Chapter 199

drupada uvāca |
evametanmahāprājña yathāttha vidurādya mām |
mamāpi paramo harṣaḥ saṃbandhe'sminkṛte vibho || 1 ||
[Analyze grammar]

gamanaṃ cāpi yuktaṃ syādgṛhameṣāṃ mahātmanām |
na tu tāvanmayā yuktametadvaktuṃ svayaṃ girā || 2 ||
[Analyze grammar]

yadā tu manyate vīraḥ kuntīputro yudhiṣṭhiraḥ |
bhīmasenārjunau caiva yamau ca puruṣarṣabhau || 3 ||
[Analyze grammar]

rāmakṛṣṇau ca dharmajñau tadā gacchantu pāṇḍavāḥ |
etau hi puruṣavyāghrāveṣāṃ priyahite ratau || 4 ||
[Analyze grammar]

yudhiṣṭhira uvāca |
paravanto vayaṃ rājaṃstvayi sarve sahānugāḥ |
yathā vakṣyasi naḥ prītyā kariṣyāmastathā vayam || 5 ||
[Analyze grammar]

vaiśaṃpāyana uvāca |
tato'bravīdvāsudevo gamanaṃ mama rocate |
yathā vā manyate rājā drupadaḥ sarvadharmavit || 6 ||
[Analyze grammar]

drupada uvāca |
yathaiva manyate vīro dāśārhaḥ puruṣottamaḥ |
prāptakālaṃ mahābāhuḥ sā buddhirniścitā mama || 7 ||
[Analyze grammar]

yathaiva hi mahābhāgāḥ kaunteyā mama sāṃpratam |
tathaiva vāsudevasya pāṇḍuputrā na saṃśayaḥ || 8 ||
[Analyze grammar]

na taddhyāyati kaunteyo dharmaputro yudhiṣṭhiraḥ |
yadeṣāṃ puruṣavyāghraḥ śreyo dhyāyati keśavaḥ || 9 ||
[Analyze grammar]

vaiśaṃpāyana uvāca |
tataste samanujñātā drupadena mahātmanā |
pāṇḍavāścaiva kṛṣṇaśca viduraśca mahāmatiḥ || 10 ||
[Analyze grammar]

ādāya draupadīṃ kṛṣṇāṃ kuntīṃ caiva yaśasvinīm |
savihāraṃ sukhaṃ jagmurnagaraṃ nāgasāhvayam || 11 ||
[Analyze grammar]

śrutvā copasthitānvīrāndhṛtarāṣṭro'pi kauravaḥ |
pratigrahāya pāṇḍūnāṃ preṣayāmāsa kauravān || 12 ||
[Analyze grammar]

vikarṇaṃ ca maheṣvāsaṃ citrasenaṃ ca bhārata |
droṇaṃ ca parameṣvāsaṃ gautamaṃ kṛpameva ca || 13 ||
[Analyze grammar]

taiste parivṛtā vīrāḥ śobhamānā mahārathāḥ |
nagaraṃ hāstinapuraṃ śanaiḥ praviviśustadā || 14 ||
[Analyze grammar]

kautūhalena nagaraṃ dīryamāṇamivābhavat |
yatra te puruṣavyāghrāḥ śokaduḥkhavināśanāḥ || 15 ||
[Analyze grammar]

tata uccāvacā vācaḥ priyāḥ priyacikīrṣubhiḥ |
udīritā aśṛṇvaṃste pāṇḍavā hṛdayaṃgamāḥ || 16 ||
[Analyze grammar]

ayaṃ sa puruṣavyāghraḥ punarāyāti dharmavit |
yo naḥ svāniva dāyādāndharmeṇa parirakṣati || 17 ||
[Analyze grammar]

adya pāṇḍurmahārājo vanādiva vanapriyaḥ |
āgataḥ priyamasmākaṃ cikīrṣurnātra saṃśayaḥ || 18 ||
[Analyze grammar]

kiṃ nu nādya kṛtaṃ tāvatsarveṣāṃ naḥ paraṃ priyam |
yannaḥ kuntīsutā vīrā bhartāraḥ punarāgatāḥ || 19 ||
[Analyze grammar]

yadi dattaṃ yadi hutaṃ vidyate yadi nastapaḥ |
tena tiṣṭhantu nagare pāṇḍavāḥ śaradāṃ śatam || 20 ||
[Analyze grammar]

tataste dhṛtarāṣṭrasya bhīṣmasya ca mahātmanaḥ |
anyeṣāṃ ca tadarhāṇāṃ cakruḥ pādābhivandanam || 21 ||
[Analyze grammar]

kṛtvā tu kuśalapraśnaṃ sarveṇa nagareṇa te |
samāviśanta veśmāni dhṛtarāṣṭrasya śāsanāt || 22 ||
[Analyze grammar]

viśrāntāste mahātmānaḥ kaṃcitkālaṃ mahābalāḥ |
āhūtā dhṛtarāṣṭreṇa rājñā śāṃtanavena ca || 23 ||
[Analyze grammar]

dhṛtarāṣṭra uvāca |
bhrātṛbhiḥ saha kaunteya nibodhedaṃ vaco mama |
punarvo vigraho mā bhūtkhāṇḍavaprasthamāviśa || 24 ||
[Analyze grammar]

na ca vo vasatastatra kaścicchaktaḥ prabādhitum |
saṃrakṣyamāṇānpārthena tridaśāniva vajriṇā |
ardhaṃ rājyasya saṃprāpya khāṇḍavaprasthamāviśa || 25 ||
[Analyze grammar]

vaiśaṃpāyana uvāca |
pratigṛhya tu tadvākyaṃ nṛpaṃ sarve praṇamya ca |
pratasthire tato ghoraṃ vanaṃ tanmanujarṣabhāḥ |
ardhaṃ rājyasya saṃprāpya khāṇḍavaprasthamāviśan || 26 ||
[Analyze grammar]

tataste pāṇḍavāstatra gatvā kṛṣṇapurogamāḥ |
maṇḍayāṃ cakrire tadvai puraṃ svargavadacyutāḥ || 27 ||
[Analyze grammar]

tataḥ puṇye śive deśe śāntiṃ kṛtvā mahārathāḥ |
nagaraṃ māpayāmāsurdvaipāyanapurogamāḥ || 28 ||
[Analyze grammar]

sāgarapratirūpābhiḥ parikhābhiralaṃkṛtam |
prākāreṇa ca saṃpannaṃ divamāvṛtya tiṣṭhatā || 29 ||
[Analyze grammar]

pāṇḍurābhraprakāśena himarāśinibhena ca |
śuśubhe tatpuraśreṣṭhaṃ nāgairbhogavatī yathā || 30 ||
[Analyze grammar]

dvipakṣagaruḍaprakhyairdvārairghorapradarśanaiḥ |
guptamabhracayaprakhyairgopurairmandaropamaiḥ || 31 ||
[Analyze grammar]

vividhairatinirviddhaiḥ śastropetaiḥ susaṃvṛtaiḥ |
śaktibhiścāvṛtaṃ taddhi dvijihvairiva pannagaiḥ |
talpaiścābhyāsikairyuktaṃ śuśubhe yodharakṣitam || 32 ||
[Analyze grammar]

tīkṣṇāṅkuśaśataghnībhiryantrajālaiśca śobhitam |
āyasaiśca mahācakraiḥ śuśubhe tatpurottamam || 33 ||
[Analyze grammar]

suvibhaktamahārathyaṃ devatābādhavarjitam |
virocamānaṃ vividhaiḥ pāṇḍurairbhavanottamaiḥ || 34 ||
[Analyze grammar]

tattriviṣṭapasaṃkāśamindraprasthaṃ vyarocata |
meghavṛndamivākāśe vṛddhaṃ vidyutsamāvṛtam || 35 ||
[Analyze grammar]

tatra ramye śubhe deśe kauravyasya niveśanam |
śuśubhe dhanasaṃpūrṇaṃ dhanādhyakṣakṣayopamam || 36 ||
[Analyze grammar]

tatrāgacchandvijā rājansarvavedavidāṃ varāḥ |
nivāsaṃ rocayanti sma sarvabhāṣāvidastathā || 37 ||
[Analyze grammar]

vaṇijaścābhyayustatra deśe digbhyo dhanārthinaḥ |
sarvaśilpavidaścaiva vāsāyābhyāgamaṃstadā || 38 ||
[Analyze grammar]

udyānāni ca ramyāṇi nagarasya samantataḥ |
āmrairāmrātakairnīpairaśokaiścampakaistathā || 39 ||
[Analyze grammar]

puṃnāgairnāgapuṣpaiśca lakucaiḥ panasaistathā |
śālatālakadambaiśca bakulaiśca saketakaiḥ || 40 ||
[Analyze grammar]

manoharaiḥ puṣpitaiśca phalabhārāvanāmitaiḥ |
prācīnāmalakairlodhrairaṅkolaiśca supuṣpitaiḥ || 41 ||
[Analyze grammar]

jambūbhiḥ pāṭalābhiśca kubjakairatimuktakaiḥ |
karavīraiḥ pārijātairanyaiśca vividhairdrumaiḥ || 42 ||
[Analyze grammar]

nityapuṣpaphalopetairnānādvijagaṇāyutam |
mattabarhiṇasaṃghuṣṭaṃ kokilaiśca sadāmadaiḥ || 43 ||
[Analyze grammar]

gṛhairādarśavimalairvividhaiśca latāgṛhaiḥ |
manoharaiścitragṛhaistathā jagatiparvataiḥ |
vāpībhirvividhābhiśca pūrṇābhiḥ paramāmbhasā || 44 ||
[Analyze grammar]

sarobhiratiramyaiśca padmotpalasugandhibhiḥ |
haṃsakāraṇḍavayutaiścakravākopaśobhitaiḥ || 45 ||
[Analyze grammar]

ramyāśca vividhāstatra puṣkariṇyo vanāvṛtāḥ |
taḍāgāni ca ramyāṇi bṛhanti ca mahānti ca || 46 ||
[Analyze grammar]

teṣāṃ puṇyajanopetaṃ rāṣṭramāvasatāṃ mahat |
pāṇḍavānāṃ mahārāja śaśvatprītiravardhata || 47 ||
[Analyze grammar]

tatra bhīṣmeṇa rājñā ca dharmapraṇayane kṛte |
pāṇḍavāḥ samapadyanta khāṇḍavaprasthavāsinaḥ || 48 ||
[Analyze grammar]

pañcabhistairmaheṣvāsairindrakalpaiḥ samanvitam |
śuśubhe tatpuraśreṣṭhaṃ nāgairbhogavatī yathā || 49 ||
[Analyze grammar]

tānniveśya tato vīro rāmeṇa saha keśavaḥ |
yayau dvāravatīṃ rājanpāṇḍavānumate tadā || 50 ||
[Analyze grammar]