Chapter 126

yudhiṣṭhira uvāca |
māndhātā rājaśārdūlastriṣu lokeṣu viśrutaḥ |
kathaṃ jāto mahābrahmanyauvanāśvo nṛpottamaḥ |
kathaṃ caitāṃ parāṃ kāṣṭhāṃ prāptavānamitadyutiḥ || 1 ||
[Analyze grammar]

yasya lokāstrayo vaśyā viṣṇoriva mahātmanaḥ |
etadicchāmyahaṃ śrotuṃ caritaṃ tasya dhīmataḥ || 2 ||
[Analyze grammar]

yathā māndhātṛśabdaśca tasya śakrasamadyuteḥ |
janma cāprativīryasya kuśalo hyasi bhāṣitum || 3 ||
[Analyze grammar]

lomaśa uvāca |
śṛṇuṣvāvahito rājanrājñastasya mahātmanaḥ |
yathā māndhātṛśabdo vai lokeṣu parigīyate || 4 ||
[Analyze grammar]

ikṣvākuvaṃśaprabhavo yuvanāśvo mahīpatiḥ |
so'yajatpṛthivīpāla kratubhirbhūridakṣiṇaiḥ || 5 ||
[Analyze grammar]

aśvamedhasahasraṃ ca prāpya dharmabhṛtāṃ varaḥ |
anyaiśca kratubhirmukhyairvividhairāptadakṣiṇaiḥ || 6 ||
[Analyze grammar]

anapatyastu rājarṣiḥ sa mahātmā dṛḍhavrataḥ |
mantriṣvādhāya tadrājyaṃ vananityo babhūva ha || 7 ||
[Analyze grammar]

śāstradṛṣṭena vidhinā saṃyojyātmānamātmanā |
pipāsāśuṣkahṛdayaḥ praviveśāśramaṃ bhṛgoḥ || 8 ||
[Analyze grammar]

tāmeva rātriṃ rājendra mahātmā bhṛgunandanaḥ |
iṣṭiṃ cakāra saudyumnermaharṣiḥ putrakāraṇāt || 9 ||
[Analyze grammar]

saṃbhṛto mantrapūtena vāriṇā kalaśo mahān |
tatrātiṣṭhata rājendra pūrvameva samāhitaḥ |
yatprāśya prasavettasya patnī śakrasamaṃ sutam || 10 ||
[Analyze grammar]

taṃ nyasya vedyāṃ kalaśaṃ suṣupuste maharṣayaḥ |
rātrijāgaraṇaśrāntāḥ saudyumniḥ samatītya tān || 11 ||
[Analyze grammar]

śuṣkakaṇṭhaḥ pipāsārtaḥ pānīyārthī bhṛśaṃ nṛpaḥ |
taṃ praviśyāśramaṃ śrāntaḥ pānīyaṃ so'bhyayācata || 12 ||
[Analyze grammar]

tasya śrāntasya śuṣkeṇa kaṇṭhena krośatastadā |
nāśrauṣītkaścana tadā śakuneriva vāśitam || 13 ||
[Analyze grammar]

tatastaṃ kalaśaṃ dṛṣṭvā jalapūrṇaṃ sa pārthivaḥ |
abhyadravata vegena pītvā cāmbho vyavāsṛjat || 14 ||
[Analyze grammar]

sa pītvā śītalaṃ toyaṃ pipāsārto mahīpatiḥ |
nirvāṇamagamaddhīmānsusukhī cābhavattadā || 15 ||
[Analyze grammar]

tataste pratyabudhyanta ṛṣayaḥ sanarādhipāḥ |
nistoyaṃ taṃ ca kalaśaṃ dadṛśuḥ sarva eva te || 16 ||
[Analyze grammar]

kasya karmedamiti ca paryapṛcchansamāgatāḥ |
yuvanāśvo mayetyeva satyaṃ samabhipadyata || 17 ||
[Analyze grammar]

na yuktamiti taṃ prāha bhagavānbhārgavastadā |
sutārthaṃ sthāpitā hyāpastapasā caiva saṃbhṛtāḥ || 18 ||
[Analyze grammar]

mayā hyatrāhitaṃ brahma tapa āsthāya dāruṇam |
putrārthaṃ tava rājarṣe mahābalaparākrama || 19 ||
[Analyze grammar]

mahābalo mahāvīryastapobalasamanvitaḥ |
yaḥ śakramapi vīryeṇa gamayedyamasādanam || 20 ||
[Analyze grammar]

anena vidhinā rājanmayaitadupapāditam |
abbhakṣaṇaṃ tvayā rājannayuktaṃ kṛtamadya vai || 21 ||
[Analyze grammar]

na tvadya śakyamasmābhiretatkartumato'nyathā |
nūnaṃ daivakṛtaṃ hyetadyadevaṃ kṛtavānasi || 22 ||
[Analyze grammar]

pipāsitena yāḥ pītā vidhimantrapuraskṛtāḥ |
āpastvayā mahārāja mattapovīryasaṃbhṛtāḥ |
tābhyastvamātmanā putramevaṃvīryaṃ janiṣyasi || 23 ||
[Analyze grammar]

vidhāsyāmo vayaṃ tatra taveṣṭiṃ paramādbhutām |
yathā śakrasamaṃ putraṃ janayiṣyasi vīryavān || 24 ||
[Analyze grammar]

tato varṣaśate pūrṇe tasya rājño mahātmanaḥ |
vāmaṃ pārśvaṃ vinirbhidya sutaḥ sūrya ivāparaḥ || 25 ||
[Analyze grammar]

niścakrāma mahātejā na ca taṃ mṛtyurāviśat |
yuvanāśvaṃ narapatiṃ tadadbhutamivābhavat || 26 ||
[Analyze grammar]

tataḥ śakro mahātejāstaṃ didṛkṣurupāgamat |
pradeśinīṃ tato'syāsye śakraḥ samabhisaṃdadhe || 27 ||
[Analyze grammar]

māmayaṃ dhāsyatītyevaṃ paribhāṣṭaḥ sa vajriṇā |
māndhāteti ca nāmāsya cakruḥ sendrā divaukasaḥ || 28 ||
[Analyze grammar]

pradeśinīṃ śakradattāmāsvādya sa śiśustadā |
avardhata mahīpāla kiṣkūṇāṃ ca trayodaśa || 29 ||
[Analyze grammar]

vedāstaṃ sadhanurvedā divyānyastrāṇi ceśvaram |
upatasthurmahārāja dhyātamātrāṇi sarvaśaḥ || 30 ||
[Analyze grammar]

dhanurājagavaṃ nāma śarāḥ śṛṅgodbhavāśca ye |
abhedyaṃ kavacaṃ caiva sadyastamupasaṃśrayan || 31 ||
[Analyze grammar]

so'bhiṣikto maghavatā svayaṃ śakreṇa bhārata |
dharmeṇa vyajayallokāṃstrīnviṣṇuriva vikramaiḥ || 32 ||
[Analyze grammar]

tasyāpratihataṃ cakraṃ prāvartata mahātmanaḥ |
ratnāni caiva rājarṣiṃ svayamevopatasthire || 33 ||
[Analyze grammar]

tasyeyaṃ vasusaṃpūrṇā vasudhā vasudhādhipa |
teneṣṭaṃ vividhairyajñairbahubhiḥ svāptadakṣiṇaiḥ || 34 ||
[Analyze grammar]

citacaityo mahātejā dharmaṃ prāpya ca puṣkalam |
śakrasyārdhāsanaṃ rājaṃllabdhavānamitadyutiḥ || 35 ||
[Analyze grammar]

ekāhnā pṛthivī tena dharmanityena dhīmatā |
nirjitā śāsanādeva saratnākarapattanā || 36 ||
[Analyze grammar]

tasya cityairmahārāja kratūnāṃ dakṣiṇāvatām |
caturantā mahī vyāptā nāsītkiṃcidanāvṛtam || 37 ||
[Analyze grammar]

tena padmasahasrāṇi gavāṃ daśa mahātmanā |
brāhmaṇebhyo mahārāja dattānīti pracakṣate || 38 ||
[Analyze grammar]

tena dvādaśavārṣikyāmanāvṛṣṭyāṃ mahātmanā |
vṛṣṭaṃ sasyavivṛddhyarthaṃ miṣato vajrapāṇinaḥ || 39 ||
[Analyze grammar]

tena somakulotpanno gāndhārādhipatirmahān |
garjanniva mahāmeghaḥ pramathya nihataḥ śaraiḥ || 40 ||
[Analyze grammar]

prajāścaturvidhāstena jitā rājanmahātmanā |
tenātmatapasā lokāḥ sthāpitāścāpi tejasā || 41 ||
[Analyze grammar]

tasyaitaddevayajanaṃ sthānamādityavarcasaḥ |
paśya puṇyatame deśe kurukṣetrasya madhyataḥ || 42 ||
[Analyze grammar]

etatte sarvamākhyātaṃ māndhātuścaritaṃ mahat |
janma cāgryaṃ mahīpāla yanmāṃ tvaṃ paripṛcchasi || 43 ||
[Analyze grammar]