Chapter 189

mārkaṇḍeya uvāca |
tataścorakṣayaṃ kṛtvā dvijebhyaḥ pṛthivīmimām |
vājimedhe mahāyajñe vidhivatkalpayiṣyati || 1 ||
[Analyze grammar]

sthāpayitvā sa maryādāḥ svayambhuvihitāḥ śubhāḥ |
vanaṃ puṇyayaśaḥkarmā jarāvānsaṃśrayiṣyati || 2 ||
[Analyze grammar]

tacchīlamanuvartsyante manuṣyā lokavāsinaḥ |
vipraiścorakṣaye caiva kṛte kṣemaṃ bhaviṣyati || 3 ||
[Analyze grammar]

kṛṣṇājināni śaktīśca triśūlānyāyudhāni ca |
sthāpayanvipraśārdūlo deśeṣu vijiteṣu ca || 4 ||
[Analyze grammar]

saṃstūyamāno viprendrairmānayāno dvijottamān |
kalkiścariṣyati mahīṃ sadā dasyuvadhe rataḥ || 5 ||
[Analyze grammar]

hā tāta hā sutetyevaṃ tāstā vācaḥ sudāruṇāḥ |
vikrośamānānsubhṛśaṃ dasyūnneṣyati saṃkṣayam || 6 ||
[Analyze grammar]

tato'dharmavināśo vai dharmavṛddhiśca bhārata |
bhaviṣyati kṛte prāpte kriyāvāṃśca janastathā || 7 ||
[Analyze grammar]

ārāmāścaiva caityāśca taṭākānyavaṭāstathā |
yajñakriyāśca vividhā bhaviṣyanti kṛte yuge || 8 ||
[Analyze grammar]

brāhmaṇāḥ sādhavaścaiva munayaśca tapasvinaḥ |
āśramāḥ sahapāṣaṇḍāḥ sthitāḥ satye janāḥ prajāḥ || 9 ||
[Analyze grammar]

jāsyanti sarvabījāni upyamānāni caiva ha |
sarveṣvṛtuṣu rājendra sarvaṃ sasyaṃ bhaviṣyati || 10 ||
[Analyze grammar]

narā dāneṣu niratā vrateṣu niyameṣu ca |
japayajñaparā viprā dharmakāmā mudā yutāḥ |
pālayiṣyanti rājāno dharmeṇemāṃ vasuṃdharām || 11 ||
[Analyze grammar]

vyavahāraratā vaiśyā bhaviṣyanti kṛte yuge |
ṣaṭkarmaniratā viprāḥ kṣatriyā rakṣaṇe ratāḥ || 12 ||
[Analyze grammar]

śuśrūṣāyāṃ ratāḥ śūdrāstathā varṇatrayasya ca |
eṣa dharmaḥ kṛtayuge tretāyāṃ dvāpare tathā |
paścime yugakāle ca yaḥ sa te saṃprakīrtitaḥ || 13 ||
[Analyze grammar]

sarvalokasya viditā yugasaṃkhyā ca pāṇḍava |
etatte sarvamākhyātamatītānāgataṃ mayā |
vāyuproktamanusmṛtya purāṇamṛṣisaṃstutam || 14 ||
[Analyze grammar]

evaṃ saṃsāramārgā me bahuśaścirajīvinā |
dṛṣṭāścaivānubhūtāśca tāṃste kathitavānaham || 15 ||
[Analyze grammar]

idaṃ caivāparaṃ bhūyaḥ saha bhrātṛbhiracyuta |
dharmasaṃśayamokṣārthaṃ nibodha vacanaṃ mama || 16 ||
[Analyze grammar]

dharme tvayātmā saṃyojyo nityaṃ dharmabhṛtāṃ vara |
dharmātmā hi sukhaṃ rājā pretya ceha ca nandati || 17 ||
[Analyze grammar]

nibodha ca śubhāṃ vāṇīṃ yāṃ pravakṣyāmi te'nagha |
na brāhmaṇe paribhavaḥ kartavyaste kadācana |
brāhmaṇo ruṣito hanyādapi lokānpratijñayā || 18 ||
[Analyze grammar]

vaiśaṃpāyana uvāca |
mārkaṇḍeyavacaḥ śrutvā kurūṇāṃ pravaro nṛpaḥ |
uvāca vacanaṃ dhīmānparamaṃ paramadyutiḥ || 19 ||
[Analyze grammar]

kasmindharme mayā stheyaṃ prajāḥ saṃrakṣatā mune |
kathaṃ ca vartamāno vai na cyaveyaṃ svadharmataḥ || 20 ||
[Analyze grammar]

mārkaṇḍeya uvāca |
dayāvānsarvabhūteṣu hito rakto'nasūyakaḥ |
apatyānāmiva sveṣāṃ prajānāṃ rakṣaṇe rataḥ |
cara dharmaṃ tyajādharmaṃ pitṝndevāṃśca pūjaya || 21 ||
[Analyze grammar]

pramādādyatkṛtaṃ te'bhūtsaṃyagdānena tajjaya |
alaṃ te mānamāśritya satataṃ paravānbhava || 22 ||
[Analyze grammar]

vijitya pṛthivīṃ sarvāṃ modamānaḥ sukhī bhava |
eṣa bhūto bhaviṣyaśca dharmaste samudīritaḥ || 23 ||
[Analyze grammar]

na te'styaviditaṃ kiṃcidatītānāgataṃ bhuvi |
tasmādimaṃ parikleśaṃ tvaṃ tāta hṛdi mā kṛthāḥ || 24 ||
[Analyze grammar]

eṣa kālo mahābāho api sarvadivaukasām |
muhyanti hi prajāstāta kālenābhipracoditāḥ || 25 ||
[Analyze grammar]

mā ca te'tra vicāro bhūdyanmayoktaṃ tavānagha |
atiśaṅkya vaco hyetaddharmalopo bhavettava || 26 ||
[Analyze grammar]

jāto'si prathite vaṃśe kurūṇāṃ bharatarṣabha |
karmaṇā manasā vācā sarvametatsamācara || 27 ||
[Analyze grammar]

yudhiṣṭhira uvāca |
yattvayoktaṃ dvijaśreṣṭha vākyaṃ śrutimanoharam |
tathā kariṣye yatnena bhavataḥ śāsanaṃ vibho || 28 ||
[Analyze grammar]

na me lobho'sti viprendra na bhayaṃ na ca matsaraḥ |
kariṣyāmi hi tatsarvamuktaṃ yatte mayi prabho || 29 ||
[Analyze grammar]

vaiśaṃpāyana uvāca |
śrutvā tu vacanaṃ tasya pāṇḍavasya mahātmanaḥ |
prahṛṣṭāḥ pāṇḍavā rājansahitāḥ śārṅgadhanvanā || 30 ||
[Analyze grammar]

tathā kathāṃ śubhāṃ śrutvā mārkaṇḍeyasya dhīmataḥ |
vismitāḥ samapadyanta purāṇasya nivedanāt || 31 ||
[Analyze grammar]