Chapter 160

arjuna uvāca |
tāpatya iti yadvākyamuktavānasi māmiha |
tadahaṃ jñātumicchāmi tāpatyārthaviniścayam || 1 ||
[Analyze grammar]

tapatī nāma kā caiṣā tāpatyā yatkṛte vayam |
kaunteyā hi vayaṃ sādho tattvamicchāmi veditum || 2 ||
[Analyze grammar]

vaiśaṃpāyana uvāca |
evamuktaḥ sa gandharvaḥ kuntīputraṃ dhanaṃjayam |
viśrutāṃ triṣu lokeṣu śrāvayāmāsa vai kathām || 3 ||
[Analyze grammar]

gandharva uvāca |
hanta te kathayiṣyāmi kathāmetāṃ manoramām |
yathāvadakhilāṃ pārtha dharmyāṃ dharmabhṛtāṃ vara || 4 ||
[Analyze grammar]

uktavānasmi yena tvāṃ tāpatya iti yadvacaḥ |
tatte'haṃ kathayiṣyāmi śṛṇuṣvaikamanā mama || 5 ||
[Analyze grammar]

ya eṣa divi dhiṣṇyena nākaṃ vyāpnoti tejasā |
etasya tapatī nāma babhūvāsadṛśī sutā || 6 ||
[Analyze grammar]

vivasvato vai kaunteya sāvitryavarajā vibho |
viśrutā triṣu lokeṣu tapatī tapasā yutā || 7 ||
[Analyze grammar]

na devī nāsurī caiva na yakṣī na ca rākṣasī |
nāpsarā na ca gandharvī tathārūpeṇa kācana || 8 ||
[Analyze grammar]

suvibhaktānavadyāṅgī svasitāyatalocanā |
svācārā caiva sādhvī ca suveṣā caiva bhāminī || 9 ||
[Analyze grammar]

na tasyāḥ sadṛśaṃ kaṃcittriṣu lokeṣu bhārata |
bhartāraṃ savitā mene rūpaśīlakulaśrutaiḥ || 10 ||
[Analyze grammar]

saṃprāptayauvanāṃ paśyandeyāṃ duhitaraṃ tu tām |
nopalebhe tataḥ śāntiṃ saṃpradānaṃ vicintayan || 11 ||
[Analyze grammar]

artharkṣaputraḥ kaunteya kurūṇāmṛṣabho balī |
sūryamārādhayāmāsa nṛpaḥ saṃvaraṇaḥ sadā || 12 ||
[Analyze grammar]

arghyamālyopahāraiśca śaśvacca nṛpatiryataḥ |
niyamairupavāsaiśca tapobhirvividhairapi || 13 ||
[Analyze grammar]

śuśrūṣuranahaṃvādī śuciḥ pauravanandanaḥ |
aṃśumantaṃ samudyantaṃ pūjayāmāsa bhaktimān || 14 ||
[Analyze grammar]

tataḥ kṛtajñaṃ dharmajñaṃ rūpeṇāsadṛśaṃ bhuvi |
tapatyāḥ sadṛśaṃ mene sūryaḥ saṃvaraṇaṃ patim || 15 ||
[Analyze grammar]

dātumaicchattataḥ kanyāṃ tasmai saṃvaraṇāya tām |
nṛpottamāya kauravya viśrutābhijanāya vai || 16 ||
[Analyze grammar]

yathā hi divi dīptāṃśuḥ prabhāsayati tejasā |
tathā bhuvi mahīpālo dīptyā saṃvaraṇo'bhavat || 17 ||
[Analyze grammar]

yathārcayanti cādityamudyantaṃ brahmavādinaḥ |
tathā saṃvaraṇaṃ pārtha brāhmaṇāvarajāḥ prajāḥ || 18 ||
[Analyze grammar]

sa somamati kāntatvādādityamati tejasā |
babhūva nṛpatiḥ śrīmānsuhṛdāṃ durhṛdāmapi || 19 ||
[Analyze grammar]

evaṃguṇasya nṛpatestathāvṛttasya kaurava |
tasmai dātuṃ manaścakre tapatīṃ tapanaḥ svayam || 20 ||
[Analyze grammar]

sa kadācidatho rājā śrīmānuruyaśā bhuvi |
cacāra mṛgayāṃ pārtha parvatopavane kila || 21 ||
[Analyze grammar]

carato mṛgayāṃ tasya kṣutpipāsāśramānvitaḥ |
mamāra rājñaḥ kaunteya girāvapratimo hayaḥ || 22 ||
[Analyze grammar]

sa mṛtāśvaścaranpārtha padbhyāmeva girau nṛpaḥ |
dadarśāsadṛśīṃ loke kanyāmāyatalocanām || 23 ||
[Analyze grammar]

sa eka ekāmāsādya kanyāṃ tāmarimardanaḥ |
tasthau nṛpatiśārdūlaḥ paśyannavicalekṣaṇaḥ || 24 ||
[Analyze grammar]

sa hi tāṃ tarkayāmāsa rūpato nṛpatiḥ śriyam |
punaḥ saṃtarkayāmāsa raverbhraṣṭāmiva prabhām || 25 ||
[Analyze grammar]

giriprasthe tu sā yasminsthitā svasitalocanā |
sa savṛkṣakṣupalato hiraṇmaya ivābhavat || 26 ||
[Analyze grammar]

avamene ca tāṃ dṛṣṭvā sarvaprāṇabhṛtāṃ vapuḥ |
avāptaṃ cātmano mene sa rājā cakṣuṣaḥ phalam || 27 ||
[Analyze grammar]

janmaprabhṛti yatkiṃciddṛṣṭavānsa mahīpatiḥ |
rūpaṃ na sadṛśaṃ tasyāstarkayāmāsa kiṃcana || 28 ||
[Analyze grammar]

tayā baddhamanaścakṣuḥ pāśairguṇamayaistadā |
na cacāla tato deśādbubudhe na ca kiṃcana || 29 ||
[Analyze grammar]

asyā nūnaṃ viśālākṣyāḥ sadevāsuramānuṣam |
lokaṃ nirmathya dhātredaṃ rūpamāviṣkṛtaṃ kṛtam || 30 ||
[Analyze grammar]

evaṃ sa tarkayāmāsa rūpadraviṇasaṃpadā |
kanyāmasadṛśīṃ loke nṛpaḥ saṃvaraṇastadā || 31 ||
[Analyze grammar]

tāṃ ca dṛṣṭvaiva kalyāṇīṃ kalyāṇābhijano nṛpaḥ |
jagāma manasā cintāṃ kāmamārgaṇapīḍitaḥ || 32 ||
[Analyze grammar]

dahyamānaḥ sa tīvreṇa nṛpatirmanmathāgninā |
apragalbhāṃ pragalbhaḥ sa tāmuvāca yaśasvinīm || 33 ||
[Analyze grammar]

kāsi kasyāsi rambhoru kimarthaṃ ceha tiṣṭhasi |
kathaṃ ca nirjane'raṇye carasyekā śucismite || 34 ||
[Analyze grammar]

tvaṃ hi sarvānavadyāṅgī sarvābharaṇabhūṣitā |
vibhūṣaṇamivaiteṣāṃ bhūṣaṇānāmabhīpsitam || 35 ||
[Analyze grammar]

na devīṃ nāsurīṃ caiva na yakṣīṃ na ca rākṣasīm |
na ca bhogavatīṃ manye na gandharvīṃ na mānuṣīm || 36 ||
[Analyze grammar]

yā hi dṛṣṭā mayā kāścicchrutā vāpi varāṅganāḥ |
na tāsāṃ sadṛśīṃ manye tvāmahaṃ mattakāśini || 37 ||
[Analyze grammar]

evaṃ tāṃ sa mahīpālo babhāṣe na tu sā tadā |
kāmārtaṃ nirjane'raṇye pratyabhāṣata kiṃcana || 38 ||
[Analyze grammar]

tato lālapyamānasya pārthivasyāyatekṣaṇā |
saudāminīva sābhreṣu tatraivāntaradhīyata || 39 ||
[Analyze grammar]

tāmanvicchansa nṛpatiḥ paricakrāma tattadā |
vanaṃ vanajapatrākṣīṃ bhramannunmattavattadā || 40 ||
[Analyze grammar]

apaśyamānaḥ sa tu tāṃ bahu tatra vilapya ca |
niśceṣṭaḥ kauravaśreṣṭho muhūrtaṃ sa vyatiṣṭhata || 41 ||
[Analyze grammar]