Chapter 41

bhīṣma uvāca |
naiṣā cedipaterbuddhiryayā tvāhvayate'cyutam |
nūnameṣa jagadbhartuḥ kṛṣṇasyaiva viniścayaḥ || 1 ||
[Analyze grammar]

ko hi māṃ bhīmasenādya kṣitāvarhati pārthivaḥ |
kṣeptuṃ daivaparītātmā yathaiṣa kulapāṃsanaḥ || 2 ||
[Analyze grammar]

eṣa hyasya mahābāho tejoṃśaśca harerdhruvam |
tameva punarādātumicchatpṛthuyaśā hariḥ || 3 ||
[Analyze grammar]

yenaiṣa kuruśārdūla śārdūla iva cedirāṭ |
garjatyatīva durbuddhiḥ sarvānasmānacintayan || 4 ||
[Analyze grammar]

vaiśaṃpāyana uvāca |
tato na mamṛṣe caidyastadbhīṣmavacanaṃ tadā |
uvāca cainaṃ saṃkruddhaḥ punarbhīṣmamathottaram || 5 ||
[Analyze grammar]

śiśupāla uvāca |
dviṣatāṃ no'stu bhīṣmaiṣa prabhāvaḥ keśavasya yaḥ |
yasya saṃstavavaktā tvaṃ bandivatsatatotthitaḥ || 6 ||
[Analyze grammar]

saṃstavāya mano bhīṣma pareṣāṃ ramate sadā |
yadi saṃstauṣi rājñastvamimaṃ hitvā janārdanam || 7 ||
[Analyze grammar]

daradaṃ stuhi bāhlīkamimaṃ pārthivasattamam |
jāyamānena yeneyamabhavaddāritā mahī || 8 ||
[Analyze grammar]

vaṅgāṅgaviṣayādhyakṣaṃ sahasrākṣasamaṃ bale |
stuhi karṇamimaṃ bhīṣma mahācāpavikarṣaṇam || 9 ||
[Analyze grammar]

droṇaṃ drauṇiṃ ca sādhu tvaṃ pitāputrau mahārathau |
stuhi stutyāvimau bhīṣma satataṃ dvijasattamau || 10 ||
[Analyze grammar]

yayoranyataro bhīṣma saṃkruddhaḥ sacarācarām |
imāṃ vasumatīṃ kuryādaśeṣāmiti me matiḥ || 11 ||
[Analyze grammar]

droṇasya hi samaṃ yuddhe na paśyāmi narādhipam |
aśvatthāmnastathā bhīṣma na caitau stotumicchasi || 12 ||
[Analyze grammar]

śalyādīnapi kasmāttvaṃ na stauṣi vasudhādhipān |
stavāya yadi te buddhirvartate bhīṣma sarvadā || 13 ||
[Analyze grammar]

kiṃ hi śakyaṃ mayā kartuṃ yadvṛddhānāṃ tvayā nṛpa |
purā kathayatāṃ nūnaṃ na śrutaṃ dharmavādinām || 14 ||
[Analyze grammar]

ātmanindātmapūjā ca paranindā parastavaḥ |
anācaritamāryāṇāṃ vṛttametaccaturvidham || 15 ||
[Analyze grammar]

yadastavyamimaṃ śaśvanmohātsaṃstauṣi bhaktitaḥ |
keśavaṃ tacca te bhīṣma na kaścidanumanyate || 16 ||
[Analyze grammar]

kathaṃ bhojasya puruṣe vargapāle durātmani |
samāveśayase sarvaṃ jagatkevalakāmyayā || 17 ||
[Analyze grammar]

atha vaiṣā na te bhaktiḥ prakṛtiṃ yāti bhārata |
mayaiva kathitaṃ pūrvaṃ bhūliṅgaśakuniryathā || 18 ||
[Analyze grammar]

bhūliṅgaśakunirnāma pārśve himavataḥ pare |
bhīṣma tasyāḥ sadā vācaḥ śrūyante'rthavigarhitāḥ || 19 ||
[Analyze grammar]

mā sāhasamitīdaṃ sā satataṃ vāśate kila |
sāhasaṃ cātmanātīva carantī nāvabudhyate || 20 ||
[Analyze grammar]

sā hi māṃsārgalaṃ bhīṣma mukhātsiṃhasya khādataḥ |
dantāntaravilagnaṃ yattadādatte'lpacetanā || 21 ||
[Analyze grammar]

icchataḥ sā hi siṃhasya bhīṣma jīvatyasaṃśayam |
tadvattvamapyadharmajña sadā vācaḥ prabhāṣase || 22 ||
[Analyze grammar]

icchatāṃ pārthivendrāṇāṃ bhīṣma jīvasyasaṃśayam |
lokavidviṣṭakarmā hi nānyo'sti bhavatā samaḥ || 23 ||
[Analyze grammar]

vaiśaṃpāyana uvāca |
tataścedipateḥ śrutvā bhīṣmaḥ sa kaṭukaṃ vacaḥ |
uvācedaṃ vaco rājaṃścedirājasya śṛṇvataḥ || 24 ||
[Analyze grammar]

icchatāṃ kila nāmāhaṃ jīvāmyeṣāṃ mahīkṣitām |
yo'haṃ na gaṇayāmyetāṃstṛṇānīva narādhipān || 25 ||
[Analyze grammar]

evamukte tu bhīṣmeṇa tataḥ saṃcukrudhurnṛpāḥ |
kecijjahṛṣire tatra kecidbhīṣmaṃ jagarhire || 26 ||
[Analyze grammar]

kecidūcurmaheṣvāsāḥ śrutvā bhīṣmasya tadvacaḥ |
pāpo'valipto vṛddhaśca nāyaṃ bhīṣmo'rhati kṣamām || 27 ||
[Analyze grammar]

hanyatāṃ durmatirbhīṣmaḥ paśuvatsādhvayaṃ nṛpaiḥ |
sarvaiḥ sametya saṃrabdhairdahyatāṃ vā kaṭāgninā || 28 ||
[Analyze grammar]

iti teṣāṃ vacaḥ śrutvā tataḥ kurupitāmahaḥ |
uvāca matimānbhīṣmastāneva vasudhādhipān || 29 ||
[Analyze grammar]

uktasyoktasya nehāntamahaṃ samupalakṣaye |
yattu vakṣyāmi tatsarvaṃ śṛṇudhvaṃ vasudhādhipāḥ || 30 ||
[Analyze grammar]

paśuvadghātanaṃ vā me dahanaṃ vā kaṭāgninā |
kriyatāṃ mūrdhni vo nyastaṃ mayedaṃ sakalaṃ padam || 31 ||
[Analyze grammar]

eṣa tiṣṭhati govindaḥ pūjito'smābhiracyutaḥ |
yasya vastvarate buddhirmaraṇāya sa mādhavam || 32 ||
[Analyze grammar]

kṛṣṇamāhvayatāmadya yuddhe śārṅgagadādharam |
yāvadasyaiva devasya dehaṃ viśatu pātitaḥ || 33 ||
[Analyze grammar]