Chapter 178

yudhiṣṭhira uvāca |
bhavānetādṛśo loke vedavedāṅgapāragaḥ |
brūhi kiṃ kurvataḥ karma bhavedgatiranuttamā || 1 ||
[Analyze grammar]

sarpa uvāca |
pātre dattvā priyāṇyuktvā satyamuktvā ca bhārata |
ahiṃsānirataḥ svargaṃ gacchediti matirmama || 2 ||
[Analyze grammar]

yudhiṣṭhira uvāca |
dānādvā sarpa satyādvā kimato guru dṛśyate |
ahiṃsāpriyayoścaiva gurulāghavamucyatām || 3 ||
[Analyze grammar]

sarpa uvāca |
dāne ratatvaṃ satyaṃ ca ahiṃsā priyameva ca |
eṣāṃ kāryagarīyastvāddṛśyate gurulāghavam || 4 ||
[Analyze grammar]

kasmācciddānayogāddhi satyameva viśiṣyate |
satyavākyācca rājendra kiṃciddānaṃ viśiṣyate || 5 ||
[Analyze grammar]

evameva maheṣvāsa priyavākyānmahīpate |
ahiṃsā dṛśyate gurvī tataśca priyamiṣyate || 6 ||
[Analyze grammar]

evametadbhavedrājankāryāpekṣamanantaram |
yadabhipretamanyatte brūhi yāvadbravīmyaham || 7 ||
[Analyze grammar]

yudhiṣṭhira uvāca |
kathaṃ svarge gatiḥ sarpa karmaṇāṃ ca phalaṃ dhruvam |
aśarīrasya dṛśyeta viṣayāṃśca bravīhi me || 8 ||
[Analyze grammar]

sarpa uvāca |
tisro vai gatayo rājanparidṛṣṭāḥ svakarmabhiḥ |
mānuṣyaṃ svargavāsaśca tiryagyoniśca tattridhā || 9 ||
[Analyze grammar]

tatra vai mānuṣāllokāddānādibhiratandritaḥ |
ahiṃsārthasamāyuktaiḥ kāraṇaiḥ svargamaśnute || 10 ||
[Analyze grammar]

viparītaiśca rājendra kāraṇairmānuṣo bhavet |
tiryagyonistathā tāta viśeṣaścātra vakṣyate || 11 ||
[Analyze grammar]

kāmakrodhasamāyukto hiṃsālobhasamanvitaḥ |
manuṣyatvātparibhraṣṭastiryagyonau prasūyate || 12 ||
[Analyze grammar]

tiryagyonyāṃ pṛthagbhāvo manuṣyatve vidhīyate |
gavādibhyastathāśvebhyo devatvamapi dṛśyate || 13 ||
[Analyze grammar]

so'yametā gatīḥ sarvā jantuścarati kāryavān |
nitye mahati cātmānamavasthāpayate nṛpa || 14 ||
[Analyze grammar]

jāto jātaśca balavānbhuṅkte cātmā sa dehavān |
phalārthastāta niṣpṛktaḥ prajālakṣaṇabhāvanaḥ || 15 ||
[Analyze grammar]

yudhiṣṭhira uvāca |
śabde sparśe ca rūpe ca tathaiva rasagandhayoḥ |
tasyādhiṣṭhānamavyagraṃ brūhi sarpa yathātatham || 16 ||
[Analyze grammar]

kiṃ na gṛhṇāsi viṣayānyugapattvaṃ mahāmate |
etāvaducyatāṃ coktaṃ sarvaṃ pannagasattama || 17 ||
[Analyze grammar]

sarpa uvāca |
yadātmadravyamāyuṣmandehasaṃśrayaṇānvitam |
karaṇādhiṣṭhitaṃ bhogānupabhuṅkte yathāvidhi || 18 ||
[Analyze grammar]

jñānaṃ caivātra buddhiśca manaśca bharatarṣabha |
tasya bhogādhikaraṇe karaṇāni nibodha me || 19 ||
[Analyze grammar]

manasā tāta paryeti kramaśo viṣayānimān |
viṣayāyatanasthena bhūtātmā kṣetraniḥsṛtaḥ || 20 ||
[Analyze grammar]

atra cāpi naravyāghra mano jantorvidhīyate |
tasmādyugapadasyātra grahaṇaṃ nopapadyate || 21 ||
[Analyze grammar]

sa ātmā puruṣavyāghra bhruvorantaramāśritaḥ |
dravyeṣu sṛjate buddhiṃ vividheṣu parāvarām || 22 ||
[Analyze grammar]

buddheruttarakālaṃ ca vedanā dṛśyate budhaiḥ |
eṣa vai rājaśārdūla vidhiḥ kṣetrajñabhāvanaḥ || 23 ||
[Analyze grammar]

yudhiṣṭhira uvāca |
manasaścāpi buddheśca brūhi me lakṣaṇaṃ param |
etadadhyātmaviduṣāṃ paraṃ kāryaṃ vidhīyate || 24 ||
[Analyze grammar]

sarpa uvāca |
buddhirātmānugā tāta utpātena vidhīyate |
tadāśritā hi saṃjñaiṣā vidhistasyaiṣaṇe bhavet || 25 ||
[Analyze grammar]

buddherguṇavidhirnāsti manastu guṇavadbhavet |
buddhirutpadyate kārye manastūtpannameva hi || 26 ||
[Analyze grammar]

etadviśeṣaṇaṃ tāta manobuddhyormayeritam |
tvamapyatrābhisaṃbuddhaḥ kathaṃ vā manyate bhavān || 27 ||
[Analyze grammar]

yudhiṣṭhira uvāca |
aho buddhimatāṃ śreṣṭha śubhā buddhiriyaṃ tava |
viditaṃ veditavyaṃ te kasmānmāmanupṛcchasi || 28 ||
[Analyze grammar]

sarvajñaṃ tvāṃ kathaṃ moha āviśatsvargavāsinam |
evamadbhutakarmāṇamiti me saṃśayo mahān || 29 ||
[Analyze grammar]

sarpa uvāca |
suprajñamapi cecchūramṛddhirmohayate naram |
vartamānaḥ sukhe sarvo nāvaitīti matirmama || 30 ||
[Analyze grammar]

so'hamaiśvaryamohena madāviṣṭo yudhiṣṭhira |
patitaḥ pratisaṃbuddhastvāṃ tu saṃbodhayāmyaham || 31 ||
[Analyze grammar]

kṛtaṃ kāryaṃ mahārāja tvayā mama paraṃtapa |
kṣīṇaḥ śāpaḥ sukṛcchro me tvayā saṃbhāṣya sādhunā || 32 ||
[Analyze grammar]

ahaṃ hi divi divyena vimānena caranpurā |
abhimānena mattaḥ sankaṃcinnānyamacintayam || 33 ||
[Analyze grammar]

brahmarṣidevagandharvayakṣarākṣasakiṃnarāḥ |
karānmama prayacchanti sarve trailokyavāsinaḥ || 34 ||
[Analyze grammar]

cakṣuṣā yaṃ prapaśyāmi prāṇinaṃ pṛthivīpate |
tasya tejo harāmyāśu taddhi dṛṣṭibalaṃ mama || 35 ||
[Analyze grammar]

brahmarṣīṇāṃ sahasraṃ hi uvāha śibikāṃ mama |
sa māmapanayo rājanbhraṃśayāmāsa vai śriyaḥ || 36 ||
[Analyze grammar]

tatra hyagastyaḥ pādena vahanspṛṣṭo mayā muniḥ |
adṛṣṭena tato'smyukto dhvaṃsa sarpeti vai ruṣā || 37 ||
[Analyze grammar]

tatastasmādvimānāgrātpracyutaścyutabhūṣaṇaḥ |
prapatanbubudhe''tmānaṃ vyālībhūtamadhomukham || 38 ||
[Analyze grammar]

ayācaṃ tamahaṃ vipraṃ śāpasyānto bhavediti |
ajñānātsaṃpravṛttasya bhagavankṣantumarhasi || 39 ||
[Analyze grammar]

tataḥ sa māmuvācedaṃ prapatantaṃ kṛpānvitaḥ |
yudhiṣṭhiro dharmarājaḥ śāpāttvāṃ mokṣayiṣyati || 40 ||
[Analyze grammar]

abhimānasya ghorasya balasya ca narādhipa |
phale kṣīṇe mahārāja phalaṃ puṇyamavāpsyasi || 41 ||
[Analyze grammar]

tato me vismayo jātastaddṛṣṭvā tapaso balam |
brahma ca brāhmaṇatvaṃ ca yena tvāhamacūcudam || 42 ||
[Analyze grammar]

satyaṃ damastapo yogamahiṃsā dānanityatā |
sādhakāni sadā puṃsāṃ na jātirna kulaṃ nṛpa || 43 ||
[Analyze grammar]

ariṣṭa eṣa te bhrātā bhīmo mukto mahābhujaḥ |
svasti te'stu mahārāja gamiṣyāmi divaṃ punaḥ || 44 ||
[Analyze grammar]

vaiśaṃpāyana uvāca |
ityuktvājagaraṃ dehaṃ tyaktvā sa nahuṣo nṛpaḥ |
divyaṃ vapuḥ samāsthāya gatastridivameva ha || 45 ||
[Analyze grammar]

yudhiṣṭhiro'pi dharmātmā bhrātrā bhīmena saṃgataḥ |
dhaumyena sahitaḥ śrīmānāśramaṃ punarabhyagāt || 46 ||
[Analyze grammar]

tato dvijebhyaḥ sarvebhyaḥ sametebhyo yathātatham |
kathayāmāsa tatsarvaṃ dharmarājo yudhiṣṭhiraḥ || 47 ||
[Analyze grammar]

tacchrutvā te dvijāḥ sarve bhrātaraścāsya te trayaḥ |
āsansuvrīḍitā rājandraupadī ca yaśasvinī || 48 ||
[Analyze grammar]

te tu sarve dvijaśreṣṭhāḥ pāṇḍavānāṃ hitepsayā |
maivamityabruvanbhīmaṃ garhayanto'sya sāhasam || 49 ||
[Analyze grammar]

pāṇḍavāstu bhayānmuktaṃ prekṣya bhīmaṃ mahābalam |
harṣamāhārayāṃ cakrurvijahruśca mudā yutāḥ || 50 ||
[Analyze grammar]