Chapter 219

mārkaṇḍeya uvāca |
śriyā juṣṭaṃ mahāsenaṃ devasenāpatiṃ kṛtam |
saptarṣipatnyaḥ ṣaḍdevyastatsakāśamathāgaman || 1 ||
[Analyze grammar]

ṛṣibhiḥ saṃparityaktā dharmayuktā mahāvratāḥ |
drutamāgamya cocustā devasenāpatiṃ prabhum || 2 ||
[Analyze grammar]

vayaṃ putra parityaktā bhartṛbhirdevasaṃmitaiḥ |
akāraṇādruṣā tāta puṇyasthānātparicyutāḥ || 3 ||
[Analyze grammar]

asmābhiḥ kila jātastvamiti kenāpyudāhṛtam |
asatyametatsaṃśrutya tasmānnastrātumarhasi || 4 ||
[Analyze grammar]

akṣayaśca bhavetsvargastvatprasādāddhi naḥ prabho |
tvāṃ putraṃ cāpyabhīpsāmaḥ kṛtvaitadanṛṇo bhava || 5 ||
[Analyze grammar]

skanda uvāca |
mātaro hi bhavatyo me suto vo'hamaninditāḥ |
yaccābhīpsatha tatsarvaṃ saṃbhaviṣyati vastathā || 6 ||
[Analyze grammar]

mārkaṇḍeya uvāca |
evamukte tataḥ śakraṃ kiṃ kāryamiti so'bravīt |
uktaḥ skandena brūhīti so'bravīdvāsavastataḥ || 7 ||
[Analyze grammar]

abhijitspardhamānā tu rohiṇyā kanyasī svasā |
icchantī jyeṣṭhatāṃ devī tapastaptuṃ vanaṃ gatā || 8 ||
[Analyze grammar]

tatra mūḍho'smi bhadraṃ te nakṣatraṃ gaganāccyutam |
kālaṃ tvimaṃ paraṃ skanda brahmaṇā saha cintaya || 9 ||
[Analyze grammar]

dhaniṣṭhādistadā kālo brahmaṇā parinirmitaḥ |
rohiṇyādyo'bhavatpūrvamevaṃ saṃkhyā samābhavat || 10 ||
[Analyze grammar]

evamukte tu śakreṇa tridivaṃ kṛttikā gatāḥ |
nakṣatraṃ śakaṭākāraṃ bhāti tadvahnidaivatam || 11 ||
[Analyze grammar]

vinatā cābravītskandaṃ mama tvaṃ piṇḍadaḥ sutaḥ |
icchāmi nityamevāhaṃ tvayā putra sahāsitum || 12 ||
[Analyze grammar]

skanda uvāca |
evamastu namaste'stu putrasnehātpraśādhi mām |
snuṣayā pūjyamānā vai devi vatsyasi nityadā || 13 ||
[Analyze grammar]

mārkaṇḍeya uvāca |
atha mātṛgaṇaḥ sarvaḥ skandaṃ vacanamabravīt |
vayaṃ sarvasya lokasya mātaraḥ kavibhiḥ stutāḥ |
icchāmo mātarastubhyaṃ bhavituṃ pūjayasva naḥ || 14 ||
[Analyze grammar]

skanda uvāca |
mātarastu bhavatyo me bhavatīnāmahaṃ sutaḥ |
ucyatāṃ yanmayā kāryaṃ bhavatīnāmathepsitam || 15 ||
[Analyze grammar]

mātara ūcuḥ |
yāstu tā mātaraḥ pūrvaṃ lokasyāsya prakalpitāḥ |
asmākaṃ tadbhavetsthānaṃ tāsāṃ caiva na tadbhavet || 16 ||
[Analyze grammar]

bhavema pūjyā lokasya na tāḥ pūjyāḥ surarṣabha |
prajāsmākaṃ hṛtāstābhistvatkṛte tāḥ prayaccha naḥ || 17 ||
[Analyze grammar]

skanda uvāca |
dattāḥ prajā na tāḥ śakyā bhavatībhirniṣevitum |
anyāṃ vaḥ kāṃ prayacchāmi prajāṃ yāṃ manasecchatha || 18 ||
[Analyze grammar]

mātara ūcuḥ |
icchāma tāsāṃ mātṝṇāṃ prajā bhoktuṃ prayaccha naḥ |
tvayā saha pṛthagbhūtā ye ca tāsāmatheśvarāḥ || 19 ||
[Analyze grammar]

skanda uvāca |
prajā vo dadmi kaṣṭaṃ tu bhavatībhirudāhṛtam |
parirakṣata bhadraṃ vaḥ prajāḥ sādhu namaskṛtāḥ || 20 ||
[Analyze grammar]

mātara ūcuḥ |
parirakṣāma bhadraṃ te prajāḥ skanda yathecchasi |
tvayā no rocate skanda sahavāsaściraṃ prabho || 21 ||
[Analyze grammar]

skanda uvāca |
yāvatṣoḍaśa varṣāṇi bhavanti taruṇāḥ prajāḥ |
prabādhata manuṣyāṇāṃ tāvadrūpaiḥ pṛthagvidhaiḥ || 22 ||
[Analyze grammar]

ahaṃ ca vaḥ pradāsyāmi raudramātmānamavyayam |
paramaṃ tena sahitā sukhaṃ vatsyatha pūjitāḥ || 23 ||
[Analyze grammar]

mārkaṇḍeya uvāca |
tataḥ śarīrātskandasya puruṣaḥ kāñcanaprabhaḥ |
bhoktuṃ prajāḥ sa martyānāṃ niṣpapāta mahābalaḥ || 24 ||
[Analyze grammar]

apatatsa tadā bhūmau visaṃjño'tha kṣudhānvitaḥ |
skandena so'bhyanujñāto raudrarūpo'bhavadgrahaḥ |
skandāpasmāramityāhurgrahaṃ taṃ dvijasattamāḥ || 25 ||
[Analyze grammar]

vinatā tu mahāraudrā kathyate śakunigrahaḥ |
pūtanāṃ rākṣasīṃ prāhustaṃ vidyātpūtanāgraham || 26 ||
[Analyze grammar]

kaṣṭā dāruṇarūpeṇa ghorarūpā niśācarī |
piśācī dāruṇākārā kathyate śītapūtanā |
garbhānsā mānuṣīṇāṃ tu harate ghoradarśanā || 27 ||
[Analyze grammar]

aditiṃ revatīṃ prāhurgrahastasyāstu raivataḥ |
so'pi bālāñśiśūnghoro bādhate vai mahāgrahaḥ || 28 ||
[Analyze grammar]

daityānāṃ yā ditirmātā tāmāhurmukhamaṇḍikām |
atyarthaṃ śiśumāṃsena saṃprahṛṣṭā durāsadā || 29 ||
[Analyze grammar]

kumārāśca kumāryaśca ye proktāḥ skandasaṃbhavāḥ |
te'pi garbhabhujaḥ sarve kauravya sumahāgrahāḥ || 30 ||
[Analyze grammar]

tāsāmeva kumārīṇāṃ patayaste prakīrtitāḥ |
ajñāyamānā gṛhṇanti bālakānraudrakarmiṇaḥ || 31 ||
[Analyze grammar]

gavāṃ mātā tu yā prājñaiḥ kathyate surabhirnṛpa |
śakunistāmathāruhya saha bhuṅkte śiśūnbhuvi || 32 ||
[Analyze grammar]

saramā nāma yā mātā śunāṃ devī janādhipa |
sāpi garbhānsamādatte mānuṣīṇāṃ sadaiva hi || 33 ||
[Analyze grammar]

pādapānāṃ ca yā mātā karañjanilayā hi sā |
karañje tāṃ namasyanti tasmātputrārthino narāḥ || 34 ||
[Analyze grammar]

ime tvaṣṭādaśānye vai grahā māṃsamadhupriyāḥ |
dvipañcarātraṃ tiṣṭhanti satataṃ sūtikāgṛhe || 35 ||
[Analyze grammar]

kadrūḥ sūkṣmavapurbhūtvā garbhiṇīṃ praviśedyadā |
bhuṅkte sā tatra taṃ garbhaṃ sā tu nāgaṃ prasūyate || 36 ||
[Analyze grammar]

gandharvāṇāṃ tu yā mātā sā garbhaṃ gṛhya gacchati |
tato vilīnagarbhā sā mānuṣī bhuvi dṛśyate || 37 ||
[Analyze grammar]

yā janitrī tvapsarasāṃ garbhamāste pragṛhya sā |
upaviṣṭaṃ tato garbhaṃ kathayanti manīṣiṇaḥ || 38 ||
[Analyze grammar]

lohitasyodadheḥ kanyā dhātrī skandasya sā smṛtā |
lohitāyanirityevaṃ kadambe sā hi pūjyate || 39 ||
[Analyze grammar]

puruṣeṣu yathā rudrastathāryā pramadāsvapi |
āryā mātā kumārasya pṛthakkāmārthamijyate || 40 ||
[Analyze grammar]

evamete kumārāṇāṃ mayā proktā mahāgrahāḥ |
yāvatṣoḍaśa varṣāṇi aśivāste śivāstataḥ || 41 ||
[Analyze grammar]

ye ca mātṛgaṇāḥ proktāḥ puruṣāścaiva ye grahāḥ |
sarve skandagrahā nāma jñeyā nityaṃ śarīribhiḥ || 42 ||
[Analyze grammar]

teṣāṃ praśamanaṃ kāryaṃ snānaṃ dhūpamathāñjanam |
balikarmopahāraśca skandasyejyā viśeṣataḥ || 43 ||
[Analyze grammar]

evamete'rcitāḥ sarve prayacchanti śubhaṃ nṛṇām |
āyurvīryaṃ ca rājendra samyakpūjānamaskṛtāḥ || 44 ||
[Analyze grammar]

ūrdhvaṃ tu ṣoḍaśādvarṣādye bhavanti grahā nṛṇām |
tānahaṃ saṃpravakṣyāmi namaskṛtya maheśvaram || 45 ||
[Analyze grammar]

yaḥ paśyati naro devāñjāgradvā śayito'pi vā |
unmādyati sa tu kṣipraṃ taṃ tu devagrahaṃ viduḥ || 46 ||
[Analyze grammar]

āsīnaśca śayānaśca yaḥ paśyati naraḥ pitṝn |
unmādyati sa tu kṣipraṃ sa jñeyastu pitṛgrahaḥ || 47 ||
[Analyze grammar]

avamanyati yaḥ siddhānkruddhāścāpi śapanti yam |
unmādyati sa tu kṣipraṃ jñeyaḥ siddhagrahastu saḥ || 48 ||
[Analyze grammar]

upāghrāti ca yo gandhānrasāṃścāpi pṛthagvidhān |
unmādyati sa tu kṣipraṃ sa jñeyo rākṣaso grahaḥ || 49 ||
[Analyze grammar]

gandharvāścāpi yaṃ divyāḥ saṃspṛśanti naraṃ bhuvi |
unmādyati sa tu kṣipraṃ graho gāndharva eva saḥ || 50 ||
[Analyze grammar]

āviśanti ca yaṃ yakṣāḥ puruṣaṃ kālaparyaye |
unmādyati sa tu kṣipraṃ jñeyo yakṣagrahastu saḥ || 51 ||
[Analyze grammar]

adhirohanti yaṃ nityaṃ piśācāḥ puruṣaṃ kvacit |
unmādyati sa tu kṣipraṃ paiśācaṃ taṃ grahaṃ viduḥ || 52 ||
[Analyze grammar]

yasya doṣaiḥ prakupitaṃ cittaṃ muhyati dehinaḥ |
unmādyati sa tu kṣipraṃ sādhanaṃ tasya śāstrataḥ || 53 ||
[Analyze grammar]

vaiklavyācca bhayāccaiva ghorāṇāṃ cāpi darśanāt |
unmādyati sa tu kṣipraṃ sattvaṃ tasya tu sādhanam || 54 ||
[Analyze grammar]

kaścitkrīḍitukāmo vai bhoktukāmastathāparaḥ |
abhikāmastathaivānya ityeṣa trividho grahaḥ || 55 ||
[Analyze grammar]

yāvatsaptativarṣāṇi bhavantyete grahā nṛṇām |
ataḥ paraṃ dehināṃ tu grahatulyo bhavejjvaraḥ || 56 ||
[Analyze grammar]

aprakīrṇendriyaṃ dāntaṃ śuciṃ nityamatandritam |
āstikaṃ śraddadhānaṃ ca varjayanti sadā grahāḥ || 57 ||
[Analyze grammar]

ityeṣa te grahoddeśo mānuṣāṇāṃ prakīrtitaḥ |
na spṛśanti grahā bhaktānnarāndevaṃ maheśvaram || 58 ||
[Analyze grammar]