Chapter 31

draupadyuvāca |
namo dhātre vidhātre ca yau mohaṃ cakratustava |
pitṛpaitāmahe vṛtte voḍhavye te'nyathā matiḥ || 1 ||
[Analyze grammar]

neha dharmānṛśaṃsyābhyāṃ na kṣāntyā nārjavena ca |
puruṣaḥ śriyamāpnoti na ghṛṇitvena karhicit || 2 ||
[Analyze grammar]

tvāṃ cedvyasanamabhyāgādidaṃ bhārata duḥsaham |
yattvaṃ nārhasi nāpīme bhrātaraste mahaujasaḥ || 3 ||
[Analyze grammar]

na hi te'dhyagamañjātu tadānīṃ nādya bhārata |
dharmātpriyataraṃ kiṃcidapi cejjīvitādiha || 4 ||
[Analyze grammar]

dharmārthameva te rājyaṃ dharmārthaṃ jīvitaṃ ca te |
brāhmaṇā guravaścaiva jānantyapi ca devatāḥ || 5 ||
[Analyze grammar]

bhīmasenārjunau caiva mādreyau ca mayā saha |
tyajestvamiti me buddhirna tu dharmaṃ parityajeḥ || 6 ||
[Analyze grammar]

rājānaṃ dharmagoptāraṃ dharmo rakṣati rakṣitaḥ |
iti me śrutamāryāṇāṃ tvāṃ tu manye na rakṣati || 7 ||
[Analyze grammar]

ananyā hi naravyāghra nityadā dharmameva te |
buddhiḥ satatamanveti chāyeva puruṣaṃ nijā || 8 ||
[Analyze grammar]

nāvamaṃsthā hi sadṛśānnāvarāñśreyasaḥ kutaḥ |
avāpya pṛthivīṃ kṛtsnāṃ na te śṛṅgamavardhata || 9 ||
[Analyze grammar]

svāhākāraiḥ svadhābhiśca pūjābhirapi ca dvijān |
daivatāni pitṝṃścaiva satataṃ pārtha sevase || 10 ||
[Analyze grammar]

brāhmaṇāḥ sarvakāmaiste satataṃ pārtha tarpitāḥ |
yatayo mokṣiṇaścaiva gṛhasthāścaiva bhārata || 11 ||
[Analyze grammar]

āraṇyakebhyo lauhāni bhājanāni prayacchasi |
nādeyaṃ brāhmaṇebhyaste gṛhe kiṃcana vidyate || 12 ||
[Analyze grammar]

yadidaṃ vaiśvadevānte sāyaṃprātaḥ pradīyate |
taddattvātithibhṛtyebhyo rājañśeṣeṇa jīvasi || 13 ||
[Analyze grammar]

iṣṭayaḥ paśubandhāśca kāmyanaimittikāśca ye |
vartante pākayajñāśca yajñakarma ca nityadā || 14 ||
[Analyze grammar]

asminnapi mahāraṇye vijane dasyusevite |
rāṣṭrādapetya vasato dhārmaste nāvasīdati || 15 ||
[Analyze grammar]

aśvamedho rājasūyaḥ puṇḍarīko'tha gosavaḥ |
etairapi mahāyajñairiṣṭaṃ te bhūridakṣiṇaiḥ || 16 ||
[Analyze grammar]

rājanparītayā buddhyā viṣame'kṣaparājaye |
rājyaṃ vasūnyāyudhāni bhrātṝnmāṃ cāsi nirjitaḥ || 17 ||
[Analyze grammar]

ṛjormṛdorvadānyasya hrīmataḥ satyavādinaḥ |
kathamakṣavyasanajā buddhirāpatitā tava || 18 ||
[Analyze grammar]

atīva mohamāyāti manaśca paridūyate |
niśāmya te duḥkhamidamimāṃ cāpadamīdṛśīm || 19 ||
[Analyze grammar]

atrāpyudāharantīmamitihāsaṃ purātanam |
īśvarasya vaśe lokastiṣṭhate nātmano yathā || 20 ||
[Analyze grammar]

dhātaiva khalu bhūtānāṃ sukhaduḥkhe priyāpriye |
dadhāti sarvamīśānaḥ purastācchukramuccaran || 21 ||
[Analyze grammar]

yathā dārumayī yoṣā naravīra samāhitā |
īrayatyaṅgamaṅgāni tathā rājannimāḥ prajāḥ || 22 ||
[Analyze grammar]

ākāśa iva bhūtāni vyāpya sarvāṇi bhārata |
īśvaro vidadhātīha kalyāṇaṃ yacca pāpakam || 23 ||
[Analyze grammar]

śakunistantubaddho vā niyato'yamanīśvaraḥ |
īśvarasya vaśe tiṣṭhannānyeṣāṃ nātmanaḥ prabhuḥ || 24 ||
[Analyze grammar]

maṇiḥ sūtra iva proto nasyota iva govṛṣaḥ |
dhāturādeśamanveti tanmayo hi tadarpaṇaḥ || 25 ||
[Analyze grammar]

nātmādhīno manuṣyo'yaṃ kālaṃ bhavati kaṃcana |
srotaso madhyamāpannaḥ kūlādvṛkṣa iva cyutaḥ || 26 ||
[Analyze grammar]

ajño janturanīśo'yamātmanaḥ sukhaduḥkhayoḥ |
īśvaraprerito gacchetsvargaṃ narakameva ca || 27 ||
[Analyze grammar]

yathā vāyostṛṇāgrāṇi vaśaṃ yānti balīyasaḥ |
dhāturevaṃ vaśaṃ yānti sarvabhūtāni bhārata || 28 ||
[Analyze grammar]

āryakarmaṇi yuñjānaḥ pāpe vā punarīśvaraḥ |
vyāpya bhūtāni carate na cāyamiti lakṣyate || 29 ||
[Analyze grammar]

hetumātramidaṃ dhātuḥ śarīraṃ kṣetrasaṃjñitam |
yena kārayate karma śubhāśubhaphalaṃ vibhuḥ || 30 ||
[Analyze grammar]

paśya māyāprabhāvo'yamīśvareṇa yathā kṛtaḥ |
yo hanti bhūtairbhūtāni mohayitvātmamāyayā || 31 ||
[Analyze grammar]

anyathā paridṛṣṭāni munibhirvedadarśibhiḥ |
anyathā parivartante vegā iva nabhasvataḥ || 32 ||
[Analyze grammar]

anyathaiva hi manyante puruṣāstāni tāni ca |
anyathaiva prabhustāni karoti vikaroti ca || 33 ||
[Analyze grammar]

yathā kāṣṭhena vā kāṣṭhamaśmānaṃ cāśmanā punaḥ |
ayasā cāpyayaśchindyānnirviceṣṭamacetanam || 34 ||
[Analyze grammar]

evaṃ sa bhagavāndevaḥ svayambhūḥ prapitāmahaḥ |
hinasti bhūtairbhūtāni chadma kṛtvā yudhiṣṭhira || 35 ||
[Analyze grammar]

saṃprayojya viyojyāyaṃ kāmakārakaraḥ prabhuḥ |
krīḍate bhagavānbhūtairbālaḥ krīḍanakairiva || 36 ||
[Analyze grammar]

na mātṛpitṛvadrājandhātā bhūteṣu vartate |
roṣādiva pravṛtto'yaṃ yathāyamitaro janaḥ || 37 ||
[Analyze grammar]

āryāñśīlavato dṛṣṭvā hrīmato vṛttikarśitān |
anāryānsukhinaścaiva vihvalāmīva cintayā || 38 ||
[Analyze grammar]

tavemāmāpadaṃ dṛṣṭvā samṛddhiṃ ca suyodhane |
dhātāraṃ garhaye pārtha viṣamaṃ yo'nupaśyati || 39 ||
[Analyze grammar]

āryaśāstrātige krūre lubdhe dharmāpacāyini |
dhārtarāṣṭre śriyaṃ dattvā dhātā kiṃ phalamaśnute || 40 ||
[Analyze grammar]

karma cetkṛtamanveti kartāraṃ nānyamṛcchati |
karmaṇā tena pāpena lipyate nūnamīśvaraḥ || 41 ||
[Analyze grammar]

atha karma kṛtaṃ pāpaṃ na cetkartāramṛcchati |
kāraṇaṃ balameveha janāñśocāmi durbalān || 42 ||
[Analyze grammar]