Chapter 52

vaiśaṃpāyana uvāca |
tataḥ prāyādviduro'śvairudārairmahājavairbalibhiḥ sādhudāntaiḥ |
balānniyukto dhṛtarāṣṭreṇa rājñā manīṣiṇāṃ pāṇḍavānāṃ sakāśam || 1 ||
[Analyze grammar]

so'bhipatya tadadhvānamāsādya nṛpateḥ puram |
praviveśa mahābuddhiḥ pūjyamāno dvijātibhiḥ || 2 ||
[Analyze grammar]

sa rājagṛhamāsādya kuberabhavanopamam |
abhyagacchata dharmātmā dharmaputraṃ yudhiṣṭhiram || 3 ||
[Analyze grammar]

taṃ vai rājā satyadhṛtirmahātmā ajātaśatrurviduraṃ yathāvat |
pūjāpūrvaṃ pratigṛhyājamīḍhastato'pṛcchaddhṛtarāṣṭraṃ saputram || 4 ||
[Analyze grammar]

yudhiṣṭhira uvāca |
vijñāyate te manaso na praharṣaḥ kaccitkṣattaḥ kuśalenāgato'si |
kaccitputrāḥ sthavirasyānulomā vaśānugāścāpi viśo'pi kaccit || 5 ||
[Analyze grammar]

vidura uvāca |
rājā mahātmā kuśalī saputra āste vṛto jñātibhirindrakalpaiḥ |
prīto rājanputragaṇairvinītairviśoka evātmaratirdṛḍhātmā || 6 ||
[Analyze grammar]

idaṃ tu tvāṃ kururājo'bhyuvāca pūrvaṃ pṛṣṭvā kuśalaṃ cāvyayaṃ ca |
iyaṃ sabhā tvatsabhātulyarūpā bhrātṝṇāṃ te paśya tāmetya putra || 7 ||
[Analyze grammar]

samāgamya bhrātṛbhiḥ pārtha tasyāṃ suhṛddyūtaṃ kriyatāṃ ramyatāṃ ca |
prīyāmahe bhavataḥ saṃgamena samāgatāḥ kuravaścaiva sarve || 8 ||
[Analyze grammar]

durodarā vihitā ye tu tatra mahātmanā dhṛtarāṣṭreṇa rājñā |
tāndrakṣyase kitavānsaṃniviṣṭānityāgato'haṃ nṛpate tajjuṣasva || 9 ||
[Analyze grammar]

yudhiṣṭhira uvāca |
dyūte kṣattaḥ kalaho vidyate naḥ ko vai dyūtaṃ rocayedbudhyamānaḥ |
kiṃ vā bhavānmanyate yuktarūpaṃ bhavadvākye sarva eva sthitāḥ sma || 10 ||
[Analyze grammar]

vidura uvāca |
jānāmyahaṃ dyūtamanarthamūlaṃ kṛtaśca yatno'sya mayā nivāraṇe |
rājā tu māṃ prāhiṇottvatsakāśaṃ śrutvā vidvañśreya ihācarasva || 11 ||
[Analyze grammar]

yudhiṣṭhira uvāca |
ke tatrānye kitavā dīvyamānā vinā rājño dhṛtarāṣṭrasya putraiḥ |
pṛcchāmi tvāṃ vidura brūhi nastānyairdīvyāmaḥ śataśaḥ saṃnipatya || 12 ||
[Analyze grammar]

vidura uvāca |
gāndhārarājaḥ śakunirviśāṃ pate rājātidevī kṛtahasto matākṣaḥ |
viviṃśatiścitrasenaśca rājā satyavrataḥ purumitro jayaśca || 13 ||
[Analyze grammar]

yudhiṣṭhira uvāca |
mahābhayāḥ kitavāḥ saṃniviṣṭā māyopadhā devitāro'tra santi |
dhātrā tu diṣṭasya vaśe kiledaṃ nādevanaṃ kitavairadya tairme || 14 ||
[Analyze grammar]

nāhaṃ rājño dhṛtarāṣṭrasya śāsanānna gantumicchāmi kave durodaram |
iṣṭo hi putrasya pitā sadaiva tadasmi kartā vidurāttha māṃ yathā || 15 ||
[Analyze grammar]

na cākāmaḥ śakuninā devitāhaṃ na cenmāṃ dhṛṣṇurāhvayitā sabhāyām |
āhūto'haṃ na nivarte kadācittadāhitaṃ śāśvataṃ vai vrataṃ me || 16 ||
[Analyze grammar]

vaiśaṃpāyana uvāca |
evamuktvā viduraṃ dharmarājaḥ prāyātrikaṃ sarvamājñāpya tūrṇam |
prāyācchvobhūte sagaṇaḥ sānuyātraḥ saha strībhirdraupadīmādikṛtvā || 17 ||
[Analyze grammar]

daivaṃ prajñāṃ tu muṣṇāti tejaścakṣurivāpatat |
dhātuśca vaśamanveti pāśairiva naraḥ sitaḥ || 18 ||
[Analyze grammar]

ityuktvā prayayau rājā saha kṣattrā yudhiṣṭhiraḥ |
amṛṣyamāṇastatpārthaḥ samāhvānamariṃdamaḥ || 19 ||
[Analyze grammar]

bāhlikena rathaṃ dattamāsthāya paravīrahā |
paricchanno yayau pārtho bhrātṛbhiḥ saha pāṇḍavaḥ || 20 ||
[Analyze grammar]

rājaśriyā dīpyamāno yayau brahmapuraḥsaraḥ |
dhṛtarāṣṭreṇa cāhūtaḥ kālasya samayena ca || 21 ||
[Analyze grammar]

sa hāstinapuraṃ gatvā dhṛtarāṣṭragṛhaṃ yayau |
samiyāya ca dharmātmā dhṛtarāṣṭreṇa pāṇḍavaḥ || 22 ||
[Analyze grammar]

tathā droṇena bhīṣmeṇa karṇena ca kṛpeṇa ca |
samiyāya yathānyāyaṃ drauṇinā ca vibhuḥ saha || 23 ||
[Analyze grammar]

sametya ca mahābāhuḥ somadattena caiva ha |
duryodhanena śalyena saubalena ca vīryavān || 24 ||
[Analyze grammar]

ye cānye tatra rājānaḥ pūrvameva samāgatāḥ |
jayadrathena ca tathā kurubhiścāpi sarvaśaḥ || 25 ||
[Analyze grammar]

tataḥ sarvairmahābāhurbhrātṛbhiḥ parivāritaḥ |
praviveśa gṛhaṃ rājño dhṛtarāṣṭrasya dhīmataḥ || 26 ||
[Analyze grammar]

dadarśa tatra gāndhārīṃ devīṃ patimanuvratām |
snuṣābhiḥ saṃvṛtāṃ śaśvattārābhiriva rohiṇīm || 27 ||
[Analyze grammar]

abhivādya sa gāndhārīṃ tayā ca pratinanditaḥ |
dadarśa pitaraṃ vṛddhaṃ prajñācakṣuṣamīśvaram || 28 ||
[Analyze grammar]

rājñā mūrdhanyupāghrātāste ca kauravanandanāḥ |
catvāraḥ pāṇḍavā rājanbhīmasenapurogamāḥ || 29 ||
[Analyze grammar]

tato harṣaḥ samabhavatkauravāṇāṃ viśāṃ pate |
tāndṛṣṭvā puruṣavyāghrānpāṇḍavānpriyadarśanān || 30 ||
[Analyze grammar]

viviśuste'bhyanujñātā ratnavanti gṛhāṇyatha |
dadṛśuścopayātāstāndraupadīpramukhāḥ striyaḥ || 31 ||
[Analyze grammar]

yājñasenyāḥ parāmṛddhiṃ dṛṣṭvā prajvalitāmiva |
snuṣāstā dhṛtarāṣṭrasya nātipramanaso'bhavan || 32 ||
[Analyze grammar]

tataste puruṣavyāghrā gatvā strībhistu saṃvidam |
kṛtvā vyāyāmapūrvāṇi kṛtyāni pratikarma ca || 33 ||
[Analyze grammar]

tataḥ kṛtāhnikāḥ sarve divyacandanarūṣitāḥ |
kalyāṇamanasaścaiva brāhmaṇānsvasti vācya ca || 34 ||
[Analyze grammar]

manojñamaśanaṃ bhuktvā viviśuḥ śaraṇānyatha |
upagīyamānā nārībhirasvapankurunandanāḥ || 35 ||
[Analyze grammar]

jagāma teṣāṃ sā rātriḥ puṇyā rativihāriṇām |
stūyamānāśca viśrāntāḥ kāle nidrāmathātyajan || 36 ||
[Analyze grammar]

sukhoṣitāstāṃ rajanīṃ prātaḥ sarve kṛtāhnikāḥ |
sabhāṃ ramyāṃ praviviśuḥ kitavairabhisaṃvṛtām || 37 ||
[Analyze grammar]