Chapter 176

vaiśaṃpāyana uvāca |
sa bhīmasenastejasvī tathā sarpavaśaṃ gataḥ |
cintayāmāsa sarpasya vīryamatyadbhutaṃ mahat || 1 ||
[Analyze grammar]

uvāca ca mahāsarpaṃ kāmayā brūhi pannaga |
kastvaṃ bho bhujagaśreṣṭha kiṃ mayā ca kariṣyasi || 2 ||
[Analyze grammar]

pāṇḍavo bhīmaseno'haṃ dharmarājādanantaraḥ |
nāgāyutasamaprāṇastvayā nītaḥ kathaṃ vaśam || 3 ||
[Analyze grammar]

siṃhāḥ kesariṇo vyāghrā mahiṣā vāraṇāstathā |
samāgatāśca bahuśo nihatāśca mayā mṛdhe || 4 ||
[Analyze grammar]

dānavāśca piśācāśca rākṣasāśca mahābalāḥ |
bhujavegamaśaktā me soḍhuṃ pannagasattama || 5 ||
[Analyze grammar]

kiṃ nu vidyābalaṃ kiṃ vā varadānamatho tava |
udyogamapi kurvāṇo vaśago'smi kṛtastvayā || 6 ||
[Analyze grammar]

asatyo vikramo nṝṇāmiti me niścitā matiḥ |
yathedaṃ me tvayā nāga balaṃ pratihataṃ mahat || 7 ||
[Analyze grammar]

ityevaṃvādinaṃ vīraṃ bhīmamakliṣṭakāriṇam |
bhogena mahatā sarpaḥ samantātparyaveṣṭayat || 8 ||
[Analyze grammar]

nigṛhya taṃ mahābāhuṃ tataḥ sa bhujagastadā |
vimucyāsya bhujau pīnāvidaṃ vacanamabravīt || 9 ||
[Analyze grammar]

diṣṭyā tvaṃ kṣudhitasyādya devairbhakṣo mahābhuja |
diṣṭyā kālasya mahataḥ priyāḥ prāṇā hi dehinām || 10 ||
[Analyze grammar]

yathā tvidaṃ mayā prāptaṃ bhujaṃgatvamariṃdama |
tadavaśyaṃ mayā khyāpyaṃ tavādya śṛṇu sattama || 11 ||
[Analyze grammar]

imāmavasthāṃ saṃprāpto hyahaṃ kopānmanīṣiṇām |
śāpasyāntaṃ pariprepsuḥ sarpasya kathayāmi tat || 12 ||
[Analyze grammar]

nahuṣo nāma rājarṣirvyaktaṃ te śrotramāgataḥ |
tavaiva pūrvaḥ pūrveṣāmāyorvaṃśakaraḥ sutaḥ || 13 ||
[Analyze grammar]

so'haṃ śāpādagastyasya brāhmaṇānavamanya ca |
imāmavasthāmāpannaḥ paśya daivamidaṃ mama || 14 ||
[Analyze grammar]

tvāṃ cedavadhyamāyāntamatīva priyadarśanam |
ahamadyopayokṣyāmi vidhānaṃ paśya yādṛśam || 15 ||
[Analyze grammar]

na hi me mucyate kaścitkathaṃcidgrahaṇaṃ gataḥ |
gajo vā mahiṣo vāpi ṣaṣṭhe kāle narottama || 16 ||
[Analyze grammar]

nāsi kevalasarpeṇa tiryagyoniṣu vartatā |
gṛhītaḥ kauravaśreṣṭha varadānamidaṃ mama || 17 ||
[Analyze grammar]

patatā hi vimānāgrānmayā śakrāsanāddrutam |
kuru śāpāntamityukto bhagavānmunisattamaḥ || 18 ||
[Analyze grammar]

sa māmuvāca tejasvī kṛpayābhipariplutaḥ |
mokṣaste bhavitā rājankasmāccitkālaparyayāt || 19 ||
[Analyze grammar]

tato'smi patito bhūmau na ca māmajahātsmṛtiḥ |
smārtamasti purāṇaṃ me yathaivādhigataṃ tathā || 20 ||
[Analyze grammar]

yastu te vyāhṛtānpraśnānpratibrūyādviśeṣavit |
sa tvāṃ mokṣayitā śāpāditi māmabravīdṛṣiḥ || 21 ||
[Analyze grammar]

gṛhītasya tvayā rājanprāṇino'pi balīyasaḥ |
sattvabhraṃśo'dhikasyāpi sarvasyāśu bhaviṣyati || 22 ||
[Analyze grammar]

iti cāpyahamaśrauṣaṃ vacasteṣāṃ dayāvatām |
mayi saṃjātahārdānāmatha te'ntarhitā dvijāḥ || 23 ||
[Analyze grammar]

so'haṃ paramaduṣkarmā vasāmi niraye'śucau |
sarpayonimimāṃ prāpya kālākāṅkṣī mahādyute || 24 ||
[Analyze grammar]

tamuvāca mahābāhurbhīmaseno bhujaṃgamam |
na te kupye mahāsarpa na cātmānaṃ vigarhaye || 25 ||
[Analyze grammar]

yasmādabhāvī bhāvī vā manuṣyaḥ sukhaduḥkhayoḥ |
āgame yadi vāpāye na tatra glapayenmanaḥ || 26 ||
[Analyze grammar]

daivaṃ puruṣakāreṇa ko nivartitumarhati |
daivameva paraṃ manye puruṣārtho nirarthakaḥ || 27 ||
[Analyze grammar]

paśya daivopaghātāddhi bhujavīryavyapāśrayam |
imāmavasthāṃ saṃprāptamanimittamihādya mām || 28 ||
[Analyze grammar]

kiṃ tu nādyānuśocāmi tathātmānaṃ vināśitam |
yathā tu vipine nyastānbhrātṝnrājyaparicyutān || 29 ||
[Analyze grammar]

himavāṃśca sudurgo'yaṃ yakṣarākṣasasaṃkulaḥ |
māṃ ca te samudīkṣantaḥ prapatiṣyanti vihvalāḥ || 30 ||
[Analyze grammar]

vinaṣṭamatha vā śrutvā bhaviṣyanti nirudyamāḥ |
dharmaśīlā mayā te hi bādhyante rājyagṛddhinā || 31 ||
[Analyze grammar]

atha vā nārjuno dhīmānviṣādamupayāsyati |
sarvāstravidanādhṛṣyo devagandharvarākṣasaiḥ || 32 ||
[Analyze grammar]

samarthaḥ sa mahābāhurekāhnā sumahābalaḥ |
devarājamapi sthānātpracyāvayitumojasā || 33 ||
[Analyze grammar]

kiṃ punardhṛtarāṣṭrasya putraṃ durdyūtadevinam |
vidviṣṭaṃ sarvalokasya dambhalobhaparāyaṇam || 34 ||
[Analyze grammar]

mātaraṃ caiva śocāmi kṛpaṇāṃ putragṛddhinīm |
yāsmākaṃ nityamāśāste mahattvamadhikaṃ paraiḥ || 35 ||
[Analyze grammar]

kathaṃ nu tasyānāthāyā madvināśādbhujaṃgama |
aphalāste bhaviṣyanti mayi sarve manorathāḥ || 36 ||
[Analyze grammar]

nakulaḥ sahadevaśca yamajau guruvartinau |
madbāhubalasaṃstabdhau nityaṃ puruṣamāninau || 37 ||
[Analyze grammar]

nirutsāhau bhaviṣyete bhraṣṭavīryaparākramau |
madvināśātparidyūnāviti me vartate matiḥ || 38 ||
[Analyze grammar]

evaṃvidhaṃ bahu tadā vilalāpa vṛkodaraḥ |
bhujaṃgabhogasaṃruddho nāśakacca viceṣṭitum || 39 ||
[Analyze grammar]

yudhiṣṭhirastu kaunteya babhūvāsvasthacetanaḥ |
aniṣṭadarśanānghorānutpātānparicintayan || 40 ||
[Analyze grammar]

dāruṇaṃ hyaśivaṃ nādaṃ śivā dakṣiṇataḥ sthitā |
dīptāyāṃ diśi vitrastā rauti tasyāśramasya ha || 41 ||
[Analyze grammar]

ekapakṣākṣicaraṇā vartikā ghoradarśanā |
rudhiraṃ vamantī dadṛśe pratyādityamapasvarā || 42 ||
[Analyze grammar]

pravavāvanilo rūkṣaścaṇḍaḥ śarkarakarṣaṇaḥ |
apasavyāni sarvāṇi mṛgapakṣirutāni ca || 43 ||
[Analyze grammar]

pṛṣṭhato vāyasaḥ kṛṣṇo yāhi yāhīti vāśati |
muhurmuhuḥ prasphurati dakṣiṇo'sya bhujastathā || 44 ||
[Analyze grammar]

hṛdayaṃ caraṇaścāpi vāmo'sya parivartate |
savyasyākṣṇo vikāraścāpyaniṣṭaḥ samapadyata || 45 ||
[Analyze grammar]

sa dharmarājo medhāvī śaṅkamāno mahadbhayam |
draupadīṃ paripapraccha kva bhīma iti bhārata || 46 ||
[Analyze grammar]

śaśaṃsa tasmai pāñcālī cirayātaṃ vṛkodaram |
sa pratasthe mahābāhurdhaumyena sahito nṛpaḥ || 47 ||
[Analyze grammar]

draupadyā rakṣaṇaṃ kāryamityuvāca dhanaṃjayam |
nakulaṃ sahadevaṃ ca vyādideśa dvijānprati || 48 ||
[Analyze grammar]

sa tasya padamunnīya tasmādevāśramātprabhuḥ |
dadarśa pṛthivīṃ cihnairbhīmasya paricihnitām || 49 ||
[Analyze grammar]

dhāvatastasya vīrasya mṛgārthe vātaraṃhasaḥ |
ūruvātavinirbhagnāndrumānvyāvarjitānpathi || 50 ||
[Analyze grammar]

sa gatvā taistadā cihnairdadarśa girigahvare |
gṛhītaṃ bhujagendreṇa niśceṣṭamanujaṃ tathā || 51 ||
[Analyze grammar]