Chapter 205

vaiśaṃpāyana uvāca |
evaṃ te samayaṃ kṛtvā nyavasaṃstatra pāṇḍavāḥ |
vaśe śastrapratāpena kurvanto'nyānmahīkṣitaḥ || 1 ||
[Analyze grammar]

teṣāṃ manujasiṃhānāṃ pañcānāmamitaujasām |
babhūva kṛṣṇā sarveṣāṃ pārthānāṃ vaśavartinī || 2 ||
[Analyze grammar]

te tayā taiśca sā vīraiḥ patibhiḥ saha pañcabhiḥ |
babhūva paramaprītā nāgairiva sarasvatī || 3 ||
[Analyze grammar]

vartamāneṣu dharmeṇa pāṇḍaveṣu mahātmasu |
vyavardhankuravaḥ sarve hīnadoṣāḥ sukhānvitāḥ || 4 ||
[Analyze grammar]

atha dīrgheṇa kālena brāhmaṇasya viśāṃ pate |
kasyacittaskarāḥ kecijjahrurgā nṛpasattama || 5 ||
[Analyze grammar]

hriyamāṇe dhane tasminbrāhmaṇaḥ krodhamūrcchitaḥ |
āgamya khāṇḍavaprasthamudakrośata pāṇḍavān || 6 ||
[Analyze grammar]

hriyate godhanaṃ kṣudrairnṛśaṃsairakṛtātmabhiḥ |
prasahya vo'smādviṣayādabhidhāvata pāṇḍavāḥ || 7 ||
[Analyze grammar]

brāhmaṇasya pramattasya havirdhvāṅkṣairvilupyate |
śārdūlasya guhāṃ śūnyāṃ nīcaḥ kroṣṭābhimarśati || 8 ||
[Analyze grammar]

brāhmaṇasve hṛte corairdharmārthe ca vilopite |
rorūyamāṇe ca mayi kriyatāmastradhāraṇam || 9 ||
[Analyze grammar]

rorūyamāṇasyābhyāśe tasya viprasya pāṇḍavaḥ |
tāni vākyāni śuśrāva kuntīputro dhanaṃjayaḥ || 10 ||
[Analyze grammar]

śrutvā caiva mahābāhurmā bhairityāha taṃ dvijam |
āyudhāni ca yatrāsanpāṇḍavānāṃ mahātmanām |
kṛṣṇayā saha tatrāsīddharmarājo yudhiṣṭhiraḥ || 11 ||
[Analyze grammar]

sa praveśāya cāśakto gamanāya ca pāṇḍavaḥ |
tasya cārtasya tairvākyaiścodyamānaḥ punaḥ punaḥ |
ākrande tatra kaunteyaścintayāmāsa duḥkhitaḥ || 12 ||
[Analyze grammar]

hriyamāṇe dhane tasminbrāhmaṇasya tapasvinaḥ |
aśrupramārjanaṃ tasya kartavyamiti niścitaḥ || 13 ||
[Analyze grammar]

upaprekṣaṇajo'dharmaḥ sumahānsyānmahīpateḥ |
yadyasya rudato dvāri na karomyadya rakṣaṇam || 14 ||
[Analyze grammar]

anāstikyaṃ ca sarveṣāmasmākamapi rakṣaṇe |
pratitiṣṭheta loke'sminnadharmaścaiva no bhavet || 15 ||
[Analyze grammar]

anāpṛcchya ca rājānaṃ gate mayi na saṃśayaḥ |
ajātaśatrornṛpatermama caivāpriyaṃ bhavet || 16 ||
[Analyze grammar]

anupraveśe rājñastu vanavāso bhavenmama |
adharmo vā mahānastu vane vā maraṇaṃ mama |
śarīrasyāpi nāśena dharma eva viśiṣyate || 17 ||
[Analyze grammar]

evaṃ viniścitya tataḥ kuntīputro dhanaṃjayaḥ |
anupraviśya rājānamāpṛcchya ca viśāṃ pate || 18 ||
[Analyze grammar]

dhanurādāya saṃhṛṣṭo brāhmaṇaṃ pratyabhāṣata |
brāhmaṇāgamyatāṃ śīghraṃ yāvatparadhanaiṣiṇaḥ || 19 ||
[Analyze grammar]

na dūre te gatāḥ kṣudrāstāvadgacchāmahe saha |
yāvadāvartayāmyadya corahastāddhanaṃ tava || 20 ||
[Analyze grammar]

so'nusṛtya mahābāhurdhanvī varmī rathī dhvajī |
śarairvidhvaṃsitāṃścorānavajitya ca taddhanam || 21 ||
[Analyze grammar]

brāhmaṇasya upāhṛtya yaśaḥ pītvā ca pāṇḍavaḥ |
ājagāma puraṃ vīraḥ savyasācī paraṃtapaḥ || 22 ||
[Analyze grammar]

so'bhivādya gurūnsarvāṃstaiścāpi pratinanditaḥ |
dharmarājamuvācedaṃ vratamādiśyatāṃ mama || 23 ||
[Analyze grammar]

samayaḥ samatikrānto bhavatsaṃdarśanānmayā |
vanavāsaṃ gamiṣyāmi samayo hyeṣa naḥ kṛtaḥ || 24 ||
[Analyze grammar]

ityukto dharmarājastu sahasā vākyamapriyam |
kathamityabravīdvācā śokārtaḥ sajjamānayā |
yudhiṣṭhiro guḍākeśaṃ bhrātā bhrātaramacyutam || 25 ||
[Analyze grammar]

pramāṇamasmi yadi te mattaḥ śṛṇu vaco'nagha |
anupraveśe yadvīra kṛtavāṃstvaṃ mamāpriyam |
sarvaṃ tadanujānāmi vyalīkaṃ na ca me hṛdi || 26 ||
[Analyze grammar]

guroranupraveśo hi nopaghāto yavīyasaḥ |
yavīyaso'nupraveśo jyeṣṭhasya vidhilopakaḥ || 27 ||
[Analyze grammar]

nivartasva mahābāho kuruṣva vacanaṃ mama |
na hi te dharmalopo'sti na ca me dharṣaṇā kṛtā || 28 ||
[Analyze grammar]

arjuna uvāca |
na vyājena careddharmamiti me bhavataḥ śrutam |
na satyādvicaliṣyāmi satyenāyudhamālabhe || 29 ||
[Analyze grammar]

vaiśaṃpāyana uvāca |
so'bhyanujñāpya rājānaṃ brahmacaryāya dīkṣitaḥ |
vane dvādaśa varṣāṇi vāsāyopajagāma ha || 30 ||
[Analyze grammar]