Chapter 61

bhīma uvāca |
bhavanti deśe bandhakyaḥ kitavānāṃ yudhiṣṭhira |
na tābhiruta dīvyanti dayā caivāsti tāsvapi || 1 ||
[Analyze grammar]

kāśyo yadbalimāhārṣīddravyaṃ yaccānyaduttamam |
tathānye pṛthivīpālā yāni ratnānyupāharan || 2 ||
[Analyze grammar]

vāhanāni dhanaṃ caiva kavacānyāyudhāni ca |
rājyamātmā vayaṃ caiva kaitavena hṛtaṃ paraiḥ || 3 ||
[Analyze grammar]

na ca me tatra kopo'bhūtsarvasyeśo hi no bhavān |
idaṃ tvatikṛtaṃ manye draupadī yatra paṇyate || 4 ||
[Analyze grammar]

eṣā hyanarhatī bālā pāṇḍavānprāpya kauravaiḥ |
tvatkṛte kliśyate kṣudrairnṛśaṃsairnikṛtipriyaiḥ || 5 ||
[Analyze grammar]

asyāḥ kṛte manyurayaṃ tvayi rājannipātyate |
bāhū te saṃpradhakṣyāmi sahadevāgnimānaya || 6 ||
[Analyze grammar]

arjuna uvāca |
na purā bhīmasena tvamīdṛśīrvaditā giraḥ |
paraiste nāśitaṃ nūnaṃ nṛśaṃsairdharmagauravam || 7 ||
[Analyze grammar]

na sakāmāḥ pare kāryā dharmamevācarottamam |
bhrātaraṃ dhārmikaṃ jyeṣṭhaṃ nātikramitumarhati || 8 ||
[Analyze grammar]

āhūto hi parai rājā kṣātradharmamanusmaran |
dīvyate parakāmena tannaḥ kīrtikaraṃ mahat || 9 ||
[Analyze grammar]

bhīmasena uvāca |
evamasmikṛtaṃ vidyāṃ yadyasyāhaṃ dhanaṃjaya |
dīpte'gnau sahitau bāhū nirdaheyaṃ balādiva || 10 ||
[Analyze grammar]

vaiśaṃpāyana uvāca |
tathā tānduḥkhitāndṛṣṭvā pāṇḍavāndhṛtarāṣṭrajaḥ |
kliśyamānāṃ ca pāñcālīṃ vikarṇa idamabravīt || 11 ||
[Analyze grammar]

yājñasenyā yaduktaṃ tadvākyaṃ vibrūta pārthivāḥ |
avivekena vākyasya narakaḥ sadya eva naḥ || 12 ||
[Analyze grammar]

bhīṣmaśca dhṛtarāṣṭraśca kuruvṛddhatamāvubhau |
sametya nāhatuḥ kiṃcidviduraśca mahāmatiḥ || 13 ||
[Analyze grammar]

bhāradvājo'pi sarveṣāmācāryaḥ kṛpa eva ca |
ata etāvapi praśnaṃ nāhaturdvijasattamau || 14 ||
[Analyze grammar]

ye tvanye pṛthivīpālāḥ sametāḥ sarvato diśaḥ |
kāmakrodhau samutsṛjya te bruvantu yathāmati || 15 ||
[Analyze grammar]

yadidaṃ draupadī vākyamuktavatyasakṛcchubhā |
vimṛśya kasya kaḥ pakṣaḥ pārthivā vadatottaram || 16 ||
[Analyze grammar]

evaṃ sa bahuśaḥ sarvānuktavāṃstānsabhāsadaḥ |
na ca te pṛthivīpālāstamūcuḥ sādhvasādhu vā || 17 ||
[Analyze grammar]

uktvā tathāsakṛtsarvānvikarṇaḥ pṛthivīpatīn |
pāṇiṃ pāṇau viniṣpiṣya niḥśvasannidamabravīt || 18 ||
[Analyze grammar]

vibrūta pṛthivīpālā vākyaṃ mā vā kathaṃcana |
manye nyāyyaṃ yadatrāhaṃ taddhi vakṣyāmi kauravāḥ || 19 ||
[Analyze grammar]

catvāryāhurnaraśreṣṭhā vyasanāni mahīkṣitām |
mṛgayāṃ pānamakṣāṃśca grāmye caivātisaktatām || 20 ||
[Analyze grammar]

eteṣu hi naraḥ sakto dharmamutsṛjya vartate |
tathāyuktena ca kṛtāṃ kriyāṃ loko na manyate || 21 ||
[Analyze grammar]

tadayaṃ pāṇḍuputreṇa vyasane vartatā bhṛśam |
samāhūtena kitavairāsthito draupadīpaṇaḥ || 22 ||
[Analyze grammar]

sādhāraṇī ca sarveṣāṃ pāṇḍavānāmaninditā |
jitena pūrvaṃ cānena pāṇḍavena kṛtaḥ paṇaḥ || 23 ||
[Analyze grammar]

iyaṃ ca kīrtitā kṛṣṇā saubalena paṇārthinā |
etatsarvaṃ vicāryāhaṃ manye na vijitāmimām || 24 ||
[Analyze grammar]

etacchrutvā mahānnādaḥ sabhyānāmudatiṣṭhata |
vikarṇaṃ śaṃsamānānāṃ saubalaṃ ca vinindatām || 25 ||
[Analyze grammar]

tasminnuparate śabde rādheyaḥ krodhamūrchitaḥ |
pragṛhya ruciraṃ bāhumidaṃ vacanamabravīt || 26 ||
[Analyze grammar]

dṛśyante vai vikarṇe hi vaikṛtāni bahūnyapi |
tajjastasya vināśāya yathāgniraraṇiprajaḥ || 27 ||
[Analyze grammar]

ete na kiṃcidapyāhuścodyamānāpi kṛṣṇayā |
dharmeṇa vijitāṃ manye manyante drupadātmajām || 28 ||
[Analyze grammar]

tvaṃ tu kevalabālyena dhārtarāṣṭra vidīryase |
yadbravīṣi sabhāmadhye bālaḥ sthavirabhāṣitam || 29 ||
[Analyze grammar]

na ca dharmaṃ yathātattvaṃ vetsi duryodhanāvara |
yadbravīṣi jitāṃ kṛṣṇāmajiteti sumandadhīḥ || 30 ||
[Analyze grammar]

kathaṃ hyavijitāṃ kṛṣṇāṃ manyase dhṛtarāṣṭraja |
yadā sabhāyāṃ sarvasvaṃ nyastavānpāṇḍavāgrajaḥ || 31 ||
[Analyze grammar]

abhyantarā ca sarvasve draupadī bharatarṣabha |
evaṃ dharmajitāṃ kṛṣṇāṃ manyase na jitāṃ katham || 32 ||
[Analyze grammar]

kīrtitā draupadī vācā anujñātā ca pāṇḍavaiḥ |
bhavatyavijitā kena hetunaiṣā matā tava || 33 ||
[Analyze grammar]

manyase vā sabhāmetāmānītāmekavāsasam |
adharmeṇeti tatrāpi śṛṇu me vākyamuttaram || 34 ||
[Analyze grammar]

eko bhartā striyā devairvihitaḥ kurunandana |
iyaṃ tvanekavaśagā bandhakīti viniścitā || 35 ||
[Analyze grammar]

asyāḥ sabhāmānayanaṃ na citramiti me matiḥ |
ekāmbaradharatvaṃ vāpyatha vāpi vivastratā || 36 ||
[Analyze grammar]

yaccaiṣāṃ draviṇaṃ kiṃcidyā caiṣā ye ca pāṇḍavāḥ |
saubaleneha tatsarvaṃ dharmeṇa vijitaṃ vasu || 37 ||
[Analyze grammar]

duḥśāsana subālo'yaṃ vikarṇaḥ prājñavādikaḥ |
pāṇḍavānāṃ ca vāsāṃsi draupadyāścāpyupāhara || 38 ||
[Analyze grammar]

tacchrutvā pāṇḍavāḥ sarve svāni vāsāṃsi bhārata |
avakīryottarīyāṇi sabhāyāṃ samupāviśan || 39 ||
[Analyze grammar]

tato duḥśāsano rājandraupadyā vasanaṃ balāt |
sabhāmadhye samākṣipya vyapakraṣṭuṃ pracakrame || 40 ||
[Analyze grammar]

ākṛṣyamāṇe vasane draupadyāstu viśāṃ pate |
tadrūpamaparaṃ vastraṃ prādurāsīdanekaśaḥ || 41 ||
[Analyze grammar]

tato halahalāśabdastatrāsīdghoranisvanaḥ |
tadadbhutatamaṃ loke vīkṣya sarvamahīkṣitām || 42 ||
[Analyze grammar]

śaśāpa tatra bhīmastu rājamadhye mahāsvanaḥ |
krodhādvisphuramāṇoṣṭho viniṣpiṣya kare karam || 43 ||
[Analyze grammar]

idaṃ me vākyamādaddhvaṃ kṣatriyā lokavāsinaḥ |
noktapūrvaṃ narairanyairna cānyo yadvadiṣyati || 44 ||
[Analyze grammar]

yadyetadevamuktvā tu na kuryāṃ pṛthivīśvarāḥ |
pitāmahānāṃ sarveṣāṃ nāhaṃ gatimavāpnuyām || 45 ||
[Analyze grammar]

asya pāpasya durjāterbhāratāpasadasya ca |
na pibeyaṃ balādvakṣo bhittvā cedrudhiraṃ yudhi || 46 ||
[Analyze grammar]

tasya te vacanaṃ śrutvā sarvalokapraharṣaṇam |
pracakrurbahulāṃ pūjāṃ kutsanto dhṛtarāṣṭrajam || 47 ||
[Analyze grammar]

yadā tu vāsasāṃ rāśiḥ sabhāmadhye samācitaḥ |
tato duḥśāsanaḥ śrānto vrīḍitaḥ samupāviśat || 48 ||
[Analyze grammar]

dhikśabdastu tatastatra samabhūllomaharṣaṇaḥ |
sabhyānāṃ naradevānāṃ dṛṣṭvā kuntīsutāṃstadā || 49 ||
[Analyze grammar]

na vibruvanti kauravyāḥ praśnametamiti sma ha |
sa janaḥ krośati smātra dhṛtarāṣṭraṃ vigarhayan || 50 ||
[Analyze grammar]

tato bāhū samucchritya nivārya ca sabhāsadaḥ |
viduraḥ sarvadharmajña idaṃ vacanamabravīt || 51 ||
[Analyze grammar]

vidura uvāca |
draupadī praśnamuktvaivaṃ roravīti hyanāthavat |
na ca vibrūta taṃ praśnaṃ sabhyā dharmo'tra pīḍyate || 52 ||
[Analyze grammar]

sabhāṃ prapadyate hyārtaḥ prajvalanniva havyavāṭ |
taṃ vai satyena dharmeṇa sabhyāḥ praśamayantyuta || 53 ||
[Analyze grammar]

dharmapraśnamatho brūyādārtaḥ sabhyeṣu mānavaḥ |
vibrūyustatra te praśnaṃ kāmakrodhavaśātigāḥ || 54 ||
[Analyze grammar]

vikarṇena yathāprajñamuktaḥ praśno narādhipāḥ |
bhavanto'pi hi taṃ praśnaṃ vibruvantu yathāmati || 55 ||
[Analyze grammar]

yo hi praśnaṃ na vibrūyāddharmadarśī sabhāṃ gataḥ |
anṛte yā phalāvāptistasyāḥ so'rdhaṃ samaśnute || 56 ||
[Analyze grammar]

yaḥ punarvitathaṃ brūyāddharmadarśī sabhāṃ gataḥ |
anṛtasya phalaṃ kṛtsnaṃ saṃprāpnotīti niścayaḥ || 57 ||
[Analyze grammar]

atrāpyudāharantīmamitihāsaṃ purātanam |
prahlādasya ca saṃvādaṃ munerāṅgirasasya ca || 58 ||
[Analyze grammar]

prahlādo nāma daityendrastasya putro virocanaḥ |
kanyāhetorāṅgirasaṃ sudhanvānamupādravat || 59 ||
[Analyze grammar]

ahaṃ jyāyānahaṃ jyāyāniti kanyepsayā tadā |
tayordevanamatrāsītprāṇayoriti naḥ śrutam || 60 ||
[Analyze grammar]

tayoḥ praśnavivādo'bhūtprahlādaṃ tāvapṛcchatām |
jyāyānka āvayorekaḥ praśnaṃ prabrūhi mā mṛṣā || 61 ||
[Analyze grammar]

sa vai vivadanādbhītaḥ sudhanvānaṃ vyalokayat |
taṃ sudhanvābravītkruddho brahmadaṇḍa iva jvalan || 62 ||
[Analyze grammar]

yadi vai vakṣyasi mṛṣā prahlādātha na vakṣyasi |
śatadhā te śiro vajrī vajreṇa prahariṣyati || 63 ||
[Analyze grammar]

sudhanvanā tathoktaḥ sanvyathito'śvatthaparṇavat |
jagāma kaśyapaṃ daityaḥ paripraṣṭuṃ mahaujasam || 64 ||
[Analyze grammar]

prahlāda uvāca |
tvaṃ vai dharmasya vijñātā daivasyehāsurasya ca |
brāhmaṇasya mahāprājña dharmakṛcchramidaṃ śṛṇu || 65 ||
[Analyze grammar]

yo vai praśnaṃ na vibrūyādvitathaṃ vāpi nirdiśet |
ke vai tasya pare lokāstanmamācakṣva pṛcchataḥ || 66 ||
[Analyze grammar]

kaśyapa uvāca |
jānanna vibruvanpraśnaṃ kāmātkrodhāttathā bhayāt |
sahasraṃ vāruṇānpāśānātmani pratimuñcati || 67 ||
[Analyze grammar]

tasya saṃvatsare pūrṇe pāśa ekaḥ pramucyate |
tasmātsatyaṃ tu vaktavyaṃ jānatā satyamañjasā || 68 ||
[Analyze grammar]

viddho dharmo hyadharmeṇa sabhāṃ yatra prapadyate |
na cāsya śalyaṃ kṛntanti viddhāstatra sabhāsadaḥ || 69 ||
[Analyze grammar]

ardhaṃ harati vai śreṣṭhaḥ pādo bhavati kartṛṣu |
pādaścaiva sabhāsatsu ye na nindanti ninditam || 70 ||
[Analyze grammar]

anenā bhavati śreṣṭho mucyante ca sabhāsadaḥ |
eno gacchati kartāraṃ nindārho yatra nindyate || 71 ||
[Analyze grammar]

vitathaṃ tu vadeyurye dharmaṃ prahlāda pṛcchate |
iṣṭāpūrtaṃ ca te ghnanti sapta caiva parāvarān || 72 ||
[Analyze grammar]

hṛtasvasya hi yadduḥkhaṃ hataputrasya cāpi yat |
ṛṇinaṃ prati yaccaiva rājñā grastasya cāpi yat || 73 ||
[Analyze grammar]

striyāḥ patyā vihīnāyāḥ sārthādbhraṣṭasya caiva yat |
adhyūḍhāyāśca yadduḥkhaṃ sākṣibhirvihatasya ca || 74 ||
[Analyze grammar]

etāni vai samānyāhurduḥkhāni tridaśeśvarāḥ |
tāni sarvāṇi duḥkhāni prāpnoti vitathaṃ bruvan || 75 ||
[Analyze grammar]

samakṣadarśanātsākṣyaṃ śravaṇācceti dhāraṇāt |
tasmātsatyaṃ bruvansākṣī dharmārthābhyāṃ na hīyate || 76 ||
[Analyze grammar]

vidura uvāca |
kaśyapasya vacaḥ śrutvā prahlādaḥ putramabravīt |
śreyānsudhanvā tvatto vai mattaḥ śreyāṃstathāṅgirāḥ || 77 ||
[Analyze grammar]

mātā sudhanvanaścāpi śreyasī mātṛtastava |
virocana sudhanvāyaṃ prāṇānāmīśvarastava || 78 ||
[Analyze grammar]

sudhanvovāca |
putrasnehaṃ parityajya yastvaṃ dharme pratiṣṭhitaḥ |
anujānāmi te putraṃ jīvatveṣa śataṃ samāḥ || 79 ||
[Analyze grammar]

vidura uvāca |
evaṃ vai paramaṃ dharmaṃ śrutvā sarve sabhāsadaḥ |
yathāpraśnaṃ tu kṛṣṇāyā manyadhvaṃ tatra kiṃ param || 80 ||
[Analyze grammar]

vaiśaṃpāyana uvāca |
vidurasya vacaḥ śrutvā nocuḥ kiṃcana pārthivāḥ |
karṇo duḥśāsanaṃ tvāha kṛṣṇāṃ dāsīṃ gṛhānnaya || 81 ||
[Analyze grammar]

tāṃ vepamānāṃ savrīḍāṃ pralapantīṃ sma pāṇḍavān |
duḥśāsanaḥ sabhāmadhye vicakarṣa tapasvinīm || 82 ||
[Analyze grammar]