Chapter 19

vāsudeva uvāca |
śālvabāṇārdite tasminpradyumne balināṃ vare |
vṛṣṇayo bhagnasaṃkalpā vivyathuḥ pṛtanāgatāḥ || 1 ||
[Analyze grammar]

hāhākṛtamabhūtsārvaṃ vṛṣṇyandhakabalaṃ tadā |
pradyumne patite rājanpare ca muditābhavan || 2 ||
[Analyze grammar]

taṃ tathā mohitaṃ dṛṣṭvā sārathirjavanairhayaiḥ |
raṇādapāharattūrṇaṃ śikṣito dārukistataḥ || 3 ||
[Analyze grammar]

nātidūrāpayāte tu rathe rathavarapraṇut |
dhanurgṛhītvā yantāraṃ labdhasaṃjño'bravīdidam || 4 ||
[Analyze grammar]

saute kiṃ te vyavasitaṃ kasmādyāsi parāṅmukhaḥ |
naiṣa vṛṣṇipravīrāṇāmāhave dharma ucyate || 5 ||
[Analyze grammar]

kaccitsaute na te mohaḥ śālvaṃ dṛṣṭvā mahāhave |
viṣādo vā raṇaṃ dṛṣṭvā brūhi me tvaṃ yathātatham || 6 ||
[Analyze grammar]

sūta uvāca |
jānārdane na me moho nāpi me bhayamāviśat |
atibhāraṃ tu te manye śālvaṃ keśavanandana || 7 ||
[Analyze grammar]

so'payāmi śanairvīra balavāneṣa pāpakṛt |
mohitaśca raṇe śūro rakṣyaḥ sārathinā rathī || 8 ||
[Analyze grammar]

āyuṣmaṃstvaṃ mayā nityaṃ rakṣitavyastvayāpyaham |
rakṣitavyo rathī nityamiti kṛtvāpayāmyaham || 9 ||
[Analyze grammar]

ekaścāsi mahābāho bahavaścāpi dānavāḥ |
nasamaṃ raukmiṇeyāhaṃ raṇaṃ matvāpayāmyaham || 10 ||
[Analyze grammar]

vāsudeva uvāca |
evaṃ bruvati sūte tu tadā makaraketumān |
uvāca sūtaṃ kauravya nivartaya rathaṃ punaḥ || 11 ||
[Analyze grammar]

dārukātmaja maivaṃ tvaṃ punaḥ kārṣīḥ kathaṃcana |
vyapayānaṃ raṇātsaute jīvato mama karhicit || 12 ||
[Analyze grammar]

na sa vṛṣṇikule jāto yo vai tyajati saṃgaram |
yo vā nipatitaṃ hanti tavāsmīti ca vādinam || 13 ||
[Analyze grammar]

tathā striyaṃ vai yo hanti vṛddhaṃ bālaṃ tathaiva ca |
virathaṃ viprakīrṇaṃ ca bhagnaśastrāyudhaṃ tathā || 14 ||
[Analyze grammar]

tvaṃ ca sūtakule jāto vinītaḥ sūtakarmaṇi |
dharmajñaścāsi vṛṣṇīnāmāhaveṣvapi dāruke || 15 ||
[Analyze grammar]

sa jānaṃścaritaṃ kṛtsnaṃ vṛṣṇīnāṃ pṛtanāmukhe |
apayānaṃ punaḥ saute maivaṃ kārṣīḥ kathaṃcana || 16 ||
[Analyze grammar]

apayātaṃ hataṃ pṛṣṭhe bhītaṃ raṇapalāyinam |
gadāgrajo durādharṣaḥ kiṃ māṃ vakṣyati mādhavaḥ || 17 ||
[Analyze grammar]

keśavasyāgrajo vāpi nīlavāsā madotkaṭaḥ |
kiṃ vakṣyati mahābāhurbaladevaḥ samāgataḥ || 18 ||
[Analyze grammar]

kiṃ vakṣyati śinernaptā narasiṃho mahādhanuḥ |
apayātaṃ raṇātsaute sāmbaśca samitiṃjayaḥ || 19 ||
[Analyze grammar]

cārudeṣṇaśca durdharṣastathaiva gadasāraṇau |
akrūraśca mahābāhuḥ kiṃ māṃ vakṣyati sārathe || 20 ||
[Analyze grammar]

śūraṃ saṃbhāvitaṃ santaṃ nityaṃ puruṣamāninam |
striyaśca vṛṣṇīvīrāṇāṃ kiṃ māṃ vakṣyanti saṃgatāḥ || 21 ||
[Analyze grammar]

pradyumno'yamupāyāti bhītastyaktvā mahāhavam |
dhigenamiti vakṣyanti na tu vakṣyanti sādhviti || 22 ||
[Analyze grammar]

dhigvācā parihāso'pi mama vā madvidhasya vā |
mṛtyunābhyadhikaḥ saute sa tvaṃ mā vyapayāḥ punaḥ || 23 ||
[Analyze grammar]

bhāraṃ hi mayi saṃnyasya yāto madhunihā hariḥ |
yajñaṃ bharatasiṃhasya pārthasyāmitatejasaḥ || 24 ||
[Analyze grammar]

kṛtavarmā mayā vīro niryāsyanneva vāritaḥ |
śālvaṃ nivārayiṣye'haṃ tiṣṭha tvamiti sūtaja || 25 ||
[Analyze grammar]

sa ca saṃbhāvayanmāṃ vai nivṛtto hṛdikātmajaḥ |
taṃ sametya raṇaṃ tyaktvā kiṃ vakṣyāmi mahāratham || 26 ||
[Analyze grammar]

upayātaṃ durādharṣaṃ śaṅkhacakragadādharam |
puruṣaṃ puṇḍarīkākṣaṃ kiṃ vakṣyāmi mahābhujam || 27 ||
[Analyze grammar]

sātyakiṃ baladevaṃ ca ye cānye'ndhakavṛṣṇayaḥ |
mayā spardhanti satataṃ kiṃ nu vakṣyāmi tānaham || 28 ||
[Analyze grammar]

tyaktvā raṇamimaṃ saute pṛṣṭhato'bhyāhataḥ śaraiḥ |
tvayāpanīto vivaśo na jīveyaṃ kathaṃcana || 29 ||
[Analyze grammar]

sa nivarta rathenāśu punardārukanandana |
na caitadevaṃ kartavyamathāpatsu kathaṃcana || 30 ||
[Analyze grammar]

na jīvitamahaṃ saute bahu manye kadācana |
apayāto raṇādbhītaḥ pṛṣṭhato'bhyāhataḥ śaraiḥ || 31 ||
[Analyze grammar]

kadā vā sūtaputra tvaṃ jānīṣe māṃ bhayārditam |
apayātaṃ raṇaṃ hitvā yathā kāpuruṣaṃ tathā || 32 ||
[Analyze grammar]

na yuktaṃ bhavatā tyaktuṃ saṃgrāmaṃ dārukātmaja |
mayi yuddhārthini bhṛśaṃ sa tvaṃ yāhi yato raṇam || 33 ||
[Analyze grammar]