Chapter 71

dhṛtarāṣṭra uvāca |
kathaṃ gacchati kaunteyo dharmarājo yudhiṣṭhiraḥ |
bhīmasenaḥ savyasācī mādrīputrau ca tāvubhau || 1 ||
[Analyze grammar]

dhaumyaścaiva kathaṃ kṣattardraupadī vā tapasvinī |
śrotumicchāmyahaṃ sarvaṃ teṣāmaṅgaviceṣṭitam || 2 ||
[Analyze grammar]

vidura uvāca |
vastreṇa saṃvṛtya mukhaṃ kuntīputro yudhiṣṭhiraḥ |
bāhū viśālau kṛtvā tu bhīmo gacchati pāṇḍavaḥ || 3 ||
[Analyze grammar]

sikatā vapansavyasācī rājānamanugacchati |
mādrīputraḥ sahadevo mukhamālipya gacchati || 4 ||
[Analyze grammar]

pāṃsūpaliptasarvāṅgo nakulaścittavihvalaḥ |
darśanīyatamo loke rājānamanugacchati || 5 ||
[Analyze grammar]

kṛṣṇā keśaiḥ praticchādya mukhamāyatalocanā |
darśanīyā prarudatī rājānamanugacchati || 6 ||
[Analyze grammar]

dhaumyo yāmyāni sāmāni raudrāṇi ca viśāṃ pate |
gāyangacchati mārgeṣu kuśānādāya pāṇinā || 7 ||
[Analyze grammar]

dhṛtarāṣṭra uvāca |
vividhānīha rūpāṇi kṛtvā gacchanti pāṇḍavāḥ |
tanmamācakṣva vidura kasmādevaṃ vrajanti te || 8 ||
[Analyze grammar]

vidura uvāca |
nikṛtasyāpi te putrairhṛte rājye dhaneṣu ca |
na dharmāccalate buddhirdharmarājasya dhīmataḥ || 9 ||
[Analyze grammar]

yo'sau rājā ghṛṇī nityaṃ dhārtarāṣṭreṣu bhārata |
nikṛtyā krodhasaṃtapto nonmīlayati locane || 10 ||
[Analyze grammar]

nāhaṃ janaṃ nirdaheyaṃ dṛṣṭvā ghoreṇa cakṣuṣā |
sa pidhāya mukhaṃ rājā tasmādgacchati pāṇḍavaḥ || 11 ||
[Analyze grammar]

yathā ca bhīmo vrajati tanme nigadataḥ śṛṇu |
bāhvorbale nāsti samo mameti bharatarṣabha || 12 ||
[Analyze grammar]

bāhū viśālau kṛtvā tu tena bhīmo'pi gacchati |
bāhū darśayamāno hi bāhudraviṇadarpitaḥ |
cikīrṣankarma śatrubhyo bāhudravyānurūpataḥ || 13 ||
[Analyze grammar]

pradiśañśarasaṃpātānkuntīputro'rjunastadā |
sikatā vapansavyasācī rājānamanugacchati || 14 ||
[Analyze grammar]

asaktāḥ sikatāstasya yathā saṃprati bhārata |
asaktaṃ śaravarṣāṇi tathā mokṣyati śatruṣu || 15 ||
[Analyze grammar]

na me kaścidvijānīyānmukhamadyeti bhārata |
mukhamālipya tenāsau sahadevo'pi gacchati || 16 ||
[Analyze grammar]

nāhaṃ manāṃsyādadeyaṃ mārge strīṇāmiti prabho |
pāṃsūpacitasarvāṅgo nakulastena gacchati || 17 ||
[Analyze grammar]

ekavastrā tu rudatī muktakeśī rajasvalā |
śoṇitāktārdravasanā draupadī vākyamabravīt || 18 ||
[Analyze grammar]

yatkṛte'hamimāṃ prāptā teṣāṃ varṣe caturdaśe |
hatapatyo hatasutā hatabandhujanapriyāḥ || 19 ||
[Analyze grammar]

bandhuśoṇitadigdhāṅgyo muktakeśyo rajasvalāḥ |
evaṃ kṛtodakā nāryaḥ pravekṣyanti gajāhvayam || 20 ||
[Analyze grammar]

kṛtvā tu nairṛtāndarbhāndhīro dhaumyaḥ purohitaḥ |
sāmāni gāyanyāmyāni purato yāti bhārata || 21 ||
[Analyze grammar]

hateṣu bhārateṣvājau kurūṇāṃ guravastadā |
evaṃ sāmāni gāsyantītyuktvā dhaumyo'pi gacchati || 22 ||
[Analyze grammar]

hā hā gacchanti no nāthāḥ samavekṣadhvamīdṛśam |
iti paurāḥ suduḥkhārtāḥ krośanti sma samantataḥ || 23 ||
[Analyze grammar]

evamākāraliṅgaiste vyavasāyaṃ manogatam |
kathayantaḥ sma kaunteyā vanaṃ jagmurmanasvinaḥ || 24 ||
[Analyze grammar]

evaṃ teṣu narāgryeṣu niryatsu gajasāhvayāt |
anabhre vidyutaścāsanbhūmiśca samakampata || 25 ||
[Analyze grammar]

rāhuragrasadādityamaparvaṇi viśāṃ pate |
ulkā cāpyapasavyaṃ tu puraṃ kṛtvā vyaśīryata || 26 ||
[Analyze grammar]

pravyāharanti kravyādā gṛdhragomāyuvāyasāḥ |
devāyatanacaityeṣu prākārāṭṭālakeṣu ca || 27 ||
[Analyze grammar]

evamete mahotpātā vanaṃ gacchati pāṇḍave |
bhāratānāmabhāvāya rājandurmantrite tava || 28 ||
[Analyze grammar]

nāradaśca sabhāmadhye kurūṇāmagrataḥ sthitaḥ |
maharṣibhiḥ parivṛto raudraṃ vākyamuvāca ha || 29 ||
[Analyze grammar]

itaścaturdaśe varṣe vinaṅkṣyantīha kauravāḥ |
duryodhanāparādhena bhīmārjunabalena ca || 30 ||
[Analyze grammar]

ityuktvā divamākramya kṣipramantaradhīyata |
brāhmīṃ śriyaṃ suvipulāṃ bibhraddevarṣisattamaḥ || 31 ||
[Analyze grammar]

tato duryodhanaḥ karṇaḥ śakuniścāpi saubalaḥ |
droṇaṃ dvīpamamanyanta rājyaṃ cāsmai nyavedayan || 32 ||
[Analyze grammar]

athābravīttato droṇo duryodhanamamarṣaṇam |
duḥśāsanaṃ ca karṇaṃ ca sarvāneva ca bhāratān || 33 ||
[Analyze grammar]

avadhyānpāṇḍavānāhurdevaputrāndvijātayaḥ |
ahaṃ tu śaraṇaṃ prāptānvartamāno yathābalam || 34 ||
[Analyze grammar]

gatānsarvātmanā bhaktyā dhārtarāṣṭrānsarājakān |
notsahe samabhityaktuṃ daivamūlamataḥ param || 35 ||
[Analyze grammar]

dharmataḥ pāṇḍuputrā vai vanaṃ gacchanti nirjitāḥ |
te ca dvādaśa varṣāṇi vane vatsyanti kauravāḥ || 36 ||
[Analyze grammar]

caritabrahmacaryāśca krodhāmarṣavaśānugāḥ |
vairaṃ pratyānayiṣyanti mama duḥkhāya pāṇḍavāḥ || 37 ||
[Analyze grammar]

mayā tu bhraṃśito rājyāddrupadaḥ sakhivigrahe |
putrārthamayajatkrodhādvadhāya mama bhārata || 38 ||
[Analyze grammar]

yājopayājatapasā putraṃ lebhe sa pāvakāt |
dhṛṣṭadyumnaṃ draupadīṃ ca vedīmadhyātsumadhyamām || 39 ||
[Analyze grammar]

jvālāvarṇo devadatto dhanuṣmānkavacī śarī |
martyadharmatayā tasmāditi māṃ bhayamāviśat || 40 ||
[Analyze grammar]

gato hi pakṣatāṃ teṣāṃ pārṣataḥ puruṣarṣabhaḥ |
sṛṣṭaprāṇo bhṛśataraṃ tasmādyotsye tavāribhiḥ || 41 ||
[Analyze grammar]

madvadhāya śruto hyeṣa loke cāpyativiśrutaḥ |
nūnaṃ so'yamanuprāptastvatkṛte kālaparyayaḥ || 42 ||
[Analyze grammar]

tvaritāḥ kuruta śreyo naitadetāvatā kṛtam |
muhūrtaṃ sukhamevaitattālacchāyeva haimanī || 43 ||
[Analyze grammar]

yajadhvaṃ ca mahāyajñairbhogānaśnīta datta ca |
itaścaturdaśe varṣe mahatprāpsyatha vaiśasam || 44 ||
[Analyze grammar]

duryodhana niśamyaitatpratipadya yathecchasi |
sāma vā pāṇḍaveyeṣu prayuṅkṣva yadi manyase || 45 ||
[Analyze grammar]

vaiśaṃpāyana uvāca |
droṇasya vacanaṃ śrutvā dhṛtarāṣṭro'bravīdidam |
samyagāha guruḥ kṣattarupāvartaya pāṇḍavān || 46 ||
[Analyze grammar]

yadi vā na nivartante satkṛtā yāntu pāṇḍavāḥ |
saśastrarathapādātā bhogavantaśca putrakāḥ || 47 ||
[Analyze grammar]