Chapter 259

mārkaṇḍeya uvāca |
pulastyasya tu yaḥ krodhādardhadeho'bhavanmuniḥ |
viśravā nāma sakrodhaḥ sa vaiśravaṇamaikṣata || 1 ||
[Analyze grammar]

bubudhe taṃ tu sakrodhaṃ pitaraṃ rākṣaseśvaraḥ |
kuberastatprasādārthaṃ yatate sma sadā nṛpa || 2 ||
[Analyze grammar]

sa rājarājo laṅkāyāṃ nivasannaravāhanaḥ |
rākṣasīḥ pradadau tisraḥ piturvai paricārikāḥ || 3 ||
[Analyze grammar]

tāstadā taṃ mahātmānaṃ saṃtoṣayitumudyatāḥ |
ṛṣiṃ bharataśārdūla nṛttagītaviśāradāḥ || 4 ||
[Analyze grammar]

puṣpotkaṭā ca rākā ca mālinī ca viśāṃ pate |
anyonyaspardhayā rājañśreyaskāmāḥ sumadhyamāḥ || 5 ||
[Analyze grammar]

tāsāṃ sa bhagavāṃstuṣṭo mahātmā pradadau varān |
lokapālopamānputrānekaikasyā yathepsitān || 6 ||
[Analyze grammar]

puṣpotkaṭāyāṃ jajñāte dvau putrau rākṣaseśvarau |
kumbhakarṇadaśagrīvau balenāpratimau bhuvi || 7 ||
[Analyze grammar]

mālinī janayāmāsa putramekaṃ vibhīṣaṇam |
rākāyāṃ mithunaṃ jajñe kharaḥ śūrpaṇakhā tathā || 8 ||
[Analyze grammar]

vibhīṣaṇastu rūpeṇa sarvebhyo'bhyadhiko'bhavat |
sa babhūva mahābhāgo dharmagoptā kriyāratiḥ || 9 ||
[Analyze grammar]

daśagrīvastu sarveṣāṃ jyeṣṭho rākṣasapuṃgavaḥ |
mahotsāho mahāvīryo mahāsattvaparākramaḥ || 10 ||
[Analyze grammar]

kumbhakarṇo balenāsītsarvebhyo'bhyadhikastadā |
māyāvī raṇaśauṇḍaśca raudraśca rajanīcaraḥ || 11 ||
[Analyze grammar]

kharo dhanuṣi vikrānto brahmadviṭpiśitāśanaḥ |
siddhavighnakarī cāpi raudrā śūrpaṇakhā tathā || 12 ||
[Analyze grammar]

sarve vedavidaḥ śūrāḥ sarve sucaritavratāḥ |
ūṣuḥ pitrā saha ratā gandhamādanaparvate || 13 ||
[Analyze grammar]

tato vaiśravaṇaṃ tatra dadṛśurnaravāhanam |
pitrā sārdhaṃ samāsīnamṛddhyā paramayā yutam || 14 ||
[Analyze grammar]

jātaspardhāstataste tu tapase dhṛtaniścayāḥ |
brahmāṇaṃ toṣayāmāsurghoreṇa tapasā tadā || 15 ||
[Analyze grammar]

atiṣṭhadekapādena sahasraṃ parivatsarān |
vāyubhakṣo daśagrīvaḥ pañcāgniḥ susamāhitaḥ || 16 ||
[Analyze grammar]

adhaḥśāyī kumbhakarṇo yatāhāro yatavrataḥ |
vibhīṣaṇaḥ śīrṇaparṇamekamabhyavahārayat || 17 ||
[Analyze grammar]

upavāsaratirdhīmānsadā japyaparāyaṇaḥ |
tameva kālamātiṣṭhattīvraṃ tapa udāradhīḥ || 18 ||
[Analyze grammar]

kharaḥ śūrpaṇakhā caiva teṣāṃ vai tapyatāṃ tapaḥ |
paricaryāṃ ca rakṣāṃ ca cakraturhṛṣṭamānasau || 19 ||
[Analyze grammar]

pūrṇe varṣasahasre tu śiraśchittvā daśānanaḥ |
juhotyagnau durādharṣastenātuṣyajjagatprabhuḥ || 20 ||
[Analyze grammar]

tato brahmā svayaṃ gatvā tapasastānnyavārayat |
pralobhya varadānena sarvāneva pṛthakpṛthak || 21 ||
[Analyze grammar]

brahmovāca |
prīto'smi vo nivartadhvaṃ varānvṛṇuta putrakāḥ |
yadyadiṣṭamṛte tvekamamaratvaṃ tathāstu tat || 22 ||
[Analyze grammar]

yadyadagnau hutaṃ sarvaṃ śiraste mahadīpsayā |
tathaiva tāni te dehe bhaviṣyanti yathepsitam || 23 ||
[Analyze grammar]

vairūpyaṃ ca na te dehe kāmarūpadharastathā |
bhaviṣyasi raṇe'rīṇāṃ vijetāsi na saṃśayaḥ || 24 ||
[Analyze grammar]

rāvaṇa uvāca |
gandharvadevāsurato yakṣarākṣasatastathā |
sarpakiṃnarabhūtebhyo na me bhūyātparābhavaḥ || 25 ||
[Analyze grammar]

brahmovāca |
ya ete kīrtitāḥ sarve na tebhyo'sti bhayaṃ tava |
ṛte manuṣyādbhadraṃ te tathā tadvihitaṃ mayā || 26 ||
[Analyze grammar]

mārkaṇḍeya uvāca |
evamukto daśagrīvastuṣṭaḥ samabhavattadā |
avamene hi durbuddhirmanuṣyānpuruṣādakaḥ || 27 ||
[Analyze grammar]

kumbhakarṇamathovāca tathaiva prapitāmahaḥ |
sa vavre mahatīṃ nidrāṃ tamasā grastacetanaḥ || 28 ||
[Analyze grammar]

tathā bhaviṣyatītyuktvā vibhīṣaṇamuvāca ha |
varaṃ vṛṇīṣva putra tvaṃ prīto'smīti punaḥ punaḥ || 29 ||
[Analyze grammar]

vibhīṣaṇa uvāca |
paramāpadgatasyāpi nādharme me matirbhavet |
aśikṣitaṃ ca bhagavanbrahmāstraṃ pratibhātu me || 30 ||
[Analyze grammar]

brahmovāca |
yasmādrākṣasayonau te jātasyāmitrakarśana |
nādharme ramate buddhiramaratvaṃ dadāmi te || 31 ||
[Analyze grammar]

mārkaṇḍeya uvāca |
rākṣasastu varaṃ labdhvā daśagrīvo viśāṃ pate |
laṅkāyāścyāvayāmāsa yudhi jitvā dhaneśvaram || 32 ||
[Analyze grammar]

hitvā sa bhagavāṃllaṅkāmāviśadgandhamādanam |
gandharvayakṣānugato rakṣaḥkiṃpuruṣaiḥ saha || 33 ||
[Analyze grammar]

vimānaṃ puṣpakaṃ tasya jahārākramya rāvaṇaḥ |
śaśāpa taṃ vaiśravaṇo na tvāmetadvahiṣyati || 34 ||
[Analyze grammar]

yastu tvāṃ samare hantā tamevaitadvahiṣyati |
avamanya guruṃ māṃ ca kṣipraṃ tvaṃ na bhaviṣyasi || 35 ||
[Analyze grammar]

vibhīṣaṇastu dharmātmā satāṃ dharmamanusmaran |
anvagacchanmahārāja śriyā paramayā yutaḥ || 36 ||
[Analyze grammar]

tasmai sa bhagavāṃstuṣṭo bhrātā bhrātre dhaneśvaraḥ |
senāpatyaṃ dadau dhīmānyakṣarākṣasasenayoḥ || 37 ||
[Analyze grammar]

rākṣasāḥ puruṣādāśca piśācāśca mahābalāḥ |
sarve sametya rājānamabhyaṣiñcaddaśānanam || 38 ||
[Analyze grammar]

daśagrīvastu daityānāṃ devānāṃ ca balotkaṭaḥ |
ākramya ratnānyaharatkāmarūpī vihaṃgamaḥ || 39 ||
[Analyze grammar]

rāvayāmāsa lokānyattasmādrāvaṇa ucyate |
daśagrīvaḥ kāmabalo devānāṃ bhayamādadhat || 40 ||
[Analyze grammar]