Chapter 36

bhīmasena uvāca |
saṃdhiṃ kṛtvaiva kālena antakena patatriṇā |
anantenāprameyena srotasā sarvahāriṇā || 1 ||
[Analyze grammar]

pratyakṣaṃ manyase kālaṃ martyaḥ sankālabandhanaḥ |
phenadharmā mahārāja phaladharmā tathaiva ca || 2 ||
[Analyze grammar]

nimeṣādapi kaunteya yasyāyurapacīyate |
sūcyevāñjanacūrṇasya kimiti pratipālayet || 3 ||
[Analyze grammar]

yo nūnamamitāyuḥ syādatha vāpi pramāṇavit |
sa kālaṃ vai pratīkṣeta sarvapratyakṣadarśivān || 4 ||
[Analyze grammar]

pratīkṣamāṇānkālo naḥ samā rājaṃstrayodaśa |
āyuṣo'pacayaṃ kṛtvā maraṇāyopaneṣyati || 5 ||
[Analyze grammar]

śarīriṇāṃ hi maraṇaṃ śarīre nityamāśritam |
prāgeva maraṇāttasmādrājyāyaiva ghaṭāmahe || 6 ||
[Analyze grammar]

yo na yāti prasaṃkhyānamaspaṣṭo bhūmivardhanaḥ |
ayātayitvā vairāṇi so'vasīdati gauriva || 7 ||
[Analyze grammar]

yo na yātayate vairamalpasattvodyamaḥ pumān |
aphalaṃ tasya janmāhaṃ manye durjātajāyinaḥ || 8 ||
[Analyze grammar]

hairaṇyau bhavato bāhū śrutirbhavati pārthiva |
hatvā dviṣantaṃ saṃgrāme bhuktvā bāhvarjitaṃ vasu || 9 ||
[Analyze grammar]

hatvā cetpuruṣo rājannikartāramariṃdama |
ahnāya narakaṃ gacchetsvargeṇāsya sa saṃmitaḥ || 10 ||
[Analyze grammar]

amarṣajo hi saṃtāpaḥ pāvakāddīptimattaraḥ |
yenāhamabhisaṃtapto na naktaṃ na divā śaye || 11 ||
[Analyze grammar]

ayaṃ ca pārtho bībhatsurvariṣṭho jyāvikarṣaṇe |
āste paramasaṃtapto nūnaṃ siṃha ivāśaye || 12 ||
[Analyze grammar]

yo'yameko'bhimanute sarvāṃlloke dhanurbhṛtaḥ |
so'yamātmajamūṣmāṇaṃ mahāhastīva yacchati || 13 ||
[Analyze grammar]

nakulaḥ sahadevaśca vṛddhā mātā ca vīrasūḥ |
tavaiva priyamicchanta āsate jaḍamūkavat || 14 ||
[Analyze grammar]

sarve te priyamicchanti bāndhavāḥ saha sṛñjayaiḥ |
ahameko'bhisaṃtapto mātā ca prativindhyataḥ || 15 ||
[Analyze grammar]

priyameva tu sarveṣāṃ yadbravīmyuta kiṃcana |
sarve hī vyasanaṃ prāptāḥ sarve yuddhābhinandinaḥ || 16 ||
[Analyze grammar]

netaḥ pāpīyasī kācidāpadrājanbhaviṣyati |
yanno nīcairalpabalai rājyamācchidya bhujyate || 17 ||
[Analyze grammar]

śīladoṣādghṛṇāviṣṭa ānṛśaṃsyātparaṃtapa |
kleśāṃstitikṣase rājannānyaḥ kaścitpraśaṃsati || 18 ||
[Analyze grammar]

ghṛṇī brāhmaṇarūpo'si kathaṃ kṣatre ajāyathāḥ |
asyāṃ hi yonau jāyante prāyaśaḥ krūrabuddhayaḥ || 19 ||
[Analyze grammar]

aśrauṣīstvaṃ rājadharmānyathā vai manurabravīt |
krūrānnikṛtisaṃyuktānvihitānaśamātmakān || 20 ||
[Analyze grammar]

kartavye puruṣavyāghra kimāsse pīṭhasarpavat |
buddhyā vīryeṇa saṃyuktaḥ śrutenābhijanena ca || 21 ||
[Analyze grammar]

tṛṇānāṃ muṣṭinaikena himavantaṃ tu parvatam |
channamicchasi kaunteya yo'smānsaṃvartumicchasi || 22 ||
[Analyze grammar]

ajñātacaryā gūḍhena pṛthivyāṃ viśrutena ca |
divīva pārtha sūryeṇa na śakyā carituṃ tvayā || 23 ||
[Analyze grammar]

bṛhacchāla ivānūpe śākhāpuṣpapalāśavān |
hastī śveta ivājñātaḥ kathaṃ jiṣṇuścariṣyati || 24 ||
[Analyze grammar]

imau ca siṃhasaṃkāśau bhrātarau sahitau śiśū |
nakulaḥ sahadevaśca kathaṃ pārtha cariṣyataḥ || 25 ||
[Analyze grammar]

puṇyakīrtī rājaputrī draupadī vīrasūriyam |
viśrutā kathamajñātā kṛṣṇā pārtha cariṣyati || 26 ||
[Analyze grammar]

māṃ cāpi rājañjānanti ākumāramimāḥ prajāḥ |
ajñātacaryāṃ paśyāmi meroriva nigūhanam || 27 ||
[Analyze grammar]

tathaiva bahavo'smābhī rāṣṭrebhyo vipravāsitāḥ |
rājāno rājaputrāśca dhṛtarāṣṭramanuvratāḥ || 28 ||
[Analyze grammar]

na hi te'pyupaśāmyanti nikṛtānāṃ nirākṛtāḥ |
avaśyaṃ tairnikartavyamasmākaṃ tatpriyaiṣibhiḥ || 29 ||
[Analyze grammar]

te'pyasmāsu prayuñjīranpracchannānsubahūñjanān |
ācakṣīraṃśca no jñātvā tannaḥ syātsumahadbhayam || 30 ||
[Analyze grammar]

asmābhiruṣitāḥ samyagvane māsāstrayodaśa |
parimāṇena tānpaśya tāvataḥ parivatsarān || 31 ||
[Analyze grammar]

asti māsaḥ pratinidhiryathā prāhurmanīṣiṇaḥ |
pūtikāniva somasya tathedaṃ kriyatāmiti || 32 ||
[Analyze grammar]

atha vānaḍuhe rājansādhave sādhuvāhine |
sauhityadānādekasmādenasaḥ pratimucyate || 33 ||
[Analyze grammar]

tasmācchatruvadhe rājankriyatāṃ niścayastvayā |
kṣatriyasya tu sarvasya nānyo dharmo'sti saṃyugāt || 34 ||
[Analyze grammar]