Chapter 5

vaiśaṃpāyana uvāca |
tathā tatropaviṣṭeṣu pāṇḍaveṣu mahātmasu |
mahatsu copaviṣṭeṣu gandharveṣu ca bhārata || 1 ||
[Analyze grammar]

lokānanucaransarvānāgamattāṃ sabhāmṛṣiḥ |
nāradaḥ sumahātejā ṛṣibhiḥ sahitastadā || 2 ||
[Analyze grammar]

pārijātena rājendra raivatena ca dhīmatā |
sumukhena ca saumyena devarṣiramitadyutiḥ |
sabhāsthānpāṇḍavāndraṣṭuṃ prīyamāṇo manojavaḥ || 3 ||
[Analyze grammar]

tamāgatamṛṣiṃ dṛṣṭvā nāradaṃ sarvadharmavit |
sahasā pāṇḍavaśreṣṭhaḥ pratyutthāyānujaiḥ saha |
abhyavādayata prītyā vinayāvanatastadā || 4 ||
[Analyze grammar]

tadarhamāsanaṃ tasmai saṃpradāya yathāvidhi |
arcayāmāsa ratnaiśca sarvakāmaiśca dharmavit || 5 ||
[Analyze grammar]

so'rcitaḥ pāṇḍavaiḥ sarvairmaharṣirvedapāragaḥ |
dharmakāmārthasaṃyuktaṃ papracchedaṃ yudhiṣṭhiram || 6 ||
[Analyze grammar]

nārada uvāca |
kaccidarthāśca kalpante dharme ca ramate manaḥ |
sukhāni cānubhūyante manaśca na vihanyate || 7 ||
[Analyze grammar]

kaccidācaritāṃ pūrvairnaradeva pitāmahaiḥ |
vartase vṛttimakṣīṇāṃ dharmārthasahitāṃ nṛṣu || 8 ||
[Analyze grammar]

kaccidarthena vā dharmaṃ dharmeṇārthamathāpi vā |
ubhau vā prītisāreṇa na kāmena prabādhase || 9 ||
[Analyze grammar]

kaccidarthaṃ ca dharmaṃ ca kāmaṃ ca jayatāṃ vara |
vibhajya kāle kālajña sadā varada sevase || 10 ||
[Analyze grammar]

kaccidrājaguṇaiḥ ṣaḍbhiḥ saptopāyāṃstathānagha |
balābalaṃ tathā samyakcaturdaśa parīkṣase || 11 ||
[Analyze grammar]

kaccidātmānamanvīkṣya parāṃśca jayatāṃ vara |
tathā saṃdhāya karmāṇi aṣṭau bhārata sevase || 12 ||
[Analyze grammar]

kaccitprakṛtayaḥ ṣaṭte na luptā bharatarṣabha |
āḍhyāstathāvyasaninaḥ svanuraktāśca sarvaśaḥ || 13 ||
[Analyze grammar]

kaccinna tarkairdūtairvā ye cāpyapariśaṅkitāḥ |
tvatto vā tava vāmātyairbhidyate jātu mantritam || 14 ||
[Analyze grammar]

kaccitsaṃdhiṃ yathākālaṃ vigrahaṃ copasevase |
kaccidvṛttimudāsīne madhyame cānuvartase || 15 ||
[Analyze grammar]

kaccidātmasamā buddhyā śucayo jīvitakṣamāḥ |
kulīnāścānuraktāśca kṛtāste vīra mantriṇaḥ || 16 ||
[Analyze grammar]

vijayo mantramūlo hi rājñāṃ bhavati bhārata |
susaṃvṛto mantradhanairamātyaiḥ śāstrakovidaiḥ || 17 ||
[Analyze grammar]

kaccinnidrāvaśaṃ naiṣi kaccitkāle vibudhyase |
kacciccāpararātreṣu cintayasyarthamarthavit || 18 ||
[Analyze grammar]

kaccinmantrayase naikaḥ kaccinna bahubhiḥ saha |
kaccitte mantrito mantro na rāṣṭramanudhāvati || 19 ||
[Analyze grammar]

kaccidarthānviniścitya laghumūlānmahodayān |
kṣipramārabhase kartuṃ na vighnayasi tādṛśān || 20 ||
[Analyze grammar]

kaccinna sarve karmāntāḥ parokṣāste viśaṅkitāḥ |
sarve vā punarutsṛṣṭāḥ saṃsṛṣṭaṃ hyatra kāraṇam || 21 ||
[Analyze grammar]

kaccidrājankṛtānyeva kṛtaprāyāṇi vā punaḥ |
viduste vīra karmāṇi nānavāptāni kānicit || 22 ||
[Analyze grammar]

kaccitkāraṇikāḥ sarve sarvaśāstreṣu kovidāḥ |
kārayanti kumārāṃśca yodhamukhyāṃśca sarvaśaḥ || 23 ||
[Analyze grammar]

kaccitsahasrairmūrkhāṇāmekaṃ krīṇāsi paṇḍitam |
paṇḍito hyarthakṛcchreṣu kuryānniḥśreyasaṃ param || 24 ||
[Analyze grammar]

kacciddurgāṇi sarvāṇi dhanadhānyāyudhodakaiḥ |
yantraiśca paripūrṇāni tathā śilpidhanurdharaiḥ || 25 ||
[Analyze grammar]

eko'pyamātyo medhāvī śūro dānto vicakṣaṇaḥ |
rājānaṃ rājaputraṃ vā prāpayenmahatīṃ śriyam || 26 ||
[Analyze grammar]

kaccidaṣṭādaśānyeṣu svapakṣe daśa pañca ca |
tribhistribhiravijñātairvetsi tīrthāni cārakaiḥ || 27 ||
[Analyze grammar]

kacciddviṣāmaviditaḥ pratiyattaśca sarvadā |
nityayukto ripūnsarvānvīkṣase ripusūdana || 28 ||
[Analyze grammar]

kaccidvinayasaṃpannaḥ kulaputro bahuśrutaḥ |
anasūyuranupraṣṭā satkṛtaste purohitaḥ || 29 ||
[Analyze grammar]

kaccidagniṣu te yukto vidhijño matimānṛjuḥ |
hutaṃ ca hoṣyamāṇaṃ ca kāle vedayate sadā || 30 ||
[Analyze grammar]

kaccidaṅgeṣu niṣṇāto jyotiṣāṃ pratipādakaḥ |
utpāteṣu ca sarveṣu daivajñaḥ kuśalastava || 31 ||
[Analyze grammar]

kaccinmukhyā mahatsveva madhyameṣu ca madhyamāḥ |
jaghanyāśca jaghanyeṣu bhṛtyāḥ karmasu yojitāḥ || 32 ||
[Analyze grammar]

amātyānupadhātītānpitṛpaitāmahāñśucīn |
śreṣṭhāñśreṣṭheṣu kaccittvaṃ niyojayasi karmasu || 33 ||
[Analyze grammar]

kaccinnogreṇa daṇḍena bhṛśamudvejitaprajāḥ |
rāṣṭraṃ tavānuśāsanti mantriṇo bharatarṣabha || 34 ||
[Analyze grammar]

kaccittvāṃ nāvajānanti yājakāḥ patitaṃ yathā |
ugrapratigrahītāraṃ kāmayānamiva striyaḥ || 35 ||
[Analyze grammar]

kacciddhṛṣṭaśca śūraśca matimāndhṛtimāñśuciḥ |
kulīnaścānuraktaśca dakṣaḥ senāpatistava || 36 ||
[Analyze grammar]

kaccidbalasya te mukhyāḥ sarve yuddhaviśāradāḥ |
dṛṣṭāpadānā vikrāntāstvayā satkṛtya mānitāḥ || 37 ||
[Analyze grammar]

kaccidbalasya bhaktaṃ ca vetanaṃ ca yathocitam |
saṃprāptakālaṃ dātavyaṃ dadāsi na vikarṣasi || 38 ||
[Analyze grammar]

kālātikramaṇāddhyete bhaktavetanayorbhṛtāḥ |
bhartuḥ kupyanti daurgatyātso'narthaḥ sumahānsmṛtaḥ || 39 ||
[Analyze grammar]

kaccitsarve'nuraktāstvāṃ kulaputrāḥ pradhānataḥ |
kaccitprāṇāṃstavārtheṣu saṃtyajanti sadā yudhi || 40 ||
[Analyze grammar]

kaccinnaiko bahūnarthānsarvaśaḥ sāṃparāyikān |
anuśāssi yathākāmaṃ kāmātmā śāsanātigaḥ || 41 ||
[Analyze grammar]

kaccitpuruṣakāreṇa puruṣaḥ karma śobhayan |
labhate mānamadhikaṃ bhūyo vā bhaktavetanam || 42 ||
[Analyze grammar]

kaccidvidyāvinītāṃśca narāñjñānaviśāradān |
yathārhaṃ guṇataścaiva dānenābhyavapadyase || 43 ||
[Analyze grammar]

kacciddārānmanuṣyāṇāṃ tavārthe mṛtyumeyuṣām |
vyasanaṃ cābhyupetānāṃ bibharṣi bharatarṣabha || 44 ||
[Analyze grammar]

kaccidbhayādupanataṃ klībaṃ vā ripumāgatam |
yuddhe vā vijitaṃ pārtha putravatparirakṣasi || 45 ||
[Analyze grammar]

kaccittvameva sarvasyāḥ pṛthivyāḥ pṛthivīpate |
samaśca nābhiśaṅkyaśca yathā mātā yathā pitā || 46 ||
[Analyze grammar]

kaccidvyasaninaṃ śatruṃ niśamya bharatarṣabha |
abhiyāsi javenaiva samīkṣya trividhaṃ balam || 47 ||
[Analyze grammar]

pārṣṇimūlaṃ ca vijñāya vyavasāyaṃ parājayam |
balasya ca mahārāja dattvā vetanamagrataḥ || 48 ||
[Analyze grammar]

kaccicca balamukhyebhyaḥ pararāṣṭre paraṃtapa |
upacchannāni ratnāni prayacchasi yathārhataḥ || 49 ||
[Analyze grammar]

kaccidātmānamevāgre vijitya vijitendriyaḥ |
parāñjigīṣase pārtha pramattānajitendriyān || 50 ||
[Analyze grammar]

kaccitte yāsyataḥ śatrūnpūrvaṃ yānti svanuṣṭhitāḥ |
sāma dānaṃ ca bhedaśca daṇḍaśca vidhivadguṇāḥ || 51 ||
[Analyze grammar]

kaccinmūlaṃ dṛḍhaṃ kṛtvā yātrāṃ yāsi viśāṃ pate |
tāṃśca vikramase jetuṃ jitvā ca parirakṣasi || 52 ||
[Analyze grammar]

kaccidaṣṭāṅgasaṃyuktā caturvidhabalā camūḥ |
balamukhyaiḥ sunītā te dviṣatāṃ pratibādhanī || 53 ||
[Analyze grammar]

kaccillavaṃ ca muṣṭiṃ ca pararāṣṭre paraṃtapa |
avihāya mahārāja vihaṃsi samare ripūn || 54 ||
[Analyze grammar]

kaccitsvapararāṣṭreṣu bahavo'dhikṛtāstava |
arthānsamanutiṣṭhanti rakṣanti ca parasparam || 55 ||
[Analyze grammar]

kaccidabhyavahāryāṇi gātrasaṃsparśakāni ca |
ghreyāṇi ca mahārāja rakṣantyanumatāstava || 56 ||
[Analyze grammar]

kaccitkośaṃ ca koṣṭhaṃ ca vāhanaṃ dvāramāyudham |
āyaśca kṛtakalyāṇaistava bhaktairanuṣṭhitaḥ || 57 ||
[Analyze grammar]

kaccidābhyantarebhyaśca bāhyebhyaśca viśāṃ pate |
rakṣasyātmānamevāgre tāṃśca svebhyo mithaśca tān || 58 ||
[Analyze grammar]

kaccinna pāne dyūte vā krīḍāsu pramadāsu ca |
pratijānanti pūrvāhṇe vyayaṃ vyasanajaṃ tava || 59 ||
[Analyze grammar]

kaccidāyasya cārdhena caturbhāgena vā punaḥ |
pādabhāgaistribhirvāpi vyayaḥ saṃśodhyate tava || 60 ||
[Analyze grammar]

kaccijjñātīngurūnvṛddhānvaṇijaḥ śilpinaḥ śritān |
abhīkṣṇamanugṛhṇāsi dhanadhānyena durgatān || 61 ||
[Analyze grammar]

kaccidāyavyaye yuktāḥ sarve gaṇakalekhakāḥ |
anutiṣṭhanti pūrvāhṇe nityamāyavyayaṃ tava || 62 ||
[Analyze grammar]

kaccidartheṣu saṃprauḍhānhitakāmānanupriyān |
nāpakarṣasi karmabhyaḥ pūrvamaprāpya kilbiṣam || 63 ||
[Analyze grammar]

kaccidviditvā puruṣānuttamādhamamadhyamān |
tvaṃ karmasvanurūpeṣu niyojayasi bhārata || 64 ||
[Analyze grammar]

kaccinna lubdhāścaurā vā vairiṇo vā viśāṃ pate |
aprāptavyavahārā vā tava karmasvanuṣṭhitāḥ || 65 ||
[Analyze grammar]

kaccinna lubdhaiścaurairvā kumāraiḥ strībalena vā |
tvayā vā pīḍyate rāṣṭraṃ kaccitpuṣṭāḥ kṛṣīvalāḥ || 66 ||
[Analyze grammar]

kaccidrāṣṭre taḍāgāni pūrṇāni ca mahānti ca |
bhāgaśo viniviṣṭāni na kṛṣirdevamātṛkā || 67 ||
[Analyze grammar]

kaccidbījaṃ ca bhaktaṃ ca karṣakāyāvasīdate |
pratikaṃ ca śataṃ vṛddhyā dadāsyṛṇamanugraham || 68 ||
[Analyze grammar]

kaccitsvanuṣṭhitā tāta vārttā te sādhubhirjanaiḥ |
vārttāyāṃ saṃśritastāta loko'yaṃ sukhamedhate || 69 ||
[Analyze grammar]

kaccicchucikṛtaḥ prājñāḥ pañca pañca svanuṣṭhitāḥ |
kṣemaṃ kurvanti saṃhatya rājañjanapade tava || 70 ||
[Analyze grammar]

kaccinnagaraguptyarthaṃ grāmā nagaravatkṛtāḥ |
grāmavacca kṛtā rakṣā te ca sarve tadarpaṇāḥ || 71 ||
[Analyze grammar]

kaccidbalenānugatāḥ samāni viṣamāṇi ca |
purāṇacaurāḥ sādhyakṣāścaranti viṣaye tava || 72 ||
[Analyze grammar]

kaccitstriyaḥ sāntvayasi kaccittāśca surakṣitāḥ |
kaccinna śraddadhāsyāsāṃ kaccidguhyaṃ na bhāṣase || 73 ||
[Analyze grammar]

kacciccārānniśi śrutvā tatkāryamanucintya ca |
priyāṇyanubhavañśeṣe viditvābhyantaraṃ janam || 74 ||
[Analyze grammar]

kacciddvau prathamau yāmau rātryāṃ suptvā viśāṃ pate |
saṃcintayasi dharmārthau yāma utthāya paścime || 75 ||
[Analyze grammar]

kacciddarśayase nityaṃ manuṣyānsamalaṃkṛtān |
utthāya kāle kālajñaḥ saha pāṇḍava mantribhiḥ || 76 ||
[Analyze grammar]

kaccidraktāmbaradharāḥ khaḍgahastāḥ svalaṃkṛtāḥ |
abhitastvāmupāsante rakṣaṇārthamariṃdama || 77 ||
[Analyze grammar]

kacciddaṇḍyeṣu yamavatpūjyeṣu ca viśāṃ pate |
parīkṣya vartase samyagapriyeṣu priyeṣu ca || 78 ||
[Analyze grammar]

kaccicchārīramābādhamauṣadhairniyamena vā |
mānasaṃ vṛddhasevābhiḥ sadā pārthāpakarṣasi || 79 ||
[Analyze grammar]

kaccidvaidyāścikitsāyāmaṣṭāṅgāyāṃ viśāradāḥ |
suhṛdaścānuraktāśca śarīre te hitāḥ sadā || 80 ||
[Analyze grammar]

kaccinna mānānmohādvā kāmādvāpi viśāṃ pate |
arthipratyarthinaḥ prāptānapāsyasi kathaṃcana || 81 ||
[Analyze grammar]

kaccinna lobhānmohādvā viśrambhātpraṇayena vā |
āśritānāṃ manuṣyāṇāṃ vṛttiṃ tvaṃ saṃruṇatsi ca || 82 ||
[Analyze grammar]

kaccitpaurā na sahitā ye ca te rāṣṭravāsinaḥ |
tvayā saha virudhyante paraiḥ krītāḥ kathaṃcana || 83 ||
[Analyze grammar]

kaccitte durbalaḥ śatrurbalenopanipīḍitaḥ |
mantreṇa balavānkaścidubhābhyāṃ vā yudhiṣṭhira || 84 ||
[Analyze grammar]

kaccitsarve'nuraktāstvāṃ bhūmipālāḥ pradhānataḥ |
kaccitprāṇāṃstvadartheṣu saṃtyajanti tvayā hṛtāḥ || 85 ||
[Analyze grammar]

kaccitte sarvavidyāsu guṇato'rcā pravartate |
brāhmaṇānāṃ ca sādhūnāṃ tava niḥśreyase śubhā || 86 ||
[Analyze grammar]

kacciddharme trayīmūle pūrvairācarite janaiḥ |
vartamānastathā kartuṃ tasminkarmaṇi vartase || 87 ||
[Analyze grammar]

kaccittava gṛhe'nnāni svādūnyaśnanti vai dvijāḥ |
guṇavanti guṇopetāstavādhyakṣaṃ sadakṣiṇam || 88 ||
[Analyze grammar]

kaccitkratūnekacitto vājapeyāṃśca sarvaśaḥ |
puṇḍarīkāṃśca kārtsnyena yatase kartumātmavān || 89 ||
[Analyze grammar]

kaccijjñātīngurūnvṛddhāndaivatāṃstāpasānapi |
caityāṃśca vṛkṣānkalyāṇānbrāhmaṇāṃśca namasyasi || 90 ||
[Analyze grammar]

kaccideṣā ca te buddhirvṛttireṣā ca te'nagha |
āyuṣyā ca yaśasyā ca dharmakāmārthadarśinī || 91 ||
[Analyze grammar]

etayā vartamānasya buddhyā rāṣṭraṃ na sīdati |
vijitya ca mahīṃ rājā so'tyantaṃ sukhamedhate || 92 ||
[Analyze grammar]

kaccidāryo viśuddhātmā kṣāritaścaurakarmaṇi |
adṛṣṭaśāstrakuśalairna lobhādvadhyate śuciḥ || 93 ||
[Analyze grammar]

pṛṣṭo gṛhītastatkārī tajjñairdṛṣṭaḥ sakāraṇaḥ |
kaccinna mucyate steno dravyalobhānnararṣabha || 94 ||
[Analyze grammar]

vyutpanne kaccidāḍhyasya daridrasya ca bhārata |
arthānna mithyā paśyanti tavāmātyā hṛtā dhanaiḥ || 95 ||
[Analyze grammar]

nāstikyamanṛtaṃ krodhaṃ pramādaṃ dīrghasūtratām |
adarśanaṃ jñānavatāmālasyaṃ kṣiptacittatām || 96 ||
[Analyze grammar]

ekacintanamarthānāmanarthajñaiśca cintanam |
niścitānāmanārambhaṃ mantrasyāparirakṣaṇam || 97 ||
[Analyze grammar]

maṅgalyasyāprayogaṃ ca prasaṅgaṃ viṣayeṣu ca |
kaccittvaṃ varjayasyetānrājadoṣāṃścaturdaśa || 98 ||
[Analyze grammar]

kaccitte saphalā vedāḥ kaccitte saphalaṃ dhanam |
kaccitte saphalā dārāḥ kaccitte saphalaṃ śrutam || 99 ||
[Analyze grammar]

yudhiṣṭhira uvāca |
kathaṃ vai saphalā vedāḥ kathaṃ vai saphalaṃ dhanam |
kathaṃ vai saphalā dārāḥ kathaṃ vai saphalaṃ śrutam || 100 ||
[Analyze grammar]

nārada uvāca |
agnihotraphalā vedā dattabhuktaphalaṃ dhanam |
ratiputraphalā dārāḥ śīlavṛttaphalaṃ śrutam || 101 ||
[Analyze grammar]

vaiśaṃpāyana uvāca |
etadākhyāya sa munirnāradaḥ sumahātapāḥ |
papracchānantaramidaṃ dharmātmānaṃ yudhiṣṭhiram || 102 ||
[Analyze grammar]

nārada uvāca |
kaccidabhyāgatā dūrādvaṇijo lābhakāraṇāt |
yathoktamavahāryante śulkaṃ śulkopajīvibhiḥ || 103 ||
[Analyze grammar]

kaccitte puruṣā rājanpure rāṣṭre ca mānitāḥ |
upānayanti paṇyāni upadhābhiravañcitāḥ || 104 ||
[Analyze grammar]

kaccicchṛṇoṣi vṛddhānāṃ dharmārthasahitā giraḥ |
nityamarthavidāṃ tāta tathā dharmānudarśinām || 105 ||
[Analyze grammar]

kaccitte kṛṣitantreṣu goṣu puṣpaphaleṣu ca |
dharmārthaṃ ca dvijātibhyo dīyate madhusarpiṣī || 106 ||
[Analyze grammar]

dravyopakaraṇaṃ kaccitsarvadā sarvaśilpinām |
cāturmāsyāvaraṃ samyaṅniyataṃ saṃprayacchasi || 107 ||
[Analyze grammar]

kaccitkṛtaṃ vijānīṣe kartāraṃ ca praśaṃsasi |
satāṃ madhye mahārāja satkaroṣi ca pūjayan || 108 ||
[Analyze grammar]

kaccitsūtrāṇi sarvāṇi gṛhṇāsi bharatarṣabha |
hastisūtrāśvasūtrāṇi rathasūtrāṇi cābhibho || 109 ||
[Analyze grammar]

kaccidabhyasyate śaśvadgṛhe te bharatarṣabha |
dhanurvedasya sūtraṃ ca yantrasūtraṃ ca nāgaram || 110 ||
[Analyze grammar]

kaccidastrāṇi sarvāṇi brahmadaṇḍaśca te'nagha |
viṣayogāśca te sarve viditāḥ śatrunāśanāḥ || 111 ||
[Analyze grammar]

kaccidagnibhayāccaiva sarpavyālabhayāttathā |
rogarakṣobhayāccaiva rāṣṭraṃ svaṃ parirakṣasi || 112 ||
[Analyze grammar]

kaccidandhāṃśca mūkāṃśca paṅgūnvyaṅgānabāndhavān |
piteva pāsi dharmajña tathā pravrajitānapi || 113 ||
[Analyze grammar]

vaiśaṃpāyana uvāca |
etāḥ kurūṇāmṛṣabho mahātmā śrutvā giro brāhmaṇasattamasya |
praṇamya pādāvabhivādya hṛṣṭo rājābravīnnāradaṃ devarūpam || 114 ||
[Analyze grammar]

evaṃ kariṣyāmi yathā tvayoktaṃ prajñā hi me bhūya evābhivṛddhā |
uktvā tathā caiva cakāra rājā lebhe mahīṃ sāgaramekhalāṃ ca || 115 ||
[Analyze grammar]

nārada uvāca |
evaṃ yo vartate rājā cāturvarṇyasya rakṣaṇe |
sa vihṛtyeha susukhī śakrasyaiti salokatām || 116 ||
[Analyze grammar]