃvasatyatra sugrīvaścaturbhiḥ sacivaiḥ saha |
bhrātā vānararājasya vālino hemamālinaḥ || 41 ||
[Analyze grammar]

etāvacchakyamasmābhirvaktuṃ draṣṭāsi jānakīm |
dhruvaṃ vānararājasya vidito rāvaṇālayaḥ || 42 ||
[Analyze grammar]

ityuktvāntarhito divyaḥ puruṣaḥ sa mahāprabhaḥ |
vismayaṃ jagmatuścobhau tau vīrau rāmalakṣmaṇau || 43 ||
[Analyze grammar]