Chapter 170

arjuna uvāca |
nivartamānena mayā mahaddṛṣṭaṃ tato'param |
puraṃ kāmacaraṃ divyaṃ pāvakārkasamaprabham || 1 ||
[Analyze grammar]

drumai ratnamayaiścaitrairbhāsvaraiśca patatribhiḥ |
paulomaiḥ kālakeyaiśca nityahṛṣṭairadhiṣṭhitam || 2 ||
[Analyze grammar]

gopurāṭṭālakopetaṃ caturdvāraṃ durāsadam |
sarvaratnamayaṃ divyamadbhutopamadarśanam |
drumaiḥ puṣpaphalopetairdivyaratnamayairvṛtam || 3 ||
[Analyze grammar]

tathā patatribhirdivyairupetaṃ sumanoharaiḥ |
asurairnityamuditaiḥ śūlarṣṭimusalāyudhaiḥ |
cāpamudgarahastaiśca sragvibhiḥ sarvato vṛtam || 4 ||
[Analyze grammar]

tadahaṃ prekṣya daityānāṃ puramadbhutadarśanam |
apṛcchaṃ mātaliṃ rājankimidaṃ dṛśyateti vai || 5 ||
[Analyze grammar]

mātaliruvāca |
pulomā nāma daiteyī kālakā ca mahāsurī |
divyaṃ varṣasahasraṃ te ceratuḥ paramaṃ tapaḥ |
tapaso'nte tatastābhyāṃ svayambhūradadādvaram || 6 ||
[Analyze grammar]

agṛhṇītāṃ varaṃ te tu sutānāmalpaduḥkhatām |
avadhyatāṃ ca rājendra surarākṣasapannagaiḥ || 7 ||
[Analyze grammar]

ramaṇīyaṃ puraṃ cedaṃ khacaraṃ sukṛtaprabham |
sarvaratnaiḥ samuditaṃ durdharṣamamarairapi |
sayakṣagandharvagaṇaiḥ pannagāsurarākṣasaiḥ || 8 ||
[Analyze grammar]

sarvakāmaguṇopetaṃ vītaśokamanāmayam |
brahmaṇā bharataśreṣṭha kālakeyakṛte kṛtam || 9 ||
[Analyze grammar]

tadetatkhacaraṃ divyaṃ caratyamaravarjitam |
paulomādhyuṣitaṃ vīra kālakeyaiśca dānavaiḥ || 10 ||
[Analyze grammar]

hiraṇyapuramityetatkhyāyate nagaraṃ mahat |
rakṣitaṃ kālakeyaiśca paulomaiśca mahāsuraiḥ || 11 ||
[Analyze grammar]

ta ete muditā nityamavadhyāḥ sarvadaivataiḥ |
nivasantyatra rājendra gatodvegā nirutsukāḥ |
mānuṣo mṛtyureteṣāṃ nirdiṣṭo brahmaṇā purā || 12 ||
[Analyze grammar]

arjuna uvāca |
surāsurairavadhyāṃstānahaṃ jñātvā tataḥ prabho |
abruvaṃ mātaliṃ hṛṣṭo yāhyetatpuramañjasā || 13 ||
[Analyze grammar]

tridaśeśadviṣo yāvatkṣayamastrairnayāmyaham |
na kathaṃciddhi me pāpā na vadhyā ye suradviṣaḥ || 14 ||
[Analyze grammar]

uvāha māṃ tataḥ śīghraṃ hiraṇyapuramantikāt |
rathena tena divyena hariyuktena mātaliḥ || 15 ||
[Analyze grammar]

te māmālakṣya daiteyā vicitrābharaṇāmbarāḥ |
samutpeturmahāvegā rathānāsthāya daṃśitāḥ || 16 ||
[Analyze grammar]

tato nālīkanārācairbhallaśaktyṛṣṭitomaraiḥ |
abhyaghnandānavendrā māṃ kruddhāstīvraparākramāḥ || 17 ||
[Analyze grammar]

tadahaṃ cāstravarṣeṇa mahatā pratyavārayam |
śastravarṣaṃ mahadrājanvidyābalamupāśritaḥ || 18 ||
[Analyze grammar]

vyāmohayaṃ ca tānsarvānrathamārgaiścaranraṇe |
te'nyonyamabhisaṃmūḍhāḥ pātayanti sma dānavāḥ || 19 ||
[Analyze grammar]

teṣāmahaṃ vimūḍhānāmanyonyamabhidhāvatām |
śirāṃsi viśikhairdīptairvyaharaṃ śatasaṃghaśaḥ || 20 ||
[Analyze grammar]

te vadhyamānā daiteyāḥ puramāsthāya tatpunaḥ |
khamutpetuḥ sanagarā māyāmāsthāya dānavīm || 21 ||
[Analyze grammar]

tato'haṃ śaravarṣeṇa mahatā pratyavārayam |
mārgamāvṛtya daityānāṃ gatiṃ caiṣāmavārayam || 22 ||
[Analyze grammar]

tatpuraṃ khacaraṃ divyaṃ kāmagaṃ divyavarcasam |
daiteyairvaradānena dhāryate sma yathāsukham || 23 ||
[Analyze grammar]

antarbhūmau nipatitaṃ punarūrdhvaṃ pratiṣṭhate |
punastiryakprayātyāśu punarapsu nimajjati || 24 ||
[Analyze grammar]

amarāvatisaṃkāśaṃ puraṃ kāmagamaṃ tu tat |
ahamastrairbahuvidhaiḥ pratyagṛhṇaṃ narādhipa || 25 ||
[Analyze grammar]

tato'haṃ śarajālena divyāstramuditena ca |
nyagṛhṇaṃ saha daiteyaistatpuraṃ bharatarṣabha || 26 ||
[Analyze grammar]

vikṣataṃ cāyasairbāṇairmatprayuktairajihmagaiḥ |
mahīmabhyapatadrājanprabhagnaṃ puramāsuram || 27 ||
[Analyze grammar]

te vadhyamānā madbāṇairvajravegairayasmayaiḥ |
paryabhramanta vai rājannasurāḥ kālacoditāḥ || 28 ||
[Analyze grammar]

tato mātalirapyāśu purastānnipatanniva |
mahīmavātaratkṣipraṃ rathenādityavarcasā || 29 ||
[Analyze grammar]

tato rathasahasrāṇi ṣaṣṭisteṣāmamarṣiṇām |
yuyutsūnāṃ mayā sārdhaṃ paryavartanta bhārata || 30 ||
[Analyze grammar]

tānahaṃ niśitairbāṇairvyadhamaṃ gārdhravājitaiḥ |
te yuddhe saṃnyavartanta samudrasya yathormayaḥ || 31 ||
[Analyze grammar]

neme śakyā mānuṣeṇa yuddheneti pracintya vai |
tato'hamānupūrvyeṇa sarvāṇyastrāṇyayojayam || 32 ||
[Analyze grammar]

tatastāni sahasrāṇi rathānāṃ citrayodhinām |
astrāṇi mama divyāni pratyaghnañśanakairiva || 33 ||
[Analyze grammar]

rathamārgānvicitrāṃste vicaranto mahārathāḥ |
pratyadṛśyanta saṃgrāme śataśo'tha sahasraśaḥ || 34 ||
[Analyze grammar]

vicitramukuṭāpīḍā vicitrakavacadhvajāḥ |
vicitrābharaṇāścaiva nandayantīva me manaḥ || 35 ||
[Analyze grammar]

ahaṃ tu śaravarṣaistānastrapramuditai raṇe |
nāśaknuvaṃ pīḍayituṃ te tu māṃ paryapīḍayan || 36 ||
[Analyze grammar]

taiḥ pīḍyamāno bahubhiḥ kṛtāstraiḥ kuśalairyudhi |
vyathito'smi mahāyuddhe bhayaṃ cāgānmahanmama || 37 ||
[Analyze grammar]

tato'haṃ devadevāya rudrāya praṇato raṇe |
svasti bhūtebhya ityuktvā mahāstraṃ samayojayam |
yattadraudramiti khyātaṃ sarvāmitravināśanam || 38 ||
[Analyze grammar]

tato'paśyaṃ triśirasaṃ puruṣaṃ navalocanam |
trimukhaṃ ṣaḍbhujaṃ dīptamarkajvalanamūrdhajam |
lelihānairmahānāgaiḥ kṛtaśīrṣamamitrahan || 39 ||
[Analyze grammar]

vibhīstatastadastraṃ tu ghoraṃ raudraṃ sanātanam |
dṛṣṭvā gāṇḍīvasaṃyogamānīya bharatarṣabha || 40 ||
[Analyze grammar]

namaskṛtvā trinetrāya śarvāyāmitatejase |
muktavāndānavendrāṇāṃ parābhāvāya bhārata || 41 ||
[Analyze grammar]

muktamātre tatastasminrūpāṇyāsansahasraśaḥ |
mṛgāṇāmatha siṃhānāṃ vyāghrāṇāṃ ca viśāṃ pate |
ṛkṣāṇāṃ mahiṣāṇāṃ ca pannagānāṃ tathā gavām || 42 ||
[Analyze grammar]

gajānāṃ sṛmarāṇāṃ ca śarabhāṇāṃ ca sarvaśaḥ |
ṛṣabhāṇāṃ varāhāṇāṃ mārjārāṇāṃ tathaiva ca |
śālāvṛkāṇāṃ pretānāṃ bhuruṇḍānāṃ ca sarvaśaḥ || 43 ||
[Analyze grammar]

gṛdhrāṇāṃ garuḍānāṃ ca makarāṇāṃ tathaiva ca |
piśācānāṃ sayakṣāṇāṃ tathaiva ca suradviṣām || 44 ||
[Analyze grammar]

guhyakānāṃ ca saṃgrāme nairṛtānāṃ tathaiva ca |
jhaṣāṇāṃ gajavaktrāṇāmulūkānāṃ tathaiva ca || 45 ||
[Analyze grammar]

mīnakūrmasamūhānāṃ nānāśastrāsipāṇinām |
tathaiva yātu dhānānāṃ gadāmudgaradhāriṇām || 46 ||
[Analyze grammar]

etaiścānyaiśca bahubhirnānārūpadharaistathā |
sarvamāsījjagadvyāptaṃ tasminnastre visarjite || 47 ||
[Analyze grammar]

triśirobhiścaturdaṃṣṭraiścaturāsyaiścaturbhujaiḥ |
anekarūpasaṃyuktairmāṃsamedovasāśibhiḥ |
abhīkṣṇaṃ vadhyamānāste dānavā ye samāgatāḥ || 48 ||
[Analyze grammar]

arkajvalanatejobhirvajrāśanisamaprabhaiḥ |
adrisāramayaiścānyairbāṇairarividāraṇaiḥ |
nyahanaṃ dānavānsarvānmuhūrtenaiva bhārata || 49 ||
[Analyze grammar]

gāṇḍīvāstrapraṇunnāṃstāngatāsūnnabhasaścyutān |
dṛṣṭvāhaṃ prāṇamaṃ bhūyastripuraghnāya vedhase || 50 ||
[Analyze grammar]

tathā raudrāstraniṣpiṣṭāndivyābharaṇabhūṣitān |
niśāmya paramaṃ harṣamagamaddevasārathiḥ || 51 ||
[Analyze grammar]

tadasahyaṃ kṛtaṃ karma devairapi durāsadam |
dṛṣṭvā māṃ pūjayāmāsa mātaliḥ śakrasārathiḥ || 52 ||
[Analyze grammar]

uvāca cedaṃ vacanaṃ prīyamāṇaḥ kṛtāñjaliḥ |
surāsurairasahyaṃ hi karma yatsādhitaṃ tvayā |
na hyetatsaṃyuge kartumapi śaktaḥ sureśvaraḥ || 53 ||
[Analyze grammar]

surāsurairavadhyaṃ hi purametatkhagaṃ mahat |
tvayā vimathitaṃ vīra svavīryāstratapobalāt || 54 ||
[Analyze grammar]

vidhvaste'tha pure tasmindānaveṣu hateṣu ca |
vinadantyaḥ striyaḥ sarvā niṣpeturnagarādbahiḥ || 55 ||
[Analyze grammar]

prakīrṇakeśyo vyathitāḥ kurarya iva duḥkhitāḥ |
petuḥ putrānpitṝnbhrātṝñśocamānā mahītale || 56 ||
[Analyze grammar]

rudantyo dīnakaṇṭhyastā vinadantyo hateśvarāḥ |
urāṃsi pāṇibhirghnantyaḥ prasrastasragvibhūṣaṇāḥ || 57 ||
[Analyze grammar]

tacchokayuktamaśrīkaṃ duḥkhadainyasamāhatam |
na babhau dānavapuraṃ hatatviṭkaṃ hateśvaram || 58 ||
[Analyze grammar]

gandharvanagarākāraṃ hatanāgamiva hradam |
śuṣkavṛkṣamivāraṇyamadṛśyamabhavatpuram || 59 ||
[Analyze grammar]

māṃ tu saṃhṛṣṭamanasaṃ kṣipraṃ mātalirānayat |
devarājasya bhavanaṃ kṛtakarmāṇamāhavāt || 60 ||
[Analyze grammar]

hiraṇyapuramārujya nihatya ca mahāsurān |
nivātakavacāṃścaiva tato'haṃ śakramāgamam || 61 ||
[Analyze grammar]

mama karma ca devendraṃ mātalirvistareṇa tat |
sarvaṃ viśrāvayāmāsa yathā bhūtaṃ mahādyute || 62 ||
[Analyze grammar]

hiraṇyapuraghātaṃ ca māyānāṃ ca nivāraṇam |
nivātakavacānāṃ ca vadhaṃ saṃkhye mahaujasām || 63 ||
[Analyze grammar]

tacchrutvā bhagavānprītaḥ sahasrākṣaḥ puraṃdaraḥ |
marudbhiḥ sahitaḥ śrīmānsādhu sādhvityathābravīt || 64 ||
[Analyze grammar]

tato māṃ devarājo vai samāśvāsya punaḥ punaḥ |
abravīdvibudhaiḥ sārdhamidaṃ sumadhuraṃ vacaḥ || 65 ||
[Analyze grammar]

atidevāsuraṃ karma kṛtametattvayā raṇe |
gurvarthaśca mahānpārtha kṛtaḥ śatrūnghnatā mama || 66 ||
[Analyze grammar]

evameva sadā bhāvyaṃ sthireṇājau dhanaṃjaya |
asaṃmūḍhena cāstrāṇāṃ kartavyaṃ pratipādanam || 67 ||
[Analyze grammar]

aviṣahyo raṇe hi tvaṃ devadānavarākṣasaiḥ |
sayakṣāsuragandharvaiḥ sapakṣigaṇapannagaiḥ || 68 ||
[Analyze grammar]

vasudhāṃ cāpi kaunteya tvadbāhubalanirjitām |
pālayiṣyati dharmātmā kuntīputro yudhiṣṭhiraḥ || 69 ||
[Analyze grammar]