Chapter 70

bṛhadaśva uvāca |
sa nadīḥ parvatāṃścaiva vanāni ca sarāṃsi ca |
acireṇāticakrāma khecaraḥ khe caranniva || 1 ||
[Analyze grammar]

tathā prayāte tu rathe tadā bhāṅgasvarirnṛpaḥ |
uttarīyamathāpaśyadbhraṣṭaṃ parapuraṃjayaḥ || 2 ||
[Analyze grammar]

tataḥ sa tvaramāṇastu paṭe nipatite tadā |
grahīṣyāmīti taṃ rājā nalamāha mahāmanāḥ || 3 ||
[Analyze grammar]

nigṛhṇīṣva mahābuddhe hayānetānmahājavān |
vārṣṇeyo yāvadetaṃ me paṭamānayatāmiti || 4 ||
[Analyze grammar]

nalastaṃ pratyuvācātha dūre bhraṣṭaḥ paṭastava |
yojanaṃ samatikrānto na sa śakyastvayā punaḥ || 5 ||
[Analyze grammar]

evamukte nalenātha tadā bhāṅgasvarirnṛpaḥ |
āsasāda vane rājanphalavantaṃ bibhītakam || 6 ||
[Analyze grammar]

taṃ dṛṣṭvā bāhukaṃ rājā tvaramāṇo'bhyabhāṣata |
mamāpi sūta paśya tvaṃ saṃkhyāne paramaṃ balam || 7 ||
[Analyze grammar]

sarvaḥ sarvaṃ na jānāti sarvajño nāsti kaścana |
naikatra pariniṣṭhāsti jñānasya puruṣe kvacit || 8 ||
[Analyze grammar]

vṛkṣe'sminyāni parṇāni phalānyapi ca bāhuka |
patitāni ca yānyatra tatraikamadhikaṃ śatam |
ekapatrādhikaṃ patraṃ phalamekaṃ ca bāhuka || 9 ||
[Analyze grammar]

pañca koṭyo'tha patrāṇāṃ dvayorapi ca śākhayoḥ |
pracinuhyasya śākhe dve yāścāpyanyāḥ praśākhikāḥ |
ābhyāṃ phalasahasre dve pañconaṃ śatameva ca || 10 ||
[Analyze grammar]

tato rathādavaplutya rājānaṃ bāhuko'bravīt |
parokṣamiva me rājankatthase śatrukarśana || 11 ||
[Analyze grammar]

atha te gaṇite rājanvidyate na parokṣatā |
pratyakṣaṃ te mahārāja gaṇayiṣye bibhītakam || 12 ||
[Analyze grammar]

ahaṃ hi nābhijānāmi bhavedevaṃ na veti ca |
saṃkhyāsyāmi phalānyasya paśyataste janādhipa |
muhūrtamiva vārṣṇeyo raśmīnyacchatu vājinām || 13 ||
[Analyze grammar]

tamabravīnnṛpaḥ sūtaṃ nāyaṃ kālo vilambitum |
bāhukastvabravīdenaṃ paraṃ yatnaṃ samāsthitaḥ || 14 ||
[Analyze grammar]

pratīkṣasva muhūrtaṃ tvamatha vā tvarate bhavān |
eṣa yāti śivaḥ panthā yāhi vārṣṇeyasārathiḥ || 15 ||
[Analyze grammar]

abravīdṛtuparṇastaṃ sāntvayankurunandana |
tvameva yantā nānyo'sti pṛthivyāmapi bāhuka || 16 ||
[Analyze grammar]

tvatkṛte yātumicchāmi vidarbhānhayakovida |
śaraṇaṃ tvāṃ prapanno'smi na vighnaṃ kartumarhasi || 17 ||
[Analyze grammar]

kāmaṃ ca te kariṣyāmi yanmāṃ vakṣyasi bāhuka |
vidarbhānyadi yātvādya sūryaṃ darśayitāsi me || 18 ||
[Analyze grammar]

athābravīdbāhukastaṃ saṃkhyāyemaṃ bibhītakam |
tato vidarbhānyāsyāmi kuruṣvedaṃ vaco mama || 19 ||
[Analyze grammar]

akāma iva taṃ rājā gaṇayasvetyuvāca ha |
so'vatīrya rathāttūrṇaṃ śātayāmāsa taṃ drumam || 20 ||
[Analyze grammar]

tataḥ sa vismayāviṣṭo rājānamidamabravīt |
gaṇayitvā yathoktāni tāvantyeva phalāni ca || 21 ||
[Analyze grammar]

atyadbhutamidaṃ rājandṛṣṭavānasmi te balam |
śrotumicchāmi tāṃ vidyāṃ yathaitajjñāyate nṛpa || 22 ||
[Analyze grammar]

tamuvāca tato rājā tvarito gamane tadā |
viddhyakṣahṛdayajñaṃ māṃ saṃkhyāne ca viśāradam || 23 ||
[Analyze grammar]

bāhukastamuvācātha dehi vidyāmimāṃ mama |
matto'pi cāśvahṛdayaṃ gṛhāṇa puruṣarṣabha || 24 ||
[Analyze grammar]

ṛtuparṇastato rājā bāhukaṃ kāryagauravāt |
hayajñānasya lobhācca tathetyevābravīdvacaḥ || 25 ||
[Analyze grammar]

yatheṣṭaṃ tvaṃ gṛhāṇedamakṣāṇāṃ hṛdayaṃ param |
nikṣepo me'śvahṛdayaṃ tvayi tiṣṭhatu bāhuka |
evamuktvā dadau vidyāmṛtuparṇo nalāya vai || 26 ||
[Analyze grammar]

tasyākṣahṛdayajñasya śarīrānniḥsṛtaḥ kaliḥ |
karkoṭakaviṣaṃ tīkṣṇaṃ mukhātsatatamudvaman || 27 ||
[Analyze grammar]

kalestasya tadārtasya śāpāgniḥ sa viniḥsṛtaḥ |
sa tena karśito rājā dīrghakālamanātmavān || 28 ||
[Analyze grammar]

tato viṣavimuktātmā svarūpamakarotkaliḥ |
taṃ śaptumaicchatkupito niṣadhādhipatirnalaḥ || 29 ||
[Analyze grammar]

tamuvāca kalirbhīto vepamānaḥ kṛtāñjaliḥ |
kopaṃ saṃyaccha nṛpate kīrtiṃ dāsyāmi te parām || 30 ||
[Analyze grammar]

indrasenasya jananī kupitā māśapatpurā |
yadā tvayā parityaktā tato'haṃ bhṛśapīḍitaḥ || 31 ||
[Analyze grammar]

avasaṃ tvayi rājendra suduḥkhamaparājita |
viṣeṇa nāgarājasya dahyamāno divāniśam || 32 ||
[Analyze grammar]

ye ca tvāṃ manujā loke kīrtayiṣyantyatandritāḥ |
matprasūtaṃ bhayaṃ teṣāṃ na kadācidbhaviṣyati || 33 ||
[Analyze grammar]

evamukto nalo rājā nyayacchatkopamātmanaḥ |
tato bhītaḥ kaliḥ kṣipraṃ praviveśa bibhītakam |
kalistvanyena nādṛśyatkathayannaiṣadhena vai || 34 ||
[Analyze grammar]

tato gatajvaro rājā naiṣadhaḥ paravīrahā |
saṃpranaṣṭe kalau rājansaṃkhyāyātha phalānyuta || 35 ||
[Analyze grammar]

mudā paramayā yuktastejasā ca pareṇa ha |
rathamāruhya tejasvī prayayau javanairhayaiḥ |
bibhītakaścāpraśastaḥ saṃvṛttaḥ kalisaṃśrayāt || 36 ||
[Analyze grammar]

hayottamānutpatato dvijāniva punaḥ punaḥ |
nalaḥ saṃcodayāmāsa prahṛṣṭenāntarātmanā || 37 ||
[Analyze grammar]

vidarbhābhimukho rājā prayayau sa mahāmanāḥ |
nale tu samatikrānte kalirapyagamadgṛhān || 38 ||
[Analyze grammar]

tato gatajvaro rājā nalo'bhūtpṛthivīpate |
vimuktaḥ kalinā rājanrūpamātraviyojitaḥ || 39 ||
[Analyze grammar]