Chapter 42

vaiśaṃpāyana uvāca |
tasya saṃpaśyatastveva pinākī vṛṣabhadhvajaḥ |
jagāmādarśanaṃ bhānurlokasyevāstameyivān || 1 ||
[Analyze grammar]

tato'rjunaḥ paraṃ cakre vismayaṃ paravīrahā |
mayā sākṣānmahādevo dṛṣṭa ityeva bhārata || 2 ||
[Analyze grammar]

dhanyo'smyanugṛhīto'smi yanmayā tryambako haraḥ |
pinākī varado rūpī dṛṣṭaḥ spṛṣṭaśca pāṇinā || 3 ||
[Analyze grammar]

kṛtārthaṃ cāvagacchāmi paramātmānamātmanā |
śatrūṃśca vijitānsarvānnirvṛttaṃ ca prayojanam || 4 ||
[Analyze grammar]

tato vaiḍūryavarṇābho bhāsayansarvato diśaḥ |
yādogaṇavṛtaḥ śrīmānājagāma jaleśvaraḥ || 5 ||
[Analyze grammar]

nāgairnadairnadībhiśca daityaiḥ sādhyaiśca daivataiḥ |
varuṇo yādasāṃ bhartā vaśī taṃ deśamāgamat || 6 ||
[Analyze grammar]

atha jāmbūnadavapurvimānena mahārciṣā |
kuberaḥ samanuprāpto yakṣairanugataḥ prabhuḥ || 7 ||
[Analyze grammar]

vidyotayannivākāśamadbhutopamadarśanaḥ |
dhanānāmīśvaraḥ śrīmānarjunaṃ draṣṭumāgataḥ || 8 ||
[Analyze grammar]

tathā lokāntakṛcchrīmānyamaḥ sākṣātpratāpavān |
mūrtyamūrtidharaiḥ sārdhaṃ pitṛbhirlokabhāvanaiḥ || 9 ||
[Analyze grammar]

daṇḍapāṇiracintyātmā sarvabhūtavināśakṛt |
vaivasvato dharmarājo vimānenāvabhāsayan || 10 ||
[Analyze grammar]

trīṃllokānguhyakāṃścaiva gandharvāṃśca sapannagān |
dvitīya iva mārtaṇḍo yugānte samupasthite || 11 ||
[Analyze grammar]

bhānumanti vicitrāṇi śikharāṇi mahāgireḥ |
samāsthāyārjunaṃ tatra dadṛśustapasānvitam || 12 ||
[Analyze grammar]

tato muhūrtādbhagavānairāvataśirogataḥ |
ājagāma sahendrāṇyā śakraḥ suragaṇairvṛtaḥ || 13 ||
[Analyze grammar]

pāṇḍureṇātapatreṇa dhriyamāṇena mūrdhani |
śuśubhe tārakārājaḥ sitamabhramivāsthitaḥ || 14 ||
[Analyze grammar]

saṃstūyamāno gandharvairṛṣibhiśca tapodhanaiḥ |
śṛṅgaṃ gireḥ samāsādya tasthau sūrya ivoditaḥ || 15 ||
[Analyze grammar]

atha meghasvano dhīmānvyājahāra śubhāṃ giram |
yamaḥ paramadharmajño dakṣiṇāṃ diśamāsthitaḥ || 16 ||
[Analyze grammar]

arjunārjuna paśyāsmāṃllokapālānsamāgatān |
dṛṣṭiṃ te vitarāmo'dya bhavānarho hi darśanam || 17 ||
[Analyze grammar]

pūrvarṣiramitātmā tvaṃ naro nāma mahābalaḥ |
niyogādbrahmaṇastāta martyatāṃ samupāgataḥ |
tvaṃ vāsavasamudbhūto mahāvīryaparākramaḥ || 18 ||
[Analyze grammar]

kṣatraṃ cāgnisamasparśaṃ bhāradvājena rakṣitam |
dānavāśca mahāvīryā ye manuṣyatvamāgatāḥ |
nivātakavacāścaiva saṃsādhyāḥ kurunandana || 19 ||
[Analyze grammar]

piturmamāṃśo devasya sarvalokapratāpinaḥ |
karṇaḥ sa sumahāvīryastvayā vadhyo dhanaṃjaya || 20 ||
[Analyze grammar]

aṃśāśca kṣitisaṃprāptā devagandharvarakṣasām |
tayā nipātitā yuddhe svakarmaphalanirjitām |
gatiṃ prāpsyanti kaunteya yathāsvamarikarśana || 21 ||
[Analyze grammar]

akṣayā tava kīrtiśca loke sthāsyati phalguna |
tvayā sākṣānmahādevastoṣito hi mahāmṛdhe |
laghvī vasumatī cāpi kartavyā viṣṇunā saha || 22 ||
[Analyze grammar]

gṛhāṇāstraṃ mahābāho daṇḍamaprativāraṇam |
anenāstreṇa sumahattvaṃ hi karma kariṣyasi || 23 ||
[Analyze grammar]

pratijagrāha tatpārtho vidhivatkurunandanaḥ |
samantraṃ sopacāraṃ ca samokṣaṃ sanivartanam || 24 ||
[Analyze grammar]

tato jaladharaśyāmo varuṇo yādasāṃ patiḥ |
paścimāṃ diśamāsthāya giramuccārayanprabhuḥ || 25 ||
[Analyze grammar]

pārtha kṣatriyamukhyastvaṃ kṣatradharme vyavasthitaḥ |
paśya māṃ pṛthutāmrākṣa varuṇo'smi jaleśvaraḥ || 26 ||
[Analyze grammar]

mayā samudyatānpāśānvāruṇānanivāraṇān |
pratigṛhṇīṣva kaunteya sarahasyanivartanān || 27 ||
[Analyze grammar]

ebhistadā mayā vīra saṃgrāme tārakāmaye |
daiteyānāṃ sahasrāṇi saṃyatāni mahātmanām || 28 ||
[Analyze grammar]

tasmādimānmahāsattva matprasādātsamutthitān |
gṛhāṇa na hi te mucyedantako'pyātatāyinaḥ || 29 ||
[Analyze grammar]

anena tvaṃ yadāstreṇa saṃgrāme vicariṣyasi |
tadā niḥkṣatriyā bhūmirbhaviṣyati na saṃśayaḥ || 30 ||
[Analyze grammar]

tataḥ kailāsanilayo dhanādhyakṣo'bhyabhāṣata |
datteṣvastreṣu divyeṣu varuṇena yamena ca || 31 ||
[Analyze grammar]

savyasācinmahābāho pūrvadeva sanātana |
sahāsmābhirbhavāñśrāntaḥ purākalpeṣu nityaśaḥ || 32 ||
[Analyze grammar]

matto'pi tvaṃ gṛhāṇāstramantardhānaṃ priyaṃ mama |
ojastejodyutiharaṃ prasvāpanamarātihan || 33 ||
[Analyze grammar]

tato'rjuno mahābāhurvidhivatkurunandanaḥ |
kauberamapi jagrāha divyamastraṃ mahābalaḥ || 34 ||
[Analyze grammar]

tato'bravīddevarājaḥ pārthamakliṣṭakāriṇam |
sāntvayañślakṣṇayā vācā meghadundubhinisvanaḥ || 35 ||
[Analyze grammar]

kuntīmātarmahābāho tvamīśānaḥ purātanaḥ |
parāṃ siddhimanuprāptaḥ sākṣāddevagatiṃ gataḥ || 36 ||
[Analyze grammar]

devakāryaṃ hi sumahattvayā kāryamariṃdama |
āroḍhavyastvayā svargaḥ sajjībhava mahādyute || 37 ||
[Analyze grammar]

ratho mātalisaṃyukta āgantā tvatkṛte mahīm |
tatra te'haṃ pradāsyāmi divyānyastrāṇi kaurava || 38 ||
[Analyze grammar]

tāndṛṣṭvā lokapālāṃstu sametāngirimūrdhani |
jagāma vismayaṃ dhīmānkuntīputro dhanaṃjayaḥ || 39 ||
[Analyze grammar]

tato'rjuno mahātejā lokapālānsamāgatān |
pūjayāmāsa vidhivadvāgbhiradbhiḥ phalairapi || 40 ||
[Analyze grammar]

tataḥ pratiyayurdevāḥ pratipūjya dhanaṃjayam |
yathāgatena vibudhāḥ sarve kāmamanojavāḥ || 41 ||
[Analyze grammar]

tato'rjuno mudaṃ lebhe labdhāstraḥ puruṣarṣabhaḥ |
kṛtārthamiva cātmānaṃ sa mene pūrṇamānasaḥ || 42 ||
[Analyze grammar]