Chapter 81

pulastya uvāca |
tato gaccheta rājendra kurukṣetramabhiṣṭutam |
pāpebhyo vipramucyante tadgatāḥ sarvajantavaḥ || 1 ||
[Analyze grammar]

kurukṣetraṃ gamiṣyāmi kurukṣetre vasāmyaham |
ya evaṃ satataṃ brūyātso'pi pāpaiḥ pramucyate || 2 ||
[Analyze grammar]

tatra māsaṃ vasedvīra sarasvatyāṃ yudhiṣṭhira |
yatra brahmādayo devā ṛṣayaḥ siddhacāraṇāḥ || 3 ||
[Analyze grammar]

gandharvāpsaraso yakṣāḥ pannagāśca mahīpate |
brahmakṣetraṃ mahāpuṇyamabhigacchanti bhārata || 4 ||
[Analyze grammar]

manasāpyabhikāmasya kurukṣetraṃ yudhiṣṭhira |
pāpāni vipraṇaśyanti brahmalokaṃ ca gacchati || 5 ||
[Analyze grammar]

gatvā hi śraddhayā yuktaḥ kurukṣetraṃ kurūdvaha |
rājasūyāśvamedhābhyāṃ phalaṃ prāpnoti mānavaḥ || 6 ||
[Analyze grammar]

tato macakrukaṃ rājandvārapālaṃ mahābalam |
yakṣaṃ samabhivādyaiva gosahasraphalaṃ labhet || 7 ||
[Analyze grammar]

tato gaccheta dharmajña viṣṇoḥ sthānamanuttamam |
satataṃ nāma rājendra yatra saṃnihito hariḥ || 8 ||
[Analyze grammar]

tatra snātvārcayitvā ca trilokaprabhavaṃ harim |
aśvamedhamavāpnoti viṣṇulokaṃ ca gacchati || 9 ||
[Analyze grammar]

tataḥ pāriplavaṃ gacchettīrthaṃ trailokyaviśrutam |
agniṣṭomātirātrābhyāṃ phalaṃ prāpnoti mānavaḥ || 10 ||
[Analyze grammar]

pṛthivyāstīrthamāsādya gosahasraphalaṃ labhet |
tataḥ śālūkinīṃ gatvā tīrthasevī narādhipa |
daśāśvamedhike snātvā tadeva labhate phalam || 11 ||
[Analyze grammar]

sarpadarvīṃ samāsādya nāgānāṃ tīrthamuttamam |
agniṣṭomamavāpnoti nāgalokaṃ ca vindati || 12 ||
[Analyze grammar]

tato gaccheta dharmajña dvārapālaṃ tarantukam |
tatroṣya rajanīmekāṃ gosahasraphalaṃ labhet || 13 ||
[Analyze grammar]

tataḥ pañcanadaṃ gatvā niyato niyatāśanaḥ |
koṭitīrthamupaspṛśya hayamedhaphalaṃ labhet |
aśvinostīrthamāsādya rūpavānabhijāyate || 14 ||
[Analyze grammar]

tato gaccheta dharmajña vārāhaṃ tīrthamuttamam |
viṣṇurvārāharūpeṇa pūrvaṃ yatra sthito'bhavat |
tatra snātvā naravyāghra agniṣṭomaphalaṃ labhet || 15 ||
[Analyze grammar]

tato jayantyā rājendra somatīrthaṃ samāviśet |
snātvā phalamavāpnoti rājasūyasya mānavaḥ || 16 ||
[Analyze grammar]

ekahaṃse naraḥ snātvā gosahasraphalaṃ labhet |
kṛtaśaucaṃ samāsādya tīrthasevī kurūdvaha |
puṇḍarīkamavāpnoti kṛtaśauco bhavennaraḥ || 17 ||
[Analyze grammar]

tato muñjavaṭaṃ nāma mahādevasya dhīmataḥ |
tatroṣya rajanīmekāṃ gāṇapatyamavāpnuyāt || 18 ||
[Analyze grammar]

tatraiva ca mahārāja yakṣī lokapariśrutā |
tāṃ cābhigamya rājendra puṇyāṃllokānavāpnuyāt || 19 ||
[Analyze grammar]

kurukṣetrasya taddvāraṃ viśrutaṃ bharatarṣabha |
pradakṣiṇamupāvṛtya tīrthasevī samāhitaḥ || 20 ||
[Analyze grammar]

saṃmite puṣkarāṇāṃ ca snātvārcya pitṛdevatāḥ |
jāmadagnyena rāmeṇa āhṛte vai mahātmanā |
kṛtakṛtyo bhavedrājannaśvamedhaṃ ca vindati || 21 ||
[Analyze grammar]

tato rāmahradāngacchettīrthasevī narādhipa |
yatra rāmeṇa rājendra tarasā dīptatejasā |
kṣatramutsādya vīryeṇa hradāḥ pañca niveśitāḥ || 22 ||
[Analyze grammar]

pūrayitvā naravyāghra rudhireṇeti naḥ śrutam |
pitarastarpitāḥ sarve tathaiva ca pitāmahāḥ |
tataste pitaraḥ prītā rāmamūcurmahīpate || 23 ||
[Analyze grammar]

rāma rāma mahābhāga prītāḥ sma tava bhārgava |
anayā pitṛbhaktyā ca vikrameṇa ca te vibho |
varaṃ vṛṇīṣva bhadraṃ te kimicchasi mahādyute || 24 ||
[Analyze grammar]

evamuktaḥ sa rājendra rāmaḥ praharatāṃ varaḥ |
abravītprāñjalirvākyaṃ pitṝnsa gagane sthitān || 25 ||
[Analyze grammar]

bhavanto yadi me prītā yadyanugrāhyatā mayi |
pitṛprasādādiccheyaṃ tapasāpyāyanaṃ punaḥ || 26 ||
[Analyze grammar]

yacca roṣābhibhūtena kṣatramutsāditaṃ mayā |
tataśca pāpānmucyeyaṃ yuṣmākaṃ tejasā hyaham |
hradāśca tīrthabhūtā me bhaveyurbhuvi viśrutāḥ || 27 ||
[Analyze grammar]

etacchrutvā śubhaṃ vākyaṃ rāmasya pitarastadā |
pratyūcuḥ paramaprītā rāmaṃ harṣasamanvitāḥ || 28 ||
[Analyze grammar]

tapaste vardhatāṃ bhūyaḥ pitṛbhaktyā viśeṣataḥ |
yacca roṣābhibhūtena kṣatramutsāditaṃ tvayā || 29 ||
[Analyze grammar]

tataśca pāpānmuktastvaṃ karmabhiste ca pātitāḥ |
hradāśca tava tīrthatvaṃ gamiṣyanti na saṃśayaḥ || 30 ||
[Analyze grammar]

hradeṣveteṣu yaḥ snātvā pitṝnsaṃtarpayiṣyati |
pitarastasya vai prītā dāsyanti bhuvi durlabham |
īpsitaṃ manasaḥ kāmaṃ svargalokaṃ ca śāśvatam || 31 ||
[Analyze grammar]

evaṃ dattvā varānrājanrāmasya pitarastadā |
āmantrya bhārgavaṃ prītāstatraivāntardadhustadā || 32 ||
[Analyze grammar]

evaṃ rāmahradāḥ puṇyā bhārgavasya mahātmanaḥ |
snātvā hradeṣu rāmasya brahmacārī śubhavrataḥ |
rāmamabhyarcya rājendra labhedbahu suvarṇakam || 33 ||
[Analyze grammar]

vaṃśamūlakamāsādya tīrthasevī kurūdvaha |
svavaṃśamuddharedrājansnātvā vai vaṃśamūlake || 34 ||
[Analyze grammar]

kāyaśodhanamāsādya tīrthaṃ bharatasattama |
śarīraśuddhiḥ snātasya tasmiṃstīrthe na saṃśayaḥ |
śuddhadehaśca saṃyāti śubhāṃllokānanuttamān || 35 ||
[Analyze grammar]

tato gaccheta rājendra tīrthaṃ trailokyaviśrutam |
lokā yatroddhṛtāḥ pūrvaṃ viṣṇunā prabhaviṣṇunā || 36 ||
[Analyze grammar]

lokoddhāraṃ samāsādya tīrthaṃ trailokyaviśrutam |
snātvā tīrthavare rājaṃllokānuddharate svakān |
śrītīrthaṃ ca samāsādya vindate śriyamuttamām || 37 ||
[Analyze grammar]

kapilātīrthamāsādya brahmacārī samāhitaḥ |
tatra snātvārcayitvā ca daivatāni pitṝṃstathā |
kapilānāṃ sahasrasya phalaṃ vindati mānavaḥ || 38 ||
[Analyze grammar]

sūryatīrthaṃ samāsādya snātvā niyatamānasaḥ |
arcayitvā pitṝndevānupavāsaparāyaṇaḥ |
agniṣṭomamavāpnoti sūryalokaṃ ca gacchati || 39 ||
[Analyze grammar]

gavāṃbhavanamāsādya tīrthasevī yathākramam |
tatrābhiṣekaṃ kurvāṇo gosahasraphalaṃ labhet || 40 ||
[Analyze grammar]

śaṅkhinīṃ tatra āsādya tīrthasevī kurūdvaha |
devyāstīrthe naraḥ snātvā labhate rūpamuttamam || 41 ||
[Analyze grammar]

tato gaccheta rājendra dvārapālamarantukam |
tasya tīrthaṃ sarasvatyāṃ yakṣendrasya mahātmanaḥ |
tatra snātvā naro rājannagniṣṭomaphalaṃ labhet || 42 ||
[Analyze grammar]

tato gaccheta dharmajña brahmāvartaṃ narādhipa |
brahmāvarte naraḥ snātvā brahmalokamavāpnuyāt || 43 ||
[Analyze grammar]

tato gaccheta dharmajña sutīrthakamanuttamam |
yatra saṃnihitā nityaṃ pitaro daivataiḥ saha || 44 ||
[Analyze grammar]

tatrābhiṣekaṃ kurvīta pitṛdevārcane rataḥ |
aśvamedhamavāpnoti pitṛlokaṃ ca gacchati || 45 ||
[Analyze grammar]

tato'mbuvaśyaṃ dharmajña samāsādya yathākramam |
kośeśvarasya tīrtheṣu snātvā bharatasattama |
sarvavyādhivinirmukto brahmaloke mahīyate || 46 ||
[Analyze grammar]

mātṛtīrthaṃ ca tatraiva yatra snātasya bhārata |
prajā vivardhate rājannanantāṃ cāśnute śriyam || 47 ||
[Analyze grammar]

tataḥ śītavanaṃ gacchenniyato niyatāśanaḥ |
tīrthaṃ tatra mahārāja mahadanyatra durlabham || 48 ||
[Analyze grammar]

punāti darśanādeva daṇḍenaikaṃ narādhipa |
keśānabhyukṣya vai tasminpūto bhavati bhārata || 49 ||
[Analyze grammar]

tīrthaṃ tatra mahārāja śvānalomāpahaṃ smṛtam |
yatra viprā naravyāghra vidvāṃsastīrthatatparāḥ || 50 ||
[Analyze grammar]

śvānalomāpanayane tīrthe bharatasattama |
prāṇāyāmairnirharanti śvalomāni dvijottamāḥ || 51 ||
[Analyze grammar]

pūtātmānaśca rājendra prayānti paramāṃ gatim |
daśāśvamedhikaṃ caiva tasmiṃstīrthe mahīpate |
tatra snātvā naravyāghra gaccheta paramāṃ gatim || 52 ||
[Analyze grammar]

tato gaccheta rājendra mānuṣaṃ lokaviśrutam |
yatra kṛṣṇamṛgā rājanvyādhena paripīḍitāḥ |
avagāhya tasminsarasi mānuṣatvamupāgatāḥ || 53 ||
[Analyze grammar]

tasmiṃstīrthe naraḥ snātvā brahmacārī jitendriyaḥ |
sarvapāpaviśuddhātmā svargaloke mahīyate || 54 ||
[Analyze grammar]

mānuṣasya tu pūrveṇa krośamātre mahīpate |
āpagā nāma vikhyātā nadī siddhaniṣevitā || 55 ||
[Analyze grammar]

śyāmākabhojanaṃ tatra yaḥ prayacchati mānavaḥ |
devānpitṝṃśca uddiśya tasya dharmaphalaṃ mahat |
ekasminbhojite vipre koṭirbhavati bhojitā || 56 ||
[Analyze grammar]

tatra snātvārcayitvā ca daivatāni pitṝṃstathā |
uṣitvā rajanīmekāmagniṣṭomaphalaṃ labhet || 57 ||
[Analyze grammar]

tato gaccheta rājendra brahmaṇaḥ sthānamuttamam |
brahmodumbaramityeva prakāśaṃ bhuvi bhārata || 58 ||
[Analyze grammar]

tatra saptarṣikuṇḍeṣu snātasya kurupuṃgava |
kedāre caiva rājendra kapiṣṭhalamahātmanaḥ || 59 ||
[Analyze grammar]

brahmāṇamabhigamyātha śuciḥ prayatamānasaḥ |
sarvapāpaviśuddhātmā brahmalokaṃ prapadyate || 60 ||
[Analyze grammar]

kapiṣṭhalasya kedāraṃ samāsādya sudurlabham |
antardhānamavāpnoti tapasā dagdhakilbiṣaḥ || 61 ||
[Analyze grammar]

tato gaccheta rājendra sarakaṃ lokaviśrutam |
kṛṣṇapakṣe caturdaśyāmabhigamya vṛṣadhvajam |
labhate sarvakāmānhi svargalokaṃ ca gacchati || 62 ||
[Analyze grammar]

tisraḥ koṭyastu tīrthānāṃ sarake kurunandana |
rudrakoṭistathā kūpe hradeṣu ca mahīpate |
ilāspadaṃ ca tatraiva tīrthaṃ bharatasattama || 63 ||
[Analyze grammar]

tatra snātvārcayitvā ca pitṝndevāṃśca bhārata |
na durgatimavāpnoti vājapeyaṃ ca vindati || 64 ||
[Analyze grammar]

kiṃdāne ca naraḥ snātvā kiṃjapye ca mahīpate |
aprameyamavāpnoti dānaṃ japyaṃ ca bhārata || 65 ||
[Analyze grammar]

kalaśyāṃ cāpyupaspṛśya śraddadhāno jitendriyaḥ |
agniṣṭomasya yajñasya phalaṃ prāpnoti mānavaḥ || 66 ||
[Analyze grammar]

sarakasya tu pūrveṇa nāradasya mahātmanaḥ |
tīrthaṃ kuruvaraśreṣṭha anājanmeti viśrutam || 67 ||
[Analyze grammar]

tatra tīrthe naraḥ snātvā prāṇāṃścotsṛjya bhārata |
nāradenābhyanujñāto lokānprāpnoti durlabhān || 68 ||
[Analyze grammar]

śuklapakṣe daśamyāṃ tu puṇḍarīkaṃ samāviśet |
tatra snātvā naro rājanpuṇḍarīkaphalaṃ labhet || 69 ||
[Analyze grammar]

tatastriviṣṭapaṃ gacchettriṣu lokeṣu viśrutam |
tatra vaitaraṇī puṇyā nadī pāpapramocanī || 70 ||
[Analyze grammar]

tatra snātvārcayitvā ca śūlapāṇiṃ vṛṣadhvajam |
sarvapāpaviśuddhātmā gaccheta paramāṃ gatim || 71 ||
[Analyze grammar]

tato gaccheta rājendra phalakīvanamuttamam |
yatra devāḥ sadā rājanphalakīvanamāśritāḥ |
tapaścaranti vipulaṃ bahuvarṣasahasrakam || 72 ||
[Analyze grammar]

dṛṣadvatyāṃ naraḥ snātvā tarpayitvā ca devatāḥ |
agniṣṭomātirātrābhyāṃ phalaṃ vindati bhārata || 73 ||
[Analyze grammar]

tīrthe ca sarvadevānāṃ snātvā bharatasattama |
gosahasrasya rājendra phalaṃ prāpnoti mānavaḥ || 74 ||
[Analyze grammar]

pāṇikhāte naraḥ snātvā tarpayitvā ca devatāḥ |
rājasūyamavāpnoti ṛṣilokaṃ ca gacchati || 75 ||
[Analyze grammar]

tato gaccheta rājendra miśrakaṃ tīrthamuttamam |
tatra tīrthāni rājendra miśritāni mahātmanā || 76 ||
[Analyze grammar]

vyāsena nṛpaśārdūla dvijārthamiti naḥ śrutam |
sarvatīrtheṣu sa snāti miśrake snāti yo naraḥ || 77 ||
[Analyze grammar]

tato vyāsavanaṃ gacchenniyato niyatāśanaḥ |
manojave naraḥ snātvā gosahasraphalaṃ labhet || 78 ||
[Analyze grammar]

gatvā madhuvaṭīṃ cāpi devyāstīrthaṃ naraḥ śuciḥ |
tatra snātvārcayeddevānpitṝṃśca prayataḥ śuciḥ |
sa devyā samanujñāto gosahasraphalaṃ labhet || 79 ||
[Analyze grammar]

kauśikyāḥ saṃgame yastu dṛṣadvatyāśca bhārata |
snāti vai niyatāhāraḥ sarvapāpaiḥ pramucyate || 80 ||
[Analyze grammar]

tato vyāsasthalī nāma yatra vyāsena dhīmatā |
putraśokābhitaptena dehatyāgārthaniścayaḥ || 81 ||
[Analyze grammar]

kṛto devaiśca rājendra punarutthāpitastadā |
abhigamya sthalīṃ tasya gosahasraphalaṃ labhet || 82 ||
[Analyze grammar]

kiṃdattaṃ kūpamāsādya tilaprasthaṃ pradāya ca |
gaccheta paramāṃ siddhimṛṇairmuktaḥ kurūdvaha || 83 ||
[Analyze grammar]

ahaśca sudinaṃ caiva dve tīrthe ca sudurlabhe |
tayoḥ snātvā naravyāghra sūryalokamavāpnuyāt || 84 ||
[Analyze grammar]

mṛgadhūmaṃ tato gacchettriṣu lokeṣu viśrutam |
tatra gaṅgāhrade snātvā samabhyarcya ca mānavaḥ |
śūlapāṇiṃ mahādevamaśvamedhaphalaṃ labhet || 85 ||
[Analyze grammar]

devatīrthe naraḥ snātvā gosahasraphalaṃ labhet |
atha vāmanakaṃ gacchettriṣu lokeṣu viśrutam || 86 ||
[Analyze grammar]

tatra viṣṇupade snātvā arcayitvā ca vāmanam |
sarvapāpaviśuddhātmā viṣṇulokamavāpnuyāt || 87 ||
[Analyze grammar]

kulaṃpune naraḥ snātvā punāti svakulaṃ naraḥ |
pavanasya hradaṃ gatvā marutāṃ tīrthamuttamam |
tatra snātvā naravyāghra vāyuloke mahīyate || 88 ||
[Analyze grammar]

amarāṇāṃ hrade snātvā amareṣu narādhipa |
amarāṇāṃ prabhāvena svargaloke mahīyate || 89 ||
[Analyze grammar]

śālihotrasya rājendra śāliśūrpe yathāvidhi |
snātvā naravaraśreṣṭha gosahasraphalaṃ labhet || 90 ||
[Analyze grammar]

śrīkuñjaṃ ca sarasvatyāṃ tīrthaṃ bharatasattama |
tatra snātvā naro rājannagniṣṭomaphalaṃ labhet || 91 ||
[Analyze grammar]

tato naimiṣakuñjaṃ ca samāsādya kurūdvaha |
ṛṣayaḥ kila rājendra naimiṣeyāstapodhanāḥ |
tīrthayātrāṃ puraskṛtya kurukṣetraṃ gatāḥ purā || 92 ||
[Analyze grammar]

tataḥ kuñjaḥ sarasvatyāṃ kṛto bharatasattama |
ṛṣīṇāmavakāśaḥ syādyathā tuṣṭikaro mahān || 93 ||
[Analyze grammar]

tasminkuñje naraḥ snātvā gosahasraphalaṃ labhet |
kanyātīrthe naraḥ snātvā agniṣṭomaphalaṃ labhet || 94 ||
[Analyze grammar]

tato gacchennaravyāghra brahmaṇaḥ sthānamuttamam |
tatra varṇāvaraḥ snātvā brāhmaṇyaṃ labhate naraḥ |
brāhmaṇaśca viśuddhātmā gaccheta paramāṃ gatim || 95 ||
[Analyze grammar]

tato gacchennaraśreṣṭha somatīrthamanuttamam |
tatra snātvā naro rājansomalokamavāpnuyāt || 96 ||
[Analyze grammar]

saptasārasvataṃ tīrthaṃ tato gacchennarādhipa |
yatra maṅkaṇakaḥ siddho maharṣirlokaviśrutaḥ || 97 ||
[Analyze grammar]

purā maṅkaṇako rājankuśāgreṇeti naḥ śrutam |
kṣataḥ kila kare rājaṃstasya śākaraso'sravat || 98 ||
[Analyze grammar]

sa vai śākarasaṃ dṛṣṭvā harṣāviṣṭo mahātapāḥ |
pranṛttaḥ kila viprarṣirvismayotphullalocanaḥ || 99 ||
[Analyze grammar]

tatastasminpranṛtte vai sthāvaraṃ jaṅgamaṃ ca yat |
pranṛttamubhayaṃ vīra tejasā tasya mohitam || 100 ||
[Analyze grammar]

brahmādibhiḥ surai rājannṛṣibhiśca tapodhanaiḥ |
vijñapto vai mahādeva ṛṣerarthe narādhipa |
nāyaṃ nṛtyedyathā deva tathā tvaṃ kartumarhasi || 101 ||
[Analyze grammar]

tataḥ pranṛttamāsādya harṣāviṣṭena cetasā |
surāṇāṃ hitakāmārthamṛṣiṃ devo'bhyabhāṣata || 102 ||
[Analyze grammar]

aho maharṣe dharmajña kimarthaṃ nṛtyate bhavān |
harṣasthānaṃ kimarthaṃ vā tavādya munipuṃgava || 103 ||
[Analyze grammar]

ṛṣiruvāca |
kiṃ na paśyasi me deva karācchākarasaṃ srutam |
yaṃ dṛṣṭvāhaṃ pranṛtto vai harṣeṇa mahatānvitaḥ || 104 ||
[Analyze grammar]

pulastya uvāca |
taṃ prahasyābravīddevo muniṃ rāgeṇa mohitam |
ahaṃ vai vismayaṃ vipra na gacchāmīti paśya mām || 105 ||
[Analyze grammar]

evamuktvā naraśreṣṭha mahādevena dhīmatā |
aṅgulyagreṇa rājendra svāṅguṣṭhastāḍito'nagha || 106 ||
[Analyze grammar]

tato bhasma kṣatādrājannirgataṃ himasaṃnibham |
taddṛṣṭvā vrīḍito rājansa muniḥ pādayorgataḥ || 107 ||
[Analyze grammar]

nānyaṃ devamahaṃ manye rudrātparataraṃ mahat |
surāsurasya jagato gatistvamasi śūladhṛk || 108 ||
[Analyze grammar]

tvayā sṛṣṭamidaṃ viśvaṃ trailokyaṃ sacarācaram |
tvāmeva bhagavansarve praviśanti yugakṣaye || 109 ||
[Analyze grammar]

devairapi na śakyastvaṃ parijñātuṃ kuto mayā |
tvayi sarve ca dṛśyante surā brahmādayo'nagha || 110 ||
[Analyze grammar]

sarvastvamasi lokānāṃ kartā kārayitā ca ha |
tvatprasādātsurāḥ sarve modantīhākutobhayāḥ |
evaṃ stutvā mahādevaṃ sa ṛṣiḥ praṇato'bhavat || 111 ||
[Analyze grammar]

ṛṣiruvāca |
tvatprasādānmahādeva tapo me na kṣareta vai || 112 ||
[Analyze grammar]

pulastya uvāca |
tato devaḥ prahṛṣṭātmā brahmarṣimidamabravīt |
tapaste vardhatāṃ vipra matprasādātsahasradhā || 113 ||
[Analyze grammar]

āśrame ceha vatsyāmi tvayā sārdhaṃ mahāmune |
saptasārasvate snātvā arcayiṣyanti ye tu mām || 114 ||
[Analyze grammar]

na teṣāṃ durlabhaṃ kiṃcidiha loke paratra ca |
sārasvataṃ ca te lokaṃ gamiṣyanti na saṃśayaḥ || 115 ||
[Analyze grammar]

tatastvauśanasaṃ gacchettriṣu lokeṣu viśrutam |
yatra brahmādayo devā ṛṣayaśca tapodhanāḥ || 116 ||
[Analyze grammar]

kārttikeyaśca bhagavāṃstrisaṃdhyaṃ kila bhārata |
sāṃnidhyamakarottatra bhārgavapriyakāmyayā || 117 ||
[Analyze grammar]

kapālamocanaṃ tīrthaṃ sarvapāpapramocanam |
tatra snātvā naravyāghra sarvapāpaiḥ pramucyate || 118 ||
[Analyze grammar]

agnitīrthaṃ tato gacchettatra snātvā nararṣabha |
agnilokamavāpnoti kulaṃ caiva samuddharet || 119 ||
[Analyze grammar]

viśvāmitrasya tatraiva tīrthaṃ bharatasattama |
tatra snātvā mahārāja brāhmaṇyamabhijāyate || 120 ||
[Analyze grammar]

brahmayoniṃ samāsādya śuciḥ prayatamānasaḥ |
tatra snātvā naravyāghra brahmalokaṃ prapadyate |
punātyāsaptamaṃ caiva kulaṃ nāstyatra saṃśayaḥ || 121 ||
[Analyze grammar]

tato gaccheta rājendra tīrthaṃ trailokyaviśrutam |
pṛthūdakamiti khyātaṃ kārttikeyasya vai nṛpa |
tatrābhiṣekaṃ kurvīta pitṛdevārcane rataḥ || 122 ||
[Analyze grammar]

ajñānājjñānato vāpi striyā vā puruṣeṇa vā |
yatkiṃcidaśubhaṃ karma kṛtaṃ mānuṣabuddhinā || 123 ||
[Analyze grammar]

tatsarvaṃ naśyate tasya snātamātrasya bhārata |
aśvamedhaphalaṃ cāpi svargalokaṃ ca gacchati || 124 ||
[Analyze grammar]

puṇyamāhuḥ kurukṣetraṃ kurukṣetrātsarasvatīm |
sarasvatyāśca tīrthāni tīrthebhyaśca pṛthūdakam || 125 ||
[Analyze grammar]

uttame sarvatīrthānāṃ yastyajedātmanastanum |
pṛthūdake japyaparo nainaṃ śvomaraṇaṃ tapet || 126 ||
[Analyze grammar]

gītaṃ sanatkumāreṇa vyāsena ca mahātmanā |
vede ca niyataṃ rājanabhigacchetpṛthūdakam || 127 ||
[Analyze grammar]

pṛthūdakātpuṇyatamaṃ nānyattīrthaṃ narottama |
etanmedhyaṃ pavitraṃ ca pāvanaṃ ca na saṃśayaḥ || 128 ||
[Analyze grammar]

tatra snātvā divaṃ yānti api pāpakṛto janāḥ |
pṛthūdake naraśreṣṭha prāhurevaṃ manīṣiṇaḥ || 129 ||
[Analyze grammar]

madhusravaṃ ca tatraiva tīrthaṃ bharatasattama |
tatra snātvā naro rājangosahasraphalaṃ labhet || 130 ||
[Analyze grammar]

tato gacchennaraśreṣṭha tīrthaṃ devyā yathākramam |
sarasvatyāruṇāyāśca saṃgamaṃ lokaviśrutam || 131 ||
[Analyze grammar]

trirātropoṣitaḥ snātvā mucyate brahmahatyayā |
agniṣṭomātirātrābhyāṃ phalaṃ vindati mānavaḥ || 132 ||
[Analyze grammar]

āsaptamaṃ kulaṃ caiva punāti bharatarṣabha |
avatīrṇaṃ ca tatraiva tīrthaṃ kurukulodvaha |
viprāṇāmanukampārthaṃ darbhiṇā nirmitaṃ purā || 133 ||
[Analyze grammar]

vratopanayanābhyāṃ vā upavāsena vā dvijaḥ |
kriyāmantraiśca saṃyukto brāhmaṇaḥ syānna saṃśayaḥ || 134 ||
[Analyze grammar]

kriyāmantravihīno'pi tatra snātvā nararṣabha |
cīrṇavrato bhavedvipro dṛṣṭametatpurātane || 135 ||
[Analyze grammar]

samudrāścāpi catvāraḥ samānītāśca darbhiṇā |
yeṣu snāto naravyāghra na durgatimavāpnuyāt |
phalāni gosahasrāṇāṃ caturṇāṃ vindate ca saḥ || 136 ||
[Analyze grammar]

tato gaccheta rājendra tīrthaṃ śatasahasrakam |
sāhasrakaṃ ca tatraiva dve tīrthe lokaviśrute || 137 ||
[Analyze grammar]

ubhayorhi naraḥ snātvā gosahasraphalaṃ labhet |
dānaṃ vāpyupavāso vā sahasraguṇitaṃ bhavet || 138 ||
[Analyze grammar]

tato gaccheta rājendra reṇukātīrthamuttamam |
tatrābhiṣekaṃ kurvīta pitṛdevārcane rataḥ |
sarvapāpaviśuddhātmā agniṣṭomaphalaṃ labhet || 139 ||
[Analyze grammar]

vimocanamupaspṛśya jitamanyurjitendriyaḥ |
pratigrahakṛtairdoṣaiḥ sarvaiḥ sa parimucyate || 140 ||
[Analyze grammar]

tataḥ pañcavaṭaṃ gatvā brahmacārī jitendriyaḥ |
puṇyena mahatā yuktaḥ satāṃ loke mahīyate || 141 ||
[Analyze grammar]

yatra yogeśvaraḥ sthāṇuḥ svayameva vṛṣadhvajaḥ |
tamarcayitvā deveśaṃ gamanādeva sidhyati || 142 ||
[Analyze grammar]

aujasaṃ varuṇaṃ tīrthaṃ dīpyate svena tejasā |
yatra brahmādibhirdevairṛṣibhiśca tapodhanaiḥ |
senāpatyena devānāmabhiṣikto guhastadā || 143 ||
[Analyze grammar]

aujasasya tu pūrveṇa kurutīrthaṃ kurūdvaha |
kurutīrthe naraḥ snātvā brahmacārī jitendriyaḥ |
sarvapāpaviśuddhātmā kurulokaṃ prapadyate || 144 ||
[Analyze grammar]

svargadvāraṃ tato gacchenniyato niyatāśanaḥ |
svargalokamavāpnoti brahmalokaṃ ca gacchati || 145 ||
[Analyze grammar]

tato gacchedanarakaṃ tīrthasevī narādhipa |
tatra snātvā naro rājanna durgatimavāpnuyāt || 146 ||
[Analyze grammar]

tatra brahmā svayaṃ nityaṃ devaiḥ saha mahīpate |
anvāsyate naraśreṣṭha nārāyaṇapurogamaiḥ || 147 ||
[Analyze grammar]

sāṃnidhyaṃ caiva rājendra rudrapatnyāḥ kurūdvaha |
abhigamya ca tāṃ devīṃ na durgatimavāpnuyāt || 148 ||
[Analyze grammar]

tatraiva ca mahārāja viśveśvaramumāpatim |
abhigamya mahādevaṃ mucyate sarvakilbiṣaiḥ || 149 ||
[Analyze grammar]

nārāyaṇaṃ cābhigamya padmanābhamariṃdamam |
śobhamāno mahārāja viṣṇulokaṃ prapadyate || 150 ||
[Analyze grammar]

tīrthe tu sarvadevānāṃ snātaḥ sa puruṣarṣabha |
sarvaduḥkhaiḥ parityakto dyotate śaśivatsadā || 151 ||
[Analyze grammar]

tataḥ svastipuraṃ gacchettīrthasevī narādhipa |
pāvanaṃ tīrthamāsādya tarpayetpitṛdevatāḥ |
agniṣṭomasya yajñasya phalaṃ prāpnoti mānavaḥ || 152 ||
[Analyze grammar]

gaṅgāhradaśca tatraiva kūpaśca bharatarṣabha |
tisraḥ koṭyastu tīrthānāṃ tasminkūpe mahīpate |
tatra snātvā naro rājansvargalokaṃ prapadyate || 153 ||
[Analyze grammar]

āpagāyāṃ naraḥ snātvā arcayitvā maheśvaram |
gāṇapatyamavāpnoti kulaṃ coddharate svakam || 154 ||
[Analyze grammar]

tataḥ sthāṇuvaṭaṃ gacchettriṣu lokeṣu viśrutam |
tatra snātvā sthito rātriṃ rudralokamavāpnuyāt || 155 ||
[Analyze grammar]

badarīpācanaṃ gacchedvasiṣṭhasyāśramaṃ tataḥ |
badaraṃ bhakṣayettatra trirātropoṣito naraḥ || 156 ||
[Analyze grammar]

samyagdvādaśa varṣāṇi badarānbhakṣayettu yaḥ |
trirātropoṣitaścaiva bhavettulyo narādhipa || 157 ||
[Analyze grammar]

indramārgaṃ samāsādya tīrthasevī narādhipa |
ahorātropavāsena śakraloke mahīyate || 158 ||
[Analyze grammar]

ekarātraṃ samāsādya ekarātroṣito naraḥ |
niyataḥ satyavādī ca brahmaloke mahīyate || 159 ||
[Analyze grammar]

tato gaccheta dharmajña tīrthaṃ trailokyaviśrutam |
ādityasyāśramo yatra tejorāśermahātmanaḥ || 160 ||
[Analyze grammar]

tasmiṃstīrthe naraḥ snātvā pūjayitvā vibhāvasum |
ādityalokaṃ vrajati kulaṃ caiva samuddharet || 161 ||
[Analyze grammar]

somatīrthe naraḥ snātvā tīrthasevī kurūdvaha |
somalokamavāpnoti naro nāstyatra saṃśayaḥ || 162 ||
[Analyze grammar]

tato gaccheta dharmajña dadhīcasya mahātmanaḥ |
tīrthaṃ puṇyatamaṃ rājanpāvanaṃ lokaviśrutam || 163 ||
[Analyze grammar]

yatra sārasvato rājanso'ṅgirāstapaso nidhiḥ |
tasmiṃstīrthe naraḥ snātvā vājapeyaphalaṃ labhet |
sārasvatīṃ gatiṃ caiva labhate nātra saṃśayaḥ || 164 ||
[Analyze grammar]

tataḥ kanyāśramaṃ gacchenniyato brahmacaryavān |
trirātropoṣito rājannupavāsaparāyaṇaḥ |
labhetkanyāśataṃ divyaṃ brahmalokaṃ ca gacchati || 165 ||
[Analyze grammar]

tato gaccheta dharmajña tīrthaṃ saṃnihitīmapi |
yatra brahmādayo devā ṛṣayaśca tapodhanāḥ |
māsi māsi samāyānti puṇyena mahatānvitāḥ || 166 ||
[Analyze grammar]

saṃnihityāmupaspṛśya rāhugraste divākare |
aśvamedhaśataṃ tena iṣṭaṃ bhavati śāśvatam || 167 ||
[Analyze grammar]

pṛthivyāṃ yāni tīrthāni antarikṣacarāṇi ca |
nadyo nadāstaḍāgāśca sarvaprasravaṇāni ca || 168 ||
[Analyze grammar]

udapānāśca vaprāśca puṇyānyāyatanāni ca |
māsi māsi samāyānti saṃnihityāṃ na saṃśayaḥ || 169 ||
[Analyze grammar]

yatkiṃcidduṣkṛtaṃ karma striyā vā puruṣasya vā |
snātamātrasya tatsarvaṃ naśyate nātra saṃśayaḥ |
padmavarṇena yānena brahmalokaṃ sa gacchati || 170 ||
[Analyze grammar]

abhivādya tato yakṣaṃ dvārapālamarantukam |
koṭirūpamupaspṛśya labhedbahu suvarṇakam || 171 ||
[Analyze grammar]

gaṅgāhradaśca tatraiva tīrthaṃ bharatasattama |
tatra snātastu dharmajña brahmacārī samāhitaḥ |
rājasūyāśvamedhābhyāṃ phalaṃ vindati śāśvatam || 172 ||
[Analyze grammar]

pṛthivyāṃ naimiṣaṃ puṇyamantarikṣe ca puṣkaram |
trayāṇāmapi lokānāṃ kurukṣetraṃ viśiṣyate || 173 ||
[Analyze grammar]

pāṃsavo'pi kurukṣetre vāyunā samudīritāḥ |
api duṣkṛtakarmāṇaṃ nayanti paramāṃ gatim || 174 ||
[Analyze grammar]

dakṣiṇena sarasvatyā uttareṇa dṛṣadvatīm |
ye vasanti kurukṣetre te vasanti triviṣṭape || 175 ||
[Analyze grammar]

kurukṣetraṃ gamiṣyāmi kurukṣetre vasāmyaham |
apyekāṃ vācamutsṛjya sarvapāpaiḥ pramucyate || 176 ||
[Analyze grammar]

brahmavedī kurukṣetraṃ puṇyaṃ brahmarṣisevitam |
tadāvasanti ye rājanna te śocyāḥ kathaṃcana || 177 ||
[Analyze grammar]

tarantukārantukayoryadantaraṃ rāmahradānāṃ ca macakrukasya |
etatkurukṣetrasamantapañcakaṃ pitāmahasyottaravedirucyate || 178 ||
[Analyze grammar]