Chapter 22

vaiśaṃpāyana uvāca |
bhīmasenastataḥ kṛṣṇamuvāca yadunandanam |
buddhimāsthāya vipulāṃ jarāsaṃdhajighāṃsayā || 1 ||
[Analyze grammar]

nāyaṃ pāpo mayā kṛṣṇa yuktaḥ syādanurodhitum |
prāṇena yaduśārdūla baddhavaṅkṣaṇavāsasā || 2 ||
[Analyze grammar]

evamuktastataḥ kṛṣṇaḥ pratyuvāca vṛkodaram |
tvarayanpuruṣavyāghro jarāsaṃdhavadhepsayā || 3 ||
[Analyze grammar]

yatte daivaṃ paraṃ sattvaṃ yacca te mātariśvanaḥ |
balaṃ bhīma jarāsaṃdhe darśayāśu tadadya naḥ || 4 ||
[Analyze grammar]

evamuktastadā bhīmo jarāsaṃdhamariṃdamaḥ |
utkṣipya bhrāmayadrājanbalavantaṃ mahābalaḥ || 5 ||
[Analyze grammar]

bhrāmayitvā śataguṇaṃ bhujābhyāṃ bharatarṣabha |
babhañja pṛṣṭhe saṃkṣipya niṣpiṣya vinanāda ca || 6 ||
[Analyze grammar]

tasya niṣpiṣyamāṇasya pāṇḍavasya ca garjataḥ |
abhavattumulo nādaḥ sarvaprāṇibhayaṃkaraḥ || 7 ||
[Analyze grammar]

vitresurmāgadhāḥ sarve strīṇāṃ garbhāśca susruvuḥ |
bhīmasenasya nādena jarāsaṃdhasya caiva ha || 8 ||
[Analyze grammar]

kiṃ nu sviddhimavānbhinnaḥ kiṃ nu sviddīryate mahī |
iti sma māgadhā jajñurbhīmasenasya nisvanāt || 9 ||
[Analyze grammar]

tato rājakuladvāri prasuptamiva taṃ nṛpam |
rātrau parāsumutsṛjya niścakramurariṃdamāḥ || 10 ||
[Analyze grammar]

jarāsaṃdharathaṃ kṛṣṇo yojayitvā patākinam |
āropya bhrātarau caiva mokṣayāmāsa bāndhavān || 11 ||
[Analyze grammar]

te vai ratnabhujaṃ kṛṣṇaṃ ratnārhaṃ pṛthivīśvarāḥ |
rājānaścakrurāsādya mokṣitā mahato bhayāt || 12 ||
[Analyze grammar]

akṣataḥ śastrasaṃpanno jitāriḥ saha rājabhiḥ |
rathamāsthāya taṃ divyaṃ nirjagāma girivrajāt || 13 ||
[Analyze grammar]

yaḥ sa sodaryavānnāma dviyodhaḥ kṛṣṇasārathiḥ |
abhyāsaghātī saṃdṛśyo durjayaḥ sarvarājabhiḥ || 14 ||
[Analyze grammar]

bhīmārjunābhyāṃ yodhābhyāmāsthitaḥ kṛṣṇasārathiḥ |
śuśubhe rathavaryo'sau durjayaḥ sarvadhanvibhiḥ || 15 ||
[Analyze grammar]

śakraviṣṇū hi saṃgrāme ceratustārakāmaye |
rathena tena taṃ kṛṣṇa upāruhya yayau tadā || 16 ||
[Analyze grammar]

taptacāmīkarābheṇa kiṅkiṇījālamālinā |
meghanirghoṣanādena jaitreṇāmitraghātinā || 17 ||
[Analyze grammar]

yena śakro dānavānāṃ jaghāna navatīrnava |
taṃ prāpya samahṛṣyanta rathaṃ te puruṣarṣabhāḥ || 18 ||
[Analyze grammar]

tataḥ kṛṣṇaṃ mahābāhuṃ bhrātṛbhyāṃ sahitaṃ tadā |
rathasthaṃ māgadhā dṛṣṭvā samapadyanta vismitāḥ || 19 ||
[Analyze grammar]

hayairdivyaiḥ samāyukto ratho vāyusamo jave |
adhiṣṭhitaḥ sa śuśubhe kṛṣṇenātīva bhārata || 20 ||
[Analyze grammar]

asaṅgī devavihitastasminrathavare dhvajaḥ |
yojanāddadṛśe śrīmānindrāyudhasamaprabhaḥ || 21 ||
[Analyze grammar]

cintayāmāsa kṛṣṇo'tha garutmantaṃ sa cābhyayāt |
kṣaṇe tasminsa tenāsīccaityayūpa ivocchritaḥ || 22 ||
[Analyze grammar]

vyāditāsyairmahānādaiḥ saha bhūtairdhvajālayaiḥ |
tasthau rathavare tasmingarutmānpannagāśanaḥ || 23 ||
[Analyze grammar]

durnirīkṣyo hi bhūtānāṃ tejasābhyadhikaṃ babhau |
āditya iva madhyāhne sahasrakiraṇāvṛtaḥ || 24 ||
[Analyze grammar]

na sa sajjati vṛkṣeṣu śastraiścāpi na riṣyate |
divyo dhvajavaro rājandṛśyate devamānuṣaiḥ || 25 ||
[Analyze grammar]

tamāsthāya rathaṃ divyaṃ parjanyasamanisvanam |
niryayau puruṣavyāghraḥ pāṇḍavābhyāṃ sahācyutaḥ || 26 ||
[Analyze grammar]

yaṃ lebhe vāsavādrājā vasustasmādbṛhadrathaḥ |
bṛhadrathātkrameṇaiva prāpto bārhadrathaṃ nṛpam || 27 ||
[Analyze grammar]

sa niryayau mahābāhuḥ puṇḍarīkekṣaṇastataḥ |
girivrajādbahistasthau same deśe mahāyaśāḥ || 28 ||
[Analyze grammar]

tatrainaṃ nāgarāḥ sarve satkāreṇābhyayustadā |
brāhmaṇapramukhā rājanvidhidṛṣṭena karmaṇā || 29 ||
[Analyze grammar]

bandhanādvipramuktāśca rājāno madhusūdanam |
pūjayāmāsurūcuśca sāntvapūrvamidaṃ vacaḥ || 30 ||
[Analyze grammar]

naitaccitraṃ mahābāho tvayi devakinandana |
bhīmārjunabalopete dharmasya paripālanam || 31 ||
[Analyze grammar]

jarāsaṃdhahrade ghore duḥkhapaṅke nimajjatām |
rājñāṃ samabhyuddharaṇaṃ yadidaṃ kṛtamadya te || 32 ||
[Analyze grammar]

viṣṇo samavasannānāṃ giridurge sudāruṇe |
diṣṭyā mokṣādyaśo dīptamāptaṃ te puruṣottama || 33 ||
[Analyze grammar]

kiṃ kurmaḥ puruṣavyāghra bravīhi puruṣarṣabha |
kṛtamityeva tajjñeyaṃ nṛpairyadyapi duṣkaram || 34 ||
[Analyze grammar]

tānuvāca hṛṣīkeśaḥ samāśvāsya mahāmanāḥ |
yudhiṣṭhiro rājasūyaṃ kratumāhartumicchati || 35 ||
[Analyze grammar]

tasya dharmapravṛttasya pārthivatvaṃ cikīrṣataḥ |
sarvairbhavadbhiryajñārthe sāhāyyaṃ dīyatāmiti || 36 ||
[Analyze grammar]

tataḥ pratītamanasaste nṛpā bharatarṣabha |
tathetyevābruvansarve pratijajñuśca tāṃ giram || 37 ||
[Analyze grammar]

ratnabhājaṃ ca dāśārhaṃ cakruste pṛthivīśvarāḥ |
kṛcchrājjagrāha govindasteṣāṃ tadanukampayā || 38 ||
[Analyze grammar]

jarāsaṃdhātmajaścaiva sahadevo mahārathaḥ |
niryayau sajanāmātyaḥ puraskṛtya purohitam || 39 ||
[Analyze grammar]

sa nīcaiḥ praśrito bhūtvā bahuratnapurogamaḥ |
sahadevo nṛṇāṃ devaṃ vāsudevamupasthitaḥ || 40 ||
[Analyze grammar]

bhayārtāya tatastasmai kṛṣṇo dattvābhayaṃ tadā |
abhyaṣiñcata tatraiva jarāsaṃdhātmajaṃ tadā || 41 ||
[Analyze grammar]

gatvaikatvaṃ ca kṛṣṇena pārthābhyāṃ caiva satkṛtaḥ |
viveśa rājā matimānpunarbārhadrathaṃ puram || 42 ||
[Analyze grammar]

kṛṣṇastu saha pārthābhyāṃ śriyā paramayā jvalan |
ratnānyādāya bhūrīṇi prayayau puṣkarekṣaṇaḥ || 43 ||
[Analyze grammar]

indraprasthamupāgamya pāṇḍavābhyāṃ sahācyutaḥ |
sametya dharmarājānaṃ prīyamāṇo'bhyabhāṣata || 44 ||
[Analyze grammar]

diṣṭyā bhīmena balavāñjarāsaṃdho nipātitaḥ |
rājāno mokṣitāśceme bandhanānnṛpasattama || 45 ||
[Analyze grammar]

diṣṭyā kuśalinau cemau bhīmasenadhanaṃjayau |
punaḥ svanagaraṃ prāptāvakṣatāviti bhārata || 46 ||
[Analyze grammar]

tato yudhiṣṭhiraḥ kṛṣṇaṃ pūjayitvā yathārhataḥ |
bhīmasenārjunau caiva prahṛṣṭaḥ pariṣasvaje || 47 ||
[Analyze grammar]

tataḥ kṣīṇe jarāsaṃdhe bhrātṛbhyāṃ vihitaṃ jayam |
ajātaśatrurāsādya mumude bhrātṛbhiḥ saha || 48 ||
[Analyze grammar]

yathāvayaḥ samāgamya rājabhistaiśca pāṇḍavaḥ |
satkṛtya pūjayitvā ca visasarja narādhipān || 49 ||
[Analyze grammar]

yudhiṣṭhirābhyanujñātāste nṛpā hṛṣṭamānasāḥ |
jagmuḥ svadeśāṃstvaritā yānairuccāvacaistataḥ || 50 ||
[Analyze grammar]

evaṃ puruṣaśārdūlo mahābuddhirjanārdanaḥ |
pāṇḍavairghātayāmāsa jarāsaṃdhamariṃ tadā || 51 ||
[Analyze grammar]

ghātayitvā jarāsaṃdhaṃ buddhipūrvamariṃdamaḥ |
dharmarājamanujñāpya pṛthāṃ kṛṣṇāṃ ca bhārata || 52 ||
[Analyze grammar]

subhadrāṃ bhīmasenaṃ ca phalgunaṃ yamajau tathā |
dhaumyamāmantrayitvā ca prayayau svāṃ purīṃ prati || 53 ||
[Analyze grammar]

tenaiva rathamukhyena taruṇādityavarcasā |
dharmarājavisṛṣṭena divyenānādayandiśaḥ || 54 ||
[Analyze grammar]

tato yudhiṣṭhiramukhāḥ pāṇḍavā bharatarṣabha |
pradakṣiṇamakurvanta kṛṣṇamakliṣṭakāriṇam || 55 ||
[Analyze grammar]

tato gate bhagavati kṛṣṇe devakinandane |
jayaṃ labdhvā suvipulaṃ rājñāmabhayadāstadā || 56 ||
[Analyze grammar]

saṃvardhitaujaso bhūyaḥ karmaṇā tena bhārata |
draupadyāḥ pāṇḍavā rājanparāṃ prītimavardhayan || 57 ||
[Analyze grammar]

tasminkāle tu yadyuktaṃ dharmakāmārthasaṃhitam |
tadrājā dharmataścakre rājyapālanakīrtimān || 58 ||
[Analyze grammar]