Chapter 49

janamejaya uvāca |
astrahetorgate pārthe śakralokaṃ mahātmani |
yudhiṣṭhiraprabhṛtayaḥ kimakurvanta pāṇḍavāḥ || 1 ||
[Analyze grammar]

vaiśaṃpāyana uvāca |
astrahetorgate pārthe śakralokaṃ mahātmani |
nyavasankṛṣṇayā sārdhaṃ kāmyake puruṣarṣabhāḥ || 2 ||
[Analyze grammar]

tataḥ kadācidekānte vivikta iva śādvale |
duḥkhārtā bharataśreṣṭhā niṣeduḥ saha kṛṣṇayā |
dhanaṃjayaṃ śocamānāḥ sāśrukaṇṭhāḥ suduḥkhitāḥ || 3 ||
[Analyze grammar]

tadviyogāddhi tānsarvāñśokaḥ samabhipupluve |
dhanaṃjayaviyogācca rājyanāśācca duḥkhitāḥ || 4 ||
[Analyze grammar]

atha bhīmo mahābāhuryudhiṣṭhiramabhāṣata |
nideśātte mahārāja gato'sau puruṣarṣabhaḥ |
arjunaḥ pāṇḍuputrāṇāṃ yasminprāṇāḥ pratiṣṭhitāḥ || 5 ||
[Analyze grammar]

yasminvinaṣṭe pāñcālāḥ saha putraistathā vayam |
sātyakirvāsudevaśca vinaśyeyurasaṃśayam || 6 ||
[Analyze grammar]

yo'sau gacchati tejasvī bahūnkleśānacintayan |
bhavanniyogādbībhatsustato duḥkhataraṃ nu kim || 7 ||
[Analyze grammar]

yasya bāhū samāśritya vayaṃ sarve mahātmanaḥ |
manyāmahe jitānājau parānprāptāṃ ca medinīm || 8 ||
[Analyze grammar]

yasya prabhāvānna mayā sabhāmadhye dhanuṣmataḥ |
nītā lokamamuṃ sarve dhārtarāṣṭrāḥ sasaubalāḥ || 9 ||
[Analyze grammar]

te vayaṃ bāhubalinaḥ krodhamutthitamātmanaḥ |
sahāmahe bhavanmūlaṃ vāsudevena pālitāḥ || 10 ||
[Analyze grammar]

vayaṃ hi saha kṛṣṇena hatvā karṇamukhānparān |
svabāhuvijitāṃ kṛtsnāṃ praśāsema vasuṃdharām || 11 ||
[Analyze grammar]

bhavato dyūtadoṣeṇa sarve vayamupaplutāḥ |
ahīnapauruṣā rājanbalibhirbalavattamāḥ || 12 ||
[Analyze grammar]

kṣātraṃ dharmaṃ mahārāja samavekṣitumarhasi |
na hi dharmo mahārāja kṣatriyasya vanāśrayaḥ |
rājyameva paraṃ dharmaṃ kṣatriyasya vidurbudhāḥ || 13 ||
[Analyze grammar]

sa kṣatradharmavidrājanmā dharmyānnīnaśaḥ pathaḥ |
prāgdvādaśa samā rājandhārtarāṣṭrānnihanmahi || 14 ||
[Analyze grammar]

nivartya ca vanātpārthamānāyya ca janārdanam |
vyūḍhānīkānmahārāja javenaiva mahāhave |
dhārtarāṣṭrānamuṃ lokaṃ gamayāmi viśāṃ pate || 15 ||
[Analyze grammar]

sarvānahaṃ haniṣyāmi dhārtarāṣṭrānsasaubalān |
duryodhanaṃ ca karṇaṃ ca yo vānyaḥ pratiyotsyate || 16 ||
[Analyze grammar]

mayā praśamite paścāttvameṣyasi vanātpunaḥ |
evaṃ kṛte na te doṣo bhaviṣyati viśāṃ pate || 17 ||
[Analyze grammar]

yajñaiśca vividhaistāta kṛtaṃ pāpamariṃdama |
avadhūya mahārāja gacchema svargamuttamam || 18 ||
[Analyze grammar]

evametadbhavedrājanyadi rājā na bāliśaḥ |
asmākaṃ dīrghasūtraḥ syādbhavāndharmaparāyaṇaḥ || 19 ||
[Analyze grammar]

nikṛtyā nikṛtiprajñā hantavyā iti niścayaḥ |
na hi naikṛtikaṃ hatvā nikṛtyā pāpamucyate || 20 ||
[Analyze grammar]

tathā bhārata dharmeṣu dharmajñairiha dṛśyate |
ahorātraṃ mahārāja tulyaṃ saṃvatsareṇa hi || 21 ||
[Analyze grammar]

tathaiva vedavacanaṃ śrūyate nityadā vibho |
saṃvatsaro mahārāja pūrṇo bhavati kṛcchrataḥ || 22 ||
[Analyze grammar]

yadi vedāḥ pramāṇaṃ te divasādūrdhvamacyuta |
trayodaśa samāḥ kālo jñāyatāṃ pariniṣṭhitaḥ || 23 ||
[Analyze grammar]

kālo duryodhanaṃ hantuṃ sānubandhamariṃdama |
ekāgrāṃ pṛthivīṃ sarvāṃ purā rājankaroti saḥ || 24 ||
[Analyze grammar]

evaṃ bruvāṇaṃ bhīmaṃ tu dharmarājo yudhiṣṭhiraḥ |
uvāca sāntvayanrājā mūrdhnyupāghrāya pāṇḍavam || 25 ||
[Analyze grammar]

asaṃśayaṃ mahābāho haniṣyasi suyodhanam |
varṣāttrayodaśādūrdhvaṃ saha gāṇḍīvadhanvanā || 26 ||
[Analyze grammar]

yacca mā bhāṣase pārtha prāptaḥ kāla iti prabho |
anṛtaṃ notsahe vaktuṃ na hyetanmayi vidyate || 27 ||
[Analyze grammar]

antareṇāpi kaunteya nikṛtiṃ pāpaniścayam |
hantā tvamasi durdharṣa sānubandhaṃ suyodhanam || 28 ||
[Analyze grammar]

evaṃ bruvati bhīmaṃ tu dharmarāje yudhiṣṭhire |
ājagāma mahābhāgo bṛhadaśvo mahānṛṣiḥ || 29 ||
[Analyze grammar]

tamabhiprekṣya dharmātmā saṃprāptaṃ dharmacāriṇam |
śāstravanmadhuparkeṇa pūjayāmāsa dharmarāṭ || 30 ||
[Analyze grammar]

āśvastaṃ cainamāsīnamupāsīno yudhiṣṭhiraḥ |
abhiprekṣya mahābāhuḥ kṛpaṇaṃ bahvabhāṣata || 31 ||
[Analyze grammar]

akṣadyūtena bhagavandhanaṃ rājyaṃ ca me hṛtam |
āhūya nikṛtiprajñaiḥ kitavairakṣakovidaiḥ || 32 ||
[Analyze grammar]

anakṣajñasya hi sato nikṛtyā pāpaniścayaiḥ |
bhāryā ca me sabhāṃ nītā prāṇebhyo'pi garīyasī || 33 ||
[Analyze grammar]

asti rājā mayā kaścidalpabhāgyataro bhuvi |
bhavatā dṛṣṭapūrvo vā śrutapūrvo'pi vā bhavet |
na matto duḥkhitataraḥ pumānastīti me matiḥ || 34 ||
[Analyze grammar]

bṛhadaśva uvāca |
yadbravīṣi mahārāja na matto vidyate kvacit |
alpabhāgyataraḥ kaścitpumānastīti pāṇḍava || 35 ||
[Analyze grammar]

atra te kathayiṣyāmi yadi śuśrūṣase'nagha |
yastvatto duḥkhitataro rājāsītpṛthivīpate || 36 ||
[Analyze grammar]

vaiśaṃpāyana uvāca |
athainamabravīdrājā bravītu bhagavāniti |
imāmavasthāṃ saṃprāptaṃ śrotumicchāmi pārthivam || 37 ||
[Analyze grammar]

bṛhadaśva uvāca |
śṛṇu rājannavahitaḥ saha bhrātṛbhiracyuta |
yastvatto duḥkhitataro rājāsītpṛthivīpate || 38 ||
[Analyze grammar]

niṣadheṣu mahīpālo vīrasena iti sma ha |
tasya putro'bhavannāmnā nalo dharmārthadarśivān || 39 ||
[Analyze grammar]

sa nikṛtyā jito rājā puṣkareṇeti naḥ śrutam |
vanavāsamaduḥkhārho bhāryayā nyavasatsaha || 40 ||
[Analyze grammar]

na tasyāśvo na ca ratho na bhrātā na ca bāndhavāḥ |
vane nivasato rājañśiṣyante sma kadācana || 41 ||
[Analyze grammar]

bhavānhi saṃvṛto vīrairbhrātṛbhirdevasaṃmitaiḥ |
brahmakalpairdvijāgryaiśca tasmānnārhasi śocitum || 42 ||
[Analyze grammar]

yudhiṣṭhira uvāca |
vistareṇāhamicchāmi nalasya sumahātmanaḥ |
caritaṃ vadatāṃ śreṣṭha tanmamākhyātumarhasi || 43 ||
[Analyze grammar]