Chapter 63

karṇa uvāca |
trayaḥ kileme adhanā bhavanti dāsaḥ śiṣyaścāsvatantrā ca nārī |
dāsasya patnī tvaṃ dhanamasya bhadre hīneśvarā dāsadhanaṃ ca dāsī || 1 ||
[Analyze grammar]

praviśya sā naḥ paricārairbhajasva tatte kāryaṃ śiṣṭamāveśya veśma |
īśāḥ sma sarve tava rājaputri bhavanti te dhārtarāṣṭrā na pārthāḥ || 2 ||
[Analyze grammar]

anyaṃ vṛṇīṣva patimāśu bhāmini yasmāddāsyaṃ na labhase devanena |
anavadyā vai patiṣu kāmavṛttirnityaṃ dāsye viditaṃ vai tavāstu || 3 ||
[Analyze grammar]

parājito nakulo bhīmaseno yudhiṣṭhiraḥ sahadevo'rjunaśca |
dāsībhūtā praviśa yājñaseni parājitāste patayo na santi || 4 ||
[Analyze grammar]

prayojanaṃ cātmani kiṃ nu manyate parākramaṃ pauruṣaṃ ceha pārthaḥ |
pāñcālyasya drupadasyātmajāmimāṃ sabhāmadhye yo'tidevīdglaheṣu || 5 ||
[Analyze grammar]

vaiśaṃpāyana uvāca |
tadvai śrutvā bhīmaseno'tyamarṣī bhṛśaṃ niśaśvāsa tadārtarūpaḥ |
rājānugo dharmapāśānubaddho dahannivainaṃ kopaviraktadṛṣṭiḥ || 6 ||
[Analyze grammar]

bhīma uvāca |
nāhaṃ kupye sūtaputrasya rājanneṣa satyaṃ dāsadharmaḥ praviṣṭaḥ |
kiṃ vidviṣo vādya māṃ dhārayeyurnādevīstvaṃ yadyanayā narendra || 7 ||
[Analyze grammar]

vaiśaṃpāyana uvāca |
rādheyasya vacaḥ śrutvā rājā duryodhanastadā |
yudhiṣṭhiramuvācedaṃ tūṣṇīṃbhūtamacetasam || 8 ||
[Analyze grammar]

bhīmārjunau yamau caiva sthitau te nṛpa śāsane |
praśnaṃ prabrūhi kṛṣṇāṃ tvamajitāṃ yadi manyase || 9 ||
[Analyze grammar]

evamuktvā sa kaunteyamapohya vasanaṃ svakam |
smayannivaikṣatpāñcālīmaiśvaryamadamohitaḥ || 10 ||
[Analyze grammar]

kadalīdaṇḍasadṛśaṃ sarvalakṣaṇapūjitam |
gajahastapratīkāśaṃ vajrapratimagauravam || 11 ||
[Analyze grammar]

abhyutsmayitvā rādheyaṃ bhīmamādharṣayanniva |
draupadyāḥ prekṣamāṇāyāḥ savyamūrumadarśayat || 12 ||
[Analyze grammar]

vṛkodarastadālokya netre utphālya lohite |
provāca rājamadhye taṃ sabhāṃ viśrāvayanniva || 13 ||
[Analyze grammar]

pitṛbhiḥ saha sālokyaṃ mā sma gacchedvṛkodaraḥ |
yadyetamūruṃ gadayā na bhindyāṃ te mahāhave || 14 ||
[Analyze grammar]

kruddhasya tasya srotobhyaḥ sarvebhyaḥ pāvakārciṣaḥ |
vṛkṣasyeva viniśceruḥ koṭarebhyaḥ pradahyataḥ || 15 ||
[Analyze grammar]

vidura uvāca |
paraṃ bhayaṃ paśyata bhīmasenādbudhyadhvaṃ rājño varuṇasyeva pāśāt |
daiverito nūnamayaṃ purastātparo'nayo bharateṣūdapādi || 16 ||
[Analyze grammar]

atidyūtaṃ kṛtamidaṃ dhārtarāṣṭrā ye'syāṃ striyaṃ vivadadhvaṃ sabhāyām |
yogakṣemo dṛśyate vo mahābhayaḥ pāpānmantrānkuravo mantrayanti || 17 ||
[Analyze grammar]

imaṃ dharmaṃ kuravo jānatāśu durdṛṣṭe'sminpariṣatsaṃpraduṣyet |
imāṃ cetpūrvaṃ kitavo'glahīṣyadīśo'bhaviṣyadaparājitātmā || 18 ||
[Analyze grammar]

svapne yathaitaddhi dhanaṃ jitaṃ syāttadevaṃ manye yasya dīvyatyanīśaḥ |
gāndhāriputrasya vaco niśamya dharmādasmātkuravo māpayāta || 19 ||
[Analyze grammar]

duryodhana uvāca |
bhīmasya vākye tadvadevārjunasya sthito'haṃ vai yamayoścaivameva |
yudhiṣṭhiraṃ cetpravadantyanīśamatho dāsyānmokṣyase yājñaseni || 20 ||
[Analyze grammar]

arjuna uvāca |
īśo rājā pūrvamāsīdglahe naḥ kuntīputro dharmarājo mahātmā |
īśastvayaṃ kasya parājitātmā tajjānīdhvaṃ kuravaḥ sarva eva || 21 ||
[Analyze grammar]

vaiśaṃpāyana uvāca |
tato rājño dhṛtarāṣṭrasya gehe gomāyuruccairvyāharadagnihotre |
taṃ rāsabhāḥ pratyabhāṣanta rājansamantataḥ pakṣiṇaścaiva raudrāḥ || 22 ||
[Analyze grammar]

taṃ ca śabdaṃ vidurastattvavedī śuśrāva ghoraṃ subalātmajā ca |
bhīṣmadroṇau gautamaścāpi vidvānsvasti svastītyapi caivāhuruccaiḥ || 23 ||
[Analyze grammar]

tato gāndhārī viduraścaiva vidvāṃstamutpātaṃ ghoramālakṣya rājñe |
nivedayāmāsaturārtavattadā tato rājā vākyamidaṃ babhāṣe || 24 ||
[Analyze grammar]

hato'si duryodhana mandabuddhe yastvaṃ sabhāyāṃ kurupuṃgavānām |
striyaṃ samābhāṣasi durvinīta viśeṣato draupadīṃ dharmapatnīm || 25 ||
[Analyze grammar]

evamuktvā dhṛtarāṣṭro manīṣī hitānveṣī bāndhavānāmapāyāt |
kṛṣṇāṃ pāñcālīmabravītsāntvapūrvaṃ vimṛśyaitatprajñayā tattvabuddhiḥ || 26 ||
[Analyze grammar]

dhṛtarāṣṭra uvāca |
varaṃ vṛṇīṣva pāñcāli matto yadabhikāṅkṣasi |
vadhūnāṃ hi viśiṣṭā me tvaṃ dharmaparamā satī || 27 ||
[Analyze grammar]

draupadyuvāca |
dadāsi cedvaraṃ mahyaṃ vṛṇomi bharatarṣabha |
sarvadharmānugaḥ śrīmānadāso'stu yudhiṣṭhiraḥ || 28 ||
[Analyze grammar]

manasvinamajānanto mā vai brūyuḥ kumārakāḥ |
eṣa vai dāsaputreti prativindhyaṃ tamāgatam || 29 ||
[Analyze grammar]

rājaputraḥ purā bhūtvā yathā nānyaḥ pumānkvacit |
lālito dāsaputratvaṃ paśyannaśyeddhi bhārata || 30 ||
[Analyze grammar]

dhṛtarāṣṭra uvāca |
dvitīyaṃ te varaṃ bhadre dadāmi varayasva mām |
mano hi me vitarati naikaṃ tvaṃ varamarhasi || 31 ||
[Analyze grammar]

draupadyuvāca |
sarathau sadhanuṣkau ca bhīmasenadhanaṃjayau |
nakulaṃ sahadevaṃ ca dvitīyaṃ varaye varam || 32 ||
[Analyze grammar]

dhṛtarāṣṭra uvāca |
tṛtīyaṃ varayāsmatto nāsi dvābhyāṃ susatkṛtā |
tvaṃ hi sarvasnuṣāṇāṃ me śreyasī dharmacāriṇī || 33 ||
[Analyze grammar]

draupadyuvāca |
lobho dharmasya nāśāya bhagavannāhamutsahe |
anarhā varamādātuṃ tṛtīyaṃ rājasattama || 34 ||
[Analyze grammar]

ekamāhurvaiśyavaraṃ dvau tu kṣatrastriyā varau |
trayastu rājño rājendra brāhmaṇasya śataṃ varāḥ || 35 ||
[Analyze grammar]

pāpīyāṃsa ime bhūtvā saṃtīrṇāḥ patayo mama |
vetsyanti caiva bhadrāṇi rājanpuṇyena karmaṇā || 36 ||
[Analyze grammar]