Chapter 30

yudhiṣṭhira uvāca |
krodho hantā manuṣyāṇāṃ krodho bhāvayitā punaḥ |
iti viddhi mahāprājñe krodhamūlau bhavābhavau || 1 ||
[Analyze grammar]

yo hi saṃharate krodhaṃ bhāvastasya suśobhane |
yaḥ punaḥ puruṣaḥ krodhaṃ nityaṃ na sahate śubhe |
tasyābhāvāya bhavati krodhaḥ paramadāruṇaḥ || 2 ||
[Analyze grammar]

krodhamūlo vināśo hi prajānāmiha dṛśyate |
tatkathaṃ mādṛśaḥ krodhamutsṛjellokanāśanam || 3 ||
[Analyze grammar]

kruddhaḥ pāpaṃ naraḥ kuryātkruddho hanyādgurūnapi |
kruddhaḥ paruṣayā vācā śreyaso'pyavamanyate || 4 ||
[Analyze grammar]

vācyāvācye hi kupito na prajānāti karhicit |
nākāryamasti kruddhasya nāvācyaṃ vidyate tathā || 5 ||
[Analyze grammar]

hiṃsyātkrodhādavadhyāṃśca vadhyānsaṃpūjayedapi |
ātmānamapi ca kruddhaḥ preṣayedyamasādanam || 6 ||
[Analyze grammar]

etāndoṣānprapaśyadbhirjitaḥ krodho manīṣibhiḥ |
icchadbhiḥ paramaṃ śreya iha cāmutra cottamam || 7 ||
[Analyze grammar]

taṃ krodhaṃ varjitaṃ dhīraiḥ kathamasmadvidhaścaret |
etaddraupadi saṃdhāya na me manyuḥ pravardhate || 8 ||
[Analyze grammar]

ātmānaṃ ca paraṃ caiva trāyate mahato bhayāt |
krudhyantamapratikrudhyandvayoreṣa cikitsakaḥ || 9 ||
[Analyze grammar]

mūḍho yadi kliśyamānaḥ krudhyate'śaktimānnaraḥ |
balīyasāṃ manuṣyāṇāṃ tyajatyātmānamantataḥ || 10 ||
[Analyze grammar]

tasyātmānaṃ saṃtyajato lokā naśyantyanātmanaḥ |
tasmāddraupadyaśaktasya manyorniyamanaṃ smṛtam || 11 ||
[Analyze grammar]

vidvāṃstathaiva yaḥ śaktaḥ kliśyamāno na kupyati |
sa nāśayitvā kleṣṭāraṃ paraloke ca nandati || 12 ||
[Analyze grammar]

tasmādbalavatā caiva durbalena ca nityadā |
kṣantavyaṃ puruṣeṇāhurāpatsvapi vijānatā || 13 ||
[Analyze grammar]

manyorhi vijayaṃ kṛṣṇe praśaṃsantīha sādhavaḥ |
kṣamāvato jayo nityaṃ sādhoriha satāṃ matam || 14 ||
[Analyze grammar]

satyaṃ cānṛtataḥ śreyo nṛśaṃsāccānṛśaṃsatā |
tamevaṃ bahudoṣaṃ tu krodhaṃ sādhuvivarjitam |
mādṛśaḥ prasṛjetkasmātsuyodhanavadhādapi || 15 ||
[Analyze grammar]

tejasvīti yamāhurvai paṇḍitā dīrghadarśinaḥ |
na krodho'bhyantarastasya bhavatīti viniścitam || 16 ||
[Analyze grammar]

yastu krodhaṃ samutpannaṃ prajñayā pratibādhate |
tejasvinaṃ taṃ vidvāṃso manyante tattvadarśinaḥ || 17 ||
[Analyze grammar]

kruddho hi kāryaṃ suśroṇi na yathāvatprapaśyati |
na kāryaṃ na ca maryādāṃ naraḥ kruddho'nupaśyati || 18 ||
[Analyze grammar]

hantyavadhyānapi kruddho gurūnrūkṣaistudatyapi |
tasmāttejasi kartavye krodho dūrātpratiṣṭhitaḥ || 19 ||
[Analyze grammar]

dākṣyaṃ hyamarṣaḥ śauryaṃ ca śīghratvamiti tejasaḥ |
guṇāḥ krodhābhibhūtena na śakyāḥ prāptumañjasā || 20 ||
[Analyze grammar]

krodhaṃ tyaktvā tu puruṣaḥ samyaktejo'bhipadyate |
kālayuktaṃ mahāprājñe kruddhaistejaḥ suduḥsaham || 21 ||
[Analyze grammar]

krodhastvapaṇḍitaiḥ śaśvatteja ityabhidhīyate |
rajastallokanāśāya vihitaṃ mānuṣānprati || 22 ||
[Analyze grammar]

tasmācchaśvattyajetkrodhaṃ puruṣaḥ samyagācaran |
śreyānsvadharmānapago na kruddha iti niścitam || 23 ||
[Analyze grammar]

yadi sarvamabuddhīnāmatikrāntamamedhasām |
atikramo madvidhasya kathaṃ svitsyādanindite || 24 ||
[Analyze grammar]

yadi na syurmanuṣyeṣu kṣamiṇaḥ pṛthivīsamāḥ |
na syātsaṃdhirmanuṣyāṇāṃ krodhamūlo hi vigrahaḥ || 25 ||
[Analyze grammar]

abhiṣakto hyabhiṣajedāhanyādguruṇā hataḥ |
evaṃ vināśo bhūtānāmadharmaḥ prathito bhavet || 26 ||
[Analyze grammar]

ākruṣṭaḥ puruṣaḥ sarvaḥ pratyākrośedanantaram |
pratihanyāddhataścaiva tathā hiṃsyācca hiṃsitaḥ || 27 ||
[Analyze grammar]

hanyurhi pitaraḥ putrānputrāścāpi tathā pitṝn |
hanyuśca patayo bhāryāḥ patīnbhāryāstathaiva ca || 28 ||
[Analyze grammar]

evaṃ saṃkupite loke janma kṛṣṇe na vidyate |
prajānāṃ saṃdhimūlaṃ hi janma viddhi śubhānane || 29 ||
[Analyze grammar]

tāḥ kṣīyeranprajāḥ sarvāḥ kṣipraṃ draupadi tādṛśe |
tasmānmanyurvināśāya prajānāmabhavāya ca || 30 ||
[Analyze grammar]

yasmāttu loke dṛśyante kṣamiṇaḥ pṛthivīsamāḥ |
tasmājjanma ca bhūtānāṃ bhavaśca pratipadyate || 31 ||
[Analyze grammar]

kṣantavyaṃ puruṣeṇeha sarvāsvāpatsu śobhane |
kṣamā bhavo hi bhūtānāṃ janma caiva prakīrtitam || 32 ||
[Analyze grammar]

ākruṣṭastāḍitaḥ kruddhaḥ kṣamate yo balīyasā |
yaśca nityaṃ jitakrodho vidvānuttamapūruṣaḥ || 33 ||
[Analyze grammar]

prabhāvavānapi narastasya lokāḥ sanātanāḥ |
krodhanastvalpavijñānaḥ pretya ceha ca naśyati || 34 ||
[Analyze grammar]

atrāpyudāharantīmā gāthā nityaṃ kṣamāvatām |
gītāḥ kṣamāvatā kṛṣṇe kāśyapena mahātmanā || 35 ||
[Analyze grammar]

kṣamā dharmaḥ kṣamā yajñaḥ kṣamā vedāḥ kṣamā śrutam |
yastāmevaṃ vijānāti sa sarvaṃ kṣantumarhati || 36 ||
[Analyze grammar]

kṣamā brahma kṣamā satyaṃ kṣamā bhūtaṃ ca bhāvi ca |
kṣamā tapaḥ kṣamā śaucaṃ kṣamayā coddhṛtaṃ jagat || 37 ||
[Analyze grammar]

ati brahmavidāṃ lokānati cāpi tapasvinām |
ati yajñavidāṃ caiva kṣamiṇaḥ prāpnuvanti tān || 38 ||
[Analyze grammar]

kṣamā tejasvināṃ tejaḥ kṣamā brahma tapasvinām |
kṣamā satyaṃ satyavatāṃ kṣamā dānaṃ kṣamā yaśaḥ || 39 ||
[Analyze grammar]

tāṃ kṣamāmīdṛśīṃ kṛṣṇe kathamasmadvidhastyajet |
yasyāṃ brahma ca satyaṃ ca yajñā lokāśca viṣṭhitāḥ |
bhujyante yajvanāṃ lokāḥ kṣamiṇāmapare tathā || 40 ||
[Analyze grammar]

kṣantavyameva satataṃ puruṣeṇa vijānatā |
yadā hi kṣamate sarvaṃ brahma saṃpadyate tadā || 41 ||
[Analyze grammar]

kṣamāvatāmayaṃ lokaḥ paraścaiva kṣamāvatām |
iha saṃmānamṛcchanti paratra ca śubhāṃ gatim || 42 ||
[Analyze grammar]

yeṣāṃ manyurmanuṣyāṇāṃ kṣamayā nihataḥ sadā |
teṣāṃ paratare lokāstasmātkṣāntiḥ parā matā || 43 ||
[Analyze grammar]

iti gītāḥ kāśyapena gāthā nityaṃ kṣamāvatām |
śrutvā gāthāḥ kṣamāyāstvaṃ tuṣya draupadi mā krudhaḥ || 44 ||
[Analyze grammar]

pitāmahaḥ śāṃtanavaḥ śamaṃ saṃpūjayiṣyati |
ācāryo viduraḥ kṣattā śamameva vadiṣyataḥ |
kṛpaśca saṃjayaścaiva śamameva vadiṣyataḥ || 45 ||
[Analyze grammar]

somadatto yuyutsuśca droṇaputrastathaiva ca |
pitāmahaśca no vyāsaḥ śamaṃ vadati nityaśaḥ || 46 ||
[Analyze grammar]

etairhi rājā niyataṃ codyamānaḥ śamaṃ prati |
rājyaṃ dāteti me buddhirna cellobhānnaśiṣyati || 47 ||
[Analyze grammar]

kālo'yaṃ dāruṇaḥ prāpto bharatānāmabhūtaye |
niścitaṃ me sadaivaitatpurastādapi bhāmini || 48 ||
[Analyze grammar]

suyodhano nārhatīti kṣamāmevaṃ na vindati |
arhastasyāhamityeva tasmānmāṃ vindate kṣamā || 49 ||
[Analyze grammar]

etadātmavatāṃ vṛttameṣa dharmaḥ sanātanaḥ |
kṣamā caivānṛśaṃsyaṃ ca tatkartāsmyahamañjasā || 50 ||
[Analyze grammar]