Chapter 42

vaiśaṃpāyana uvāca |
tataḥ śrutvaiva bhīṣmasya cedirāḍuruvikramaḥ |
yuyutsurvāsudevena vāsudevamuvāca ha || 1 ||
[Analyze grammar]

āhvaye tvāṃ raṇaṃ gaccha mayā sārdhaṃ janārdana |
yāvadadya nihanmi tvāṃ sahitaṃ sarvapāṇḍavaiḥ || 2 ||
[Analyze grammar]

saha tvayā hi me vadhyāḥ pāṇḍavāḥ kṛṣṇa sarvathā |
nṛpatīnsamatikramya yairarājā tvamarcitaḥ || 3 ||
[Analyze grammar]

ye tvāṃ dāsamarājānaṃ bālyādarcanti durmatim |
anarhamarhavatkṛṣṇa vadhyāsta iti me matiḥ |
ityuktvā rājaśārdūlastasthau garjannamarṣaṇaḥ || 4 ||
[Analyze grammar]

evamukte tataḥ kṛṣṇo mṛdupūrvamidaṃ vacaḥ |
uvāca pārthivānsarvāṃstatsamakṣaṃ ca pāṇḍavān || 5 ||
[Analyze grammar]

eṣa naḥ śatruratyantaṃ pārthivāḥ sātvatīsutaḥ |
sātvatānāṃ nṛśaṃsātmā na hito'napakāriṇām || 6 ||
[Analyze grammar]

prāgjyotiṣapuraṃ yātānasmāñjñātvā nṛśaṃsakṛt |
adahaddvārakāmeṣa svasrīyaḥ sannarādhipāḥ || 7 ||
[Analyze grammar]

krīḍato bhojarājanyāneṣa raivatake girau |
hatvā baddhvā ca tānsarvānupāyātsvapuraṃ purā || 8 ||
[Analyze grammar]

aśvamedhe hayaṃ medhyamutsṛṣṭaṃ rakṣibhirvṛtam |
piturme yajñavighnārthamaharatpāpaniścayaḥ || 9 ||
[Analyze grammar]

sauvīrānpratipattau ca babhroreṣa yaśasvinaḥ |
bhāryāmabhyaharanmohādakāmāṃ tāmito gatām || 10 ||
[Analyze grammar]

eṣa māyāpraticchannaḥ karūṣārthe tapasvinīm |
jahāra bhadrāṃ vaiśālīṃ mātulasya nṛśaṃsakṛt || 11 ||
[Analyze grammar]

pitṛṣvasuḥ kṛte duḥkhaṃ sumahanmarṣayāmyaham |
diṣṭyā tvidaṃ sarvarājñāṃ saṃnidhāvadya vartate || 12 ||
[Analyze grammar]

paśyanti hi bhavanto'dya mayyatīva vyatikramam |
kṛtāni tu parokṣaṃ me yāni tāni nibodhata || 13 ||
[Analyze grammar]

imaṃ tvasya na śakṣyāmi kṣantumadya vyatikramam |
avalepādvadhārhasya samagre rājamaṇḍale || 14 ||
[Analyze grammar]

rukmiṇyāmasya mūḍhasya prārthanāsīnmumūrṣataḥ |
na ca tāṃ prāptavānmūḍhaḥ śūdro vedaśrutiṃ yathā || 15 ||
[Analyze grammar]

evamādi tataḥ sarve sahitāste narādhipāḥ |
vāsudevavacaḥ śrutvā cedirājaṃ vyagarhayan || 16 ||
[Analyze grammar]

tatastadvacanaṃ śrutvā śiśupālaḥ pratāpavān |
jahāsa svanavaddhāsaṃ prahasyedamuvāca ha || 17 ||
[Analyze grammar]

matpūrvāṃ rukmiṇīṃ kṛṣṇa saṃsatsu parikīrtayan |
viśeṣataḥ pārthiveṣu vrīḍāṃ na kuruṣe katham || 18 ||
[Analyze grammar]

manyamāno hi kaḥ satsu puruṣaḥ parikīrtayet |
anyapūrvāṃ striyaṃ jātu tvadanyo madhusūdana || 19 ||
[Analyze grammar]

kṣama vā yadi te śraddhā mā vā kṛṣṇa mama kṣama |
kruddhādvāpi prasannādvā kiṃ me tvatto bhaviṣyati || 20 ||
[Analyze grammar]

tathā bruvata evāsya bhagavānmadhusūdanaḥ |
vyapāharacchiraḥ kruddhaścakreṇāmitrakarṣaṇaḥ |
sa papāta mahābāhurvajrāhata ivācalaḥ || 21 ||
[Analyze grammar]

tataścedipaterdehāttejo'gryaṃ dadṛśurnṛpāḥ |
utpatantaṃ mahārāja gaganādiva bhāskaram || 22 ||
[Analyze grammar]

tataḥ kamalapatrākṣaṃ kṛṣṇaṃ lokanamaskṛtam |
vavande tattadā tejo viveśa ca narādhipa || 23 ||
[Analyze grammar]

tadadbhutamamanyanta dṛṣṭvā sarve mahīkṣitaḥ |
yadviveśa mahābāhuṃ tattejaḥ puruṣottamam || 24 ||
[Analyze grammar]

anabhre pravavarṣa dyauḥ papāta jvalitāśaniḥ |
kṛṣṇena nihate caidye cacāla ca vasuṃdharā || 25 ||
[Analyze grammar]

tataḥ kecinmahīpālā nābruvaṃstatra kiṃcana |
atītavākpathe kāle prekṣamāṇā janārdanam || 26 ||
[Analyze grammar]

hastairhastāgramapare pratyapīṣannamarṣitāḥ |
apare daśanairoṣṭhānadaśankrodhamūrchitāḥ || 27 ||
[Analyze grammar]

rahastu kecidvārṣṇeyaṃ praśaśaṃsurnarādhipāḥ |
kecideva tu saṃrabdhā madhyasthāstvapare'bhavan || 28 ||
[Analyze grammar]

prahṛṣṭāḥ keśavaṃ jagmuḥ saṃstuvanto maharṣayaḥ |
brāhmaṇāśca mahātmānaḥ pārthivāśca mahābalāḥ || 29 ||
[Analyze grammar]

pāṇḍavastvabravīdbhrātṝnsatkāreṇa mahīpatim |
damaghoṣātmajaṃ vīraṃ saṃsādhayata mā ciram |
tathā ca kṛtavantaste bhrāturvai śāsanaṃ tadā || 30 ||
[Analyze grammar]

cedīnāmādhipatye ca putramasya mahīpatim |
abhyaṣiñcattadā pārthaḥ saha tairvasudhādhipaiḥ || 31 ||
[Analyze grammar]

tataḥ sa kururājasya kratuḥ sarvasamṛddhimān |
yūnāṃ prītikaro rājansaṃbabhau vipulaujasaḥ || 32 ||
[Analyze grammar]

śāntavighnaḥ sukhārambhaḥ prabhūtadhanadhānyavān |
annavānbahubhakṣyaśca keśavena surakṣitaḥ || 33 ||
[Analyze grammar]

samāpayāmāsa ca taṃ rājasūyaṃ mahākratum |
taṃ tu yajñaṃ mahābāhurā samāpterjanārdanaḥ |
rarakṣa bhagavāñśauriḥ śārṅgacakragadādharaḥ || 34 ||
[Analyze grammar]

tatastvavabhṛthasnātaṃ dharmarājaṃ yudhiṣṭhiram |
samastaṃ pārthivaṃ kṣatramabhigamyedamabravīt || 35 ||
[Analyze grammar]

diṣṭyā vardhasi dharmajña sāmrājyaṃ prāptavānvibho |
ājamīḍhājamīḍhānāṃ yaśaḥ saṃvardhitaṃ tvayā |
karmaṇaitena rājendra dharmaśca sumahānkṛtaḥ || 36 ||
[Analyze grammar]

āpṛcchāmo naravyāghra sarvakāmaiḥ supūjitāḥ |
svarāṣṭrāṇi gamiṣyāmastadanujñātumarhasi || 37 ||
[Analyze grammar]

śrutvā tu vacanaṃ rājñāṃ dharmarājo yudhiṣṭhiraḥ |
yathārhaṃ pūjya nṛpatīnbhrātṝnsarvānuvāca ha || 38 ||
[Analyze grammar]

rājānaḥ sarva evaite prītyāsmānsamupāgatāḥ |
prasthitāḥ svāni rāṣṭrāṇi māmāpṛcchya paraṃtapāḥ |
te'nuvrajata bhadraṃ vo viṣayāntaṃ nṛpottamān || 39 ||
[Analyze grammar]

bhrāturvacanamājñāya pāṇḍavā dharmacāriṇaḥ |
yathārhaṃ nṛpamukhyāṃstānekaikaṃ samanuvrajan || 40 ||
[Analyze grammar]

virāṭamanvayāttūrṇaṃ dhṛṣṭadyumnaḥ pratāpavān |
dhanaṃjayo yajñasenaṃ mahātmānaṃ mahārathaḥ || 41 ||
[Analyze grammar]

bhīṣmaṃ ca dhṛtarāṣṭraṃ ca bhīmaseno mahābalaḥ |
droṇaṃ ca sasutaṃ vīraṃ sahadevo mahārathaḥ || 42 ||
[Analyze grammar]

nakulaḥ subalaṃ rājansahaputraṃ samanvayāt |
draupadeyāḥ sasaubhadrāḥ pārvatīyānmahīpatīn || 43 ||
[Analyze grammar]

anvagacchaṃstathaivānyānkṣatriyānkṣatriyarṣabhāḥ |
evaṃ saṃpūjitāste vai jagmurviprāśca sarvaśaḥ || 44 ||
[Analyze grammar]

gateṣu pārthivendreṣu sarveṣu bharatarṣabha |
yudhiṣṭhiramuvācedaṃ vāsudevaḥ pratāpavān || 45 ||
[Analyze grammar]

āpṛcche tvāṃ gamiṣyāmi dvārakāṃ kurunandana |
rājasūyaṃ kratuśreṣṭhaṃ diṣṭyā tvaṃ prāptavānasi || 46 ||
[Analyze grammar]

tamuvācaivamuktastu dharmarāṇmadhusūdanam |
tava prasādādgovinda prāptavānasmi vai kratum || 47 ||
[Analyze grammar]

samastaṃ pārthivaṃ kṣatraṃ tvatprasādādvaśānugam |
upādāya baliṃ mukhyaṃ māmeva samupasthitam || 48 ||
[Analyze grammar]

na vayaṃ tvāmṛte vīra raṃsyāmeha kathaṃcana |
avaśyaṃ cāpi gantavyā tvayā dvāravatī purī || 49 ||
[Analyze grammar]

evamuktaḥ sa dharmātmā yudhiṣṭhirasahāyavān |
abhigamyābravītprītaḥ pṛthāṃ pṛthuyaśā hariḥ || 50 ||
[Analyze grammar]

sāmrājyaṃ samanuprāptāḥ putrāste'dya pitṛṣvasaḥ |
siddhārthā vasumantaśca sā tvaṃ prītimavāpnuhi || 51 ||
[Analyze grammar]

anujñātastvayā cāhaṃ dvārakāṃ gantumutsahe |
subhadrāṃ draupadīṃ caiva sabhājayata keśavaḥ || 52 ||
[Analyze grammar]

niṣkramyāntaḥpurāccaiva yudhiṣṭhirasahāyavān |
snātaśca kṛtajapyaśca brāhmaṇānsvasti vācya ca || 53 ||
[Analyze grammar]

tato meghavaraprakhyaṃ syandanaṃ vai sukalpitam |
yojayitvā mahārāja dārukaḥ pratyupasthitaḥ || 54 ||
[Analyze grammar]

upasthitaṃ rathaṃ dṛṣṭvā tārkṣyapravaraketanam |
pradakṣiṇamupāvṛtya samāruhya mahāmanāḥ |
prayayau puṇḍarīkākṣastato dvāravatīṃ purīm || 55 ||
[Analyze grammar]

taṃ padbhyāmanuvavrāja dharmarājo yudhiṣṭhiraḥ |
bhrātṛbhiḥ sahitaḥ śrīmānvāsudevaṃ mahābalam || 56 ||
[Analyze grammar]

tato muhūrtaṃ saṃgṛhya syandanapravaraṃ hariḥ |
abravītpuṇḍarīkākṣaḥ kuntīputraṃ yudhiṣṭhiram || 57 ||
[Analyze grammar]

apramattaḥ sthito nityaṃ prajāḥ pāhi viśāṃ pate |
parjanyamiva bhūtāni mahādrumamivāṇḍajāḥ |
bāndhavāstvopajīvantu sahasrākṣamivāmarāḥ || 58 ||
[Analyze grammar]

kṛtvā paraspareṇaivaṃ saṃvidaṃ kṛṣṇapāṇḍavau |
anyonyaṃ samanujñāpya jagmatuḥ svagṛhānprati || 59 ||
[Analyze grammar]

gate dvāravatīṃ kṛṣṇe sātvatapravare nṛpa |
eko duryodhano rājā śakuniścāpi saubalaḥ |
tasyāṃ sabhāyāṃ divyāyāmūṣatustau nararṣabhau || 60 ||
[Analyze grammar]