Chapter 65

bṛhadaśva uvāca |
hṛtarājye nale bhīmaḥ sabhārye preṣyatāṃ gate |
dvijānprasthāpayāmāsa naladarśanakāṅkṣayā || 1 ||
[Analyze grammar]

saṃdideśa ca tānbhīmo vasu dattvā ca puṣkalam |
mṛgayadhvaṃ nalaṃ caiva damayantīṃ ca me sutām || 2 ||
[Analyze grammar]

asminkarmaṇi niṣpanne vijñāte niṣadhādhipe |
gavāṃ sahasraṃ dāsyāmi yo vastāvānayiṣyati |
agrahāraṃ ca dāsyāmi grāmaṃ nagarasaṃmitam || 3 ||
[Analyze grammar]

na cecchakyāvihānetuṃ damayantī nalo'pi vā |
jñātamātre'pi dāsyāmi gavāṃ daśaśataṃ dhanam || 4 ||
[Analyze grammar]

ityuktāste yayurhṛṣṭā brāhmaṇāḥ sarvatodiśam |
purarāṣṭrāṇi cinvanto naiṣadhaṃ saha bhāryayā || 5 ||
[Analyze grammar]

tataścedipurīṃ ramyāṃ sudevo nāma vai dvijaḥ |
vicinvāno'tha vaidarbhīmapaśyadrājaveśmani |
puṇyāhavācane rājñaḥ sunandāsahitāṃ sthitām || 6 ||
[Analyze grammar]

mandaprakhyāyamānena rūpeṇāpratimena tām |
pinaddhāṃ dhūmajālena prabhāmiva vibhāvasoḥ || 7 ||
[Analyze grammar]

tāṃ samīkṣya viśālākṣīmadhikaṃ malināṃ kṛśām |
tarkayāmāsa bhaimīti kāraṇairupapādayan || 8 ||
[Analyze grammar]

sudeva uvāca |
yatheyaṃ me purā dṛṣṭā tathārūpeyamaṅganā |
kṛtārtho'smyadya dṛṣṭvemāṃ lokakāntāmiva śriyam || 9 ||
[Analyze grammar]

pūrṇacandrānanāṃ śyāmāṃ cāruvṛttapayodharām |
kurvantīṃ prabhayā devīṃ sarvā vitimirā diśaḥ || 10 ||
[Analyze grammar]

cārupadmapalāśākṣīṃ manmathasya ratīmiva |
iṣṭāṃ sarvasya jagataḥ pūrṇacandraprabhāmiva || 11 ||
[Analyze grammar]

vidarbhasarasastasmāddaivadoṣādivoddhṛtām |
malapaṅkānuliptāṅgīṃ mṛṇālīmiva tāṃ bhṛśam || 12 ||
[Analyze grammar]

paurṇamāsīmiva niśāṃ rāhugrastaniśākarām |
patiśokākulāṃ dīnāṃ śuṣkasrotāṃ nadīmiva || 13 ||
[Analyze grammar]

vidhvastaparṇakamalāṃ vitrāsitavihaṃgamām |
hastihastaparikliṣṭāṃ vyākulāmiva padminīm || 14 ||
[Analyze grammar]

sukumārīṃ sujātāṅgīṃ ratnagarbhagṛhocitām |
dahyamānāmivoṣṇena mṛṇālīmaciroddhṛtām || 15 ||
[Analyze grammar]

rūpaudāryaguṇopetāṃ maṇḍanārhāmamaṇḍitām |
candralekhāmiva navāṃ vyomni nīlābhrasaṃvṛtām || 16 ||
[Analyze grammar]

kāmabhogaiḥ priyairhīnāṃ hīnāṃ bandhujanena ca |
dehaṃ dhārayatīṃ dīnāṃ bhartṛdarśanakāṅkṣayā || 17 ||
[Analyze grammar]

bhartā nāma paraṃ nāryā bhūṣaṇaṃ bhūṣaṇairvinā |
eṣā virahitā tena śobhanāpi na śobhate || 18 ||
[Analyze grammar]

duṣkaraṃ kurute'tyarthaṃ hīno yadanayā nalaḥ |
dhārayatyātmano dehaṃ na śokenāvasīdati || 19 ||
[Analyze grammar]

imāmasitakeśāntāṃ śatapatrāyatekṣaṇām |
sukhārhāṃ duḥkhitāṃ dṛṣṭvā mamāpi vyathate manaḥ || 20 ||
[Analyze grammar]

kadā nu khalu duḥkhasya pāraṃ yāsyati vai śubhā |
bhartuḥ samāgamātsādhvī rohiṇī śaśino yathā || 21 ||
[Analyze grammar]

asyā nūnaṃ punarlābhānnaiṣadhaḥ prītimeṣyati |
rājā rājyaparibhraṣṭaḥ punarlabdhveva medinīm || 22 ||
[Analyze grammar]

tulyaśīlavayoyuktāṃ tulyābhijanasaṃyutām |
naiṣadho'rhati vaidarbhīṃ taṃ ceyamasitekṣaṇā || 23 ||
[Analyze grammar]

yuktaṃ tasyāprameyasya vīryasattvavato mayā |
samāśvāsayituṃ bhāryāṃ patidarśanalālasām || 24 ||
[Analyze grammar]

ayamāśvāsayāmyenāṃ pūrṇacandranibhānanām |
adṛṣṭapūrvāṃ duḥkhasya duḥkhārtāṃ dhyānatatparām || 25 ||
[Analyze grammar]

bṛhadaśva uvāca |
evaṃ vimṛśya vividhaiḥ kāraṇairlakṣaṇaiśca tām |
upagamya tato bhaimīṃ sudevo brāhmaṇo'bravīt || 26 ||
[Analyze grammar]

ahaṃ sudevo vaidarbhi bhrātuste dayitaḥ sakhā |
bhīmasya vacanādrājñastvāmanveṣṭumihāgataḥ || 27 ||
[Analyze grammar]

kuśalī te pitā rājñi janitrī bhrātaraśca te |
āyuṣmantau kuśalinau tatrasthau dārakau ca te |
tvatkṛte bandhuvargāśca gatasattvā ivāsate || 28 ||
[Analyze grammar]

abhijñāya sudevaṃ tu damayantī yudhiṣṭhira |
paryapṛcchattataḥ sarvānkrameṇa suhṛdaḥ svakān || 29 ||
[Analyze grammar]

ruroda ca bhṛśaṃ rājanvaidarbhī śokakarśitā |
dṛṣṭvā sudevaṃ sahasā bhrāturiṣṭaṃ dvijottamam || 30 ||
[Analyze grammar]

tato rudantīṃ tāṃ dṛṣṭvā sunandā śokakarśitām |
sudevena sahaikānte kathayantīṃ ca bhārata || 31 ||
[Analyze grammar]

janitryai preṣayāmāsa sairandhrī rudate bhṛśam |
brāhmaṇena samāgamya tāṃ veda yadi manyase || 32 ||
[Analyze grammar]

atha cedipatermātā rājñaścāntaḥpurāttadā |
jagāma yatra sā bālā brāhmaṇena sahābhavat || 33 ||
[Analyze grammar]

tataḥ sudevamānāyya rājamātā viśāṃ pate |
papraccha bhāryā kasyeyaṃ sutā vā kasya bhāminī || 34 ||
[Analyze grammar]

kathaṃ ca naṣṭā jñātibhyo bharturvā vāmalocanā |
tvayā ca viditā vipra kathamevaṃgatā satī || 35 ||
[Analyze grammar]

etadicchāmyahaṃ tvatto jñātuṃ sarvamaśeṣataḥ |
tattvena hi mamācakṣva pṛcchantyā devarūpiṇīm || 36 ||
[Analyze grammar]

evamuktastayā rājansudevo dvijasattamaḥ |
sukhopaviṣṭa ācaṣṭa damayantyā yathātatham || 37 ||
[Analyze grammar]