Chapter 148

vaiśaṃpāyana uvāca |
evamukto mahābāhurbhīmasenaḥ pratāpavān |
praṇipatya tataḥ prītyā bhrātaraṃ hṛṣṭamānasaḥ |
uvāca ślakṣṇayā vācā hanūmantaṃ kapīśvaram || 1 ||
[Analyze grammar]

mayā dhanyataro nāsti yadāryaṃ dṛṣṭavānaham |
anugraho me sumahāṃstṛptiśca tava darśanāt || 2 ||
[Analyze grammar]

evaṃ tu kṛtamicchāmi tvayāryādya priyaṃ mama |
yatte tadāsītplavataḥ sāgaraṃ makarālayam |
rūpamapratimaṃ vīra tadicchāmi nirīkṣitum || 3 ||
[Analyze grammar]

evaṃ tuṣṭo bhaviṣyāmi śraddhāsyāmi ca te vacaḥ |
evamuktaḥ sa tejasvī prahasya harirabravīt || 4 ||
[Analyze grammar]

na tacchakyaṃ tvayā draṣṭuṃ rūpaṃ nānyena kenacit |
kālāvasthā tadā hyanyā vartate sā na sāṃpratam || 5 ||
[Analyze grammar]

anyaḥ kṛtayuge kālastretāyāṃ dvāpare'paraḥ |
ayaṃ pradhvaṃsanaḥ kālo nādya tadrūpamasti me || 6 ||
[Analyze grammar]

bhūmirnadyo nagāḥ śailāḥ siddhā devā maharṣayaḥ |
kālaṃ samanuvartante yathā bhāvā yuge yuge |
balavarṣmaprabhāvā hi prahīyantyudbhavanti ca || 7 ||
[Analyze grammar]

tadalaṃ tava tadrūpaṃ draṣṭuṃ kurukulodvaha |
yugaṃ samanuvartāmi kālo hi duratikramaḥ || 8 ||
[Analyze grammar]

bhīma uvāca |
yugasaṃkhyāṃ samācakṣva ācāraṃ ca yuge yuge |
dharmakāmārthabhāvāṃśca varṣma vīryaṃ bhavābhavau || 9 ||
[Analyze grammar]

hanūmānuvāca |
kṛtaṃ nāma yugaṃ tāta yatra dharmaḥ sanātanaḥ |
kṛtameva na kartavyaṃ tasminkāle yugottame || 10 ||
[Analyze grammar]

na tatra dharmāḥ sīdanti na kṣīyante ca vai prajāḥ |
tataḥ kṛtayugaṃ nāma kālena guṇatāṃ gatam || 11 ||
[Analyze grammar]

devadānavagandharvayakṣarākṣasapannagāḥ |
nāsankṛtayuge tāta tadā na krayavikrayāḥ || 12 ||
[Analyze grammar]

na sāmayajuṛgvarṇāḥ kriyā nāsīcca mānavī |
abhidhyāya phalaṃ tatra dharmaḥ saṃnyāsa eva ca || 13 ||
[Analyze grammar]

na tasminyugasaṃsarge vyādhayo nendriyakṣayaḥ |
nāsūyā nāpi ruditaṃ na darpo nāpi paiśunam || 14 ||
[Analyze grammar]

na vigrahaḥ kutastandrī na dveṣo nāpi vaikṛtam |
na bhayaṃ na ca saṃtāpo na cerṣyā na ca matsaraḥ || 15 ||
[Analyze grammar]

tataḥ paramakaṃ brahma yā gatiryogināṃ parā |
ātmā ca sarvabhūtānāṃ śuklo nārāyaṇastadā || 16 ||
[Analyze grammar]

brāhmaṇāḥ kṣatriyā vaiśyāḥ śūdrāśca kṛtalakṣaṇāḥ |
kṛte yuge samabhavansvakarmaniratāḥ prajāḥ || 17 ||
[Analyze grammar]

samāśramaṃ samācāraṃ samajñānamatībalam |
tadā hi samakarmāṇo varṇā dharmānavāpnuvan || 18 ||
[Analyze grammar]

ekavedasamāyuktā ekamantravidhikriyāḥ |
pṛthagdharmāstvekavedā dharmamekamanuvratāḥ || 19 ||
[Analyze grammar]

cāturāśramyayuktena karmaṇā kālayoginā |
akāmaphalasaṃyogātprāpnuvanti parāṃ gatim || 20 ||
[Analyze grammar]

ātmayogasamāyukto dharmo'yaṃ kṛtalakṣaṇaḥ |
kṛte yuge catuṣpādaścāturvarṇyasya śāśvataḥ || 21 ||
[Analyze grammar]

etatkṛtayugaṃ nāma traiguṇyaparivarjitam |
tretāmapi nibodha tvaṃ yasminsatraṃ pravartate || 22 ||
[Analyze grammar]

pādena hrasate dharmo raktatāṃ yāti cācyutaḥ |
satyapravṛttāśca narāḥ kriyādharmaparāyaṇāḥ || 23 ||
[Analyze grammar]

tato yajñāḥ pravartante dharmāśca vividhāḥ kriyāḥ |
tretāyāṃ bhāvasaṃkalpāḥ kriyādānaphalodayāḥ || 24 ||
[Analyze grammar]

pracalanti na vai dharmāttapodānaparāyaṇāḥ |
svadharmasthāḥ kriyāvanto janāstretāyuge'bhavan || 25 ||
[Analyze grammar]

dvāpare'pi yuge dharmo dvibhāgonaḥ pravartate |
viṣṇurvai pītatāṃ yāti caturdhā veda eva ca || 26 ||
[Analyze grammar]

tato'nye ca caturvedāstrivedāśca tathāpare |
dvivedāścaikavedāścāpyanṛcaśca tathāpare || 27 ||
[Analyze grammar]

evaṃ śāstreṣu bhinneṣu bahudhā nīyate kriyā |
tapodānapravṛttā ca rājasī bhavati prajā || 28 ||
[Analyze grammar]

ekavedasya cājñānādvedāste bahavaḥ kṛtāḥ |
satyasya ceha vibhraṃśātsatye kaścidavasthitaḥ || 29 ||
[Analyze grammar]

satyātpracyavamānānāṃ vyādhayo bahavo'bhavan |
kāmāścopadravāścaiva tadā daivatakāritāḥ || 30 ||
[Analyze grammar]

yairardyamānāḥ subhṛśaṃ tapastapyanti mānavāḥ |
kāmakāmāḥ svargakāmā yajñāṃstanvanti cāpare || 31 ||
[Analyze grammar]

evaṃ dvāparamāsādya prajāḥ kṣīyantyadharmataḥ |
pādenaikena kaunteya dharmaḥ kaliyuge sthitaḥ || 32 ||
[Analyze grammar]

tāmasaṃ yugamāsādya kṛṣṇo bhavati keśavaḥ |
vedācārāḥ praśāmyanti dharmayajñakriyāstathā || 33 ||
[Analyze grammar]

ītayo vyādhayastandrī doṣāḥ krodhādayastathā |
upadravāśca vartante ādhayo vyādhayastathā || 34 ||
[Analyze grammar]

yugeṣvāvartamāneṣu dharmo vyāvartate punaḥ |
dharme vyāvartamāne tu loko vyāvartate punaḥ || 35 ||
[Analyze grammar]

loke kṣīṇe kṣayaṃ yānti bhāvā lokapravartakāḥ |
yugakṣayakṛtā dharmāḥ prārthanāni vikurvate || 36 ||
[Analyze grammar]

etatkaliyugaṃ nāma acirādyatpravartate |
yugānuvartanaṃ tvetatkurvanti cirajīvinaḥ || 37 ||
[Analyze grammar]

yacca te matparijñāne kautūhalamariṃdama |
anarthakeṣu ko bhāvaḥ puruṣasya vijānataḥ || 38 ||
[Analyze grammar]

etatte sarvamākhyātaṃ yanmāṃ tvaṃ paripṛcchasi |
yugasaṃkhyāṃ mahābāho svasti prāpnuhi gamyatām || 39 ||
[Analyze grammar]