Chapter 181

vaiśaṃpāyana uvāca |
ajināni vidhunvantaḥ karakāṃśca dvijarṣabhāḥ |
ūcustaṃ bhīrna kartavyā vayaṃ yotsyāmahe parān || 1 ||
[Analyze grammar]

tānevaṃ vadato viprānarjunaḥ prahasanniva |
uvāca prekṣakā bhūtvā yūyaṃ tiṣṭhata pārśvataḥ || 2 ||
[Analyze grammar]

ahamenānajihmāgraiḥ śataśo vikirañśaraiḥ |
vārayiṣyāmi saṃkruddhānmantrairāśīviṣāniva || 3 ||
[Analyze grammar]

iti taddhanurādāya śulkāvāptaṃ mahārathaḥ |
bhrātrā bhīmena sahitastasthau giririvācalaḥ || 4 ||
[Analyze grammar]

tataḥ karṇamukhānkruddhānkṣatriyāṃstānruṣotthitān |
saṃpetaturabhītau tau gajau pratigajāniva || 5 ||
[Analyze grammar]

ūcuśca vācaḥ paruṣāste rājāno jighāṃsavaḥ |
āhave hi dvijasyāpi vadho dṛṣṭo yuyutsataḥ || 6 ||
[Analyze grammar]

tato vaikartanaḥ karṇo jagāmārjunamojasā |
yuddhārthī vāśitāhetorgajaḥ pratigajaṃ yathā || 7 ||
[Analyze grammar]

bhīmasenaṃ yayau śalyo madrāṇāmīśvaro balī |
duryodhanādayastvanye brāhmaṇaiḥ saha saṃgatāḥ |
mṛdupūrvamayatnena pratyayudhyaṃstadāhave || 8 ||
[Analyze grammar]

tato'rjunaḥ pratyavidhyadāpatantaṃ tribhiḥ śaraiḥ |
karṇaṃ vaikartanaṃ dhīmānvikṛṣya balavaddhanuḥ || 9 ||
[Analyze grammar]

teṣāṃ śarāṇāṃ vegena śitānāṃ tigmatejasām |
vimuhyamāno rādheyo yatnāttamanudhāvati || 10 ||
[Analyze grammar]

tāvubhāvapyanirdeśyau lāghavājjayatāṃ varau |
ayudhyetāṃ susaṃrabdhāvanyonyavijayaiṣiṇau || 11 ||
[Analyze grammar]

kṛte pratikṛtaṃ paśya paśya bāhubalaṃ ca me |
iti śūrārthavacanairābhāṣetāṃ parasparam || 12 ||
[Analyze grammar]

tato'rjunasya bhujayorvīryamapratimaṃ bhuvi |
jñātvā vaikartanaḥ karṇaḥ saṃrabdhaḥ samayodhayat || 13 ||
[Analyze grammar]

arjunena prayuktāṃstānbāṇānvegavatastadā |
pratihatya nanādoccaiḥ sainyāstamabhipūjayan || 14 ||
[Analyze grammar]

karṇa uvāca |
tuṣyāmi te vipramukhya bhujavīryasya saṃyuge |
aviṣādasya caivāsya śastrāstravinayasya ca || 15 ||
[Analyze grammar]

kiṃ tvaṃ sākṣāddhanurvedo rāmo vā viprasattama |
atha sākṣāddharihayaḥ sākṣādvā viṣṇuracyutaḥ || 16 ||
[Analyze grammar]

ātmapracchādanārthaṃ vai bāhuvīryamupāśritaḥ |
viprarūpaṃ vidhāyedaṃ tato māṃ pratiyudhyase || 17 ||
[Analyze grammar]

na hi māmāhave kruddhamanyaḥ sākṣācchacīpateḥ |
pumānyodhayituṃ śaktaḥ pāṇḍavādvā kirīṭinaḥ || 18 ||
[Analyze grammar]

vaiśaṃpāyana uvāca |
tamevaṃvādinaṃ tatra phalgunaḥ pratyabhāṣata |
nāsmi karṇa dhanurvedo nāsmi rāmaḥ pratāpavān |
brāhmaṇo'smi yudhāṃ śreṣṭhaḥ sarvaśastrabhṛtāṃ varaḥ || 19 ||
[Analyze grammar]

brāhme pauraṃdare cāstre niṣṭhito guruśāsanāt |
sthito'smyadya raṇe jetuṃ tvāṃ vīrāvicalo bhava || 20 ||
[Analyze grammar]

evamuktastu rādheyo yuddhātkarṇo nyavartata |
brāhmaṃ tejastadājayyaṃ manyamāno mahārathaḥ || 21 ||
[Analyze grammar]

yuddhaṃ tūpeyatustatra rājañśalyavṛkodarau |
balinau yugapanmattau spardhayā ca balena ca || 22 ||
[Analyze grammar]

anyonyamāhvayantau tau mattāviva mahāgajau |
muṣṭibhirjānubhiścaiva nighnantāvitaretaram |
muhūrtaṃ tau tathānyonyaṃ samare paryakarṣatām || 23 ||
[Analyze grammar]

tato bhīmaḥ samutkṣipya bāhubhyāṃ śalyamāhave |
nyavadhīdbalināṃ śreṣṭho jahasurbrāhmaṇāstataḥ || 24 ||
[Analyze grammar]

tatrāścaryaṃ bhīmasenaścakāra puruṣarṣabhaḥ |
yacchalyaṃ patitaṃ bhūmau nāhanadbalinaṃ balī || 25 ||
[Analyze grammar]

pātite bhīmasenena śalye karṇe ca śaṅkite |
śaṅkitāḥ sarvarājānaḥ parivavrurvṛkodaram || 26 ||
[Analyze grammar]

ūcuśca sahitāstatra sādhvime brāhmaṇarṣabhāḥ |
vijñāyantāṃ kvajanmānaḥ kvanivāsāstathaiva ca || 27 ||
[Analyze grammar]

ko hi rādhāsutaṃ karṇaṃ śakto yodhayituṃ raṇe |
anyatra rāmāddroṇādvā kṛpādvāpi śaradvataḥ || 28 ||
[Analyze grammar]

kṛṣṇādvā devakīputrātphalgunādvā paraṃtapāt |
ko vā duryodhanaṃ śaktaḥ pratiyodhayituṃ raṇe || 29 ||
[Analyze grammar]

tathaiva madrarājānaṃ śalyaṃ balavatāṃ varam |
baladevādṛte vīrātpāṇḍavādvā vṛkodarāt || 30 ||
[Analyze grammar]

kriyatāmavahāro'smādyuddhādbrāhmaṇasaṃyutāt |
athainānupalabhyeha punaryotsyāmahe vayam || 31 ||
[Analyze grammar]

tatkarma bhīmasya samīkṣya kṛṣṇaḥ kuntīsutau tau pariśaṅkamānaḥ |
nivārayāmāsa mahīpatīṃstāndharmeṇa labdhetyanunīya sarvān || 32 ||
[Analyze grammar]

ta evaṃ saṃnivṛttāstu yuddhādyuddhaviśāradāḥ |
yathāvāsaṃ yayuḥ sarve vismitā rājasattamāḥ || 33 ||
[Analyze grammar]

vṛtto brahmottaro raṅgaḥ pāñcālī brāhmaṇairvṛtā |
iti bruvantaḥ prayayurye tatrāsansamāgatāḥ || 34 ||
[Analyze grammar]

brāhmaṇaistu praticchannau rauravājinavāsibhiḥ |
kṛcchreṇa jagmatustatra bhīmasenadhanaṃjayau || 35 ||
[Analyze grammar]

vimuktau janasaṃbādhācchatrubhiḥ parivikṣatau |
kṛṣṇayānugatau tatra nṛvīrau tau virejatuḥ || 36 ||
[Analyze grammar]

teṣāṃ mātā bahuvidhaṃ vināśaṃ paryacintayat |
anāgacchatsu putreṣu bhaikṣakāle'tigacchati || 37 ||
[Analyze grammar]

dhārtarāṣṭrairhatā na syurvijñāya kurupuṃgavāḥ |
māyānvitairvā rakṣobhiḥ sughorairdṛḍhavairibhiḥ || 38 ||
[Analyze grammar]

viparītaṃ mataṃ jātaṃ vyāsasyāpi mahātmanaḥ |
ityevaṃ cintayāmāsa sutasnehānvitā pṛthā || 39 ||
[Analyze grammar]

mahatyathāparāhṇe tu ghanaiḥ sūrya ivāvṛtaḥ |
brāhmaṇaiḥ prāviśattatra jiṣṇurbrahmapuraskṛtaḥ || 40 ||
[Analyze grammar]